.jpg)
លោក ហ៊ុន សែន និង លោក អង់តូនីញ៉ូ។ រូបថត SPM និង AFP
ភ្នំពេញៈ លោកនាយករដ្ឋមន្ត្រី ហ៊ុន សែន ឆ្លើយតបលិខិតរំលែកទុក្ខរបស់អគ្គលេខាធិការអង្គការសហប្រជាជាតិ (អសប) លោក អង់តូនីញ៉ូ ហ្គុយតឺរេស ដែលបានចូលរួមរំលែកទុក្ខចំពោះគ្រួសារសព និងរាជរដ្ឋាភិបាលកម្ពុជាចំពោះមរណភាពរបស់នាយទាហានជាន់ខ្ពស់លោក ស សាវី ដោយសារជំងឺកូវីដ ១៩ នៅប្រទេសម៉ាលី។ លោកថា កម្ពុជាប្តេជ្ញាបន្តសកម្មភាពមនុស្សធម៌ និងរក្សាសន្តិភាពក្នុងពិភពលោក។
លិខិតចុះថ្ងៃទី ២៤ មិថុនា ឆ្លើយតបទៅលោក អង់តូនីញ៉ូ លោក ហ៊ុន សែន សរសេរថា លោកបានទទួលរួចហើយនូវលិខិតរំលែកទុក្ខរបស់លោកអគ្គលេខាធិការអង្គការសហប្រជាជាតិចុះថ្ងៃទី ១២ មិថុនា ឆ្នាំ ២០២០ អំពីការបាត់បង់ដ៏សោកសង្រេងរបស់នាយទាហានជាន់ខ្ពស់ ស សាវី ដែលជាកម្លាំងគាំទ្រថ្នាក់ជាតិកម្ពុជាក្នុងបេសកកម្មរក្សាស្ថិរភាពចម្រុះនៅសាធារណរដ្ឋម៉ាលី (MINUSMA) ដោយសារជំងឺកូវីដ ១៩។
លោកថា សេចក្តីក្លាហាន និងពលិកម្មរបស់នាយទាហានរូបនេះនឹងត្រូវបានចងចាំជាមួយការគោរពបំផុត និងការទទួលស្គាល់ទាំងជាតិ និងអន្តរជាតិ។
លោក ហ៊ុន សែន បញ្ជាក់ថា៖ «ទន្ទឹមនឹងការត្រៀមខ្លួនរួចជាស្រេចធ្វើការយ៉ាងជិតស្និទ្ធជាមួយអង្គការសហប្រជាជាតិ ដើម្បីចាត់វិធានការបន្ថែមក្នុងការឆ្លើយតបនឹងការរាតត្បាតនៃជំងឺកូវីដ១៩ រាជរដ្ឋាភិបាលកម្ពុជាសម្តែងសាជាថ្មីនូវការប្តេជ្ញារបស់ខ្លួនក្នុងការបន្តសកម្មភាពមនុស្សធម៌ ព្រមទាំងការកសាង និងការរក្សាសន្តិភាពនៅក្នុងពិភពលោក»។
លោកនាយករដ្ឋមន្ត្រីបន្តថា តាងនាមឱ្យរាជរដ្ឋាភិបាលកម្ពុជា និងប្រជាពលរដ្ឋកម្ពុជា ក៏ដូចជាក្រុមគ្រួសារនៃសព លោកថ្លែងអំណរគុណចំពោះទឹកចិត្តរបស់លោក អង់តូនីញ៉ូ ហ្គុយតឺរេស (Anto''nio Guterres)។
កាលពីថ្ងៃទី ១២ មិថុនា លោក Anto''nio Guterres បានសរសេរលិខិតរំលែកទុក្ខមកកាន់លោក ហ៊ុន សែន ចំពោះមរណភាពរបស់លោក ស សាវី។
ក្នុងលិខិតនោះលោក អង់តូនីញ៉ូ សរសេរថា៖ «ខ្ញុំបានទទួលដំណឹងដ៏ក្រៀមក្រំបំផុតចំពោះមរណភាពរបស់កម្លាំងគាំទ្រថ្នាក់ជាតិកម្ពុជានៃបេសកកម្មរក្សាស្ថិរភាពចម្រុះនៅសាធារណរដ្ឋម៉ាលី (MINUSMA) ក្នុងទីក្រុងហ្គាវ (GAO) កាលពីថ្ងៃទី ២៩ ឧសភា ឆ្នាំ ២០២០ កន្លងមក។ ក្នុងឱកាសដ៏សោកសៅនេះ ខ្ញុំសូមចូលរួមរំលែកទុក្ខដោយស្មោះអស់ពីដួងចិត្តចំពោះក្រុមគ្រួសារនៃសព និងរាជរដ្ឋាភិបាលកម្ពុជាលើការបាត់បង់ជីវិតដ៏សោកសង្រេងនេះ»។
លោកក៏បានថ្លែងកោតសរសើរចំពោះការចូលរួមចំណែកដែលបានធ្វើឡើងដោយជនរួមជាតិរបស់លោក ហ៊ុន សែន ដល់កិច្ចការងាររក្សាសន្តិភាពនៅប្រទេសម៉ាលី។ លោកអះអាងចំពោះលោក ហ៊ុន សែន ថា អ.ស.ប. ក្នុងកិច្ចសហប្រតិបត្តិការជាមួយបណ្តារដ្ឋាភិបាលនៃប្រទេសម្ចាស់ផ្ទះ ប្តេជ្ញាពង្រឹងកិច្ចខិតខំថែមទៀតក្នុងការកាត់បន្ថយផលប៉ះពាល់ និងទប់ស្កាត់ការរីករាលដាលនៃជំងឺកូវីដ ១៩ លើបេសកកម្មរក្សាសន្តិភាពរបស់កម្ពុជា និង អ.ស.ប.។
លោកបន្ថែមថា៖ «ស្របពេលនៃការចាត់វិធានការក្នុងការធានាសុវត្ថិភាព និងសន្តិសុខរបស់កងកម្លាំងរក្សាសន្តិភាព និងបុគ្គលិកដទៃទៀត បេសកកម្មនានារបស់យើងនឹងខិតខំបន្តផ្តល់អាណត្តិរបស់ពួកគេ»។
លោក អង់តូនីញ៉ូ ក៏បានថ្លែងអំណរគុណចំពោះការគាំទ្ររបស់លោក ហ៊ុន សែន ដល់ អ.ស.ប. និងជាពិសេសដល់ប្រតិបត្តិការរក្សាសន្តិភាព។
លោក ស សាវី អាយុ ៦៣ ឆ្នាំ ជានាយទាហានថ្នាក់ជាតិ និងជាយោធិនរបស់កម្ពុជាដែលបានចូលរួមក្នុងបេសកកម្មការងារមនុស្សធម៌ក្រោមឆត្រ អ.ស.ប. នៅប្រទេសម៉ាលីទទួលមរណភាពកាលពីថ្ងៃទី ២៩ ឧសភា ដោយសារការឆ្លងជំងឺកូវីដ ១៩។
លោក ស សាវី បានដឹកនាំកងអនុសេនាធំកម្ទេចគ្រាប់មិនទាន់ផ្ទុះលេខ ២៣១ ទៅបំពេញបេសកកម្មនៅប្រទេសម៉ាលីកាលពីខែមេសា ឆ្នាំមុន ហើយត្រូវបញ្ចប់បេសកកម្មវិលត្រឡប់មកប្រទេសកម្ពុជាវិញនៅខែមេសាឆ្នាំនេះ។ ប៉ុន្តែការវិលត្រឡប់ត្រូវបានពន្យារពេល ដោយសារការរីករាលដាលនៃជំងឺកូវីដ ១៩ ហើយលោកក៏ទទួលមរណភាពនៅទីនោះ៕
