កណ្ដាលៈ លោកនាយករដ្ឋមន្ត្រី ហ៊ុន សែន បានជំរុញឱ្យក្រសួងសុខាភិបាល ចេញសេចក្ដីណែនាំ ស្ដីពីវិធានការទប់ស្កាត់ការឆ្លងជំងឺកូវីដ១៩ ក្នុងពេលបុណ្យអុំទូក ដែលនឹងប្រារព្ធធ្វើនៅចុងខែតុលានេះ បើទោះបីជាពិធីបុណ្យនេះ មិនប្រារព្ធធ្វើនៅភ្នំពេញដូចរៀងរាល់ឆ្នាំក្តី ដើម្បីការពារការរីករាលដាលនៅក្នុងសហគមន៍។
ក្នុងពិធីសម្ពោធដាក់ឱ្យប្រើប្រាស់ មជ្ឈមណ្ឌលកម្សាន្ត ព្រីនស៍ ម៉ាណ័រ ខ្នាតយក្សដំបូងបំផុតនៅកម្ពុជាក្នុងស្រុកកៀនស្វាយ ខេត្តកណ្តាល កាលពីព្រឹកថ្ងៃទី ៧ ខែតុលា ឆ្នាំ ២០២០ លោក ហ៊ុន សែន បានថ្លែងថា ដោយសារជំងឺកូវីដ១៩ រាជរដ្ឋាភិបាលបានសម្រេចមិនរៀបចំប្រារព្ធពិធីជួបជុំបុណ្យអុំទូកក្នុងរាជធានីភ្នំពេញនោះទេនៅក្នុងឆ្នាំនេះ។ តែពិធីអកអំបុក សំពះព្រះខែ នឹងនៅតែធ្វើធម្មតា តាមផ្ទះ តាមវត្តអារាម ហើយនៅតាមបណ្តាខេត្តមួយចំនួន គេអាចរៀបចំពិធីបុណ្យអុំទូក ដែលអ្នកស្រុកតែងធ្វើកន្លងមក។ ដូច្នេះក្រសួងសុខាភិបាលត្រូវរៀបចំវិធានការណែនាំ ដើម្បីបង្ការ និងទប់ស្កាត់ការឆ្លងរាលដាលជំងឺកូវីដ១៩។
លោកថ្លែងថា៖ «ជំងឺកូវីដមិនភ្លេចយើងទេ ហើយយើងក៏មិនដឹងថាវាសំងំលាក់ខ្លួននៅកន្លែងណាដែរ។ កន្លងមកនៅប្រទេសមួយចំនួនមានគ្រូពេទ្យជាច្រើននាក់បានស្លាប់ដោយសារការឆ្លងមេរោគកូវីដ១៩ពីអ្នកជំងឺ។ យើងត្រូវមានវិធានការការពារ និងខិតខំធ្វើយ៉ាងណាកុំឱ្យកម្ពុជាមានការឆ្លងជំងឺកូវីដ១៩នៅក្នុងសហគមន៍»។
លោកនាយករដ្ឋមន្ត្រីក៏បានជំរុញឱ្យក្រសួងសុខាភិបាលពិនិត្យអំពីលទ្ធភាពនៃការប្រើប្រាស់ និង ទិញបញ្ចូលនូវឧបករណ៍ និងសម្ភារវេជ្ជសាស្ត្រសម្រាប់ការទប់ស្កាត់ការឆ្លងជំងឺកូវីដ-១៩ នៅក្នុងស្តុកផងដែរ ដែលក្នុងនោះត្រូវពិនិត្យអំពីគុណភាព និង កាលបរិច្ឆេទឱ្យបានច្បាស់លាស់ ចៀសវាងទុកនៅក្នុងស្តុកយូរពេក នាំឱ្យខូចខាតមិនអាចប្រើប្រាស់បាន ជាពិសេស ម៉ាស់ និងខោអាវសម្រាប់គ្រូពេទ្យ និងភ្នាក់ងារសុខាភិបាលដែលធ្វើកិច្ចការផ្ទាល់នៅក្នុងការប្រយុទ្ធប្រឆាំងនឹងជំងឺកូវីដ១៩នេះដោយផ្ទាល់។
លោកបញ្ជាក់ថា៖ «យើងត្រូវពិនិត្យមើលស្តុកយុទ្ធសាស្ត្ររបស់យើង។ អ្វីដែលគួរត្រូវបញ្ចេញមកប្រើប្រាស់ គឺត្រូវបញ្ចេញ ហើយអ្វីដែលត្រូវទិញបន្ថែមដើម្បីដាក់បញ្ចូលនៅក្នុងស្តុក ទាំងថ្នាំព្យាបាល ម៉ាស់ និងខោអាវពេទ្យគឺត្រូវទិញចូល»។
ក្រោយពីមានការប្រកាសជំរុញឱ្យមានការដាក់ចេញនូវយុទ្ធសាស្ត្រ និងការណែនាំអំពីវិធានការ ការពារ និងទប់ស្កាត់ការឆ្លងរាលដាលនៃជំងឺកូវីដ-១៩ លោក ម៉ម ប៊ុនហេង រដ្ឋមន្ត្រីក្រសួងសុខាភិបាលនៅថ្ងៃទី ៧ ខែតុលា ឆ្នាំ ២០២០ បានចេញសេចក្ដីណែនាំបន្ទាន់មួយស្ដីពីការពង្រឹងការធ្វើចត្តាឡីស័កនៅតាមផ្ទះ និងតាមមណ្ឌលចត្តាឡីស័កឱ្យបានហ្មត់ចត់ ដើម្បីចូលរួមការពារការចម្លងវីរុសកូវីដ-១៩ ចូលក្នុងសហគមន៍ ពីព្រោះប្រទេសកម្ពុជានៅតែមានហានិភ័យនៃការចម្លងជំងឺកូវីដ១៩ គ្រប់ពេលវេលានៅឡើយ។
ដើម្បីចូលរួមបន្តទប់ស្កាត់ការចម្លងជំងឺកូវីដ១៩ ចូលក្នុងសហគមន៍ ការពង្រឹងការធ្វើចត្តាឡីស័កចំនួន ១៤ ថ្ងៃ ឬការដាក់ខ្លួនឱ្យនៅដាច់ដោយឡែកពីគេ នៅតែជាវិធានការចម្បងបំផុតមួយក្នុងចំណោមវិធានការមួយចំនួនទៀត។ បុគ្គលដែលត្រូវធ្វើចត្តាឡីស័កចំនួន ១៤ ថ្ងៃនៅតាមផ្ទះ និងនៅតាមមណ្ឌលនានា គឺ តម្រូវឱ្យមានការចូលរួមឱ្យបានត្រឹមត្រូវ និងម៉ឺងម៉ាត់បំផុត តាមការណែនាំរបស់ក្រសួងសុខាភិបាល និងមានការគ្រប់គ្រងពីអាជ្ញាធរមានសមត្ថកិច្ចនៅតាមមូលដ្ឋាននៅទូទាំងប្រទេស បន្ទាប់ពីទទួលបានលទ្ធផលតេស្តលើកទី ១ អវិជ្ជមានវីរុសកូវីដ១៩។ ការមិនគោរពបានត្រឹមត្រូវតាមការណែនាំរបស់ក្រសួងសុខាភិបាល ដូចជាការធ្វើដំណើរចល័តរបស់បុគ្គលពីកន្លែងមួយទៅកន្លែងមួយ ឬទៅប៉ះពាល់ជាមួយអ្នកដទៃទៀត ក្នុងអំឡុងពេលធ្វើចត្តាឡីស័ក ឬនៅដាច់ដោយឡែកនេះនឹងអាចជាហេតុនាំឱ្យមានការចម្លងជំងឺកូវីដ១៩ពីបុគ្គលម្នាក់ទៅម្នាក់ បង្កើតឱកាសចម្លងទៅអ្នកផ្សេងទៀត និងក៏អាចជាឱកាសនាំឱ្យមានការចម្លងទៅក្នុងសហគមន៍ផងដែរបើបុគ្គលនោះមានផ្ទុកវីរុសកូវីដ១៩។
ជាមួយគ្នានេះក្រសួងសុខាភិបាលក៏បានអំពាវនាវសាជាថ្មីដល់សាធារណជន ក៏ដូចជាក្រសួងពាក់ព័ន្ធ អាជ្ញាធរថ្នាក់ក្រោមជាតិ និងអាជ្ញាធរមានសមត្ថកិច្ចនៅតាមមូលដ្ឋានទាំងអស់ «ចូលរួមទប់ស្កាត់ការចម្លងវីរុសកូវីដ-១៩ កុំឱ្យមានឆ្លងចូលទៅក្នុងសហគមន៍» ដោយក្នុងនោះ អាជ្ញាធរថ្នាក់ក្រោមជាតិត្រូវបន្តធ្វើឱ្យសកម្មនូវការអប់រំប្រជាជនអំពីវិធានការការពារ និងភាពចាំបាច់នៃការធ្វើចត្តាឡីស័ក ឬការដាក់ខ្លួនឱ្យនៅដាច់ដោយឡែក៕
វីដេអូ៖