ភ្នំពេញៈ ដំណើរទស្សនកិច្ចផ្លូវការរបស់នាយករដ្ឋមន្ត្រីកម្ពុជា លោក ហ៊ុន សែន បានចាប់ផ្តើមហើយនៅទីក្រុងស៊ីដនី ប្រទេសអូស្ត្រាលី ជាកន្លែងដែលលោកនឹងត្រូវចូលរួមកិច្ចប្រជុំអាស៊ាន អូស្ត្រាលីផងដែរ ជាមួយនឹងការស្វាគមន៍ដ៏កក់ក្តៅពីសំណាក់ក្រុមប្រជាពលរដ្ឋគាំទ្រគណបក្សប្រជាជនកម្ពុជា ក៏ដូចជារដ្ឋាភិបាល និង ក្រុមអ្នកតវ៉ាលើកបដាប្រឆាំងនឹងវត្តមានរបស់លោក ។
លោកនាយករដ្ឋមន្ត្រីហ៊ុន សែន បានប្រាប់អ្នកគាំទ្ររបស់លោកក្រោយជំនួបទ្វេភាគី ជាមួយលោកនាយករដ្ឋមន្ត្រី អូស្ត្រាលី លោក Marlcom Turnbull ថា អូស្ត្រាលីសន្យាបន្តជួយដល់កម្ពុជា។
លោកបានថ្លែងថា ៖ « អំបាញ់មិញនេះ ជួបជាមួយ នាយករដ្ឋមន្ត្រី អូស្ត្រាលី គេផ្តល់ជំនួយឲ្យយើង ៧៨ លានដុល្លារ» នៅឆ្នាំ ២០១៨ នេះ ដោយបន្តបញ្ជាក់ប្រាប់អ្នកគាំទ្រថា មានជំនួយជាច្រើនទៀត អូស្ត្រាលី នឹងផ្តល់មកកម្ពុជា ផងដែរ។
ក្នុងទំព័រហ្វេសប៊ុក លោក ហ៊ុន សែន បានសរសេរថា លោកនាយករដ្ឋមន្រ្តីអូស្រ្តាលីបានចាត់ទុកថាជាកិច្ចប្រជុំដ៏មានផ្លែផ្កាវិជ្ជមាន ពីព្រោះលោកមានឱកាសបានស្តាប់ប្រសាសន៍ លោក ហ៊ុន សែន ដោយផ្ទាល់។ ចំណែក នាយករដ្ឋមន្ត្រីកម្ពុជា ក៏បានបញ្ជាក់ផងដែរថា «កម្ពុជានឹងខិតខំរៀបចំការបោះឆ្នោតអោយបានល្អត្រឹមត្រូវទៅតាមកាលកំណត់»។
ទោះបីជាយ៉ាងណា ក្រុមអ្នកប្រឆាំងនាយករដ្ឋមន្ត្រី បាននាំគ្នាលើកបដា ដោយមានពាក្យស្លោកនានា ក្នុងនោះ មានការជម្រុញឲ្យ «ដោះលែង កឹម សុខា» ដែលជាអតីតប្រធានបក្សប្រឆាំង និងត្រូវឃុំខ្លួននៅក្នុងពន្ធនាគារត្រពាំងផ្លុង ខេត្តត្បូងឃ្មុំ ក្បែរព្រំដែនប្រទេសវៀតណាម។
ព្រះសង្ឃមួយអង្គ ដែលនិមន្តចូលរួមក្នុងការតវ៉ាប្រឆាំងនឹងដំណើរទស្សនកិច្ចលោក ហ៊ុន សែន មានសង្ឃដីកាប្រឆាំងនយោបាយលោកនាយករដ្ឋមន្ត្រី និងទាមទារឲ្យបញ្ឈប់ការធ្វើទុកបុកម្នេញអ្នកនយោបាយ និង ប្រជាពលរដ្ឋរស់នៅក្រោមរបបរបស់លោក។
ព្រះសង្ឃ មានដីកាថា ៖ «(លោក) ហ៊ុន សែន តែងយកពលរដ្ឋធ្វើជាចំណាប់ខ្មាំង ...ប្រើហិង្សា សម្តីញុះញង់ បើមិនជាប់ឆ្នោត ថាគេមិនកសាងអ្វីទាំងអស់នៅកម្ពុជា នេះជាសម្តីហ៊ុនសែន មុនពេលបោះ ឆ្នោត»។
មានការតវ៉ាទាមទារឲ្យដោះលែងលោក កឹម សុខា និងទាមទារឲ្យកម្ពុជា អនុញ្ញាតឲ្យ គណបក្សសង្គ្រោះជាតិ ដែលបានរំលាយចោលទៅហើយនោះ បានចូលរួមប្រកួតប្រជែងការបោះឆ្នោតឡើងវិញផងដែរ៕