ភ្នំពេញ៖ នៅថ្ងៃទី ២៣ មេសា ២០២១ នេះ លោកនាយករដ្ឋមន្ត្រី ហ៊ុន សែន បានដឹកនាំគណៈប្រតិភូជាន់ខ្ពស់រាជរដ្ឋាភិបាល តាមជើងយន្តហោះកម្ពុជាពិសេស ឆ្ពោះទៅកាន់ទីក្រុងហ្សាការតា សាធារណរដ្ឋឥណ្ឌូនេស៊ី ដើម្បីចូលរួមកិច្ចប្រជុំកំពូលអាស៊ានពិសេសរយៈពេល ១ ថ្ងៃ នៅថ្ងៃទី ២៤ មេសាស្អែកនេះ។
បើតាមសារដែលត្រូវបានបង្ហោះនៅលើហ្វេសប៊ុករបស់លោក ហ៊ុន សែន បានសរសេរថា មេដឹកនាំអាស៊ានភាគច្រើននឹងទៅដល់ទីក្រុងហ្សាការតានៅរសៀលនេះ។
តាមកម្មវិធីគ្រោងទុកនៅថ្ងៃទី ២៤ ខែ មេសា ឆ្នាំ ២០២១ លោក ហ៊ុន សែន នឹងចូលរួមកិច្ចប្រជុំក្រៅផ្លូវការរបស់មេដឹកនាំអាស៊ាន និងជំនួបមួយចំនួនជាមួយបណ្ដាមេដឹកនាំអាស៊ានផ្សេងទៀត។
ក្រោយពីចប់កិច្ចប្រជុំពេញមួយថ្ងៃហើយ លោក ហ៊ុន សែន នឹងវិលត្រឡប់មកកម្ពុជាវិញនៅល្ងាចថ្ងែទី ២៤ មេសា ដដែលនេះ។
លោក ហ៊ុន សែន បានមានប្រសាសន៍នៅក្នុងសារនេះថា៖ «ពេលមកដល់កម្ពុជាភ្លាម ខ្ញុំ និងគណៈប្រតិភូ នឹងផ្ដល់សំណាកដើម្បីពិនិត្យកូវីដ ១៩ នៅអាកាសយានដ្ឋានអន្តរជាតិភ្នំពេញតែម្ដង ដើម្បីធានាសុវត្ថិភាពសុខភាពទាំងអស់គ្នា»។
ជាមួយគ្នានេះ លោកនាយករដ្ឋមន្ត្រីបានអរគុណដល់អាជ្ញាធរ សមត្ថកិច្ច និងកងកម្លាំងប្រដាប់អាវុធ ដែលបានយកចិត្តទុកដាក់ក្នុងការអនុវត្តវិធានការការពារកូវីដ ១៩ ដើម្បីថែរក្សាការពារអាយុជីវិតប្រជាពលរដ្ឋ ព្រមទាំងការផ្គត់ផ្គង់ស្បៀងអាហារជូនប្រជាពលរដ្ឋបានទាន់ពេលវេលា។
លើសពីនេះ លោក ហ៊ុន សែន ក៏បានអរគុណដល់សប្បុរសជនទាំងអស់ផងដែរ ដែលបានចូលរួមជាមួយរាជរដ្ឋាភិបាល និងចូលរួមឧបត្ថម្ភដោយផ្ទាល់ដល់ប្រជាពលរដ្ឋដែលកំពុងត្រូវការជំនួយស្បៀងអាហារ។
លោកបានផ្តាំផ្ញើទៀតថា៖ «សូមបងប្អូនបន្តរស់នៅក្នុងផ្ទះ និងអនុវត្តវិធានការការពារកូវីដ ១៩ ឱ្យបានខ្ជាប់ខ្ជួនបំផុតតាមការណែនាំរបស់ក្រសួងសុខាភិបាល និងរាជរដ្ឋាភិបាល»៕
