ភ្នំពេញៈ រាជរដ្ឋាភិបាលកម្ពុជា និងក្រសួងពាក់ព័ន្ធបានដាក់ចេញនូវវិធានការជាច្រើនទៀត ដើម្បីទប់ស្កាត់ការរីករាលដាលនៃជំងឺកូវីដ ១៩ ខណៈដែលកម្ពុជារកឃើញអ្នកមានផ្ទុកមេរោគនេះជាបន្តបន្ទាប់។
កាលពីព្រលប់ថ្ងៃអាទិត្យលោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានចេញសារាចរណែនាំស្ដីពីវិធានការបង្ការ និងទប់ស្កាត់ការរាតត្បាតនៃជំងឺនេះ ដោយលើកឡើងនូវវិធានការ ៤ ចំណុចរួមមានការតម្រូវឲ្យអាជ្ញាធរណែនាំដល់ប្រជាពលរដ្ឋទាំងអស់សូមកុំធ្វើដំណើរទៅកាន់បណ្ដាប្រទេសនៅអឺរ៉ុប សហរដ្ឋអាមេរិក និងអ៊ីរ៉ង់ ប្រសិនបើមិនមានការចាំបាច់បំផុតដែលខានពុំបាន។
លោកបានប្រាប់ឲ្យគ្រប់ក្រសួងស្ថាប័នរដ្ឋទាំងអស់ទាំងនៅថ្នាក់ជាតិ និងថ្នាក់ក្រោមជាតិមិនត្រូវអនុញ្ញាតឲ្យមន្ត្រីរាជការបុគ្គលិកគ្រប់លំដាប់ថ្នាក់ធ្វើដំណើរចូលរួមកិច្ចប្រជុំគ្រប់ប្រភេទទៅកាន់បណ្ដាប្រទេសនៅអឺរ៉ុប សហរដ្ឋអាមេរិក និងអ៊ីរ៉ង់ឡើយ។ ក្នុងករណីចាំបាច់ខានមិនបានក្រសួងស្ថាប័នពាក់ព័ន្ធនីមួយៗត្រូវធ្វើដំណើរទៅកាន់ក្រសួងការបរទេស និងសហប្រតិបត្តិការអន្តរជាតិ ដើម្បីចាត់តំណាងស្ថានទូតប្រចាំនៅប្រទេសម្ចាស់ផ្ទះនៃការប្រជុំឲ្យចូលរួមជំនួស។
ចំណុចទី ៤ នៃសារាចរណែនាំនោះថ្លែងថា៖ «ចំពោះមន្ត្រីរាជការ និងប្រជាពលរដ្ឋកម្ពុជាទាំងឡាយណាដែលទើបវិលត្រឡប់មកពីបណ្ដាប្រទេសនៅអឺរ៉ុប សហរដ្ឋអាមេរិក និងអ៊ីរ៉ង់ត្រូវដាក់ខ្លួនឲ្យនៅដាច់ដោយឡែកក្នុងរយៈពេល ១៤ ថ្ងៃគិតចាប់ពីថ្ងៃដែលបានត្រឡប់មកដល់ព្រះរាជាណាចក្រកម្ពុជាវិញ ស្របតាមនីតិវិធីកំណត់ដោយក្រសួងសុខាភិបាល»។
ក្រសួងអប់រំក៏បានចេញវិធានការស្រដៀងគ្នានេះដែរ សម្រាប់មន្ត្រីរបស់ខ្លួនរួមមានការនៅដាច់ដោយឡែករយៈពេល ១៤ ថ្ងៃពេលត្រឡប់មកពីប្រទេសដែលមានវត្តមានកូវីដ ១៩ វិញ និងរាយការណ៍ពីស្ថានភាពសុខភាពរបស់ពួកគេជាប្រចាំ, ផ្អាករាល់បេសកកម្មក្នុង និងនៅក្រៅប្រទេស និងវគ្គបណ្ដុះបណ្ដាល, ផ្អាកជួបជាមួយភ្ញៀវបរទេស, បើជួបត្រូវស្វាគមន៍ដោយការសំពះ, ឈរនៅចម្ងាយមួយម៉ែត្រកន្លះ និងត្រូវរក្សាអនាម័យឲ្យបានគត់មត់។ វិធានការទាំងនេះត្រូវអនុវត្តក្នុងរយៈពេលមួយខែ លើកលែងករណីចាំបាច់ដែលត្រូវយល់ព្រមដោយរដ្ឋមន្ត្រីអប់រំ លោក ហង់ជួន ណារ៉ុន។
ក្រសួងអប់រំបានសម្រេចឲ្យមានការចាប់ផ្ដើមវិស្សមកាលតូច និងការឈប់សម្រាកមុនពេលកំណត់សម្រាប់គ្រឹះស្ថានអប់រំគ្រប់កម្រិត គ្រប់ប្រភេទ ទាំងសាធារណៈ និងឯកជននៅទូទាំងប្រទេសចាប់ពីថ្ងៃចន្ទម្សិលមិញតទៅ។ ចំពោះកាលកំណត់ចូលរៀនវិញ ក្រសួងនឹងជូនដំណឹងសាជាថ្មី។
ក្រសួងប្រាប់ដល់មន្ទីរអប់រំរាជធានីខេត្តត្រូវចាត់តាំងក្រុមការងារទប់ស្កាត់ការរីករាលដាលនៃជំងឺកូវីដ ១៩ ដើម្បីតាមដាន និងរាយការណ៍ហេតុការណ៍ដែលអាចកើតមានឡើងលើបុគ្គលិកអប់រំ និងសិស្សានុសិស្ស និងផ្ដល់ព័ត៌មានដល់ក្រសួងរៀងរាល់ថ្ងៃក្នុងពេលមានករណីសង្ស័យ។
ស្របពេលជាមួយគ្នានេះដែរក្រសួងសុខាភិបាលកាលពីម្សិលមិញបានចេញសេចក្ដីណែនាំស្ដីពីនីតិវិធីដាក់ឲ្យនៅដាច់ដោយឡែកក្នុងរយៈពេល ១៤ ថ្ងៃដើម្បីបង្ការ និងទប់ស្កាត់ជំងឺកូវីដ ១៩ ជាលក្ខខណៈបុគ្គលដែលជានីតិវិធីបំពេញបន្ថែមទៅលើសារាចរណែនាំរបស់រាជរដ្ឋាភិបាល។
វិធីដែលបុគ្គលត្រូវធ្វើរួមមានការស្ថិតនៅក្នុងបន្ទប់មានខ្យល់ចេញចូលល្អ, កាត់បន្ថយការប្រើប្រាស់កន្លែងទំនេររួម និងកាត់បន្ថយការរស់នៅរួមគ្នាដូចជាផ្ទះបាយ និងបន្ទប់ទឹក។ ក្នុងរយៈពេល ១៤ ថ្ងៃនេះត្រូវតាមដានសុខភាពផ្ទាល់ខ្លួន រោគសញ្ញា ដូចជាកម្តៅ ក្អក ឈឺបំបង់ក ហត់ ពិបាកដកដង្ហើម ឬរោគសញ្ញាផ្សេងទៀត។ ក្នុងករណីសង្ស័យត្រូវរាយការណ៍ទៅអាជ្ញាធរ ឬមន្ត្រីសុខាភិបាល។
សេចក្ដីណែនាំបន្តថា៖ «[ត្រូវ] អនុវត្តអនាម័យលាងដៃឲ្យបានញឹកញាប់ ជាពិសេសបន្ទាប់ពីប៉ះពាល់ជាមួយនឹងទឹករំអិលផ្លូវដង្ហើម។ ខ្ទប់ច្រមុះ មាត់ ដោយប្រើកែងដៃ ឬក្រដាសអនាម័យនៅពេលក្អក ឬកណ្ដាស់ រួចចោលក្រដាសអនាម័យនោះចោលភ្លាមទៅក្នុងធុងសំរាមត្រឹមត្រូវ»។
ក្រសួងបន្តថា៖ «ត្រូវសម្អាតបន្ទប់ស្នាក់នៅ និងបន្ទប់ទឹកឲ្យបានជាប្រចាំ។ ត្រូវសម្អាតជានិច្ច និងបោកគក់សម្លៀកបំពាក់ស្រោមពូកខ្នើយ និងគ្រឿងបរិក្ខារប្រើប្រាស់ផ្សេងៗ»។ ក្រសួងឲ្យអាជ្ញាធរមូលដ្ឋាន និងមន្ត្រីសុខាភិបាលពិនិត្យមើលដើម្បីធានាថា បុគ្គលដែលស្ថិតនៅដាច់ដោយឡែកនេះអនុវត្តតាមបានត្រឹមត្រូវ។ កាលពីយប់ថ្ងៃអាទិត្យក្រសួងសុខាភិបាលបានប្រកាសថាមានអ្នកបានឆ្លងជំងឺកូវីដ ១៩ នេះសរុប ១២ នាក់នៅប្រទេសកម្ពុជា។
ករណីរកឃើញចុងក្រោយ គឺកូនប្រុសអាយុ ៤ ខែ របស់ជនជាតិបារាំងដែលមានជំងឺនេះ ជនជាតិខ្មែរម្នាក់ដែលត្រឡប់មកពីប្រទេស បារាំង និងខ្មែរអ៊ិស្លាម ២ នាក់ នៅខេត្តព្រះវិហារដែលបានត្រឡប់មកពីចូលរួមពិធីសាសនានៅប្រទេស ម៉ាឡេស៊ី កាលពីចុងខែកុម្ភៈ។ មនុស្ស ៨ នាក់ទៀត ដែលបានធ្វើដំណើរទៅចូលរួមពិធីសាសនាដូចគ្នាត្រូវបានដាក់ឲ្យនៅដោយឡែករយៈពេល ១៤ ថ្ងៃ។
ពាក់ព័ន្ធនឹងជំងឺកូវីដ ១៩ នេះរដ្ឋមន្ត្រីក្រសួងសាធារណការ និងដឹកជញ្ជូនកាលពីម្សិលមិញបានធ្វើអន្តរាគមន៍ដោយឲ្យកប៉ាល់ទេសចរណ៍ចំនួន ៤ គ្រឿង ដែលចាកចេញពីកម្ពុជា ហើយត្រូវបានបដិសេធមិនឲ្យចូលចតនៅវៀតណាមបានត្រឡប់មកកម្ពុជាវិញ។ អន្តរាគមន៍នេះធ្វើឡើងតាមអនុសាសន៍របស់លោក ហ៊ុន សែន។ យោងតាម FN។
លោក ផាន សុបិន្ត តំណាងក្រុមហ៊ុនទេសចរណ៍ដែលដឹកនាំកប៉ាល់ទាំង ៤ នោះបានថ្លែងប្រាប់ភ្នំពេញប៉ុស្តិ៍ថា កប៉ាល់ទាំង ៤ ចាកចេញពីកម្ពុជាកាលពីថ្ងៃទី ៥ មីនា ហើយបានទៅដល់វៀតណាមនៅថ្ងៃទី ១២ និងទី ១៣ មីនា។ នៅលើកប៉ាល់ទាំងនោះមានភ្ញៀវទេសចរដែលភាគច្រើនមកពីអឺរ៉ុបជាង ៧០ នាក់ និងបុគ្គលិកជាង ៨០ នាក់។
លោកថ្លែងថា៖ «មុនយើងចេញទៅហ្នឹង វាអត់ទាន់មានការភ្ញាក់ផ្អើលរឿងវីរុសហ្នឹងប៉ុន្មានទេ ហើយព្រំដែនក៏អត់ទាន់បានបិទដែរ»។ លោកថា កប៉ាល់ទាំងអស់បានវិលត្រឡប់ដល់ព្រំដែនកម្ពុជាវិញហើយកាលពីថ្ងៃចន្ទម្សិលមិញ៕