The Phnom Penh Post Search

Search form




Logo of Phnom Penh Post newspaper Phnom Penh Post - លោក ហ៊ុន សែន ណែនាំ​ឲ្យ​កងទ័ព​រក្សា​ភាព​ស្ងប់​ស្ងាត់

លោក ហ៊ុន សែន ណែនាំ​ឲ្យ​កងទ័ព​រក្សា​ភាព​ស្ងប់​ស្ងាត់

លោក ហ៊ុន សែន ណែនាំ​ឲ្យ​កងទ័ព​រក្សា​ភាព​ស្ងប់​ស្ងាត់

131028_07
ប្រាសាទព្រះវិហារ ដែលជាសម្បត្តិបេតិកភណ្ឌពិភពលោក រូប ហេង ជីវ័ន

ភ្នំពេញៈ លោក​នាយក​រដ្ឋ​មន្រ្តី ហ៊ុន សែន បាន​ណែនាំ​ដល់​កម្លាំង​ប្រដាប់​អាវុធ​ទាំងអស់ នៅ​តាម​បណ្តោយ​ព្រំដែន កម្ពុជា-ថៃ ឲ្យ​រក្សា​ភាព​ស្ងប់​ស្ងាត់ បើ​ទោះ​ជា​តុលាការ​យុត្តិធម៌​អន្តរជាតិ (ICJ) ប្រកាស​សាលដីកា ស្តី​ពី​ជម្លោះ​ទឹក​ដី​ក្បែរ​ប្រាសាទ ព្រះវិហារ យ៉ាង​ណា​ក្តី តែ​យ៉ាង​ណា​ក៏​មាន​ការ​រាយការណ៍​ថា អាជ្ញាធរ​នៅ​ម្តុំ​ប្រាសាទ​នេះ កំពុង​មាន​ការ​ប្រុង​ប្រយ័ត្ន​ខ្ពស់​ដែរ កាល​ពី​ថ្ងៃ​អាទិត្យ​ម្សិលមិញ។

ក្នុង​សេចក្តី​ថ្លែង​ការណ៍​ដែល​ចេញ​ផ្សាយ​បន្ទាប់​ពី​កិច្ច​ប្រជុំ​គណៈ​រដ្ឋ​មន្រ្តី​ប្រចាំ​សប្តាហ៍​កាល​ពី ថ្ងៃ​សុក្រ លោក ហ៊ុន សែន បាន​ណែនាំ​ថា៖ «បើ​ទោះ​ជា​នៅ​ពេល​ខាង​មុខ សេចក្តី​សម្រេច​របស់​តុលាការ​អន្តរជាតិ​ក្រុង ឡាអេ ដែល​នឹង​ប្រកាស​នៅ​ថ្ងៃ ទី១១ វិច្ឆិកា ឆ្នាំ ២០១៣ មាន​ន័យ​យ៉ាង​ណា​ក៏​ដោយ អំណោយផល​ដល់​ព្រះ​រាជាណាចក្រ​កម្ពុជា ឬ​ក៏​ដល់ ថៃ រាជ​រដ្ឋាភិបាល​ទាំង​ពីរ​នៅ​តែ​ប្រកាន់​ខ្ជាប់​នូវ​ជំហរ​មិត្តភាព និង​សហ​ប្រតិបត្តិការ​ល្អ​រវាង​រដ្ឋាភិបាល​ទាំង​ពីរ កងទ័ព​និង​ប្រជាជន​ទាំង​ពីរ ហើយ​ដាច់​ខាត រក្សា​ឲ្យ​បាន​នូវ​សុវត្ថិភាព និង​សន្តិភាព​នៅ​តាម​បណ្តោយ​ព្រំដែន កម្ពុជា-ថៃ»។

ទោះ​បី​មាន​ភាព ស្ងប់​ស្ងាត់​ក៏​ដោយ ក៏​មន្ត្រី​ប៉ូលិស​ព្រំដែន​ម្នាក់ បាន​ប្រាប់​ថា មេ​បញ្ជាការ​គាត់​បាន​ហាម​មិន​ឲ្យ​ឈប់​សម្រាក និង​បាន​ចេញ​បញ្ជា​ឲ្យ​មាន​ការ​ប្រុង​ប្រយ័ត្ន។ កម្ពុជា បាន​ស្នើ​ឲ្យ ICJ បកស្រាយ​ភាព​ជា​កម្មសិទ្ធិ​លើ​ផ្ទៃ​ដី ៤,៦ គីឡូម៉ែត្រ​ការ៉េ នៅ​ជិត​ប្រាសាទ ព្រះ​វិហារ កាល​ពី​ខែ កុម្ភៈ ឆ្នាំ ២០១០ បន្ទាប់​ពី​មាន​ការ​ប៉ះ​ទង្គិច​គ្នា ដែល​ធ្វើ​ឲ្យ​ស្លាប់​មនុស្ស​ជាច្រើន​នៅ​ទី​នោះ។ ក្រុម​មន្រ្តី​មក​ពី​ប្រទេស​ទាំង​ពីរ គ្រោង​នឹង​ជួប​ប្រជុំ​គ្នា​ថ្ងៃ​នេះ ដើម្បី​ពិភាក្សា​ពី​កិច្ច​សហ​ប្រតិបត្តិការ​និង​រក្សា​សន្តិសុខ តាម​ព្រំដែន ជាដើម។

កម្ពុជា បាន​ប្តឹង​ទៅ ICJ ឲ្យ​បកស្រាយ​សាលក្រម​របស់​ខ្លួន កាល​ពី​ឆ្នាំ ១៩៦២ អំពី​ជម្លោះ​នៅ​ប្រាសាទ ព្រះ​វិហារ កាល​ពី​ខែ កុម្ភៈ ឆ្នាំ ២០១០ បន្ទាប់​ពី​កងទ័ព​ភាគី​ទាំង​ពីរ បាន​ប៉ះ​ទង្គិច​គ្នា​បណ្តាល​ឲ្យ​មាន​មនុស្ស​ស្លាប់​រាប់​សិប​នាក់ និង​ប្រជា​ពលរដ្ឋ​រស់​នៅ​តាម​ព្រំដែន​រាប់​ពាន់​នាក់​ផ្សេង​ទៀត​ត្រូវ​បាន​ជម្លៀស​ពី​លំនៅឋាន។

ទោះ​យ៉ាង​នេះ​ក្តី​ក៏​លោក ហ៊ុន សែន មិន​បាន​អះអាង ពី​ការ​ប្រឈម​ដាក់​គ្នា​នៅ​តាម​ព្រំដែន​ប្រទេស​ទាំង​ពីរ​ដែរ ខណៈ​ដែល ICJ ប្រកាស​ថា នឹង​ចេញ​សាលដីកា​លើ​បណ្តឹង​កម្ពុជា នៅ​ថ្ងៃ ទី១១ ខែ វិច្ឆិកា ខាង​មុខ​នេះ ប៉ុន្តែ កង​កម្លាំង​ប្រដាប់​អាវុធ​នៅ​តាម​ព្រំដែន និង​តំបន់​ប្រាសាទ​នេះ បាន​ប្រាប់​ថា ពួក​គេ​ទទួល​បាន​ការ​ណែនាំ​ពី​មេ​បញ្ជាការ​ឲ្យ​ត្រៀម​ជានិច្ច​និង​មិន ឲ្យ​សុំ​ច្បាប់​ឈប់​សម្រាក​ទេ​តាំង​តែ​ពី​ដើម​ខែ តុលា មក។

មន្រ្តី​ប៉ូលិស​យាម​ច្រក​ចូល​ប្រាសាទ ១ រូប បាន​ប្រាប់​ថា៖ «យើង​កំពុង​តែ​យាម​រាល់​ថ្ងៃ និង​មិន​អាច​ទៅ​ណា​ទេ»។ មន្រ្តី​រូប​នេះ​បន្ត​ថា ស្ថានការណ៍​តាម​ព្រំដែន មាន​ភាព​ប្រក្រតី។

កម្ពុជា និង ថៃ មិន​បាន​កំណត់​ព្រំដែន​រួម​ប្រវែង ៨០៥ គីឡូម៉ែត្រ ឲ្យ​បាន​ពេញ​លេញ​នៅ​ឡើយ​ទេ ហើយ​មាន​ការ​ប៉ះ​ទង្គិច​គ្នា​បាន​ផ្ទុះ​ឡើង​នៅ​ពេល​ដែល​ប្រាសាទ​នេះ ត្រូវ​បាន​ចុះ​បញ្ជី​ជា​សម្បត្តិ​បេតិកភណ្ឌ​ពិភពលោក កាល​ពី​ខែ កក្កដា ឆ្នាំ ២០០៨។

យោង​តាម​ប្រព័ន្ធ​ឃោសនា ថៃ NNT បាន​រាយការណ៍​កាល​ពី​ថ្ងៃ​ម្សិលមិញ​ថា នាយក​រដ្ឋ​មន្រ្តី​ថៃ លោក​ស្រី យីងឡាក់ ស៊ីណាវ៉ាត្រា បាន​ណែនាំ​អភិបាល​ខេត្ត ស៊ីសាកេត ឲ្យ​ចរចា​បន្ទាន់​ជាមួយ​នឹង​អ្នក​ស្រុក មុន ICJ ចេញ​សាល​ដីកា​ថ្ងៃ ទី១១ ខែ វិច្ឆិកា។

តាម NNT ថា លោក​ស្រី យីងឡាក់ បាន​អំពាវនាវ​ដល់​ក្រុម​អ្នក​តវ៉ា​កុំ​ឲ្យ​បិទ​ផ្លូវ ហើយ​ថា លោក​ស្រី​នឹង​បញ្ជូន​មន្រ្តី​ម្នាក់​ទៅ​ជួប ដើម្បី​ស្វែង​យល់​ពី​ការ​ទាម​ទារ​របស់​ពួក​គេ អំពី​ការ​ទទួល​យក​សាលដីកា​របស់​តុលាការ​អន្តរជាតិ​នេះពី​សំណាក់​ប្រទេស ថៃ។

អ្នក​ការទូត​ជាន់​ខ្ពស់​របស់​ប្រទេស កម្ពុជា លោក​រដ្ឋ​មន្រ្តី ការ​បរទេស ហោ ណាំហុង នឹង​ជួប​ជាមួយ​សម​ភាគី​ថៃ​របស់​លោក គឺ​លោក ស៊ូរ៉ាពង់ តុវិឆាកឆៃគុល រដ្ឋ​មន្ត្រី​ការ​បរទេស ថៃ នៅ​ថ្ងៃ​ចន្ទ​នេះ នៅ​ក្រុង ប៉ោយប៉ែត ដែល​ជា​ច្រក​ព្រំដែន​នៅ​ខេត្ត បន្ទាយ​មាន​ជ័យ ដើម្បី​ពិភាក្សា​អំពី​កិច្ច​សហ​ប្រតិបត្តិការ​ព្រំដែន ការ​រក្សា​សន្តិសុខ ហើយ​និង​ការ​បើក​ច្រក​ថ្មី​មួយ​ចំនួន​ទៀត តាម​ព្រំដែន​ប្រទេស​ទាំង​ពីរ​ផង៕ NR

អត្ថបទគួរចាប់អារម្មណ៍