ភ្នំពេញៈ ក្រោយពីឆ្លើយតបនឹងការរិះគន់ទៅលើការតែងតាំងកូនៗមន្ត្រីជាន់ខ្ពស់ក្នុងរដ្ឋាភិបាលកន្លងទៅថ្មីៗនេះជាថ្មីម្តងទៀត លោកនាយករដ្ឋមន្ត្រី ហ៊ុន សែន ពីម្សិលមិញថ្លែងថា ការតែងតាំងកូនៗមន្ត្រីជាន់ខ្ពស់នៅក្នុងសមាជិកនៃគណៈកម្មាធិការកណ្តាលនៃសហភាពសហព័ន្ធយុវជនកម្ពុជាគឺធ្វើទៅតាមនីតិវិធីផ្ទៃក្នុង និងលក្ខន្តិកៈនៃស្ថាប័ននេះ ហើយថាអ្នកដែលបំផ្លាញរូបលោក អ្នកនោះតែងវិនាសជានិច្ច។
ការបញ្ជាក់របស់នាយករដ្ឋមន្ត្រីដូច្នេះបានធ្វើឡើងនៅក្នុងពិធីបិទសន្និបាតតំណាងទូទាំងប្រទេសលើកទី ៤ របស់សហភាពសហព័ន្ធយុវជនកម្ពុជា (ស.ស.យ.ក) ដែលធ្វើឡើងនៅសណ្ឋាគារសុខាភ្នំពេញ រាជធានីភ្នំពេញ ដែលមានថ្នាក់ដឹកនាំ និងសមាជិកនៃសហភាពសហព័ន្ធយុវជនកម្ពុជាប្រមាណជាង ១៣០០ នាក់ដើម្បីសរុបការងារឆ្នាំ ២០១២-២០១៨ និងទិសដៅការងារឆ្នាំ ២០១៨-២០២០ និងការបោះឆ្នោតជ្រើសតាំងសមាជិក និងការអនុម័តលើការកែប្រែលក្ខន្តិកៈនៃសហភាពសហព័ន្ធយុវជនកម្ពុជាផងដែរ។
លោកថ្លែងថា៖ «និយាយឲ្យចំកុំឲ្យវាលំបាកព្រោះថា ខ្ញុំក៏បានឃើញអត្ថាធិប្បាយមួយចំនួនទៅលើវិទ្យុខ្លះ និងសារព័ត៌មានខ្លះអំពីអព្យាក្រឹតភាព ឬអំពីការតែងតាំងនេះតែងតាំងនោះ។ អស់លោកក្រុមប្រឆាំងសូមកុំសង្ឃឹមថាបានមកចូលរួមអង្គុយជាមួយ ស.ស.យ.ក ឲ្យសោះ។ ស.ស.យ.ក ជាអង្គការក្រៅរដ្ឋាភិបាលមួយ ហើយបើកឱកាសឲ្យគ្រប់សមាសភាពនៃយុវជនដែលចង់ចូលរួម ប៉ុន្តែពួកអ្នកឯងមិនចង់ចូលរួមគឺជារឿងរបស់អ្នកឯង»។
លោក ហ៊ុន សែន បានផ្ដាំផ្ញើទៅក្រុមប្រឆាំង កុំសង្ឃឹមថាបានចូលរួមជាមួយសហភាពសហព័ន្ធយុវជនកម្ពុជាឲ្យសោះទោះបីជាស្ថាប័ននេះជាអង្គការក្រៅរដ្ឋាភិបាលក៏ដោយ ហើយថាការតែងតាំងសមាជិកថ្មី ១៥ រូបជាសមាជិកនៃគណៈកម្មាធិការកណ្តាលគឺធ្វើតាមនីតិវិធី និងលក្ខន្តិកៈរបស់ ស.ស.យ.ក។
លោកនាយករដ្ឋមន្ត្រីក៏បានចោទជាសំណួរថា៖ «បើទោះបីអ្នកឯងបង្កើតនូវអង្គការចាត់តាំងមួយដែលគាំទ្រអ្នកឯង ក៏អ្នកឯងមិនផ្តល់ឱកាសឲ្យអង្គការយុវជនរបស់គណបក្សកាន់អំណាចចូលរួមនោះទេ នេះគឺជារឿងពិត។ សូមផ្តាំទៅពួកអ្នកឯងវិញថា យល់ឲ្យច្បាស់ និងដឹងឲ្យច្បាស់កុំនិយាយថា ស.ស.យ.ក សុទ្ធតែប្រមូលផ្តុំកូនថ្នាក់ដឹកនាំ បើយើងមិនជ្រើសរើសអ្នកទាំងនេះតើយើងទៅជ្រើសរើសពីអ្នកណាមក។ យើងត្រូវជ្រើសរើសទៅតាមរបៀបរបស់យើង»។
ការបោះឆ្នោតបញ្ចូលសមាជិក ១៥ រូបជាសមាជិកនៃគណៈកម្មាធិការកណ្តាលនោះរួមមានលោកស្រី ចម និមល លោក ជាម ច័ន្ទសោភ័ណ្ឌ លោកស្រី មិថុនា ភូថង លោក ទៀ សីហា លោកស្រី បានស្រីមុំ លោក ម៉ុម សារឿន លោក វ៉ា ថន លោក សុខ ពុទ្ធិវុធ លោក សុខ សប្បាយណា លោក សំហេង បុរស លោក ហេង សុខគង់ លោក ហេង សួរ លោក ហ៊ុយ វណ្ណៈ និងលោក អ៊ុន ចាន់ដា។
ជាមួយគ្នានេះដែរលោក ហ៊ុន សែន ថ្លែងថាសហភាពសហព័ន្ធយុវជនកម្ពុជាមិនមែនជាអង្គការឯកោនោះទេ គឺបានចូលជ្រាបទៅគ្រប់កន្លែងទាំងអស់ សូម្បីតែអភិបាលខេត្តខ្លះព្រមទាំងរដ្ឋលេខាធិការ និងអនុរដ្ឋលេខាខ្លះក៏ជាសមាជិកដែរ។
លោកថ្លែងថា៖ «អ្នកណាបំផ្លាញ ហ៊ុន សែន តែងវិនាសជានិច្ច។ អ្នកត្រូវជឿខ្លះៗទៅបារមីមិនដល់អ្នកធ្វើអ្វីក៏អត់កើតដែរ មានតែវិនាសខ្លួនឯងតែប៉ុណ្ណោះ។ អ្នកជឿខ្លះទៅនូវអបិយជំនឿអាគមផ្សំអាយុ»។
កញ្ញា លី ស្រីស្រស់ អ្នកវិភាគនយោបាយ និងសង្គមមើលឃើញថាទោះបីការតែងតាំងធ្វើតាមបែបបទ និងតាមនីតិវិធីផ្ទៃក្នុង និងលក្ខន្តិកៈនៃសហភាពសហព័ន្ធយុវជនកម្ពុជាក៏ដោយក៏គេឃើញថាមានសុទ្ធតែកូនៗមន្ត្រីជាន់ខ្ពស់ត្រូវបានតែងតាំងជាសមាជិកនៃគណៈកម្មាធិការកណ្តាលនេះដែលមិនបានផ្តល់ឱកាសដល់យុវជនផ្សេងៗដែលមានស្នាដៃ និងបទពិសោធ ដោយសារតែខ្លួនគ្មានសែស្រឡាយជាមួយមន្ត្រីជាន់ខ្ពស់ទាំងនោះ និងវាបង្ហាញពីបក្ខពួកនិយម។
កញ្ញាថា៖ «យើងមើលពីទិដ្ឋភាពខាងក្រៅទៅវាហាក់ដូចបក្ខពួកនិយមដោយសារតែរចនាសម្ព័ន្ធគឺដឹកនាំ និងស្ថិតនៅក្រោមការដឹកនាំរបស់កូនៗមេដឹកនាំមន្ត្រីជាន់ខ្ពស់រដ្ឋាភិបាល»៕