The Phnom Penh Post Search

Search form




Logo of Phnom Penh Post newspaper Phnom Penh Post - លោក ​ហ៊ុន សែន ​ថា​ការ​សង់​ស្ពាន​អ្នកលឿង​គ្មាន​អំពើ​ពុករលួយ​ទេ

លោក ​ហ៊ុន សែន ​ថា​ការ​សង់​ស្ពាន​អ្នកលឿង​គ្មាន​អំពើ​ពុករលួយ​ទេ

ពិធី​តភ្ជាប់​ស្ពាន​អ្នកលឿង ត្រូវ​បាន​ធ្វើ​ឡើង​កាលពី​ថ្ងៃ​ពុធ​។
ពិធី​តភ្ជាប់​ស្ពាន​អ្នកលឿង ត្រូវ​បាន​ធ្វើ​ឡើង​កាលពី​ថ្ងៃ​ពុធ​។AFP

លោក ​ហ៊ុន សែន ​ថា​ការ​សង់​ស្ពាន​អ្នកលឿង​គ្មាន​អំពើ​ពុករលួយ​ទេ

ភ្នំពេញៈ ក្នុង​អំឡុង​ពេល​ថ្លែង​ការពារ​ពី​កេរដំណែល​រយៈពេល ៣០ ឆ្នាំ​របស់​ខ្លួន កាលពី​ថ្ងៃ​ពុធ លោក​នាយករដ្ឋមន្រ្តី ហ៊ុន សែន ក៏​បាន​បញ្ជាក់​ផង​ដែរ​ថា ស្ពាន​អ្នកលឿង​ដែល​វែង​បំផុត ថ្មី​បំផុត និង​ចំណាយ​ច្រើន​បំផុត ពុំ​ជាប់​ពាក់ព័ន្ធ​នឹង​អំពើ​ពុករលួយ​ទេ។

ការ​ប្រកាស​ផ្សេងៗ​ពី​ថ្លៃ​ចំណាយ​សរុប​សម្រាប់​សាងសង់​ស្ពាន​អ្នកលឿង ដែល​សាងសង់​ដោយ​ជំនួយ​ជប៉ុន នៅ​ខេត្ត​កណ្តាល​បាន​ធ្វើឲ្យ​មាន​ការ​សង្ស័យ​ថា រដ្ឋាភិបាល​បាន​យក​ប្រាក់​ឬ​គិត​ចំណាយ​ហួស​ដើម្បី​ចំណេញ។

នៅក្នុង​ពិធី​ចាក់​បេតុង​តភ្ជាប់​ស្ពាន​អ្នកលឿង កាលពី​ថ្ងៃ​ពុធ លោក ហ៊ុន សែន បាន​ប្រកាស​ថា៖ «​ខ្ញុំ​សូម​ប្រកាស​ដល់​ប្រជាជន​ទូទាំង​ប្រទេស​ថា គេ​បាន​ចោទប្រកាន់​ខុស​មកលើ​រដ្ឋាភិបាល​ថា បាន​ប្រើប្រាស់​ជំនួយ​បរទេស​ដោយ​មិន​ត្រឹមត្រូវ​»។ ក្នុង​ពិធី​នេះ លោក ហ៊ុន សែន ក៏​បាន​អួត​សរសើរ​ថា ប្រសិន​បើ​លោក​ជា​មេដឹកនាំ​មិន​ល្អ ជប៉ុន​នឹង​មិន​ផ្តល់​ជំនួយ​ក្នុង​គម្រោង​នេះ​ទេ។

ជា​ជាង​ការ​កិបកេង​ប្រាក់ជំនួយ ទាំង​រដ្ឋាភិបាល និង​ទីភ្នាក់ងារ​ជប៉ុន​ដើម្បី​សហប្រតិបតិ្តការ​អន្តរជាតិ (JICA) បាន​អះអាង​ថា ការ​ប្រកាស​ខុស​គ្នា​ពី​ចំណាយ​គឺ​ដោយសារ​តែ​អត្រា​ប្តូរប្រាក់​ប្រែប្រួល រវាង​រូបិយវត្ថុ​យេន​ជប៉ុន និង​ដុល្លារ​អាមេរិក។

លោក Fukuzawa Daisuke នៃ​ទីភ្នាក់ងារ JICA ថ្លែង​ថា៖ «​ចំណាយ​គម្រោង​សរុប​គឺ​ប្រហែល ៩ ពាន់​លាន​យ៉េន។ វា​អាច​ស្មើ​នឹង​៨០​លាន​ដុល្លារ ឬ ១៣០ លាន​ដុល្លារ យោងតាម​អត្រា​ប្តូរប្រាក់​ខុសៗ​គ្នា»។ បើ​ទោះបី​ជា​កិច្ចសន្យា​ស្ពាន​ពី​ដំបូង​បាន​កំណត់​ថវិកា​តែ​ ១១,៩ ពាន់​លាន​យ៉េន​ក៏ដោយ ក៏​ប៉ុន្តែ លោក Daisuke បញ្ជាក់​ថា តួលេខ​នេះ គឺជា​ចំនួន​អតិបរមា និង​ថា ចំណាយ​សរុប​ទាប​ជាង​នេះ មិន​អាច​បកស្រាយ​ថា ជា​ការ​កិបកេង​ទេ។

លោក​បន្ត​ថា៖ «​យើង​បាន​គ្រប់គ្រង​ប្រាក់​យើង​យ៉ាង​តឹងរ៉ឹង ដោយ​គ្មាន​ការ​ជ្រៀតជ្រែក​ពី​ភាគី​កម្ពុជា​ទេ។ ខ្ញុំ​អាច​និយាយ​ថា គ្មាន​អំពើ​ពុករលួយ​ក្នុង​គម្រោង​នេះ​ទេ»៕ TK

អត្ថបទគួរចាប់អារម្មណ៍