.jpg)
លោក ឌឹម សុវណ្ណារុំ អ្នកនាំពាក្យ គជប បង្ហាញបញ្ជីឈ្មោះ គណបក្សនយោបាយដល់អ្នកសារព័ត៌មានកាលពីម្សិលមិញ។ ផា លីណា
ភ្នំពេញៈ លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាកាលពីម្សិលមិញបានអះអាងថា ល្បែងប្រជាធិបតេយ្យដែលកើតចេញពីការបោះឆ្នោតនៅក្នុងប្រទេសកម្ពុជានឹងមិនត្រូវបានរាំងខ្ទប់ដោយបុគ្គលបក្ស ឬក្រុមណាមួយនោះទេ នៅអំឡុងពេលដែលគណៈកម្មាធិការជាតិរៀបចំការបោះឆ្នោតបានចាប់ផ្ដើមចុះបញ្ជីបេក្ខជនរបស់គណបក្សនយោបាយដែលនឹងចូលរួមការបោះឆ្នោតជ្រើសតាំងតំណាងរាស្ត្រនៅថ្ងៃទី ២៩ ខែកក្កដាខាងមុខនេះ។
ក្នុងពិធីចែកសញ្ញាបត្រដល់និស្សិតដែលបានបញ្ចប់ការសិក្សាពីសាកលវិទ្យាល័យធនធានមនុស្ស នៅឯវិទ្យាស្ថានជាតិអប់រំកាលពីម្សិលមិញ លោក ហ៊ុន សែន ថ្លែងថា៖ «ល្បែងប្រជាធិបតេយ្យនៅកម្ពុជាមិនត្រូវបានរាំងខ្ទប់ដោយបុគ្គលណាមួយ ឬបក្ស ឬក្រុមណាមួយទេ ព្រោះប្រព័ន្ធដំណើរការប្រជាធិបតេយ្យសេរី ពហុបក្សនៅតែបន្តមិនដឹងថាមានប៉ុន្មានគណបក្សទេ ក៏ប៉ុន្តែខ្ញុំគិតថាវាច្រើនបង្គួរ សម្រាប់ការបោះឆ្នោត។ ឯនៅប្រទេសខ្លះ វាអត់មានការបោះឆ្នោតផង មានប្រទេសខ្លះមានបក្សតែមួយបោះប្រជែងគ្នាឯង ក៏ចាត់ទុកថាជាដំណើរការប្រជាធិបតេយ្យ»។
លោកនាយករដ្ឋមន្ត្រីក៏បានផ្ញើសារនយោបាយជាសាធារណៈផងដែរ រាល់ការរិះគន់ចំពោះគណបក្សនយោបាយដែលបានបង្កើតមួយចំនួនថា ជាអាយ៉ងរបស់ ហ៊ុន សែន។
លោក ហ៊ុន សែន ថ្លែងថា៖ «ឥឡូវមិនដឹងថាវាឡប់អីវាឲ្យតែអ្នកណាបង្កើតបក្សនយោបាយ គឺសុទ្ធតែអាយ៉ងរបស់ ហ៊ុន សែន ទាំងអស់ វាទៅជាឆ្កួតឡប់អ៊ីចេះ។ តែកាលណាគេធ្វើបក្សនយោបាយបានសេចក្ដីថាភាពខុសគ្នា ទោះតិចទោះច្រើនគឺមានការខុសគ្នាហើយ បើដូចគ្នាគេមិនបង្កើតបក្សទេ គេមកចូលជាមួយគណបក្សប្រជាជនទៅហើយ»។
លោក ហ៊ុន សែន ក៏បានអះអាងផងដែរចំពោះគណបក្សសង្គ្រោះជាតិដែលត្រូវបានរំលាយចោលដោយតុលាការកំពូលកាលពីចុងឆ្នាំ ២០១៧ ហើយបានហាមឃាត់អ្នកនយោបាយនៃគណបក្សនេះមិនឲ្យធ្វើនយោបាយ ៥ ឆ្នាំនោះគឺមិនអាចចូលរួមការបោះឆ្នោតនៅក្នុងខែកក្កដានេះបានទេ។
លោក ហ៊ុន សែន ថ្លែងថា៖ «អ៊ីចឹងទេ ខ្មោចដែលវាងាប់ហើយ ដែលគេយកទៅកប់ ដុត មិនដឹងឆ្អឹងនៅឯណា វាមិនរស់ឡើងវិញទេ វាមានតែបក្សនយោបាយពិតប្រាកដប៉ុណ្ណោះដែលឈរឈ្មោះបោះឆ្នោតពិតប្រាកដនោះ។ អ៊ីចឹងសខ្មៅ វាឃើញហើយ។ អ្នកដែលមិនជឿអ្នកដែលជឿ ងប់រហូតដល់មានអ្នកខ្លះគេថា បើលោក ហ៊ុន សែន មិនព្រមធ្វើ មិនព្រមពន្យារទេ ច្បាស់ជាគេចាប់លោក ហ៊ុន សែន»។
លោកបន្តថា៖ «ខ្ញុំសួរអាណាក្បាលប៉ានដែកមកចាប់ ហ៊ុន សែន នោះ ខ្ញុំសួរត្រឡប់ទៅ។ គេថា គេចាប់ ហ៊ុន សែន នាយករដ្ឋមន្ត្រីនៃរដ្ឋអធិបតេយ្យត្រូវគេចូលមកចាប់ខ្លួននៅទីនេះ។ លមើល អញ្ជើញមកក្រែងលោ វាពិបាករកខ្មោចទៅទៀត។ មកពីកន្លែងណា»។
សារនយោបាយរបស់លោកនាយករដ្ឋមន្ត្រីបានធ្វើឡើងក្នុងថ្ងៃតែមួយ ដែលគណបក្សប្រជាជនកម្ពុជា និងគណបក្សយុវជនកម្ពុជាបានដាក់បញ្ជីឈ្មោះបេក្ខជនទៅគណៈកម្មាធិការជាតិរៀបចំការបោះឆ្នោត (គ.ជ.ប) សម្រាប់ត្រៀមចូលរួមប្រកួតប្រជែងការបោះឆ្នោតជ្រើសតាំងតំណាងរាស្ត្រនៅថ្ងៃទី ២៩ ខែកក្កដានេះ។ ទន្ទឹមគ្នានោះដែរគណបក្ស ៤ ទៀតបានដាក់តម្កល់ថវិកាដើម្បីបំពេញលក្ខខណ្ឌសុំចុះឈ្មោះផងដែរ។
លោក អ៊ុក គឹមហាន អនុប្រធានខុទ្ទកាល័យគណៈកម្មាធិការកណ្ដាល CPP។ រូបថត Fresh News
គ.ជ.ប បានចាប់ផ្ដើមចុះបញ្ជីបេក្ខជនរបស់គណបក្សនយោបាយដែលចូលរួមការបោះឆ្នោតជ្រើសតាំងតំណាងរាស្ត្រចាប់ពីថ្ងៃទី ៣០ ខែមេសារហូតដល់ថ្ងៃទី ១៤ ខែឧសភាដែលជាថ្ងៃឱសានវាទនៃការបិទបញ្ជីបេក្ខជន។
លោក អ៊ុក គឹមហាន អនុប្រធានខុទ្ទកាល័យគណៈកម្មាធិការកណ្តាលរបស់គណបក្សប្រជាជនកម្ពុជាបានឲ្យដឹងថា គណបក្សកាន់រាជរដ្ឋាភិបាលបានដាក់បេក្ខជនចំនួន ២៧១ រូបដែលក្នុងនោះ មាន ១២៥ រូបជាបេក្ខជនពេញសិទ្ធិ និងមានបេក្ខនារី ៤៧ រូប ហើយលោក ហ៊ុន សែន នៅតែជាបេក្ខជនតំណាងរាស្ត្រមណ្ឌលខេត្តកណ្ដាល និងនៅតែជាបេក្ខជននាយករដ្ឋមន្ត្រីដូចអាណត្តិមុនៗដដែល។
លោក អ៊ុក គឹមហាន ថ្លែងថា៖ «គោលការណ៍របស់ គ.ជ.ប បានឲ្យដាក់ពីថ្ងៃ ៣០ (មេសា) ដល់ថ្ងៃ ១៤ (ឧសភា) អ៊ីចឹងគណបក្សបានត្រៀមរួចអស់ហើយបញ្ជីបេក្ខជនហ្នឹង ហើយយើងយកមកដាក់ ហើយបើមានការខុសឆ្គងអីយើងមានពេលវេលាក្នុងការកែសម្រួល។ ហើយគណបក្សប្រជាជនក៏មិនចង់ដាក់ក្រោយគេដែរ»។
ក្នុងពេលតែមួយជាមួយ និងបក្សកាន់អំណាចលោក ពេជ្រ ស្រស់ ប្រធានគណបក្សយុវជនកម្ពុជាក៏បានដាក់បេក្ខជនចំនួន ២៣៤ រូបសម្រាប់ ១៧ ខេត្តក្រុង សម្រាប់ខេត្តដែលមានអាសនៈចាប់ពី ៣ ឡើងទៅ។
លោក ស្រស់ ថ្លែងថា៖ «យើងអត់ដាក់ទេ ខេត្តដែលមាន ១ អាសនៈ យើងដាក់ខេត្តមាន ៣ អាសនៈឡើង។ អ៊ីចឹងយើងអត់ដាក់ ៨ ខេត្ត។ ក្នុងចំនួននេះយើងមានស្ត្រី ៦៨ រូប។ យើងដាក់មុនគេដោយសារយើងជាគណបក្សថ្មី ហើយគណបក្សយើងរវល់ការងារច្រើន»។
គណបក្សអំណាចខ្មែរ និងគណបក្សជាតិនិយមបានបញ្ជាក់ជំហររបស់ពួកគេនឹងមិនចូលរួមការបោះឆ្នោតខាងមុខនោះទេ។
ស្របពេលជាមួយគ្នានេះក៏មានគណបក្សនយោបាយមួយត្រូវបានក្រសួងមហាផ្ទៃទទួលស្គាល់ និងចុះឈ្មោះជាផ្លូវការកាលពីថ្ងៃចន្ទដែរគឺគណបក្ស រស្មីខេមរា ដែលដឹកនាំដោយលោក ស៊ិន សុភាព។ នេះបើតាមឯកសារជូនដំណឹងរបស់ក្រសួងមហាផ្ទៃ។
ទន្ទឹមនឹងនេះក្រសួងមហាផ្ទៃក៏បានរំឭកដល់គណបក្សនយោបាយដែលបានសុំចុះបញ្ជី តែមិនទាន់ទទួលបានភាពស្របច្បាប់ ដោយសារមិនទាន់បានបំពេញលក្ខខណ្ឌតម្រូវតាមច្បាប់ស្តីពីគណបក្សនយោបាយនោះ គឺគណបក្ស ឆន្ទៈខ្មែររបស់លោក គង់ មុនីកា កូនប្រុសលោក គង់ គាំ និងគណបក្សខ្មែរក្រោក របស់តារាហ្វេសប៊ុក សុខសុវណ្ណ វឌ្ឍនាសាប៊ុង ដែលគេស្គាល់តាមរយៈហ្វេសប៊ុកឈ្មោះ William Guang។
លោក វឌ្ឍនាសាប៊ុង ថ្លែងថា៖ «ខ្ញុំចង់ឲ្យយុវវ័យក៏ដោយ ប្រជាពលរដ្ឋក៏ដោយចូលរួមយ៉ាងសស្រាក់សស្រាំក្នុងរឿងនយោបាយកំណត់វាសនាជាតិ។ រឿងនយោបាយបើមានបញ្ហា ប្រជាពលរដ្ឋទាំងអស់ច្បាស់ជាមិនអាចនៅបានសុខទេ។ ខ្ញុំចង់ឲ្យខ្មែរគ្រប់គ្នា ក្រោកឡើង ងើបឡើងឲ្យដឹងថា ប្រទេសយើងត្រូវការអ្នកមានចំណេះដឹង និងហានរិះគន់ស្ថាបនាសង្គម ចូលរួមស្ថាបនា ហើយក្រោកឡើងកុំគិតពីផលប្រយោជន៍ផ្ទាល់ខ្លួនច្រើនពេក។ យើងប្រឆាំងនឹងទុច្ចរិតភាពរបស់បរទេសដែលចង់ឈ្លានពានទឹកដីរបស់យើង»។
លោកបន្តថា៖ «យើងចង់ឲ្យពលរដ្ឋមានជម្រើសក្នុងការផ្លាស់ប្តូរ»។
ទោះយ៉ាងណាក៏ដោយ លោក ឌឹម សុវណ្ណារុំ សមាជិក និងអ្នកនាំពាក្យ គ.ជ.ប បានប្រាប់ឲ្យដឹងថាគណបក្សសម្ព័ន្ធដើម្បីប្រជាធិបតេយ្យ គណបក្សសំបុកឃ្មុំ គណបក្សពន្លឺថ្មី និងគណបក្សហ៊្វុនស៊ិនប៉ិចបានតម្កល់ថវិកា ១៥ លានរៀលនៅរតនាគារជាតិដែលជាលក្ខខណ្ឌមួយក្នុងចំណោមលក្ខខណ្ឌទាំងឡាយដែលត្រូវបំពេញ។ លោកក៏បញ្ជាក់ដែរថាគណបក្សកសិកររបស់លោក មាស បូពៅ ក៏បានទៅសុំទម្រង់បែបបទសុំចុះឈ្មោះផងដែរ។
ចំពោះថវិកា ១៥ លានរៀលដែលត្រូវបានតម្កល់ដោយគណបក្សនយោបាយនីមួយៗគណបក្សទាំងនោះអាចដកយកថវិការបស់ពួកគេវិញបាន បើសិនគណបក្សនយោបាយនីមួយៗនោះទទួលបានសំឡេង ៣ ភាគរយនៃសន្លឹកឆ្នោតបានការទូទាំងប្រទេស ឬស្មើមួយអាសនៈនៅក្នុងរដ្ឋសភា៕
រាយការណ៍បន្ថែមដោយ បែន សុខហ៊ាន
