ភ្នំពេញៈ លោកនាយករដ្ឋមន្ត្រី ហ៊ុន សែន ពីម្សិលមិញ លើកឡើង ថាសំណង់អគារគ្មានច្បាប់ បណ្ដាលមកពីមន្ត្រីខិលខូចមួយចំនួនមិនព្រមអនុម័តឱ្យបានឆាប់រហ័ស ព្រោះចង់បន្ទុចបង្អាក់ទារលុយពីម្ចាស់គម្រោង ដោយលោកជំរុញឲ្យចាត់វិធានការមន្ត្រីទាំងនេះ បន្ទាប់ពីអង្គភាពប្រឆាំងអំពើពុករលួយបានឃាត់ខ្លួនមន្ត្រីមន្ទីររៀបចំដែនដីខេត្តពោធិ៍សាត់ ៣ នាក់ ពាក់ព័ន្ធនឹងការជំរិតទារប្រាក់ពីម្ចាស់គម្រោង ១០ ម៉ឺនដុល្លារ។
ការថ្លែងនេះ នៅពេលលោកអញ្ជើញជាអធិបតីក្នុងកម្មវិធីចុះពិនិត្យការដ្ឋានសាងសង់ពហុកីឡដ្ឋានជាតិ «មរតកតេជោ» កាលពីថ្ងៃទី ២៩ កក្កដា ខណៈកំពុងដំឡើងថាសកៅអីបេតុងចុងក្រោយ ដែលជានិមិត្តរូបនៃការលេចចេញជារូបរាងកីឡដ្ឋានធំនេះ។ លោកក៏បានជួបសំណេះសំណាលជាមួយកម្មករ កម្មការិនី ថ្នាក់ដឹកនាំ មន្ត្រីកីឡា និងកីឡាករ កីឡាការិនីជាច្រើនរូបផ្សេងទៀត។
លោកនាយករដ្ឋមន្ត្រី ហ៊ុន សែន បានថ្លែងថា ការឃាត់ខ្លួនប្រធាន អនុប្រធាន និងមន្ត្រីមន្ទីរសុរិយោដីខេត្តពោធិ៍សាត់ចំនួន ៣ រូបនេះ គឺជាបទពិសោធបង្ហាញឲ្យឃើញថា ការសាងសង់សំណង់អគារគ្មានច្បាប់បណ្ដាលមកពីមន្ត្រីមួយចំនួនមិនព្រមចេញច្បាប់អនុញ្ញាតសាងសង់ឲ្យពួកគេ ដើម្បីបន្ទុចបង្អាក់ទារប្រាក់ពីម្ចាស់គម្រោង។
លោកបញ្ជាក់ថា៖ «បើគេបានសុំច្បាប់យើង ហើយយើងមិនបានឆ្លើយជាមួយគេ ហើយគេបែរជាទៅសាងសង់អាហ្នឹង គឺមានចំណែកខុសពីយើងដែលយើងមិនបានឆ្លើយតបទៅគេ។ ដូចករណីនៅពោធិ៍សាត់ ជាករណីផ្ដល់មេរៀនពិសោធន៍។ កន្លែងខ្លះគេសុំច្បាប់ វាទៅទារលុយពីគេ វាមិនព្រមធ្វើទេ វាកិកកុក ដល់អ៊ីចឹង គ្នាទៅផ្ទះវិញ ទៅធ្វើទាំងអត់ច្បាប់ ព្រោះគ្នាចាំយើងយូរពេក។ ខ្លះវាមានករណីហ្នឹង ដែលបង្កើតឲ្យមានរឿងអត់ច្បាប់ បើយើងពិនិត្យគេឲ្យលឿន ហើយផ្ដល់ឲ្យគេលឿនដែរទៅ ត្រូវកែសម្រួលប្លង់យ៉ាងម៉េចប្លង់គេខុសបច្ចេកទេសម៉េច កែលឿនៗឡើងទៅ»។
លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ (ACU) ពីម្សិលមិញ នៅតែមិនទាន់អាចទាក់ទងសុំការបញ្ជាក់ជុំវិញការឃាត់ខ្លួនមន្ត្រីទាំង ៣ នាក់នេះនៅឡើយទេ ហើយក៏មិនទាន់ទទួលដំណឹងពីការបញ្ជូនពួកគេទៅតុលាការនៅពេលណាដែរ។
ប៉ុន្ដែលោក ហ៊ុន សែន បានពន្យល់ថា៖ «អារឿងចាប់មន្ត្រី៣នាក់មកពីពោធិ៍សាត់ រឿងវាដូច្នេះ គេត្រូវកសាងរោងចក្រ ហើយខ្ញុំបានទៅប្រកាសបើករោងចក្រនៅកន្លែងហ្នឹង។ ដល់ពេលគេសុំសាងសង់ វាទារលុយគេ។ ដំបូងវាត្រឹម ៥ ម៉ឺន (ដុល្លារ) ទេ ដល់ក្រោយមក ខ្ញុំធ្វើការជាមួយអង្គភាពប្រឆាំងអំពើពុករលួយ ឱម យ៉ិនទៀង ស្រាវជ្រាវរឿងហ្នឹង។ គេឲ្យមន្ត្រីក្លែងបន្លំចូលទៅ ធ្វើជាម្ចាស់ក្រុមហ៊ុន។ អានោះ វាឡើងថ្លៃ ១ ទ្វេជា ២ ពី ៥ ម៉ឺនដល់ ១០ ម៉ឺន ទារកក់ ៥ ពាន់។ ខាង ACU គេក៏កក់ ៥ ពាន់។ ស្អែកឡើងត្រូវយក ៤ ម៉ឺន ៥ ពាន់ទៀត យកទៅកក់ឲ្យបានគ្រប់ ៥០ ភាគរយ។ អ៊ីចឹងថ្ងៃទី ១ កក់ ៥ ពាន់ ថ្ងៃទី ២៤ ម៉ឺន ៥ ពាន់។ កក់រួចហើយ យកមក (ចាប់ខ្លួន) តែម្តង»។
លោក សារុន ចាន់ធី ស្នងការនគរបាលខេត្តពោធិ៍សាត់ ពីម្សិលមិញបានថ្លែងថា ការឃាត់ខ្លួន ឬវិធានការផ្សេងៗ អង្គភាពប្រឆាំងអំពើពុករលួយជាអ្នកអនុវត្តផ្ទាល់។ កម្លាំងលោកមិនបានចូលរួមទេ ប៉ុន្ដែលោកបានបញ្ជាក់ថា៖ «ខាង ACU គាត់ធ្វើខ្លួនគាត់ផ្ទាល់ ហើយពេលឃាត់ខ្លួនហ្នឹង គឺគេសាកសួររួចហើយ ក៏បញ្ជូនទៅភ្នំពេញ ដើម្បីបន្តនីតិវិធី ខ្ញុំអត់ដឹងនីតិវិធីគាត់យ៉ាងណាទេ»។
លោក សន ជ័យ នាយកប្រតិបត្តិនៃអង្គការសម្ព័ន្ធគណនេយ្យភាពសង្គមកម្ពុជា (ANSA) ថ្លែងថា ការស្រាវជ្រាវអំពីបញ្ហាអំពើពុករលួយពាក់ព័ន្ធវិស័យអចលនទ្រព្យនេះ អង្គភាពប្រឆាំងអំពើពុករលួយគួរតែទៅស៊ើបអង្កេតនៅតាមតំបន់ដែលមានការរីកចម្រើនផ្នែកសំណង់ដូចជា ខេត្តព្រះសីហនុ បាវិត ប៉ោយប៉ែត ត្បូងឃ្មុំ និងកន្លែងសំខាន់ៗជាច្រើនទៀត។
លោកបញ្ជាក់ថា៖ «យើងលើកទឹកចិត្តឲ្យអ្នករកស៊ីផ្សេងទៀត ក៏ដូចជាពលរដ្ឋសាមញ្ញរាយការណ៍ ឬប្ដឹងមកអង្គភាពប្រឆាំងអំពើពុករលួយ។ បើគ្មានបណ្ដឹងទេ ស្ថាប័នហ្នឹង ពិបាកនឹងអនុវត្តការងាររបស់ខ្លួន ហើយក្រៅពីប្ដឹងហ្នឹង យើងក៏ចង់ឲ្យមានការស៊ើបអង្កេតលើតំបន់គោលដៅដែលកំពុងអភិវឌ្ឍន៍ខ្លាំង។ ព្រោះអ្នករកស៊ីនៅតំបន់ផ្សេងៗហ្នឹងប្រហែលជាកំពុងជួបបញ្ហាដូចករណីនេះដែរ»។
បើតាម Fresh News ចេញផ្សាយថ្ងៃទី ២៨ កក្កដា ថា ប្រធាន អនុប្រធាន និងមន្ត្រីមន្ទីរសុរិយោដី ខេត្តពោធិ៍សាត់ដែលត្រូវចាប់ខ្លួន ៣ នាក់នោះ រួមមាន ទី១ ឈ្មោះ លៀម ប៊ុនរឿន ប្រធានមន្ទីរសុរិយោដីខេត្តពោធិ៍សាត់ ទី២ ឈ្មោះ ជាង វុទ្ធី អនុប្រធានមន្ទីរទទួលការងារសំណង់ និងទី៣ ឈ្មោះ តែ ប៊ុនថេង មន្ត្រីសុរិយោដីខេត្តទទួលបន្ទុកច្រក។
សារព័ត៌មាននេះបន្តថា ពួកគេទាំង ៣ នាក់ ត្រូវបានឃាត់ខ្លួនដោយសង្ស័យពាក់ព័ន្ធការឃុបឃិតគ្នាប្រព្រឹត្តអំពើពុករលួយទារលុយពីប្រជាពលរដ្ឋជាម្ចាស់ដីដោយខុសច្បាប់ចំនួន ១០ ម៉ឺនដុល្លារ ជាថ្នូរនឹងការចេញច្បាប់សាងសង់។ ពួកគេត្រូវបានឃាត់ខ្លួននៅភោជនីយដ្ឋាន មហាលាភ ក្រុងពោធិ៍សាត់ នៅថ្ងៃទី ២៧ កក្កដា ខណៈពួកគេ និងម្ចាស់ដីបានណាត់ជួបគ្នា ដើម្បីប្រគល់លុយ៕