The Phnom Penh Post Search

Search form

Logo of Phnom Penh Post newspaper Phnom Penh Post - លោក ​ហ៊ុន សែន ថា ខណៈ​ជំងឺ​កូវីដ​កំពុង​គំរាមកំហែង គ្មាន​ប្រទេស​ណា​មាន​សុវត្ថិភាព​ទេ

លោក ​ហ៊ុន សែន ថា ខណៈ​ជំងឺ​កូវីដ​កំពុង​គំរាមកំហែង គ្មាន​ប្រទេស​ណា​មាន​សុវត្ថិភាព​ទេ

Content image - Phnom Penh Post
ក្រុមគ្រូពេទ្យយកសំណាកនៅផ្សារស្ទឹងមានជ័យក្នុងរាជធានីភ្នំពេញកាលពីថ្ងៃទី២០​​ ខែមេសា​​ ឆ្នាំ ២០២១។ រូបភាព TYDA

លោក ​ហ៊ុន សែន ថា ខណៈ​ជំងឺ​កូវីដ​កំពុង​គំរាមកំហែង គ្មាន​ប្រទេស​ណា​មាន​សុវត្ថិភាព​ទេ

ភ្នំពេញៈ បច្ចុប្បន្ន ជំងឺ​កូវីដ១៩ បាន​បន្ត​គំរាមកំហែង​យ៉ាងធ្ងន់ធ្ងរ​ដល់​សុខភាព​សាធារណៈ​សកល និង​ការអភិវឌ្ឍ​ជារួម។ ក្នុង​បរិការណ៍​នេះ គ្មាន​ប្រទេស​ណាមួយ​មាន​សុវត្ថិភាព​នោះទេ ដរាប​ណា​ប្រទេស​ទាំងអស់​មិនមាន​សុវត្ថិភាព។ នេះ​ជា​ការថ្លែង​របស់លោក​នាយករដ្ឋមន្ត្រី​ ហ៊ុន សែន ក្នុង​ពិធី​បើក​វេទិកា​បូ​អាវ​សម្រាប់​អាស៊ី។

តាមរយៈ​ការថ្លែង​សុន្ទរកថា ក្នុង​វេទិកា​បូអាវ សម្រាប់​អាស៊ី ក្រោម​ប្រធានបទ​ពិភពលោក​ក្នុង​ការផ្លាស់ប្តូរ​រួមដៃ​គ្នា​ដើម្បី​ពង្រឹង​អភិបាលកិច្ច​សកល​ និង​លើកកម្ពស់​កិច្ចសហប្រតិបត្តិការ​ខ្សែក្រវាត់​ និង​ផ្លូវ​នៅ​ថ្ងៃទី ២០ មេសា លោក​ហ៊ុន សែន បាន​បញ្ជាក់ថា ក្នុង​ន័យ​នេះ​កម្ពុជា​សូម​វាយតម្លៃ​ខ្ពស់​ចំពោះ​ការយកចិត្ត​ទុកដាក់​ខ្ពស់ និង​ការប្តេជ្ញាចិត្ត​របស់​ប្រទេស​ចិន​ក្នុង​ការអនុវត្ត "ផ្លូវ​សូត្រ​សុខភាព" ក្រោម​គំនិត​ផ្តួចផ្តើម​ខ្សែក្រវាត់ និង​ផ្លូវ និង​តួនាទី​ឈានមុខ​ក្នុង​ការផ្តល់​នូវ​ថ្នាំពេទ្យ គ្រឿង​បរិក្ខារ​វេជ្ជសាស្ត្រ និង​វ៉ាក់សាំង​ការពារ​កូវីដ១៩​ទាន់​ពេលវេលា​ទៅកាន់​ប្រទេស​ជាច្រើន។ នេះ​ជា​សក្ខីភាព​មួយ​យ៉ាង​ប្រត្យក្ស​អំពី​ភាពដឹកនាំ​សកល​របស់​ប្រទេស​ចិន។

ក្នុង​នាម​រាជរដ្ឋាភិបាល និង​ប្រជាជន​កម្ពុជា លោក​ ហ៊ុន សែន បាន​ថ្លែងអំណរគុណ​ចំពោះ​រដ្ឋាភិបាល និង​ប្រជាជន​ចិន ដែល​បាន​ផ្តល់​ថ្នាំពេទ្យ គ្រឿង​បរិក្ខារ​វេជ្ជសាស្ត្រ ក៏ដូចជា​វ៉ាក់សាំង​ការពារ​ជំងឺ​កូវីដ១៩​ចំនួន ២,៨ លាន​ដូស​ដល់​កម្ពុជា ដែល​ក្នុង​នោះ​ចំនួន ១,៣ លាន​ដូស​ជា​ជំនួយ​មនុស្សធម៌។

បើតាម​លោក​ ហ៊ុន សែន ក្រៅពី​ជំងឺ​រាតត្បាត​កូវីដ១៩ ពិភពលោក​កំពុង​ប្រឈម​បញ្ហា​ជាច្រើន​ទៀត ដែល​បណ្តាល​មកពី​ភាពតានតឹង​នៃ​ការប្រកួតប្រជែង​ភូមិសាស្ត្រ​នយោបាយ​រវាង​ប្រទេស​មហាអំណាច ស្របពេល​ការងើបឡើង​នៃ​ប្រទេស​មហាអំណាច​កណ្តាល ដែល​បាន​បោះជំហាន​យ៉ាង​លឿន​នៅ​លើ​ឆាកនយោបាយ​ក្នុង​តំបន់។

លោកនាយក​រដ្ឋមន្ត្រី​ថ្លែងថា៖ «ក្នុង​កាលៈទេសៈ​ដ៏សំខាន់​នេះ ខ្ញុំ​យល់ឃើញ​ថា ពិភពលោក​ពិតជា​ត្រូវការ​អភិបាលកិច្ច​សកល​មួយ​ដែល​គាំទ្រ​ពហុភាគី​និយម​ និង​គោរព​ច្បាប់​អន្តរជាតិ និង​អធិបតេយ្យភាព​របស់​ប្រទេស​នីមួយៗ​ដែល​មិន​គិតពី​ទំហំ ឬ​ធនធាន ដោយ​មាន​អង្គការ​សហប្រជាជាតិ​ជា​ស្នូល»។

លោក​ ហ៊ុន សែន បញ្ជាក់ថា កម្ពុជា​ទទួលស្គាល់​នូវ​តួនាទី​ស្នូល​នៃ​ពហុភាគី​និយម​ក្នុង​ការដោះស្រាយ​បញ្ហា​ប្រឈម​ពិភពលោក​ដែល​មាន​ភាពស្មុគស្មាញ​ និង​អន្តរ​ទំនាក់ទំនង។ ក្នុង​បរិការណ៍​នេះ​ប្រទេស​នីមួយៗ គួរតែ​ដើរតួនាទី​កាន់តែ​សកម្ម​ក្នុង​អភិបាលកិច្ច​សកល ដោយ​ភាពបត់បែន ស្ថាបនា និង​ឥរិយាបថ​ទទួល​ខុសត្រូវ៕

អត្ថបទគួរចាប់អារម្មណ៍