.jpg)
លោក យ៉ង សាំងកុមារ (បង់កក្រមា) ជាមួយកសិករ។ រូបថត ហ្វេសប៊ុក
ភ្នំពេញៈ មេដឹកនាំបក្សកាន់អំណាច និងមេដឹកនាំបក្សប្រជាធិបតេយ្យមូលដ្ឋាន បានបង្កើតសង្គ្រាមវោហារស័ព្ទថ្មីៗនេះដាក់គ្នា ទាក់ទងនឹងការលើកឡើងអំពីអត្តចរិតនៃបេក្ខជននាយករដ្ឋមន្ត្រីរបស់បក្សខ្លួនសម្រាប់ការប្រកួតប្រជែងក្នុងការបោះឆ្នោតដែលអ្នកវិភាគ និង អ្នកតាមដាននយោបាយ មើលឃើញថា វាអាចក្លាយជារឿងធំឈានដល់ការប្រមាថ និងគំរាមកំហែងនៅពេលភាគីទាំង ២ ក្តៅស្លឹកត្រចៀកកាន់តែខ្លាំងនោះ។
លោកនាយករដ្ឋមន្ត្រី ហ៊ុន សែន នៃគណបក្សប្រជាជនកម្ពុជាដែលជាបក្សកាន់អំណាចកាលពីចុងសប្តាហ៍បានយកវេទិកាក្នុងពិធីចែកសញ្ញាបត្រដល់និស្សិតនៅមជ្ឈមណ្ឌលកោះពេជ្រ ភ្នំពេញ និងវេទិកាសម្ពោធសួនសត្វសាហ្វារី នៅភាគខាងជើងជាយក្រុងភ្នំពេញឆ្លើយតបទៅនឹងមេបក្សប្រជាធិបតេយ្យមូលដ្ឋានលោក យ៉ង សាំងកុមារ ដែលមានជំនាញខាងកសិកម្មដោយលោក ហ៊ុន សែន ចាត់ទុកលោក យ៉ង សាំងកុមារ ត្រឹមតែជា «អ្នកចេះដាំដុះ» មិនទាន់ចេះគ្រប់គ្រងប្រទេសនៅឡើយ។
នេះជាការស៊កសៀតពាក្យសម្ដីដាក់គ្នាតាមបែបសង្គ្រាមវោហារស័ព្ទលើកទី ១ សម្រាប់អ្នកនយោបាយជើងចាស់លោក ហ៊ុន សែន និងអ្នកនយោបាយជើងថ្មីលោក យ៉ង សាំងកុមារ ប្រធានគណៈកម្មាធិការនាយកនៃគណបក្សប្រជាធិបតេយ្យមូលដ្ឋានដែលទើបជាប់ឆ្នោតក្នុងបក្សជាបេក្ខជនសម្រាប់តំណែងនាយករដ្ឋមន្ត្រីក្នុងការប្រកួតប្រជែងការបោះឆ្នោតនាថ្ងៃទី ២៩ កក្កដា។ ដើមចមនៃការកើតឡើងនូវសង្គ្រាមពាក្យសម្ដីរវាងអ្នកនយោបាយទាំង ២ គឺចាប់ផ្តើមពីការប្រើសម្ដីបែបឌឺដងរបស់លោក យ៉ង សាំងកុមារ ឬគណបក្សប្រជាធិបតេយ្យមូលដ្ឋានតាមបណ្តាញសង្គមហ្វេសប៊ុកកាលពីថ្ងៃទី ២១ មិថុនា សំដៅទៅលោកនាយករដ្ឋមន្ត្រី ហ៊ុន សែន ដែលត្រូវបានហៅថាជានាយករដ្ឋមន្ត្រី «ងាកឆេះចូលចិត្តប្រើកម្លាំង បទពិសោធសង្គ្រាម...»។
ដោយឡែកបេក្ខជននាយករដ្ឋមន្ត្រីបក្សប្រជាធិបតេយ្យមូលដ្ឋានមានលក្ខណសម្បត្តិខុសពីបេក្ខជននាយករដ្ឋមន្ត្រី ឬនាយករដ្ឋមន្ត្រីនៃគណបក្សប្រជាជនកម្ពុជា។ លក្ខណសម្បត្តិរបស់នាយករដ្ឋមន្ត្រីគណបក្សប្រជាធិបតេយ្យមូលដ្ឋានគឺ «ងាកផ្តល់ចំណេះ ចូលចិត្តប្រើគំនិត បទពិសោធអភិវឌ្ឍន៍...»។
ជាការឆ្លើយតបក្នុងពិធីចែកសញ្ញាបត្រដល់និស្សិតជាង ៣០០០ នាក់កាលពីថ្ងៃសុក្រលោក ហ៊ុន សែន បានថ្លែងបែបចំអកទៅលោក យ៉ង សាំងកុមារ ថា៖ «អ្នកគ្រាន់តែជាអ្នកចេះដាំដុះ...អ្នកមិនទាន់ចេះគ្រប់គ្រងមនុស្ស កុំថាឡើយទៅដល់លាននាក់ គ្រប់គ្រងប្រទេស សូម្បីតែគ្រប់គ្រងអង្គការមួយវាមិនគ្រប់គ្រាន់ផង ខ្ញុំដឹងថាអ្នកជំពាក់លុយគេតើ។ ខ្ញុំដឹងថាអ្នកកំពុងរកលក់នេះ លក់នោះរាប់ទាំងលក់ម៉ាស៊ីនស្រូវផងដែរតើ»។
លោកបន្តថា៖ «អ្នកណាធ្វើឲ្យគេក្លាយជាបណ្ឌិតឲ្យគេក្លាយទៅជាបញ្ញវន្ត។ អ្នកនេះ (លោក ហ៊ុន សែន) ឈរនៅខាងមុខគេកំពុងតែប្រៀបធៀបបេក្ខជននេះ អន់ជាងបេក្ខជនគេ តែបេក្ខជននេះហើយដែលបានបណ្តុះបណ្ដាលបេក្ខជនមួយទៀតត្រូវឲ្យយល់កន្លែងហ្នឹង គួរឲ្យមានការខ្មាសអៀនផង»។
ជាងនេះទៀតកាលពីថ្ងៃសៅរ៍លោក ហ៊ុន សែន បញ្ជាក់ថាលោក យ៉ង សាំងកុមារ ត្រូវតែដឹងថា រូបលោកគឺជាអ្នកផ្តល់ចំណេះដល់លោក យ៉ង សាំងកុមារ តាមរយៈការធានាឲ្យលោកកុមាររស់រានមានជីវិត និងតាមរយៈបញ្ជូនលោកកុមារទៅរៀនគឺផ្តល់ចំណេះដល់លោក។
លោក ហ៊ុន សែន សង្កត់ធ្ងន់ថា៖ «ឥឡូវគាត់មកបង្អាប់ខ្ញុំថាជាអ្នកងាកឆេះ ឯគាត់ងាកផ្តល់ចំណេះ តើគាត់ផ្តល់ឲ្យប៉ុន្មានទៅហើយ»។
នៅលើហ្វេសប៊ុករបស់ខ្លួនគណបក្សប្រជាធិបតេយ្យមូលដ្ឋានបានចាត់ទុកលោក ហ៊ុន សែន ថា «ងាកឆេះ» «ចូលចិត្តប្រើកម្លាំង» «បទពិសោធសង្គ្រាម» «ប្រើប្រព័ន្ធបញ្ជាពីលើទៅក្រោម» «ចង់បញ្ជាសមាជិករដ្ឋសភា» « រក្សារចនាសម្ព័ន្ធបក្សក្នុងស្ថាប័នមន្ត្រីរាជការ» និង «អភិវឌ្ឍជាតិពឹងលើជំនួយ» រីឯលោក យ៉ង សាំងកុមារ ត្រូវបានគណបក្សនេះចាត់ទុកថាជាជន «ងាកផ្តល់ចំណេះ» «ចូលចិត្តប្រើគំនិត» «បទពិសោធអភិវឌ្ឍន៍» «ប្រើប្រព័ន្ធប្រជាធិបតេយ្យពីក្រោមមកលើ» «ចង់ស្តាប់សមាជិករដ្ឋសភា» «លុបបំបាត់រចនាសម្ព័ន្ធបក្សក្នុងស្ថាប័នមន្ត្រីរាជការ» និង «អភិវឌ្ឍជាតិពឹងលើខ្លួនឯង»។
ប៉ុន្មានម៉ោងបន្ទាប់ពីប្រតិកម្មពីលោក ហ៊ុន សែន លោក យ៉ង សាំងកុមារ បានតបសារលើទំព័រហ្វេសប៊ុករបស់លោកថា «ដោយសារខ្ញុំដឹងគុណសម្តេច បានជាខ្ញុំធ្វើនយោបាយប្រកួតជាមួយសម្តេចដើម្បីនាំមកនូវគោលនយោបាយដែលធានាឲ្យមានសន្តិភាព និងការអភិវឌ្ឍប្រកបដោយយុត្តិធម៌ និងនិរន្តរភាព។ កសិករ និងកូនកសិករខ្មែរភាគច្រើនត្រូវការការងារ និងមុខរបរនៅតាមមូលដ្ឋានដែលមានប្រាក់ចំណូលសមរម្យ ហើយចាស់ជរាតាមភូមិត្រូវការការជួយឧបត្ថម្ភពីរដ្ឋ»។
បន្ថែមពីនេះលោកបណ្ឌិត យ៉ង សាំងកុមារ ប្រាប់ភ្នំពេញ-ប៉ុស្តិ៍ ពីម្សិលមិញថាវាគ្មានអ្វីចម្លែកទេ ក្នុងនាមលោកនាយករដ្ឋមន្ត្រីជាបេក្ខជននាយករដ្ឋមន្ត្រីម្នាក់របស់គណបក្សប្រជាជនកម្ពុជា លោកតែងតែចង់បង្ហាញថាលោកមានប្រៀបជាងគណបក្សដទៃជាក់ស្ដែងដូចរូបលោកជាដើម។
លោកថ្លែងថា៖ «នៅលើលោកនេះអត់មានពីណាកើតមកជានាយករដ្ឋមន្ត្រីទេ។ ម្នាក់ៗត្រូវឆ្លងកាត់បទពិសោធដឹកនាំ ដូចគាត់អ៊ីចឹងក៏ឆ្លងកាត់ជាកូនទាហាន បន្ទាប់មកមេទ័ព បន្ទាប់មកទៅជារដ្ឋមន្ត្រីក្រសួងការបរទេស។ គាត់រៀនបណ្ដើរ ធ្វើបណ្តើរ អ៊ីចឹងរហូតដល់គាត់សព្វថ្ងៃធ្វើជានាយករដ្ឋមន្ត្រី។ ខ្ញុំក៏ដូចគ្នាដែរ ខ្ញុំចាប់ផ្តើមពីអ្នកដាំបន្លែចាប់ផ្តើមពីប្រធានអង្គការ ដឹកនាំសហគមន៍រាប់ពាន់ទូទាំងប្រទេសដែលបានចែករំលែកការងារកន្លងមកក៏ខ្ញុំរៀនបណ្ដើរធ្វើបណ្ដើរ ខ្ញុំមានបទពិសោធគួរសមដែរក្នុងការងារដឹកនាំមនុស្ស»។
លោក អ៊ូ ច័ន្ទរ័ត្ន អតីតតំណាងរាស្ត្រនៃអតីតគណបក្សសង្គ្រោះជាតិថ្លែងថាវាជារឿងធម្មតាសម្រាប់អ្នកនយោបាយក្នុងការប្រើសង្គ្រាមពាក្យសម្ដីដាក់គ្នា ប៉ុន្តែការឆ្លើយតបទៅវិញទៅមកអាចធ្វើឲ្យពលរដ្ឋមានការព្រួយបារម្ភ។
លោកថ្លែងថា៖ «ចៀសវាង កុំឲ្យតែមានការប្រមាថ កុំឲ្យតែមានការគំរាម តាមរយៈពាក្យសម្ដី អាហ្នឹងវាមិនមានអីប្លែកទេ បើសិនជាយើងមានការឆ្លើយតបទៅវិញទៅមក។ ប៉ុន្តែអ្នកនយោបាយយើង បើមានឆ្លើយតបទៅវិញទៅមក ជួនកាលធ្វើឲ្យក្តៅស្លឹកត្រចៀក តែក្ដៅស្លឹកត្រចៀកមានការខឹងគុំកួន អាចឈានទៅដល់ការប្រមាថ និងឈានដល់ការគំរាម។ ការប្រមាថ ការគំរាមគ្នាទៅវិញទៅមកមិនចំណេញអ្វីទេ តែធ្វើឲ្យពលរដ្ឋមានការព្រួយបារម្ភទៅវិញទេ»។
លោក មាស នី អ្នកវិភាគនយោបាយចាត់ទុកវោហារស័ព្ទរបស់លោក ហ៊ុន សែន និងលោក យ៉ង សាំងកុមារ ទៅនឹង «អាយ៉ៃឆ្លើយឆ្លង» ដែលបង្កទៅជារឿងធំ បើនៅបន្តមានការឆ្លើយឆ្លង ហើយថាការចាត់ទុកលោក សាំងកុមារ ថាមិនអាចគ្រប់គ្រងប្រទេសបានគឺជារឿងមើលស្រាលបណ្ឌិតកសិកម្មរូបនេះ ដែលជាស្ថាបនិកអង្គការសេដាកដ៏ល្បីល្បាញ។
លោកថ្លែងថា៖ «វាហាក់ដូចជាមើលស្រាលទៅដល់កូនខ្មែរជំនាន់ក្រោយ ដែលជារឿងសំខាន់។ សម្រាប់អាយ៉ៃឆ្លងឆ្លើយគ្នា ខ្ញុំមិនចង់ធ្វើអត្ថាធិប្បាយ ដោយសារតែអាយ៉ៃនេះមានតាំងពីដើមហើយអាយ៉ៃនេះ អ៊ីចឹងអត់បានយូរទេ។ បើមានអ្នកច្រៀងបន្តទៀតអាចទៅជារឿងធំ»៕
