.jpg)
លោកនាយករដ្ឋមន្ត្រី ហ៊ុន សែន និងលោក ហេង សំរិន លែងព្រាបក្នុងពិធីអបអរសាទរខួបលើកទី ៤១ ឆ្នាំនៃទិវាជ័យជម្នះ ៧ មករា កាលពីថ្ងៃម្សិលមិញ។ ហុង មិនា
ភ្នំពេញៈ លោកនាយករដ្ឋមន្ត្រី ហ៊ុន សែន ថ្លែងថាកម្ពុជាបានប្រែក្លាយពីវាលពិឃាតនៃរបបប្រល័យពូជសាសន៍ពីសមរភូមិនៃសង្គ្រាមដ៏រ៉ាំរ៉ៃពីទឹកដីដែលគ្មានសេរីភាពពីការបែកបាក់ជាតិ បែងចែកទឹកដី និងពីគំនរផេះផង់ ទៅជាទឹកដីប្រកបដោយសន្តិភាព ស្ថិរភាព សេរីភាព ប្រជាធិបតេយ្យ នីតិរដ្ឋ និងបាននិងកំពុងអភិវឌ្ឍដ៏ខ្លាំងក្លាលើគ្រប់វិស័យធ្វើឲ្យប្រជាជនបានរស់នៅយ៉ាងសុខសាន្ត។
ការថ្លែងរបស់លោក ហ៊ុន សែន ធ្វើឡើងនៅព្រឹកថ្ងៃអង្គារទី ៧ ខែមករា ក្នុងពិធីអបអរសាទរខួប ៤១ ឆ្នាំ ថ្ងៃរស់រានមានជីវិតជាថ្មី ក្រោយពីផ្តួលរំលំរបបវាលពិឃាតខ្មែរក្រហមកាលពីថ្ងៃទី ៧ មករា ឆ្នាំ ១៩៧៩។ ពិធីនេះមានការចូលរួមពីមន្ត្រីជាន់ខ្ពស់គណបក្សប្រជាជន មន្ត្រីទូត អង្គការ មន្ត្រីគណបក្សនយោបាយ សមាគមផ្សេងៗទៀត និងប្រជាពលរដ្ឋខ្មែរប្រមាណជាង ៣ ម៉ឺននាក់នៅលើបរិវេណមជ្ឈមណ្ឌលកោះពេជ្រ។
នាយករដ្ឋមន្ត្រីដែលត្រូវបានគេហៅថាជាបុរសខ្លាំង និងជាប្រធានគណបក្សប្រជាជនកម្ពុជាក៏បានលើកឡើងថា រាល់ការប៉ុនប៉ងរបស់សមាសភាពអាក្រក់ទាំងឡាយដែលមានបំណងផ្លាស់ប្តូររបបនយោបាយនៅកម្ពុជាតាមរយៈវិធានការដែលផ្ទុយពីរដ្ឋធម្មនុញ្ញ និងគោលការណ៍លទ្ធិប្រជាធិបតេយ្យត្រូវបរាជ័យទាំងស្រុងក្រោមចំណាត់ការដ៏ម៉ឺងម៉ាត់របស់រាជរដ្ឋាភិបាល និងកម្លាំងសាមគ្គីរបស់ប្រជាជន។ លោកក៏បានសម្តែងការប្ដេជ្ញាការពារ អធិបតេយ្យជាតិ ទោះស្ថិតក្នុងកាលៈទេសៈណាក៏ដោយដែលមានការប៉ុងប៉ងធ្វើឲ្យកម្ពុជាឃ្លាតចេញពីមាគ៌ា ប្រជាធិបតេយ្យពីបណ្តាប្រទេសណាមួយ។
លោក ហ៊ុន សែន ថ្លែងថាបច្ចុប្បន្ននេះទោះបីប្រជាជនកម្ពុជាបាននិងកំពុងរស់នៅយ៉ាងសុខដុមរមនាក្រោមពន្លឺនៃសន្តិភាព និងការអភិវឌ្ឍក្តីក៏ប្រជាជនកម្ពុជានៅតែចងចាំជានិច្ចនូវអតីតកាលដ៏ឈឺចាប់ និងខ្មៅងងឹតបំផុតដែលបណ្តាលមកពីភ្លើងសង្គ្រាម និងអំពើប្រល័យពូជសាសន៍ដ៏សាហាវយង់ឃ្នងបំផុត។
លោកបន្ថែមថារដ្ឋប្រហារថ្ងៃទី ១៨ មីនា ឆ្នាំ ១៩៧០ របស់ពួក លន់ នល់ បានធ្វើឲ្យមាតុភូមិកម្ពុជាដែលជាកោះសន្តិភាពធ្លាក់ចូលក្នុងភ្លើងសង្គ្រាមពេញទំហឹងដែលបានដុតបំផ្លាញមាតុភូមិដ៏ស្រស់ស្អាត និងបង្កទុក្ខសោក និងការបាត់បង់ដែលពុំអាចគណនាបាន។ បន្ទាប់ពីសង្គ្រាម ៥ ឆ្នាំ កម្ពុជាបានបន្តធ្លាក់ចូលក្នុងគ្រោះមហន្តរាយប្រល័យពូជសាសន៍ថែមទៀតដែលបង្កឡើងដោយ ពួកឃាតករ ប៉ុល ពត ធ្វើឲ្យមាតុភូមិកម្ពុជាត្រូវបំផ្លាញខ្ទេចខ្ទីដល់ចំណុចសូន្យ។ លោកបន្តថា ប្រជាជនកម្ពុជាជាង ៣ លាននាក់ត្រូវបានសម្លាប់រង្គាលយ៉ាងព្រៃផ្សៃបំផុត ឯអ្នកនៅរស់ក៏រង់ចាំតែពេលត្រូវគេយកទៅសម្លាប់ប៉ុណ្ណោះ។
លោក ហ៊ុន សែន និងថ្នាក់ដឹកនាំក្នុងពិធីប្រារព្ធខួប ៤១ ឆ្នាំនៃការផ្តួលរំលំរបបខ្មែរក្រហមម្សិលមិញនៅកោះពេជ្រ។ហុង មិនា
លោកបញ្ជាក់ថា៖ «យើងទាំងអស់គ្នា ដែលជាអ្នករងគ្រោះពីសង្គ្រាម និងពីអំពើប្រល័យពូជសាសន៍មានមោទនភាពជាទីបំផុតដែលបានរួមសាមគ្គីគ្នាបង្កើតបាននូវរាល់សមិទ្ធផលជាប្រវត្តិសាស្ត្រដែលធ្វើឲ្យទឹកដីកម្ពុជាមានការផ្លាស់ប្តូរទាំងស្រុងដែលយើងមិនអាចស្មានដល់»។
លោកនាយករដ្ឋមន្ត្រីថ្លែងថា៖ «កម្ពុជាបានប្រែក្លាយពីវាលពិឃាតនៃរបបប្រល័យពូជសាសន៍ពីសមរភូមិនៃសង្គ្រាមដ៏រ៉ាំរ៉ៃពីទឹកដីដែលគ្មានសេរីភាពពីការបែកបាក់ជាតិ និងបែងចែកទឹកដី និងពីគំនរផេះផង់ទៅជាទឹកដីប្រកបដោយសន្តិភាព ស្ថិរភាព សេរីភាព ប្រជាធិបតេយ្យ នីតិរដ្ឋ និងកំពុងអភិវឌ្ឍដ៏ខ្លាំងក្លាលើគ្រប់វិស័យធ្វើឲ្យប្រជាជនបានរស់នៅយ៉ាងសុខសាន្ត និងប្រកបដោយក្តីសង្ឃឹមចំពោះអនាគតរបស់ខ្លួននៅក្រោមដំបូលរដ្ឋធម្មនុញ្ញ និងម្លប់ដ៏ត្រជាក់នៃអង្គព្រះមហាក្សត្រជាទីសក្ការៈដ៏ខ្ពង់ខ្ពស់បំផុត»។
លោកបន្ថែមថា៖ «ប្រជាជនកម្ពុជាបានប្រសិទ្ធនាមជ័យជម្នះ ៧ មករា ថាជាថ្ងៃកំណើតទី ២ របស់ខ្លួន ហើយថា បើគ្មានជ័យជម្នះ ៧ មករា យើងពិតជាគ្មានអ្វីៗទាំងអស់នៅថ្ងៃនេះ។ ជ័យជម្នះ ៧ មករា ជារបស់ប្រជាជនកម្ពុជាគ្រប់រូប និងជារបស់មនុស្សជាតិទាំងអស់ដែលស្រឡាញ់សន្តិភាព សេរីភាព និងយុត្តិធម៌។ នេះជាសច្ចធម៌ប្រវតិ្តសាស្ត្រ»។
លោក ហួត ហៃ អភិបាលរងរាជធានីភ្នំពេញថ្លែងទៅកាន់មហាជនដែលបានចូលរួមក្នុងពិធីនោះថា ៤១ ឆ្នាំក្រោមការដឹកនាំរបស់គណបក្សប្រជាជនកម្ពុជា និងដែលមានលោក ហ៊ុន សែន ជាអគ្គមគ្គុទេសក៍បានធ្វើឱ្យប្រទេសកម្ពុជា មានការប្រែប្រួល និងផ្លាស់ប្តូរពីការបែកបាក់ និងសង្គ្រាមមកមានសន្តិភាព ឯកភាពជាតិ ឯកភាពទឹកដី។ ផ្លាស់ប្តូរពីទឹកដីមរណៈមកមានជីវិតរស់ឡើងវិញ មានសេរីភាព ប្រជាធិបតេយ្យ សិទ្ធិមនុស្ស នីតិរដ្ឋ និងអភិវឌ្ឍន៍ និងផ្លាស់ប្តូរពីសង្គមធ្លាប់ឯកោ ធ្លាប់គេប្រមាថ មកជាសង្គមមានកិត្តិយស ស្មើភាព និងស្មើសិទ្ធិជាមួយបណ្តាប្រទេសនានាលើសកលលោក។
លោកថ្លែងថា៖ «អំពើមិនគប្បី និងអំពើរមិលគុណទៅលើថ្ងៃជ័យជម្នះ៧មករា ពិតជាត្រូវបាបកម្មតាមផ្តន្ទាមិនខានឡើយ។ ក្នុងកាលវេលាកន្លងមកធ្លាប់បានបញ្ជាក់រួចហើយថា បណ្តាឧបាយកលដែលចង់បំផ្លាញនូវរាល់សមិទ្ធផលសង្គមជាតិដែលជាផ្លែផ្កាដ៏ពិសិដ្ឋរបស់ថ្ងៃជ័យជម្នះ៧មករា គឺសុទ្ធតែត្រូវទទួលជ័យជម្នះជាបន្តបន្ទាប់»។
លោកបន្ថែមថា៖ «យ៉ាងណាមិញ ការបរាជ័យនៃការរៀបចំផែនការធ្វើបដិវត្តន៍ពណ៌ និងថ្មីៗនេះការបរាជ័យនៃការរៀបចំផែនការធ្វើរដ្ឋប្រហារថ្ងៃ ៩ វិច្ឆិកា ឆ្នាំ ២០១៩ របស់ពួកប្រឆាំងកាន់តែបានបង្ហាញច្បាស់អំពីភាពរឹងមាំនៃស្មារតី៧មករា ដែលបានប្តូរផ្តាច់ការពារផលប្រយោជន៍ជាតិ និងប្រជាជនដែលជាក់ស្តែងយើងការពារបានរឹងមាំ ឯករាជ្យ អធិបតេយ្យ បូរណភាពដែនដី សន្តិភាព ប្រជាធិបតេយ្យ និងការអភិវឌ្ឍមិនឱ្យបាត់បង់ឡើយ»។
លោក ឡឹប សាលឹត ជនជាតិចាម ដែលមានវ័យ ៧០ ឆ្នាំដែលបានចូលរួមក្នុងពិធីនោះថ្លែងថា នៅក្នុងអំឡុងសម័យខ្មែរក្រហមលោកបានបាត់បងប្អូនដល់ទៅ ៥ នាក់ដោយសារតែខ្មែរក្រហមបង្អត់អាហារ។ ពួកគេបានធ្វើទារុណកម្ម និងបង្ខំឲ្យជនជាតិចាមហូបសាច់ជ្រូកដែលជាការរំលោភទៅដល់សាសនាអ៊ិស្លាម។ លោកអះអាងថា លោកបានរស់រានមានជីវិតដោយសារតែថ្ងៃ៧មករា។
លោកបញ្ជាក់ថា៖ «គេបានបង្អត់ និងគេធ្វើទារុណកម្មហើយគេបង្ខំឲ្យយើងហូបបបរសាច់ជ្រូកដែលយើងមិនអាចហូបកើត ពេលដែលយើងហូប យើងក្អួតមកវិញ ហើយពេលខ្លះយើងហូបបណ្តើរយំបណ្តើរ។ ១ ពេលគេឲ្យយើងហូបបបរ ៣ វែក។ ពេលយប់មកដល់យើងតែងតែគិតថាគេនឹងយកយើងទៅសម្លាប់ យើងគ្មានសង្ឃឹមថារស់នោះទេ តែសំណាង និងនឹកស្មានមិនដល់អាចរស់បានដល់ពេលនេះ»។
ក្នុងថ្ងៃដែលកម្ពុជាប្រារព្ធខួប ៤១ ឆ្នាំនៃការផ្តួលរំលំរបបខ្មែរក្រហម ស្ថានទូតសហរដ្ឋអាមេរិកប្រចាំកម្ពុជាបានបង្ហាញសារគាំទ្រចំពោះការផ្សះផ្សាជាតិ ដើម្បីធានាថាសោកនាដកម្មបែបនេះនឹងមិនកើតឡើងវិញ ហើយថាប្រជាជនកម្ពុជាបានបង្ហាញភាពរឹងមាំអស់ជាច្រើនទសវត្សរ៍ចាប់តាំងពីសម័យដ៏ខ្មៅងងឹត និងការខិតខំប្តេជ្ញាចិត្តបាននាំប្រទេសមួយនេះមកដល់សព្វថ្ងៃ។
តាមរយៈហ្វេសប៊ុករបស់ស្ថានទូតសហរដ្ឋអាមេរិកប្រចាំកម្ពុជាបញ្ជាក់ថា៖ «ថ្ងៃនេះគឺជាការចងចាំប្រជាជនកម្ពុជាជិត ២ លាននាក់បានបាត់បង់ជីវិត ហើយមានផលប៉ះពាល់ជាច្រើនរាប់មិនអស់នៅក្នុងរបបប្រល័យពូជសាសន៍ខ្មែរក្រហម។ សហរដ្ឋអាមេរិកនៅតែប្តេជ្ញាចិត្តយ៉ាងមុតមាំក្នុងការគាំទ្រដល់ប្រជាជន កម្ពុជា និងសេចក្តីប្រាថ្នារបស់ពួកគេសម្រាប់ការផ្សះផ្សាជាតិ វិបុលភាព ប្រជាធិបតេយ្យ និងឯករាជភាព ហើយដើម្បីធានាថា សោកនាដកម្មបែបនេះនឹងមិនកើតឡើងវិញ»៕
វីដេអូ៖
