.jpg)
លោក ហ៊ុន សែន នាយករដ្ឋមន្ត្រីកម្ពុជា នាពេលកន្លងមក។ ហេង ជីវ័ន
ភ្នំពេញៈ លោក ហ៊ុន សែន នាយករដ្ឋមន្ត្រីកម្ពុជាបានថ្លែងទៅកាន់អង្គការសហប្រជាជាតិថា ប្រទេសក្រីក្រ គឺជាមុខព្រួញនៃការដាក់ទណ្ឌកម្មចំពោះដំណើរការកសាងជាតិរបស់ខ្លួន ហើយការប្រកួតប្រជែងភូមិសាស្ត្រនយោបាយរបស់ប្រទេសមហាអំណាចបានរាំងខ្ទប់សិទ្ធិស្វ័យសម្រេចរបស់ប្រទេសកំពុងអភវិឌ្ឍន៍ក្នុងការជ្រើសរើសឯករាជ្យ និងដៃគូមិត្តភាព។
លោកបានថ្លែងដូច្នេះនៅក្នុងសារជាវីដេអូដែលថតទុកមុន ដែលត្រូវបានចាក់ផ្សាយក្នុងកិច្ចប្រជុំកម្រិតខ្ពស់ដើម្បីរំឭកខួបលើកទី៧៥ របស់អង្គការសហប្រជាជាតិនៅសាលប្រជុំនៃមហាសន្និបាត អ.ស.ប នៅទីក្រុងញូវយ៉ក កាលពីថ្ងៃចន្ទ ទី ២១ ខែកញ្ញា។
លោកមានប្រសាសន៍ថា បន្ទាប់ពីភាពខ្ទេចខ្ទាំក្នុងសង្គ្រាមលោកលើកទី ២ មេដឹកនាំពិភពលោកបានប្រកាសថា ការប្រើប្រាស់នូវយន្តការអន្តរជាតិសម្រាប់លើកស្ទួយសេដ្ឋកិច្ច និងការរីកចម្រើនក្នុងសង្គមសម្រាប់ប្រជាជនគ្រប់រូប គឺជាមធ្យោបាយជាសារវន្តក្នុងការធានានូវសុខសន្តិភាព ការលើកកម្ពស់សិទ្ធិមនុស្ស និងធានានូវវឌ្ឍនភាពសង្គម។ ការប្ដេជ្ញា និងយន្តការនេះក៏មានចែងនៅក្នុងបុព្វកថារបស់ អ.ស.ប ផងដែរ។ ប៉ុន្តែជាក់ស្ដែងវាកំពុងរងការបំផ្លិចបំផ្លាញ។
លោកបន្តថា ពហុភាគីនិយមកំពុងទទួលរងការវាយប្រហារយ៉ាងដំណំ ពិសេសគឺដោយសារទង្វើជាតិនិយមជ្រុល និងគាំពារនិយមរបស់ប្រទេសមហាអំណាចខ្លះលើសកលលោក។ លោកមានប្រសាសន៍ដូច្នេះថា៖ «ជំនួសការទទួលបានការគាំទ្រជារឿយៗប្រទេសកំពុងអភិវឌ្ឍន៍តែងត្រូវបានប្រែក្លាយជាមុខព្រួញនៃការដាក់ទណ្ឌកម្ម ចំពោះកិច្ចដំណើរការប្រឹងប្រែងកសាងជាតិរបស់ខ្លួន ដែលមិនបានល្អឥតខ្ចោះស្របតាមស្តង់ដារបស់ប្រទេសអភិវឌ្ឍន៍ ខណៈដែលសមត្ថភាពនៃប្រទេសទន់ខ្សោយទាំងនោះនៅមានការខ្វះខាតក្នុងកិច្ចការពារសិទ្ធិមនុស្សជាមូលដ្ឋាន ដូចជាសិទ្ធិទទួលបានសន្តិភាព សិទ្ធិរស់រានមានជីវិត សិទ្ធិទទួលបានអាហារ ទីជម្រក និងការងារជាដើម»។
លោកបន្តថា ទាំងនេះគឺជាមូលហេតុមួយដែលចូលរួមចំណែកក្នុងការបំផ្លិចបំផ្លាញយ៉ាងធ្ងន់ធ្ងរដល់ការខិតខំប្រឹងប្រែង និងអភិវឌ្ឍជាតិរបស់ប្រទេសក្រីក្រតាមរយៈការធ្វើនយោបាយយូបនីយកម្មលើបញ្ហាសិទ្ធិមនុស្ស បម្រើឱ្យរបៀបវារៈភូមិសាស្ត្រនយោបាយរបស់ប្រទេសអភិវឌ្ឍន៍មួយចំនួន។
លោកមានប្រសាសន៍បន្តថា៖ «ការប្រកួតប្រជែងរវាងមហាអំណាចបានបង្កជាការរាំងខ្ទប់ដល់សិទ្ធិស្វ័យសម្រេចរបស់ប្រទេសកំពុងអភិវឌ្ឍន៍ក្នុងការជ្រើសរើសយកឯករាជ្យ និងអធិបតេយ្យជាមាគ៌ាសម្រាប់ការអភិវឌ្ឍក៏ដូចជាការជ្រើសរើសដៃគូមិត្តភាព ដើម្បីសន្តិភាព និងការអភិវឌ្ឍ។ ខ្ញុំគិតថា នេះជាឧបសគ្គពិតប្រាកដ៏ចម្បងមួយរបស់ប្រទេសកំពុងអភិវឌ្ឍន៍ក្នុងការធ្វើឱ្យសម្រេចបាននូវគោលដៅរបៀបវារៈឆ្នាំ ២០៣០ បន្ថែមលើបញ្ហាប្រឈមបន្ទាន់ទាំងឡាយដែលបង្កដោយការរាតត្បាតនៃជំងឺកូវីដ១៩ និងផលប៉ះពាល់នៃជំងឺនេះមកលើសង្គម និងសេដ្ឋកិច្ច»។
កម្ពុជាជឿជាក់ថា បណ្ដារដ្ឋជាសមាជិកត្រូវតែអនុវត្តទៅតាមបទប្បញ្ញត្តិដែលមានចែងក្នុងសេចក្ដីប្រកាសស្ដីពីការរំឭកខួបទី ៧៥ នៃអង្គការសហប្រជាជាតិ ដែលបានអនុម័តក្នុងកិច្ចប្រជុំនេះ។ ជោគជ័យក្នុងការអនុវត្តគោលដៅប្រកបដោយមហិច្ឆតានេះនឹងត្រួសត្រាយផ្លូវសម្រាប់មនុស្សជំនាន់ក្រោយឱ្យអាចរស់នៅបានក្នុងវិបុលភាព និងសង្គមមួយប្រកបដោយបរិយាប័ន្ន និងភាពសុខដុមរមនា។ នេះបើតាមការលើកឡើងរបស់លោក ហ៊ុន សែន។
លោកថា សហគមន៍អន្តរជាតិពិតជាទាមទារចង់បានអង្គការសហប្រជាជាតិមួយរឹងមាំដែលមានសមត្ថភាពពេញលេញក្នុងការដោះស្រាយគ្រប់បញ្ហាប្រឈមដែលកើតមាននៅក្នុងតថភាពនៃសតវត្សរ៍ទី ២១។ កម្ពុជាទទួលស្គាល់តួនាទីស្នូលនៃប្រព័ន្ធពហុភាគីនិយមក្នុងការដោះស្រាយបញ្ហាប្រឈមសកលដ៏ស្មុគស្មាញដែលពិភពលោកកំពុងជួបប្រទះនាពេលបច្ចុប្បន្ន។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាថ្លែងពីម្សិលមិញថាការលើកឡើងរបស់លោក ហ៊ុន សែន ឆ្លុះបញ្ចាំងពីភាពជាក់ស្ដែងដែលប្រទេសមហាអំណាចមួយចំនួនអនុវត្តទៅលើប្រទេសក្រីក្ររួមទាំងកម្ពុជាផង។ លោកសង្កេតឃើញថា ប្រទេសមហាអំណាច ប្រើបញ្ហាសិទ្ធិមនុស្ស ប្រជាធិបតេយ្យជាឧបករណ៍ដើម្បីលាបពណ៌ និងវាយប្រហារប្រទេសមួយទៀត បន្ថែមទៅលើវិធានការពាណិជ្ជកម្ម ដូចជាការដកការអនុគ្រោះពន្ធជាដើម។
លោកថា៖ «ដូចកម្ពុជាអ៊ីចឹង នៅពេលយើងមានទំនាក់ទំនងល្អជាមួយចិន ដែលផ្ដល់ផលប្រយោជន៍ខាងផ្នែកសេដ្ឋកិច្ច នយោបាយយុទ្ធសាស្ត្រពាណិជ្ជកម្មផ្សេងៗ យើងឃើញប្រទេសលោកខាងលិច មានសហរដ្ឋអាមេរិក និងសហភាពអឺរ៉ុបជាដើម គេមានវិធានការផ្សេងៗ ដើម្បីធ្វើម៉េចឱ្យទំនាក់ទំនងរបស់យើងជាមួយចិនមានភាពល្អក់កករ។ គេទាញយើងមិនឱ្យយើងដើរតាមខ្សែបន្ទាត់នយោបាយការបរទេសមួយដែលបម្រើផលប្រយោជន៍ឱ្យប្រជាពលរដ្ឋ ប្រទេសជាតិ។ គេចង់ឱ្យយើងអនុវត្តគោលនយោបាយមួយដែលដើរតាមខ្សែបន្ទាត់របៀបវារៈនយោបាយរបស់ពួកគេដែលគេគូសវាសដើម្បីមានឥទ្ធិពលខាងភូមិសាស្ត្រនយោបាយរបស់គេ»។
លោកបន្តថា វិធានការនានារបស់ប្រទេសមហាអំណាចមកលើប្រទេសក្រីក្រ ដូចជាការផ្អាកប្រព័ន្ធអនុគ្រោះពន្ធ ២០ ភាគរយ ដោយសហភាពអ៊ឺរ៉ុបសម្រាប់កម្ពុជា និងការដាក់ទណ្ឌកម្មលើក្រុមហ៊ុនឯកជនមួយនៅកម្ពុជាដោយសហរដ្ឋអាមេរិកតិច ឬច្រើនបានរួមចំណែកបង្អាក់ដំណើរការអភិវឌ្ឍនៃប្រទេសកម្ពុជាក៏ដូចជាគោលដៅអភិវឌ្ឍន៍ប្រកបដោយចីរភាពរបស់អង្គការសហប្រជាជាតិឆ្នាំ ២០៣០ និង ២០៥០៕
វីដេអូ៖
