ភ្នំពេញៈ លោកនាយករដ្ឋមន្ត្រី ហ៊ុន សែន កាលពីថ្ងៃម្សិលមិញបានទទួលពានរង្វាន់ភាពជាអ្នកដឹកនាំ និងអភិបាលកិច្ចល្អពីសហព័ន្ធសន្តិភាពសកល (UPF) ក្នុងកិច្ចប្រជុំកំពូលអាស៊ីប៉ាស៊ីហ្វិកលើកទី ២ នៅវិមានសន្តិភាពដែលប្រគល់ដោយសហស្ថាបនិកសហព័ន្ធសន្តិភាពសកល លោកស្រី Hak Ja Han Moon បន្ទាប់ពីលោកបញ្ចប់ការថ្លែងសុន្ទរកថាបើកកិច្ចប្រជុំ។
លោក ផៃ ស៊ីផាន អ្នកនាំពាក្យរាជរដ្ឋាភិបាលប្រាប់ភ្នំពេញប៉ុស្តិ៍ពីម្សិលមិញថា អង្គការ UPF បានវាយតម្លៃខ្ពស់ចំពោះគុណវឌ្ឍិរបស់លោក ហ៊ុន សែន ក្នុងន័យអភិបាលកិច្ចល្អដែលនាំឱ្យមានកំណើនសេដ្ឋកិច្ច។ ផលិតផលសរុបក្នុងស្រុក (GDP) ឈរនៅលេខរៀងទី ១ ប្រចាំតំបន់ដែលមានកំណើនខ្ពស់ជាងគេ។ ក្នុងអភិបាលកិច្ចល្អនេះដែរមានការបែងចែកផលដោយសមធម៌ដល់គ្រប់ស្រទាប់វណ្ណៈនៅកម្ពុជាដូចជាស្ត្រី ស្ត្រីមានផ្ទៃពោះ កុមារក៏ដូចជាចាស់ជរាជាដើម។
លោក ស៊ីផាន ថ្លែងថា៖ «ក្រៅពីកិច្ចការងារមួយចំនួនធំហ្នឹង យើងឃើញថា លោកទទួលបានអ្វី ដែលជាលទ្ធផលនៃសន្តិភាព និងស្ថិរភាព។ បើមិនមានអភិបាលកិច្ចល្អទេ ស្រុកមានសង្គ្រាម ហើយ។ ដូច្នេះនៅក្នុងចន្លោះហ្នឹង សម្តេច (ហ៊ុន សែន) លោកទទួលបានការវាយតម្លៃខ្ពស់ក្នុងការគាំទ្រ បានផ្តល់មេដាយជូនលោក។ មិនត្រឹមតែប៉ុណ្ណឹង គេក៏ចង់រៀនសូត្រអំពីកម្ពុជាក្នុងការដណ្តើមយកសន្តិភាពយកមកប្រគល់ជូនប្រជាពលរដ្ឋវិញ»។
លោក Robert S. Kittel អ្នកនាំពាក្យ UPF បានប្រាប់អ្នកកាសែតនៅឯកិច្ចប្រជុំនោះថា គុណវឌ្ឍិដែលលោកនាយករដ្ឋមន្ត្រី ហ៊ុន សែន ទទួលបានពានរង្វាន់ ព្រោះលោក ហ៊ុន សែន គឺជានាយករដ្ឋមន្ត្រីកម្ពុជា។ នេះគឺវាគ្រប់គ្រាន់ហើយ ហើយជាសមិទ្ធផលធំធេងណាស់។
កម្ពុជាធ្វើជាម្ចាស់ផ្ទះនៃកិច្ចប្រជុំនេះក្រោមប្រធានបទ «ការឆ្លើយតបចំពោះបញ្ហាប្រឈមគន្លឹះនាពេលបច្ចុប្បន្ន សន្ដិភាព ការផ្សះផ្សាជាតិ ការពឹងពាក់គ្នាទៅវិញទៅមក វិបុលភាពទៅវិញទៅមក និងគុណតម្លៃជាសកល»។ រដ្ឋាភិបាលប្រកាសថា កិច្ចប្រជុំនេះមានការចូលរួមពីប្រតិភូជាង ៨៦០ នាក់ មកពី ៤០ ប្រទេស រួមមានមេដឹកនាំរដ្ឋាភិបាល សមាជិកសភា មេដឹកនាំស្ដ្រី យុវជន និងសាសនារួមទាំងតំណាងសារព័ត៌មាន សាកលវិទ្យាល័យ អង្គការសង្គមស៊ីវិល រួមទាំងពាណិជ្ជករ។
UPF គឺជាបណ្តាញបុគ្គល និងអង្គការអន្តរជាតិ និងអន្តរសាសនាដែលរួមមានតំណាងសាសនា រដ្ឋាភិបាល សង្គមស៊ីវិល និងវិស័យឯកជន។ អង្គការនេះប្តេជ្ញាសម្រេចឱ្យបាននូវសន្តិភាពពិភពលោក។ ក្នុងនាមជាអង្គការក្រៅរដ្ឋាភិបាល ជាអ្នកពិគ្រោះយោបល់ទូទៅជាមួយក្រុមប្រឹក្សាសេដ្ឋកិច្ច និងសង្គមរបស់អង្គការសហប្រជាជាតិនោះ UPF គាំទ្រការងាររបស់ អសប។ ជាពិសេសក្នុងវិស័យកសាងសន្តិភាពអន្តរជំនឿ ការអប់រំសន្តិភាព និងការពង្រឹងអាពាហ៍ពិពាហ៍គ្រួសារ។
ពានរង្វាន់ភាពជាអ្នកដឹកនាំ និងអភិបាលកិច្ចល្អ ទទួលស្គាល់ចំពោះបុគ្គលដែលបានបង្ហាញគោលការណ៍ដឹកនាំឆ្នើមរួមមានយុត្តិធម៌ ភាពស្មោះត្រង់ គណនេយ្យភាព តម្លាភាព និងបរិយាប័ន្ន។ ការផ្តល់ពានរង្វាន់នេះ ផ្អែកលើគុណតម្លៃស្នូលដែលរស់នៅដើម្បីប្រយោជន៍អ្នកដទៃក្នុងការបម្រើព្រះ និងមនុស្សជាតិ លើកកម្ពស់ភាពសុខដុម និងកិច្ចសហប្រតិបត្តិការសម្រាប់ជាតិសាសន៍ សាសនា ជាតិ វប្បធម៌ ពង្រឹងអាពាហ៍ពិពាហ៍ និងក្រុមគ្រួសារដែលជាសាលានៃក្តីស្រឡាញ់ និងបញ្ជាក់ពីតម្លៃស្មារតីជាសកល។
យោងតាមគេហទំព័ររបស់ UPF សម្តេចនរោត្តម សិរីវុឌ្ឍ អតីតឧបនាយករដ្ឋមន្ត្រី និងជាឧត្តមប្រឹក្សាផ្ទាល់ ព្រះមហាក្សត្រ និងលោកស្រី Margaret Thatcher អតីតនាយករដ្ឋមន្ត្រីចក្រភពអង់គ្លេស (1979-90) ព្រមទាំងបុគ្គលឆ្នើមប្រមាណជាង ៦០ នាក់ផ្សេងទៀតក៏បានទទួលពានរង្វាន់ភាពជាអ្នកដឹកនាំ និងអភិបាលកិច្ចល្អពី UPF នេះផងដែរ៕