.jpg)
លោក គង់ វិបុល អគ្គនាយកនៃ អគ្គនាយកដ្ឋានពន្ធដារ។
ភ្នំពេញៈ លោក នាយករដ្ឋមន្ត្រី ហ៊ុន សែន និងអគ្គនាយកដ្ឋានពន្ធដារ លោក គង់ វិបុល បានចោទប្រកាន់សហរដ្ឋអាមេរិកថា កំពុងភូតភរអំពីការកាត់ជំនួយមកកម្ពុជាដោយអះអាងថា កម្មវិធីមួយក្នុងចំណោមកម្មវិធីទាំងនោះមិនមានទេចាប់តាំងពីឆ្នាំ ២០១៦ មក។
នៅក្នុងពិធីជួបជុំកម្មកររោងចក្រនៅតំបន់សេដ្ឋកិច្ចពិសេសខេត្តព្រះសីហនុ កាលពីព្រឹកថ្ងៃសៅរ៍លោក ហ៊ុន សែន បានថ្លែងថាអាមេរិកធ្លាប់បានផ្តល់ជំនួយបច្ចេកទេសមួយចំនួនដល់អគ្គនាយកដ្ឋានពន្ធដារ ប៉ុន្តែបានបញ្ចប់តាំងពីចុងឆ្នាំ ២០១៦ ហើយលោកបានចោទឯកអគ្គរដ្ឋទូតអាមេរិកប្រចាំនៅកម្ពុជាលោក William Heidt ថា ភូតភរ មួលបង្កាច់ ដើម្បីកេងចំណេញនយោបាយឲ្យអតីតគណបក្សសង្គ្រោះជាតិ និងស្នើឲ្យមានការបំភ្លឺករណីការប្រកាសកាត់ជំនួយ។
លោកបន្តថា «ប៉ុន្តែខ្ញុំចង់សួរឯកឧតុ្តមឆ្លើយឲ្យបានច្បាស់មើលតើជំនួយដែលបានបញ្ចប់តាំងពីឆ្នាំ ២០១៦ ហេតុអីបានមកប្រកាសកាត់នៅឆ្នាំ ២០១៨? បានសេចក្តីថា ខ្យល់សុទ្ធ។ ប៉ុន្តែខ្យល់នេះគឺជាកម្មវត្ថុនៃនយោបាយពិតប្រាកដណាស់...»។
លោកនាយករដ្ឋមន្ត្រីគូសបញ្ជាក់ថា៖ «នៅលើពិភពលោកនេះទើបតែមានប្រទេសអាមេរិកទេ ដែលទើបមានប្រធានាធិបតីដែលគាត់ធុញទ្រាន់នឹងការភូតកុហក។ ពីមុនគ្រាន់តែមានសារព័ត៌មានភូតកុហក តែឥឡូវមានអគ្គរដ្ឋទូតភូតកុហក...ហេតុអ្វីបានជាអគ្គរដ្ឋទូតមកប្រើប្រាស់នូវព័ត៌មានភូតកុហក ហើយសរសេរជាណូតទូតមកទៀត ហើយផ្សាយតាមវិទ្យុសំឡេងសហរដ្ឋអាមេរិក»។
លោកបន្តថា៖ «អ្វីដែលនៅពីក្រោយខ្នងពិតប្រាកដ គឺការមួលបង្កាច់ ដើម្បីបង្កើតចិត្តសាស្ត្រ ដើម្បីសម្រាប់ពួកអាងាប់ទៅ ចង់ឲ្យវារស់ឡើងវិញ។ គឺវាគ្មានផ្លូវទេ...ប្រសើរណាស់ប្រសិនបើអគ្គរដ្ឋទូត ឯកឧត្តម អាចបំភ្លឺបន្តិចបានទេ! យើងហ៊ានស៊ីហ៊ានសង ហ៊ាននិយាយសរសេរមកដោយផ្អែកលើមូលដ្ឋានអ្វី ហើយអ្នកឯងបានផ្តល់ឲ្យខ្ញុំពីអង្កាល់បានផ្តល់រួចហើយ និងបានទៅវិញបាត់ហើយ។ មានតែគោលដៅវាយប្រហារយើងតែប៉ុណ្ណោះ»។
ការលើកឡើងរបស់លោកនាយរដ្ឋមន្ត្រីនេះ ធ្វើឡើងបួនថ្ងៃក្រោយពីសហរដ្ឋអាមេរិកបានប្រកាសកាត់ ឬព្យួរជំនួយមកឲ្យប្រទេសកម្ពុជាក្នុងនោះមានជំនួយយោធា ការពង្រឹងសមត្ថភាពរដ្ឋបាលមូលដ្ឋាន និងអគ្គនាយកដ្ឋានពន្ធដារ។
មន្ត្រីអាមេរិកបានបដិសេធមិនបញ្ជាក់ថាតើ កម្មវិធីណាមួយកំពុងត្រូវបានកាត់ ដោយគ្រាន់តែថ្លែងថា ពួកគេកំពុងតម្រង់គោលដៅទៅរកផ្នែកមួយចំនួននៃរដ្ឋាភិបាលកម្ពុជាក្នុងនោះរួមទាំងអគ្គនាយកដ្ឋានពន្ធដារដែលពាក់ព័ន្ធដោយផ្ទាល់នៅក្នុងការបង្ក្រាបនយោបាយ។
នៅក្នុងលិខិតមួយទៅអគ្គនាយកដ្ឋានពន្ធដារពីរថ្ងៃបន្ទាប់ពីការប្រកាស ឯកអគ្គរដ្ឋទូតអាមេរិកប្រចាំកម្ពុជា លោក William Heidt បានថ្លែងថា៖ «អាមេរិកបានព្យួរការគាំទ្រផ្នែកកសាងសមត្ថភាពទៅ [អគ្គនាយកដ្ឋានពន្ធដារ] និងមន្ត្រីរបស់អគ្គនាយកដ្ឋាន»។
លោក គង់ វិបុល បានឆ្លើយតបនៅថ្ងៃដដែលនោះនៅក្នុងលិខិតសាធារណៈមួយ ដោយក្នុងនោះលោកថ្លែងថាកម្មវិធីជំនួយទាំងអស់ជាមួយអាមេរិកបានបញ្ចប់តាំងពីឆ្នាំ ២០១៦ ដោយលោកចង្អុលបញ្ជាក់ថាលោក William Heidt បានចូលរួមកម្មវិធីបិទគម្រោងចុងក្រោយនោះ។
លិខិតរបស់លោក វិបុល ដែលចុះថ្ងៃទី ២ ខែមីនាបានលើកឡើងថាការលើកឡើងរបស់អាមេរិក សម្រេចកាត់ផ្តាច់ជំនួយបច្ចេកទេសជូនអគ្គនាយកដ្ឋានពន្ធដារនោះគឺជារឿងមិនពិត និងមិនមានមូលដ្ឋានច្បាស់លាស់ និងភូតកុហកសាធារណជនដោយសារអគ្គនាយកដ្ឋានពន្ធដារមិនដែលបានទទួលជំនួយបច្ចេកទេស ចាប់តាំងពីខែធ្នូ ឆ្នាំ ២០១៦ ដោយបានចោទអគ្គរដ្ឋទូតអាមេរិកថា កំពុងតែព្យាយាមបង្កើតព្រឹត្តិការណ៍នយោបាយ និងក៏បានចោទវិទ្យុសំឡេងសហរដ្ឋអាមេរិក និងវិទ្យុអាស៊ីសេរីដែលបានរាយការណ៍លើព្រឹត្តិការណ៍នៃការកាត់ជំនួយនេះថាបានផ្សព្វផ្សាយព័ត៌មានមិនពិត បន្លំសាធារណមតិ។
លោក ហ៊ុន សែន បានការពារចំណាត់ការរបស់រដ្ឋាភិបាលទៅលើកាសែត The Cambodia Daily និងវិទ្យុអាស៊ីសេរី ថាពួកគេមិនបានបង់ពន្ធឲ្យរដ្ឋាភិបាលកម្ពុជា ហើយបន្ទាប់មកទៀតអាមេរិកបានប្រកាសផ្អាកជំនួយបោះឆ្នោតបន្ទាប់មកទៀតសេតវិមានបានប្រកាសកាត់បន្ថយ ឬព្យួរជំនួយមកប្រទេសកម្ពុជាក្នុងនោះមានជំនួយយោធា ការពង្រឹងសមត្ថភាពរដ្ឋបាលមូលដ្ឋាន និងអគ្គនាយកដ្ឋានពន្ធដារ ដើម្បីដាក់សម្ពាធទៅលើលោក ហ៊ុន សែន ដើម្បីឱ្យបរិយាកាសនយោបាយល្អប្រសើរឡើងវិញ។
នៅពេលទាក់ទងកាលពីម្សិលមិញលោក វិបុល បានថ្លែងថាលោកមានអារម្មណ៍ថា អយុត្តិធម៌ដែលអាមេរិកតម្រង់មករកអគ្គនាយកដ្ឋានពន្ធដារ ចំពោះការបិទកាសែតឌឹខេមបូឌាដេលី។
លោកចោទសួរថា៖ «តើពួកគេអាចកាត់ជំនួយយ៉ាងម៉េចទៅ នៅពេលមិនមានជំនួយ? មិនមានជំនួយទៀតទេ បន្ទាប់ពីឆ្នាំ ២០១៦។ [តើវាជារឿងនយោបាយឬ?] បាទ នោះហើយជាអ្វីដែលខ្ញុំឆ្ងល់ នោះហើយជាអ្វីដែលខ្ញុំសួរឯកអគ្គរដ្ឋទូត។ តើជំនួយអ្វីដែលពួកគេផ្តល់ឲ្យអគ្គនាយកដ្ឋានពន្ធដារ បន្ទាប់ពីឆ្នាំ ២០១៦?»។
លោកបញ្ជាក់ថា នៅពេលដែលលោកបានទទួលលិខិតពីឯកអគ្គរដ្ឋទូតអាមេរិកកាលពីថ្ងៃសុក្រ លោកមានការភ្ញាក់ផ្អើលដោយសារមិនដឹងថា តើពួកគេកំពុងសំដៅទៅអ្វី? លោកបានលើកឡើងថា វិទ្យុអាស៊ីសេរី និងវិទ្យុសំឡេងសហរដ្ឋអាមេរិក (VOA)«ជាមូលហេតុដែលខ្ញុំធ្វើឲ្យច្បាស់នៅក្នុងសារព័ត៌មានថា វាមិនពិត។ ព័ត៌មានក្លែងក្លាយគឺថាមិនមានជំនួយត្រូវកាត់ទេ... ខ្ញុំគ្រាន់តែបំភ្លឺទៅសាធារណជនថា នេះជាព័ត៌មានក្លែងក្លាយ...»។
ប៉ុន្តែទោះយ៉ាងណាលោក វិបុល ថ្លែងថា៖ «ខ្ញុំមិនខឹងសហរដ្ឋអាមេរិកទេ ព្រោះខ្ញុំដឹងគុណដែលពួកគេបានជួយអគ្គនាយកដ្ឋានពន្ធដារកាលពីអតីតកាល...តាមរយៈកំណែទម្រង់របស់ខ្ញុំ [អាមេរិក] រីករាយណាស់ ពួកគេបន្តរហូតដល់ឆ្នាំ ២០១៦។ ពួកគេរីករាយនឹងកំណែទម្រង់របស់យើង។ ពួកគេមិនដែលមានការត្អូញត្អែរណាមួយទេ»។
ប៉ុន្តែលោកបានចោទសួរទៀតថា៖ «[តើអ្នកគិតថា វាអយុត្តិធម៌ទេ ដែលសំដៅមករកអគ្គនាយកដ្ឋានពន្ធដារ ដោយសារការបិទកាសែតឌឹខេមបូឌាដេលី?] បាទ វាអយុត្តិធម៌ដោយសារយើងកំពុងព្យាយាមអនុវត្តច្បាប់។ យើងគឺដូចរដ្ឋបាលពន្ធដារដទៃៗទៀតក្នុងពិភពលោក។ យើងកំពុងតែអនុវត្តទៅលើក្រុមហ៊ុនដែលមិនគោរពតាមការបង់ពន្ធ...»។
អ្នកនាំពាក្យស្ថានទូតអាមេរិកលោក ArendZwartjes បានថ្លែងកាលពីម្សិលមិញថា លោកកំពុងរង់ចាំការណែនាំពីក្រសួងការបរទេសអាមេរិក និងរតនាគារអាមេរិកពីមុនពេលធ្វើអត្ថាធិប្បាយ។
នៅក្នុងសុន្ទរកថាកាលពីថ្ងៃសៅលោក ហ៊ុន សែន បានលើកឡើងដូច្នេះថា៖ «តើគោលបំណងជាក់លាក់លើបញ្ហានេះគឺជាអ្វី? ប្រហែលជាពិបាកឆ្លើយនឹងសំណួរនេះ។ ខ្ញុំមិនយល់បង្ហាញការមិនយល់។ តើអ្នកមានបំណងបង្ខូចកេរ្តិ៍ឈ្មោះប្រទេសកម្ពុជា ថាអ្នកគឺជាអ្នកផ្តល់ជំនួយ ហើយអ្នកកាត់ជំនួយ ដោយអ្នកមិនពេញចិត្តហើយនៅក្នុងលិខិតនោះក៏បានបញ្ជាក់ថា ដោយសារតែអគ្គនាយដ្ឋានពន្ធដារ គឺបានរួមចំណែកធ្វើឲ្យលទ្ធិប្រជាធិបតេយ្យដើរថយក្រោយ»។
ទោះជាយ៉ាងណាក្តីលោកបន្ថែមថាលោកនៅតែមានបំណងរក្សា «ទំនាក់ទំនងល្អ» ជាមួយអាមេរិក»៕ PS
