.jpg)
លោក ហ៊ុន សែន និងសមភាគីឡាវក្នុងជំនួបនៅវិមានសន្តិភាពពីឆ្នាំមុន។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន និងអ្នកពាក់ព័ន្ធជាង ១ ០០០ នាក់ផ្សេងទៀត នៅក្នុងព្រឹត្តិការណ៍ ៣ វិច្ឆិកា បានធ្វើតេស្តអវិជ្ជមានជាលើកទី៣ និងរង់ចាំធ្វើតេស្តលើកទី៤ ដែលជាលើកចុងក្រោយ ដើម្បីរកជំងឺកូវីដ ១៩ ខណៈកម្ពុជាបានប្រកាសផ្តល់ម៉ាស់ជាង ២ លាន និងសម្ភារវេជ្ជសាស្ត្រផ្សេងទៀតដល់ប្រទេសឡាវ ដើម្បីប្រយុទ្ធប្រឆាំងនឹងជំងឺនេះ។
សេចក្តីជូនព័ត៌មានរបស់ក្រសួងសុខាភិបាលបានឱ្យដឹងកាលពីថ្ងៃទី ១៥ ខែវិច្ឆិកា ថា សំណាកអ្នកពាក់ព័ន្ធប្រមាណ ១ ៣០០ នាក់ ដែលវិទ្យាស្ថានប៉ាស្ទ័រកម្ពុជាបានពិនិត្យធ្វើតេស្តរកវីរុសកូរ៉ូណាជាលើកទី៣ គឺមានចំនួន ១១-៩៥ សំណាកទទួលបានលទ្ធផលអវិជ្ជមាន។ ក្រសួងបន្តថា ចំណែកវត្ថុសំណាកវិភាគ ១០៥ ដែលនៅសល់គឺវិទ្យាស្ថានប៉ាស្ទ័រ បន្តពិនិត្យនៅថ្ងៃទី ១៥ វិច្ឆិកា បន្តទៀត។
ក្រសួងសុខាភិបាលបញ្ជាក់ថា៖ «គិតពីថ្ងៃទី ៤ ដល់ថ្ងៃទី ១៤ វិច្ឆិកា ឆ្នាំ ២០២០ សរុបចំនួនតេស្តដែលបានធ្វើវិភាគមានចំនួន ៣ ៧៦២ វត្ថុសំណាក (ក្នុងនោះ មានអ្នកធ្វើតេស្តលើកទី១ ចំនួន ១ ៧៤១ នាក់ និងលើកទី២ ចំនួន ៨២៥ នាក់ និងតេស្តលើកទី៣ ចំនួន ១ ១៩៥ សំណាក) ដោយលទ្ធផលបង្ហាញថា មានអ្នកវិជ្ជមានវីរុសកូវីដ ១៩ ចំនួន ៤ នាក់ ដែលកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត»។
បើតាមក្រសួងសុខាភិបាលចំពោះលទ្ធផលជាទូទៅវិញត្រឹមថ្ងៃទី ១៤ ខែវិច្ឆិកា គឺមិនមានអ្នកវិជ្ជមានកូវីដ ១៩ ថ្មីនោះទេ ហើយក៏មិនមានករណីជាសះស្បើយនោះដែរ ខណៈគិតត្រឹមថ្ងៃទី ១៥ វិច្ឆិកា ប្រទេសកម្ពុជា មានអ្នកឆ្លងវីរុសកូរ៉ូណាសរុប ៣០២ នាក់ ហើយត្រូវបានព្យាបាលជាសះស្បើយចំនួន ២៨៩ នាក់ និងបន្តសម្រាកព្យាបាលចំនួន ១៣ នាក់។
លោក ហ៊ុន សែន កាលពីថ្ងៃ ១៤ វិច្ឆិកា បានសរសេរនៅលើទំព័រហ្វេសប៊ុករបស់លោកថា លោក និងក្រុមគ្រួសារត្រូវបានក្រុមគ្រូពេទ្យបានយកសំណាកទៅធ្វើតេស្តជាលើកទី ៣ ហើយជាលទ្ធផលគឺអវិជ្ជមានកូវីដ១៩ទាំងអស់។ ជាមួយនឹងលទ្ធផលតេស្តអវិជ្ជមាននេះលោករំពឹងថា ការធ្វើតេស្តជាលើកទី ៤ នឹងទទួលបានលទ្ធផលអវិជ្ជមានបន្តទៀត។
លោកបញ្ជាក់ថា៖ «ខ្ញុំនឹងបន្តធ្វើចត្តាឡីស័ករហូតដល់ថ្ងៃទី ១៨ វិច្ឆិកា ដែលនឹងត្រូវធ្វើតេស្តលើកទី៤ និងជាលើកចុងក្រោយដែលខ្ញុំសង្ឃឹមថា នឹងមានលទ្ធផលអវិជ្ជមាន ទាំងខ្ញុំ និងភរិយាព្រមទាំងបងប្អូនប្រមាណជាង ១០០០ នាក់ដែលធ្វើចត្តាឡីស័កក្នុងពេលជាមួយគ្នាពីថ្ងៃទី ៤ វិច្ឆិកា ២០២០ ដែលនឹងធ្វើឱ្យការព្រួយបារម្ភអំពីកូវីដ ១៩ ត្រូវបានកាត់បន្ថយនៅក្នុងរាជធានីភ្នំពេញ និងខេត្តកណ្តាលដែលនឹងអាចឈានទៅបើកសាលារៀនឡើងវិញសម្រាប់ការសិក្សារបស់កូនចៅយើង»។
ស្របពេលជាមួយគ្នានេះលោកនាយករដ្ឋមន្ត្រីក៏បានឱ្យដឹងដែរថា កម្ពុជា បានផ្តល់ម៉ាស់ ២ លានម៉ាស់ និងសម្ភារវេជ្ជសាស្ត្រមួយចំនួនទៀតដល់ប្រទេសឡាវ ដើម្បីចូលរួមចំណែកប្រយុទ្ធប្រឆាំងជាមួយប្រទេសជាមិត្តជិតខាងនេះ ហើយសង្ឃឹមថា ប្រទេសទាំង ២ នឹងរួមគ្នាឱ្យទទួលបានជោគជ័យក្នុងការប្រយុទ្ធប្រឆាំងនឹងជំងឺកូវីដ ១៩។
លោកបញ្ជាក់ថា៖ «តាងនាមនៃរាជរដ្ឋាភិបាលនៃព្រះរាជាណាចក្រកម្ពុជា ខ្ញុំសូមធ្វើការបរិច្ចាគនូវម៉ាស់ចំនួន ២ លាន និងសម្ភារវេជ្ជសាស្ត្រមួយចំនួនទៀតដូចមានក្នុងបញ្ជីរាយនាមជូនដល់រដ្ឋាភិបាល និងប្រជាជននៃសាធារណរដ្ឋប្រជាធិបតេយ្យប្រជាមានិតឡាវ»។ បើតាមលោក ហ៊ុន សែន ម៉ាស់ និងសម្ភារផ្សេងៗទៀត នឹងត្រូវនាំយកទៅទីក្រុងវៀងចន្ទន៍ នាព្រឹកថ្ងៃចន្ទនេះតាមជើងយន្តហោះពិសេសរបស់កម្ពុជា។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជា យល់ឃើញថា នេះគឺជាកាយវិការដ៏ល្អមួយដែលបង្ហាញថា កម្ពុជាគឺជាប្រទេសគំរូមួយក្នុងការជួយគ្នាទៅវិញទៅមក បើទោះជាកម្ពុជាមិនមែនជាប្រទេសអ្នកមានក៏ដោយ។
លោកបញ្ជាក់ថា៖ «យើងដឹងថាប្រទេសកម្ពុជា និងឡាវ គឺជាប្រទេសដែលមានទំនាក់ទំនងនឹងគ្នាល្អ ហើយជាអ្នកជិតខាងល្អជាបងប្អូនល្អ និងតែងតែផ្តល់ការគាំទ្រគ្នា ជួយគ្នាទៅវិញទៅមក»។ នេះបង្ហាញឱ្យឃើញពីការផ្តល់តម្លៃនៃមិត្តភាព និងកិច្ចសហប្រត្តិបត្តិការរវាងប្រទេសទាំង ២។
លោកបន្តថា៖ «បើនិយាយពីទិដ្ឋភាពក្នុងក្របខ័ណ្ឌនៃនយោបាយការទូតវិញ គឺកម្ពុជាកំពុងដើរនៅក្នុងផ្លូវដ៏ត្រឹមត្រូវមួយដោយបង្ហាញភាពជាគំរូនៅក្នុងតំបន់ដែលពាក់ព័ន្ធជាមួយនឹងការជួបការលំបាកដូចគ្នា។ ក្នុងការលំបាកនេះ គឺអាចចែករំលែកជួយគ្នាទៅតាមលទ្ធភាពរៀងៗខ្លួន»៕
វីដេអូ៖
