.jpg)
លោក ហ៊ុន សែន និងសមភាគីវៀតណាមកន្លងមក។ រូប Press OCM
ភ្នំពេញៈ លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងគណៈប្រតិភូជាន់ខ្ពស់នឹងធ្វើដំណើរទស្សនកិច្ចជាផ្លូវការទៅកាន់ប្រទេស វៀតណាម ចំនួន ២ ថ្ងៃពីថ្ងៃទី ៤-៥ ខែតុលានេះ។
យោងតាមសេចក្ដីប្រកាសព័ត៌មានរបស់ក្រសួងការបរទេសកាលពីម្សិលមិញ បានឲ្យដឹងថា ដំណើរទស្សនកិច្ចនេះធ្វើឡើងតាមការអញ្ជើញរបស់នាយករដ្ឋមន្ត្រីនៃប្រទេស វៀតណាម លោក ង្វៀន សួនហ៊្វុក (Nguyen Xuan Phuc)។
សេចក្ដីប្រកាសព័ត៌មានដដែលបានឲ្យដឹងថា៖ «នាយករដ្ឋមន្ត្រីទាំង ២ នឹងពិភាក្សាលើបញ្ហានានាពាក់ព័ន្ធនឹងកិច្ចសហប្រតិបត្តិការទ្វេភាគី តំបន់ និងអន្តរជាតិដែលមានផលប្រយោជន៍ទៅវិញទៅមក និងការបារម្ភរួមគ្នា»។
សេចក្ដីប្រកាសព័ត៌មានដដែលនេះបានឲ្យដឹងទៀតថា ក្រោយកិច្ចប្រជុំ នាយករដ្ឋមន្ត្រីទាំង ២ នឹងអញ្ជើញជាអធិបតីក្នុងពិធីចុះហត្ថលេខាលើឯកសារមួយចំនួនស្តីពីការជំរុញកិច្ចសហប្រតិបត្តិការទ្វេភាគី។ ក្នុងអំឡុងពេលស្នាក់នៅទីក្រុងហាណូយលោក ហ៊ុន សែន នឹងដាក់កម្រងផ្កា គោរពវិញ្ញាក្ខន្ធ នៅវិមានអនុស្សាវរីយ៍បុព្វបុរស និងយុទ្ធជនពលី និងនៅវិមានតម្កល់សពលោក ហូ ជីមិញ។
លោក ហ៊ុន សែន នឹងជួបដាច់ដោយឡែកពីគ្នាជាមួយលោក ង្វៀន ហ៊្វុជុង (Nguyen Phu Trong) អគ្គលេខាធិការបក្ស និងជាប្រធានរដ្ឋវៀតណាម និងលោកស្រី ង្វៀន ធី គីម ងិន (Nguyen Thi Kim Ngan) ប្រធានរដ្ឋសភាវៀតណាម។
សេចក្តីប្រកាសព័ត៌មាននេះឲ្យដឹងថា នាយករដ្ឋមន្ត្រីទាំង ២ នឹងចូលរួមថ្លែងសុន្ទរកថា បើកសន្និសីទស្តីពីការជំរុញវិនិយោគ និងពាណិជ្ជកម្មកម្ពុជា-វៀតណាម នៅរសៀលថ្ងៃទី ៤ ខែតុលា។ នៅថ្ងៃទី ២ នៃទស្សនកិច្ច នាយករដ្ឋមន្ត្រីទាំង ២ នឹងចូលរួមជាអធិបតីក្នុងសន្និសីទបូកសរុបការងារខណ្ឌសីមា និងបោះបង្គោលព្រំដែនដែលរំពឹងថានឹងបញ្ចប់ដោយការចុះហត្ថលេខាលើឯកសារច្បាប់ចំនួន ២ ដើម្បីទទួលស្គាល់លទ្ធផលការងារខណ្ឌសីមាព្រំដែនដែលសម្រេចបាន ៨៤ ភាគរយ។
អមដំណើរលោកនាយករដ្ឋមន្ត្រីរួមមានលោក ទៀ បាញ់ ឧបនាយករដ្ឋមន្ត្រី រដ្ឋមន្ត្រីការពារជាតិ ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិលោក វ៉ា គឹមហុង ទេសរដ្ឋមន្ត្រី និងជាប្រធានអាជ្ញាធរជាតិទទួលបន្ទុកកិច្ចការព្រំដែន លោក ប៉ាន សូរស័ក្តិ រដ្ឋមន្ត្រី ក្រសួងពាណិជ្ជកម្ម លោក ស៊ុយ សែម រដ្ឋមន្ត្រីក្រសួងរ៉ែ និងថាមពល និងលោក ថោង ខុន រដ្ឋមន្ត្រី ក្រសួងទេសចរណ៍ ព្រមទាំងឥស្សរជនជាន់ខ្ពស់នៃរាជរដ្ឋាភិបាល និងថ្នាក់ដឹកនាំធុរកិច្ចនៃសភាពាណិជ្ជកម្មកម្ពុជាផងដែរ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាថ្លែងថា ទស្សនកិច្ចផ្លូវការរបស់លោក ហ៊ុន សែន ទៅកាន់សាធារណរដ្ឋសង្គមនិយមវៀតណាមនឹងជួយឲ្យទំនាក់ទំនង និងកិច្ចសហប្រតិបត្តិការរវាងប្រទេសទាំង ២ កាន់តែរឹងមាំថែមទៀត។
លោកថ្លែងថា៖ «ធម្មតាវៀតណាម និងកម្ពុជាមានទំនាក់ទំនងជាប្រពៃណី បងប្អូន និងអ្នកជិតខាងល្អគឺដូច្នេះ គោលដៅនៃទស្សនកិច្ចនេះគឺពង្រឹងពង្រីកបន្ថែមនៃកិច្ចសហការរវាងប្រទេសទាំង ២»៕
