.jpg)
លោកនាយករដ្ឋមន្ត្រី ហ៊ុន សែន នាពេលកន្លងមក។ រូបថត AKP
ភ្នំពេញៈ លោក ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាគ្រោងនឹងថ្លែងសុន្ទរកថា ដោយសង្កត់ធ្ងន់លើភាពចាំបាច់ក្នុងការប្តេជ្ញាចិត្តកាន់តែខ្លាំងក្លាជាងមុន ដើម្បីទទួលបានសាមគ្គីភាព និងឯកភាពតំបន់ និងពិភពលោក ដើម្បីឆ្លើយតបនឹងជំងឺរាតត្បាតសកលកូវីដ១៩។ នេះបើតាមសេចក្ដីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិចេញផ្សាយកាលពីចុងខែវិច្ឆិកា។
សុន្ទរកថារបស់លោកនាយករដ្ឋមន្ត្រីនឹងធ្វើឡើងក្នុងសម័យប្រជុំពិសេសលើកទី ៣១ របស់សន្និបាតអង្គការសហប្រជាជាតិ ដើម្បីឆ្លើយតបនឹងជំងឺកូវីដ១៩ ដែលនឹងប្រព្រឹត្តទៅនៅថ្ងៃទី ៣ និងទី ៤ ខែធ្នូ នៅទីក្រុងញូវយ៉ក។ សម័យប្រជុំពិសេសនេះធ្វើឡើងក្នុងកម្រិតថ្នាក់ប្រមុខរដ្ឋ និងថ្នាក់ដឹកនាំរដ្ឋាភិបាលតាមរយៈប្រព័ន្ធវីដេអូដែលថតទុកជាមុន។
ជំងឺរាតត្បាតសកលបានសម្លាប់ជីវិតមនុស្សអស់ជាច្រើននាក់ រាំងខ្ទប់ដង្ហើមសេដ្ឋកិច្ចពិភពលោក និងបង្អាក់ការធ្វើពាណិជ្ជកម្មរវាងប្រទេស និងប្រទេសធ្វើឱ្យខូចខាតដល់វិស័យទេសចរណ៍អន្តរជាតិ និងបង្កផលប៉ះពាល់ដល់វិស័យសុខាភិបាលពិភពលោក។ ដូច្នេះសម័យប្រជុំពិសេសថ្នាក់ប្រមុខរដ្ឋាភិបាលលើកទី ៣១ របស់មហាសន្និបាតអង្គការសហប្រជាជាតិនេះ មានគោលបំណងជំរុញការអនុវត្តវិធានការឆ្លើយតបជារួមក្នុងសហគមន៍អន្តរជាតិ ដើម្បីប្រយុទ្ធប្រឆាំងនឹងជំងឺរាតត្បាតសកលកូវីដ១៩ និងកាត់បន្ថយផលប៉ះពាល់នៃជំងឺនេះ។
ក្រសួងបញ្ជាក់ថា៖ «នៅក្នុងសុន្ទរកថាគន្លឹះ សម្តេចតេជោនាយករដ្ឋមន្រ្តីនឹងសង្កត់ធ្ងន់លើភាពចាំបាច់ក្នុងការប្តេជ្ញាចិត្តកាន់តែខ្លាំងក្លាជាងមុន ដើម្បីទទួលបានសាមគ្គីភាព និងឯកភាពតំបន់ និងពិភពលោក ខណៈដែលពហុភាគីនិយមដ៏មានប្រសិទ្ធភាពក្នុងក្របខ័ណ្ឌអង្គការសហប្រជាជាតិ និងអង្គការសុខភាពពិភពលោកជាប្រការមិនអាចខ្វះបាន ដើម្បីឆ្លើយតបនឹងជំងឺរាតត្បាតសកលមួយនេះ»។
យោងតាមអង្គការសហប្រជាជាតិជំងឺកូវីដ១៩ បានឆក់យកជីវិតមនុស្សជាង ១,៣ លាននាក់ និងឆ្លងដល់មនុស្ស ៥៤ លាននាក់។ ស្ថានភាពនេះអាចបណ្ដាលឲ្យមានបញ្ហាសេដ្ឋកិច្ចសកលអាក្រក់បំផុតគិតចាប់ពីការធ្លាក់ចុះសេដ្ឋកិច្ចខ្លាំងបំផុតកាលពីទសវត្សរ៍ឆ្នាំ ១៩៣០។
អង្គការសហប្រជាជាតិថ្លែងថា៖ «ការឆ្លើយតបជាប្រព័ន្ធរបស់អង្គការសហប្រជាជាតិលើកូវីដ១៩ ធ្វើឡើងផ្អែកលើសសរស្ដម្ភ ៣ រួមមាន ការឆ្លើយតបទ្រង់ទ្រាយធំដែលមានការសម្របសម្រួល និងគ្រប់ជ្រុងជ្រោយ, កិច្ចខិតខំប្រឹងប្រែងទូលំទូលាយដើម្បីរក្សាអាយុជីវិត និងជីវភាព, និងដំណើរការស្តារឡើងវិញ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានថ្លែងថា ប្រទេសដែលមានប្រព័ន្ធសុខាភិបាលទន់ខ្សោយ និងមានកម្រិតសេដ្ឋកិច្ចទាបពិតជាត្រូវការការគាំទ្រ និងសាមគ្គីភាពពីសហគមន៍អន្តរជាតិ និងយន្តការពហុភាគីនិយម។
លោកថ្លែងថា៖ «ប្រទេសតូចៗ ដូចជាកម្ពុជាជាដើមពិតជាត្រូវការវិធានការស្ថិតក្រោមពហុភាគីនិយម និងសាមគ្គីភាព ជាពិសេសក្នុងការដោះស្រាយបញ្ហាក្រោមយន្តការអង្គការសហប្រជាជាតិ។ យើងសង្ឃឹមថា ប្រទេសតូចៗនឹងទទួលបានសេវាព្យាបាល និងវ៉ាក់សាំង និងថ្នាំព្យាបាលកូវីដ១៩នៅពេលអនាគតដ៏ខ្លី»។
ដោយឡែកអ្នកវិភាគនយោបាយលោក ឡៅ ម៉ុងហៃ ថ្លែងថា៖ «លោកនាយករដ្ឋមន្ត្រីរបស់យើងគួរតែជំរុញឱ្យគ្រប់ប្រទេសមើលឃើញជំងឺកូវីដថាជាគ្រោះថ្នាក់សម្រាប់មនុស្សគ្រប់រូបជារួម ហើយជំរុញឱ្យមានការរួបរួមគ្នាដើម្បីយកជ័យជម្នះលើជំងឺនេះ បើទោះបីជាប្រទេសនានាមានភាពខុសគ្នាយ៉ាងណាក្ដី»៕
