.jpg)
សកម្មភាពមកជួបប្រជុំសុខាភិបាលអាស៊ាននៅខេត្តសៀមរាបពីម្សិលមិញ។ រូបថត សហការី
សៀមរាបៈ នៅព្រឹកថ្ងៃទី ២៩ ខែសីហានេះ លោកនាយករដ្ឋមន្ត្រី ហ៊ុន សែន នឹងទៅថ្លែងសុន្ទរកថាជាគន្លឹះ និងផ្តល់អនុសាសន៍នៅក្នុងកិច្ចប្រជុំរដ្ឋមន្ត្រីសុខាភិបាលអាស៊ានលើកទី ១៤ នៅខេត្តសៀមរាបដែលកម្ពុជាបានធ្វើជាម្ចាស់ផ្ទះ ខណៈដែលអាស៊ានបានលើកឡើងថា គន្លាតបញ្ហាសុខភាពនៅតែបន្តកើតឡើងនៅតាមបណ្តាប្រទេសក្នុងប្លុកមួយនេះ។
សេចក្ដីប្រកាសព័ត៌មានរបស់ក្រសួងសុខាភិបាលចេញពីម្សិលមិញបញ្ជាក់ថា នៅថ្ងៃនេះលោកនាយករដ្ឋមន្ត្រីនឹងឡើងថ្លែងសុន្ទរកថា ជាគន្លឹះ និងផ្ដល់អនុសាសន៍មួយចំនួនក្នុងពិធីប្រកាសបើកជាផ្លូវការនូវកិច្ចប្រជុំរដ្ឋមន្ត្រីសុខាភិបាលអាស៊ានលើកទី ១៤ នេះ។ កិច្ចប្រជុំនេះមានរយៈពេល ៥ ថ្ងៃគឺចាប់ពីថ្ងៃទី ២៦ ដល់ថ្ងៃទី ៣០ ខែសីហា។
កិច្ចប្រជុំត្រូវបានចែកចេញជា ២ ដំណាក់កាលគឺចាប់ពីថ្ងៃទី ២៦ ដល់ថ្ងៃទី ២៨ គឺជាកិច្ចប្រជុំត្រៀមរបស់ក្រុមឧត្តមមន្ត្រីសុខាភិបាលអាស៊ាន អាស៊ានបូក ៣ និងអាស៊ានចិន ហើយចាប់ពីថ្ងៃទី ២៩ ដល់ថ្ងៃទី ៣០ ខែសីហាគឺជាកិច្ចប្រជុំរដ្ឋមន្ត្រីសុខាភិបាលអាស៊ាន អាស៊ានបូក ៣ និងអាស៊ានចិនដែលកិច្ចប្រជុំទាំងនោះស្ដីពីការលើកកម្ពស់សុខភាពប្រជាជនអាស៊ានទាំងមូល។
ទំព័រហ្វេសប៊ុករបស់ក្រសួងសុខាភិបាលផ្សាយកាលពីម្សិលមិញថា កាលពីថ្ងៃទី ២៦ ខែ សីហា លោក ស្រី ឱ វណ្ណឌីន រដ្ឋលេខាធិការក្រសួងសុខាភិបាល បានធ្វើជាប្រធានដឹកនាំកិច្ចប្រជុំឧត្តមមន្ត្រីសុខាភិបាលអាស៊ាន ដើម្បីពិភាក្សាផ្ដោតលើការរីកចម្រើននៃការអនុវត្តកិច្ចការរបស់ក្រុមការងារសុខាភិបាលអាស៊ានកន្លងមកដូចជាការលើកកម្ពស់ការរស់នៅមានសុខភាពល្អ ការឆ្លើយតបទៅនឹងគ្រោះមហន្តរាយ និងការគំរាមកំហែង ការពង្រឹងប្រព័ន្ធសុខភាព និងទទួលបានការថែទាំ និងការធានាសុវត្ថិភាពចំណីអាហារ។
កាលពីថ្ងៃទី ២៧ ខែសីហាកិច្ចប្រជុំ ២ ទៀតបានធ្វើឡើងគឺកិច្ចប្រជុំឧត្តមមន្ត្រីសុខាភិបាលអាស៊ានបូក ៣ ដែលមានប្រទេសចិន ជប៉ុន និងកូរ៉េ និងកិច្ចប្រជុំឧត្តមមន្ត្រីសុខាភិបាលអាស៊ានចិន ហើយមកដល់ព្រឹកថ្ងៃទី ២៨ ខែសីហា ឧត្តមមន្ត្រីសុខាភិបាលអាស៊ានបានបន្តបើកកិច្ចប្រជុំពិភាក្សាមួយទៀតលើប្រធានបទសុខភាពសកល និងការលើកកម្ពស់ការថែទាំសុខភាពដោយផ្ដោតលើការជ្រើសរើសចំណីអាហារដែលមានសុខភាពល្អដើម្បីកាត់បន្ថយហានិភ័យនៃជំងឺនានា។
បើតាមទំព័រហ្វេសប៊ុកក្រសួងសុខាភិបាលបញ្ជាក់ថា លទ្ធផលកិច្ចប្រជុំត្រៀមទាំង ៣ ថ្ងៃនេះបានសម្រេចរៀបចំឯកសារជាច្រើនដែលមានខ្លឹមសារជំរុញឱ្យមានការពន្លឿនកិច្ចប្រឹងប្រែងលើកតម្កើងសុខភាពប្រជាជន ហើយឯកសារទាំងនោះនឹងដាក់ឱ្យអង្គប្រជុំរដ្ឋមន្ត្រីសុខាភិបាលអាស៊ានពិនិត្យ និងអនុម័តនៅថ្ងៃទី ២៩ និងថ្ងៃទី ៣០ ខែសីហា នេះ។
កាលពីថ្ងៃម្សិលមិញភ្នំពេញប៉ុស្ដិ៍មិនអាចសុំការអធិប្បាយពីលោក ស្រី ឱ វណ្ណឌីន បានទេដោយទូរស័ព្ទរបស់លោកស្រីពុំមានអ្នកទទួល ខណៈលោក ក្រុស សារ៉ាត់ ប្រធានមន្ទីរសុខាភិបាលខេត្តសៀមរាបថ្លែងថា លោកបានចូលរួមកិច្ចប្រជុំត្រៀមរយៈពេល ៣ ថ្ងៃនេះដែរ ប៉ុន្តែលោកមិនហ៊ានបញ្ចេញមតិជុំវិញកិច្ចប្រជុំនេះឡើយ។
កិច្ចប្រជុំរដ្ឋមន្ត្រីសុខាភិបាលអាស៊ានបានរៀបចំឡើង ២ ឆ្នាំម្ដង ដើម្បីពិភាក្សាលើបញ្ហាប្រឈមជាចម្បងនានាពាក់ព័ន្ធសុខភាពប្រជាជនក្នុងតំបន់។
អាស៊ានដឹងថា គន្លាតបញ្ហាសុខភាពនៅតែបន្តកើតឡើង នៅប្រទេសក្នុងតំបន់។ ក្នុងប្រទេសអាស៊ានខ្លះភាពក្រីក្រនៅតែជាឧបសគ្គដ៏សំខាន់បំផុតសម្រាប់ស្ថានភាពសុខភាពដែលកើតឡើងជាចម្បងសម្រាប់សហគមន៍រស់នៅក្នុងតំបន់ដាច់ស្រយាល សហគមន៍ស្ថិតនៅឯកោ សហគមន៍តាមតំបន់ភ្នំ និងសហគមន៍រស់នៅលើកោះជាដើម។ ប្រទេសមួយចំនួនថែមទាំងប្រឈមទ្វេដងទៅនឹងជំងឺមិនឆ្លងដូចជា ជំងឺសរសៃឈាមបេះដូង និងជំងឺមហារីកខណៈជំងឺគ្រុនចាញ់ គ្រុនឈាម របេង ជំងឺដែលអាចការពារដោយវ៉ាក់សាំង និងជំងឺឆ្លងផ្សេងទៀតនៅតែជាបន្ទុកសម្រាប់ប្រទេសទាំងនោះ៕
