ភ្នំពេញៈ លោកនាយករដ្ឋមន្ត្រី ហ៊ុន សែន នឹងចូលរួមជំនួបកំពូលអាស៊ាន-កូរ៉េ និងមេគង្គកូរ៉េលើកទី ១ នៅសប្ដាហ៍ក្រោយ ខណៈពេលកូរ៉េខាងជើងអញ្ជើញប្រមុខការទូតខ្មែរទៅធ្វើទស្សនកិច្ចនៅកូរ៉េខាងជើង។
សាធារណរដ្ឋកូរ៉េ ឬកូរ៉េខាងត្បូង នឹងរៀបចំជំនួបកំពូលអាស៊ាន-កូរ៉េ រយៈពេល ២ ថ្ងៃ ចាប់ពីថ្ងៃទី ២៥ ដល់ ២៦ និងជំនួបកំពូលមេគង្គ-កូរ៉េ លើកទី ១ នៅថ្ងៃទី ២៧ ខែវិច្ឆិកា នៅទីក្រុងប៊ូសាន ប្រទេស កូរ៉េខាងត្បូង។
លោក ឡុង ឌីម៉ង់ ឯកអគ្គរាជទូតកម្ពុជាប្រចាំសាធារណរដ្ឋកូរ៉េបានប្រាប់ឲ្យដឹងកាលពីថ្ងៃម្សិលមិញថា លោកនាយករដ្ឋមន្ត្រី ហ៊ុន សែន នឹងចូលរួមក្នុងជំនួបកំពូលទាំង ២ នេះ។ លោកថា ក្រុមការងារស្ថានទូតកម្ពុជាប្រចាំប្រទេសកូរ៉េខាងត្បូង និងស្ថានទូតនៃបណ្ដាប្រទេសអាស៊ាន ៩ ផ្សេងទៀតក៏ដូចជាភាគីកូរ៉េ បានធ្វើការជាមួយគ្នាក្នុងការរៀបចំការងារផ្សេងៗសម្រាប់ជំនួបកំពូល ក៏ដូចជាសម្រាប់កិច្ចប្រជុំដាច់ដោយឡែកនានា។
លោក ឡុង ឌីម៉ង់ បានថ្លែងថាលោកនាយករដ្ឋមន្ត្រី ហ៊ុន សែន នឹងមានជំនួបទ្វេភាគីជាមួយប្រធានាធិបតីកូរ៉េខាងត្បូង មូន ជេអ៊ីន (Moon Jae-in) នៅរសៀលថ្ងៃទី ២៥ វិច្ឆិកា ដោយថ្នាក់ដឹកនាំទាំង ២ គ្រោងនឹងលើកឡើងអំពីការពង្រឹង និងពង្រីកកិច្ចសហប្រតិបត្តិការរវាងប្រទេសទាំង ២ ដែលកំពុងមានភាពល្អប្រសើរស្ទើរគ្រប់វិស័យរួចហើយ។
លោកថ្លែងថា៖ «ក្រៅពីនេះយើងក៏នឹងមានការពិភាក្សាគ្នាដើម្បីធ្វើយ៉ាងណាឲ្យមានការពង្រីកផ្នែកពាណិជ្ជកម្ម វិនិយោគបន្ថែមទៀត ហើយនិងកិច្ចសហប្រតិបត្តិការលើវិស័យផ្សេងៗទៀត។ យើងនឹងមានឯកសារមួយចំនួនដែលនឹងត្រូវចុះហត្ថលេខា ប៉ុន្តែសុទ្ធតែជាឯកសារពាក់ព័ន្ធនឹងកិច្ចសហប្រតិបត្តិការលើវិស័យសេដ្ឋកិច្ចពាណិជ្ជកម្ម វិស័យយុត្តិធម៌ និងវិស័យផ្សេងទៀត»។
លោកឯកអគ្គរាជទូតបានបញ្ជាក់ថា នៅពេលលោកនាយករដ្ឋមន្ត្រីទៅដល់ប្រទេសកូរ៉េ លោកនឹងជួបជាមួយសហគមន៍ខ្មែរប្រមាណ ២ ០០០ នាក់ នៅទីក្រុងប៊ូសាននារសៀលថ្ងៃទី ២៤ ខែវិច្ឆិកា ដើម្បីសំណេះសំណាល និងសួរសុខទុក្ខ។
កូរ៉េខាងត្បូងជាប្រទេសដែលទទួលយកពលករខ្មែរទៅធ្វើការលំដាប់ទី ២ បន្ទាប់ពីប្រទេស ថៃ។ បច្ចុប្បន្ននេះមានពលករកម្ពុជាប្រមាណ ៤៥ ០០០ នាក់ កំពុងធ្វើការនៅទីនោះ ប៉ុន្តែបើគិតទាំងនិស្សិត និងស្ដ្រីដែលរៀបការជាមួយបុរសកូរ៉េមានពលរដ្ឋខ្មែរសរុបជាង ៦ ម៉ឺននាក់។
លោក ឌីម៉ង់ បានបញ្ជាក់ថាក្នុង ១ ឆ្នាំៗ ពលករនៅកូរ៉េផ្ញើប្រាក់មកក្រុមគ្រួសារនៅកម្ពុជាប្រមាណ ៦០០ លានដុល្លារ។
ស្របពេលជាមួយគ្នានេះ អនុរដ្ឋមន្ត្រីការបរទេសកូរ៉េខាងជើងលោក Ri Kil Song បានអញ្ជើញលោក ប្រាក់ សុខុន ទៅធ្វើទស្សនកិច្ចនៅប្រទេស កូរ៉េខាងជើង តាមពេលវេលាសមស្របមួយ។ ការអញ្ជើញនេះធ្វើឡើងកាលពីថ្ងៃសុក្រសប្ដាហ៍មុន ក្នុងជំនួបរវាងលោក Ri Kil Song និងលោក ប្រាក់ សុខុន នៅក្រសួងការបរទេស។ នេះបើតាមការបញ្ជាក់របស់លោក កុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ។
លោក កុយ គួង បញ្ជាក់ថា ដំណើរទស្សនកិច្ចចុងក្រោយរបស់មន្ត្រីជាន់ខ្ពស់កម្ពុជាទៅកូរ៉េខាងជើងធ្វើឡើងកាលពីឆ្នាំ ២០១២ ដែលដឹកនាំដោយលោក ហោ ណាំហុង ដែលកាលនោះជារដ្ឋមន្ត្រីក្រសួងការបរទេសកម្ពជា។
លោកថា ទំនាក់ទំនងកម្ពុជា និងកូរ៉េខាងជើង មានលក្ខណៈល្អប្រសើរធម្មតាផ្នែកការទូតដោយឡែកទំនាក់ទំនងផ្នែកពាណិជ្ជកម្មវិញ មានតិចតួចបំផុត។ ខណៈដែលកូរ៉េទាំង ២ មានបញ្ហាផ្នែកសន្តិសុខ ជាពិសេសពាក់ព័ន្ធនឹងអាវុធបរមាណូកូរ៉េខាងជើង លោក កុយ គួង បញ្ជាក់ថាកម្ពុជាត្រូវមានទំនាក់ទំនងការទូតល្អប្រសើរដូចគ្នាជាមួយប្រទេសកូរ៉េទាំង ២។
លោក សុខ ទូច ប្រធានរាជបណ្ឌិត្យសភាកម្ពុជាថ្លែងថា លោកនាយករដ្ឋមន្ត្រី ហ៊ុន សែន គឺជាអ្នកផ្ដួចផ្ដើមទំនាក់ទំនងការទូតជាមួយកូរ៉េកាលពីឆ្នាំ ១៩៩៧ ដោយលោកនាយករដ្ឋមន្ត្រីមើលឃើញផលប្រយោជន៍ ៣ យ៉ាងគឺផលប្រយោជន៍ផ្នែកសេដ្ឋកិច្ច បង្កើតនយោបាយការបរទេសចម្រុះពណ៌ និងទំនាក់ទំនងផ្នែកវប្បធម៌។
លោក សុខ ទូច បានថ្លែងបន្តថាកូរ៉េខាងត្បូងកំពុងប្រកួតប្រជែងផ្នែកសេដ្ឋកិច្ចនៅតំបន់អាស៊ានជាមួយជប៉ុន ចិន និងអាមេរិក។ ដូច្នេះកម្ពុជាត្រូវពង្រីកទំនាក់ទំនងល្អជាមួយកូរ៉េ ជាពិសេសការធ្វើទំនើបកម្មផ្នែកបច្ចេកវិទ្យាក៏ដូចជាទំនាក់ទំនងក្នុងស្រទាប់យុវជន ស្របពេលដែលកូរ៉េកំពុងពង្រីកនយោបាយការបរទេសឆ្ពោះទៅទិសខាងត្បូងរបស់ខ្លួន។
លោក សុខ ទូច ថ្លែងថា៖ «ចំណុចមួយទៀតគឺចំណងទាក់ទងកម្ពុជា-កូរ៉េ ត្រូវតែធ្វើឲ្យបានខ្លាំងទាំងកិច្ចការផ្នែកការទូត និងសេដ្ឋកិច្ច ពីព្រោះកូរ៉េតូចមែន តូចជាងកម្ពុជាទៀត ប៉ុន្តែអាចគ្រប់គ្រងប្រជាជនជាង ៥២ លាននាក់ ហើយមានសេដ្ឋកិច្ចខ្ពស់។ នេះជាអ្វីដែលកម្ពុជាគួរធ្វើដំណើរតាម។ ទី ២ នយោបាយការបរទេសគឺថា យើងមិនលូកដៃក្នុងកិច្ចការផ្ទៃក្នុងរវាងគ្នា»។
លោក សុខ ទូច បានថ្លែងបន្តទៀតថា ប្រទេសទាំង ២ ក៏គួរពង្រឹងទំនាក់ទំនងពាណិជ្ជកម្ម និងទេសចរណ៍ជាមួយគ្នា ហើយកូរ៉េក៏គួរពង្រឹងទំនាក់ទំនងជាមួយប្រទេសក្នុងតំបន់ទន្លេមេគង្គផងដែរដូចដែលចិនមានកិច្ចសហប្រតិបត្តិការមួយហៅថា មេគង្គ-ឡាងឆាង។
ចំពោះគម្រោងទស្សនកិច្ចរបស់លោក ប្រាក់ សុខុន ទៅកូរ៉េខាងជើងនោះ លោក សុខ ទូច យល់ថាកម្ពុជាហាក់មិនមានកិច្ចការទូតអ្វីចម្បងជាមួយកូរ៉េខាងជើងទេ ព្រោះកូរ៉េខាងជើងមិនមានកិច្ចការទូតច្បាស់លាស់ក្រៅតែពីការទប់ទល់ជាមួយសហរដ្ឋអាមេរិកដោយប្រើប្រាស់កូរ៉េខាងត្បូង។
លោក សុខ ទូច បានអះអាងបន្តថា កូរ៉េខាងជើងមានទំនាក់ទំនងល្អជាមួយកម្ពុជាដោយសារព្រះបរមរតនកោដ្ឋ និងព្រះមហាក្សត្រ។
លោក សុខ ទូច ថ្លែងថា៖ «បើក្នុងន័យនយោបាយផ្សះផ្សា កម្ពុជាអាចដើរតួនាទីជាអង់ទីករដើម្បីសម្របសម្រួល ឬ កាតាលិករដែលជួយជំរុញទំនាក់ទំនង បើសិនកូរ៉េខាងត្បូងពឹងកម្ពុជា ពីព្រោះយើងដឹងហើយថា សម្ដេចនាយករដ្ឋមន្ត្រីមានទំនាក់ទំនងល្អជាមួយកូរ៉េខាងត្បូង ហើយព្រះមហាក្សត្រមានទំនាក់ទំនងល្អជាមួយកូរ៉េខាងជើង។ អ៊ីចឹងកម្ពុជាអាចជាអ្នកដើរតួសម្របសម្រួលនយោបាយក៏ល្អដែរ»។
លោកបន្តថា ការសម្របសម្រួលដោយមានកម្ពុជាជាអ្នកដើរតួនោះ ក៏អាចធ្វើឡើងដោយសារតែលោកនាយករដ្ឋមន្ត្រី ហ៊ុន សែន ក៏មាននយោបាយស៊ីជម្រៅដូចគ្នាជាមួយកូរ៉េខាងត្បូង និងចិន៕