The Phnom Penh Post Search

Search form




Logo of Phnom Penh Post newspaper Phnom Penh Post - លោក ហ៊ុន សែន បកស្រាយ​រឿង​លើក​តម្កើង ស៊ន សៀវម៉ី

លោក ហ៊ុន សែន បកស្រាយ​រឿង​លើក​តម្កើង ស៊ន សៀវម៉ី

ម្ចាស់​មេដាយ​មាស​​តេក្វាន់ដូ ក្នុង​ព្រឹត្តិ​ការណ៍​កីឡា​ទ្វីប​អាស៊ី កីឡាការិនី​ស៊ន សៀវម៉ី។
ម្ចាស់​មេដាយ​មាស​​តេក្វាន់ដូ ក្នុង​ព្រឹត្តិ​ការណ៍​កីឡា​ទ្វីប​អាស៊ី កីឡាការិនី​ស៊ន សៀវម៉ី។ ស្រេង ម៉េងស្រ៊ុន

លោក ហ៊ុន សែន បកស្រាយ​រឿង​លើក​តម្កើង ស៊ន សៀវម៉ី

ភ្នំពេញៈ ប្រមុខ​រដ្ឋាភិបាល​លោក ហ៊ុន សែន បាន​ឆ្លើយ​តប​ទៅ​នឹង​មតិ​រិះគន់​ជុំវិញ​ការ​ដែល​កម្ពុជា​ប្រឹង​អួត​ពី​រង្វាន់​មេដាយ​មាស​កីឡាការិនី ស៊ន សៀវម៉ី ដោយ​ពន្យល់​ថា គឺ​ដោយ​សារ​តែ​កម្ពុជា​មិន​ដែល​ឈ្នះ​មេដាយ​មាស​ពី​មុន​មក ហើយ​ការ​ឈ្នះ​នេះ បាន​ធ្វើ​ឲ្យ​កម្ពុជា​កាន់​តែ​លេច​ធ្លោ​ក្នុង​ក្រប​ខ័ណ្ឌ​តំបន់ និង​អន្តរជាតិ។

ក្នុង​ពិធី​ចែក​សញ្ញាបត្រ​នៅ​មជ្ឈ​មណ្ឌល​កោះពេជ្រ កាល​ពី​ម្សិល​មិញ លោក​នាយក​រដ្ឋ​មន្រ្តី​បាន​បក​ស្រាយ​ឆ្លើយ​តប​ទៅ​នឹង​ការ​រិះគន់​ជុំវិញ​ពិធី​ដ៏​គគ្រឹង​គគ្រេង ស្វាគមន៍​ការ​វិល​ត្រឡប់​របស់​កីឡាការិនី សៀវម៉ី ថា៖ «ដោយ​សារ​តែ​អាមួយ​ហ្នឹង (មេដាយ​មាស) បាន​ចាំបាច់​មាន​ម៉ូតូ​អម​តាំង​ពី​ពោធិ៍ចិនតុង​នោះ ព្រោះ​អាមួយ​ហ្នឹង​វា​អត់​ដែល​មាន ខ្ញុំ​បញ្ជាក់​ថា អត់​ដែល​មាន​តាំង​ពី​មួយ​ជីវិត​របស់​កម្ពុជា​តែ​ម្តង»។

លោក ហ៊ុន សែន បន្ត​ថា៖ «ប្រវត្តិ​ការ​ប្រកួត​របស់​កម្ពុជា ធ្លាប់​ទទួល​បាន​មេដាយ​សំរឹទ្ធ​សរុប ៣ មេដាយ​ប្រាក់ ២ អ៊ីចឹង​អា​មាស​ហ្នឹង​វា​អត់​ដែល​មាន មិន​លេង​សើច​ទេ ៤៥ ប្រទេស វាយ​ទម្រាំ​បាន។ មាន​អ្នក​ខ្លះ​កិត្តិយស​ជាតិ​មិន​ចូល​រួម​លើក​តម្កើង​ទេ ហើយ​ថា គ្រាន់​តែ​ប៉ុណ្ណឹង ក៏​ខំ​អួត​នឹង​គេ​ដែរ​ខ្ញុំ​ថា មក​ពី​មាន​តែ​មួយ​ហ្នឹង បាន​ខំ​អួត​ហ្នឹង​ណា»។

ការ​លើក​ឡើង​ទាំង​នេះ ត្រូវ​បាន​លោក​នាយក​រដ្ឋ​មន្រ្តី ចាត់​ទុក​ថា ជា​ការ​ឆ្លើយ​តប​ចំពោះ​អ្នក​រិះគន់ មក​លើ​ទង្វើ​របស់​លោក ដែល​លោក និង​មន្រ្តី​រដ្ឋាភិបាល​មួយ​ចំនួន​បាន​រង់​ចាំ​ទទួល​ស្វាគមន៍​ការ​វិល​ត្រឡប់​ទាំង​យប់​របស់ សៀវម៉ី រហូត​ដល់​ម៉ោង​ជាង ១១ យប់ កាល​ពី​ថ្ងៃ ទី៥ ខែ​តុលា។

កីឡាការិនី សៀវម៉ី អាយុ ១៩ ឆ្នាំ​ជើង​ឯក​តេក្វាន់ដូ បាន​ផ្តួល​គូ​ប្រកួត​មក​ពី ប្រទេស​អ៊ីរ៉ង់ ដោយ​លទ្ធផល ៧ ទល់​នឹង ៤ ក្នុង​ព្រឹត្តិ​ការណ៍​កីឡា​ទ្វីប​អាស៊ី នៅ ទីក្រុង​អ៊ីឈន ប្រទេស​កូរ៉េ​ខាង​ត្បូង។ មេដាយ​មាស​នោះ ត្រូវ​បាន​ចាត់​ទុក​ថា ជា​សមិទ្ធផល​ប្រវត្តិសាស្រ្ត​កីឡា​កម្ពុជា ដែល​រង់​ចាំ​អស់​ពេល​ជាង ៤៤ ឆ្នាំ​មក​ហើយ។

ជាមួយ​គ្នា​នេះ គេហទំព័រ​ហ្វេសប៊ុក របស់​គណៈកម្មាធិការ​ជាតិ​អូឡាំពិក កាល​ពី​ម្សិល​មិញ​បាន​ផ្សាយ​ថា «ថ្មីៗ​នេះ​សង្កេត​ឃើញ​មាន​ការ​បង្កើត Account ហ្វេសប៊ុក ក៏​ដូច​ជា Page មួយ​ចំនួន​ដោយ​ប្រើ​ប្រាស់​ឈ្មោះ កីឡាការិនី ស៊ន សៀវម៉ី ហើយ​ខ្លះ​បាន​ប្រើ​ប្រាស់​ក្នុង​សកម្មភាព​រៃ​អង្គាស​ថវិកា។

គណៈកម្មាធិការ​ជាតិ​អូឡាំពិក​សុំ​បញ្ជាក់​ថា «កីឡាការិនី ស៊ន សៀវម៉ី ពុំ​ទាន់​មាន Page ផ្លូវ​ការ​ណា​មួយ​នោះ​ទេ ហើយ​ក៏​មិន​បាន​ធ្វើ​ការ​រៃ​អង្គាស​ប្រាក់​តាម​បណ្តាញ​សង្គម​ហ្វេសប៊ុក​នោះ​ដែរ»៕

អត្ថបទគួរចាប់អារម្មណ៍