The Phnom Penh Post Search

Search form




Logo of Phnom Penh Post newspaper Phnom Penh Post - លោក ហ៊ុន​ សែន ​បង្កើត​ក្រុម​មេធាវី ៣០ នាក់​ចាំ​ជួយ​ស្ត្រី​ក្រីក្រ

លោក ហ៊ុន​ សែន ​បង្កើត​ក្រុម​មេធាវី ៣០ នាក់​ចាំ​ជួយ​ស្ត្រី​ក្រីក្រ

Content image - Phnom Penh Post
លោកហ៊ុន​ សែន ថ្លែងក្នុងពិធីមួយនាពេលកន្លងមក។ ស្រេង ម៉េងស្រ៊ុន

លោក ហ៊ុន​ សែន ​បង្កើត​ក្រុម​មេធាវី ៣០ នាក់​ចាំ​ជួយ​ស្ត្រី​ក្រីក្រ

ភ្នំពេញៈ លោក​នាយក​រដ្ឋមន្រ្តី ​ហ៊ុន សែន ​បាន​សម្រេច​បង្កើត​ឱ្យ​មាន​ក្រុម​មេ​ធាវី​ស្ម័គ្រ​ចិត្តមួយ​ក្រុម​ដែល​មាន​សមាជិក​ចំនួន​ ៣០ ​នាក់ ​ដើម្បី​បំពេញ​វិជ្ជាជីវៈ​សម្រាប់​ជួយ​ស្រ្ដី​ក្រី​ក្រ​ដែល​ទទួល​រង​ការ​រំលោភ​បំពាន​តាម​ផ្លូវ​ច្បាប់​ហើយ​ខ្វះ​លទ្ធ​ភាព​ចំណាយ​ប្រាក់​ពឹង​ពាក់​រក​មេ​ធាវី​។ នេះ​បើ​តាម​ការ​បញ្ជាក់​ពី​លោក​ គី តិច ​ប្រធាន​មេ​ធាវី​រដ្ឋា​ភិ​បាល ប្រាប់​ភ្នំ​ពេញ​ប៉ុស្ដិ៍​ ពី​ម្សិលមិញ។

លោក​ គី តិច ​លើក​ឡើង​ថា​ ក្រុម​មេ​ធាវី​ស្ម័គ្រ​ចិត្ត​នេះ​នឹង​ស្ថិតនៅក្រោម​ការ​គ្រប់​គ្រង​ផ្ទាល់​ពី​លោកហ៊ុន សែន និង​មិន​មែន​ជា​មេ​ធាវី​ដែល​ទទួល​បាន​ប្រាក់​ខែ​ពី​រដ្ឋ​ឡើយ ប៉ុន្តែ​ពួក​គេ​នឹង​ទទួលបាន​ប្រាក់​ឧបត្ថម្ភ​នៅ​ពេល​ត្រូវ​ចុះ​ទៅ​ដោះ​ស្រាយ​សំណុំ​រឿង​ជួយ​ស្រ្ដី​ក្រី​ក្រ​នៅ​តាម​ជន​បទ​។

លោក​គី តិច ​ថ្លែង​ថា ​មូល​ហេតុ​ដែល​លោក ​ហ៊ុន សែន​ សម្រេច​បង្កើត​ក្រុម​មេធាវី​នេះ​ឡើង ​គឺ​ដើម្បី​បង្ហាញ​អំពី​ការ​គិត​គូរ​ទៅ​ដល់​ស្រ្ដី​ក្រ​ក្រី​ដែល​ទទួល​រង​ការ​រំលោភ​បំពាន​ផ្លូវ​ច្បាប់​ហើយ​គ្មាន​លទ្ធ​ភាព​ស្វែង​រង​ការ​ពឹងពាក់​ពី​មេធាវី ជា​ពិសេស​សម្រាប់​ស្រ្ដី​មេម៉ាយ។

លោក​បញ្ជាក់ថា៖​ «នៅ​ក្នុង​ដំណាក់​កាល​ដំបូង​នេះ គឺ​សម្ដេច​បាន​ណែ​នាំ​ឱ្យ​ខ្ញុំ​រៀប​ចំ​ឱ្យ​បាន​ប្រហែល ៣០ ​រូប​។ ខ្ញុំ​កំពុង​សម្លឹង​មើល​ដើម្បី​ពិនិត្យ​លក្ខណសម្បត្តិ ​បទ​ពិសោធការ​ងារ ជា​ពិសេស​គឺ​សំដៅ​ទៅ​លើ​មេធាវី​ជា​ស្រ្ដី​។ តាម​ពិត មេធាវី​ក្រុម​នេះ​មិន​មែន​ជា​មេធាវី​ក្រប​ខ័ណ្ឌ​រដ្ឋ​អី​ទេ គឺ​ជា​មេធាវី​បំពេញ​វិជ្ជា​ជីវៈ​សេ​រី ហើយ​មេធាវី​ដែល​ជ្រើស​រើស​ជា​មេធាវី​របស់​សម្ដេច ក៏​អត់​មាន​ក្រប​ខ័ណ្ឌ​ និង​ប្រាក់​ពី​រដ្ឋ​អី​ទេ ហើយ​មេធាវី​ទាំង​អស់​ហ្នឹង ​គឺ​បំពេញ​ភារ​កិច្ច​ជួយ​សម្ដេច​តេជោ»។

ប្រធានក្រុម​មេ​ធាវី​រដ្ឋា​ភិបាល​ដដែល​បាន​បញ្ជាក់​កុំ​ឱ្យ​មាន​ការយល់​ច្រឡំ ចំពោះ​ការ​បង្កើត​មេធាវី​ទាំង​នេះ​ថា​ជា​ការ​ធ្វើ​ឱ្យ​ខ្ជះខ្ជាយ​ថវិកា​រដ្ឋ ពី​ព្រោះ​លោក​ ហ៊ុន សែន ​បាន​សម្រេច​ផ្ដល់​ថវិកា​ផ្ទាល់​ខ្លួន​សម្រាប់​ចំណាយ​ការស្នាក់​នៅ​ និង​ហូប​ចុក ជា​ប្រាក់​ឧបត្ថម្ភ​នៅ​ពេល​មេធាវី​ទាំង​នោះ​ចុះ​ទៅ​បំ​ពេញ​បេសកកម្ម​នៅ​តាម​ជនបទ។

បើ​តាម​លោក​ គី តិច ​ស្រ្ដី​រងគ្រោះ​ជា​គោល​ដៅ​ដែល​អាច​ទទួល​បាន​ការ​ជួយ​ការ​ពារ​ផ្លូវច្បាប់​ពី​ក្រុម​មេធាវី​​នេះ ​គឺ​មាន​ដូច​ជា​ក្រុម​ស្រ្ដី​ក្រី​ក្រ​ដែល​ទទួល​រង​គ្រោះពី​ការ​រំលោភ​ដី​ធ្លី​ពី​អ្នក​មាន​អំណាច ​និង​ត្រូវ​បាន​អ្នក​មាន​អំណាច​ប្ដឹង​ឡើង​តុលា​ការ​ជា​ដើម​។ លោក​បញ្ជាក់​ថា​ នឹង​ខំ​ប្រឹង​បង្កើត​ក្រុម​មេធាវី​នេះ​ឱ្យ​បាន​ឆាប់​បំផុត។

ការ​លើក​ឡើង​ពី​លោក ​គី តិច ​គឺ​មួយថ្ងៃ​បន្ទាប់​ពី​លោក​ ហ៊ុន សែន ​បាន​ប្រកាស​ថា​ ការ​បង្កើត​ក្រុមមេធាវី​ស្ម័គ្រ​ចិត្ត គឺ​ដើម្បី​ឱ្យ​ការជួយ​ស្រ្ដី​រង​គ្រោះ​ទន់​ខ្សោយ​ និង​ក្រី​ក្រ​ឱ្យកាន់​តែ​មាន​ប្រសិទ្ធ​ភាព។

លោក​មេធា​វី ​សុក សំអឿន ​អ្នក​ជំនាញ​ផ្នែក​ច្បាប់​លើក​ឡើង​ថា ​ការ​បង្កើត​ក្រុម​មេធាវី​ជួយ​អ្នក​ក្រី​ក្រ​ដោយ​មិន​យក​កម្រៃ​បែប​នេះ គឺ​ជា​រឿង​ល្អ ប៉ុន្តែ​លោក​យល់​ឃើញ​ថា​ ដើម្បី​ឱ្យ​ការ​ជួយ​នោះ​ទៅ​ដល់​អ្នក​ក្រ​ពិត​ប្រាកដ គឺ​ធ្វើ​យ៉ាង​ណា​កុំ​ឱ្យ​ក្រុម​មេធាវី អាច​ទទួល​បាន​ប្រាក់​ពី​កូន​ក្ដី ព្រោះ​​កាល​ណា​អាច​ទទួល​ប្រាក់ គឺ​ពួក​គេ​នឹង​មិន​អាច​យក​ចិត្ត​ទុក​ដាក់​សម្រាប់​រឿង​របស់​កូន​ក្ដី​ផ្សេង​ទៀត​ដែល​ជាអ្នក​ក្រ​សុទ្ធសាធ។

លោកថ្លែង​ថា​៖ «​បើ​តាម​បទ​ពិ​សោធខ្ញុំ​កន្លង​មក បើ​យើង​ជួយ​គាត់​កុំ​ឱ្យ​យក​កម្រៃ​គឺ​ដាច់​ខាត​កុំ​ឱ្យ​ពាក់​ព័ន្ធ​យក​កម្រៃ​ឬ​សាគុណ​អ្វី​ផ្សេង​ៗ ធ្វើ​ឱ្យ​តែ​ស្អាត​តែ​ម្ដង​ទៅ​។ ព្រោះ​ធម្មតាប្រសិន​ជា​កូន​ក្ដី​មួយ​ឱ្យ​លុយ​កូន​ក្ដី​មួយ​ទៀត​អត់​ឱ្យ​លុយ​​អ៊ីចឹង វា​អាច​ធ្វើ​ឱ្យ​មេធាវី​ហ្នឹងអាច​រា​រែក​ និង​អាច​ឆក​ល្វែង​អត់​សូវ​យក​ចិត្ត​ទុក​ដាក់​ចំពោះ​អ្នក​ដែល​ក្រ​សុទ្ធសាធ»។

ចំណែក​លោក​ ស៊ឹង សែនករុណា ​អ្នក​នាំ​ពាក្យ​សមា​គម​ការ​ពារ​សិទ្ធិ​មនុស្ស ​(អាដ​ហុក) ​យល់​ឃើញ​ដែរ​ថា ​ការ​បង្កើត​ក្រុម​មេធាវី​សម្រាប់​ការ​ពារ​ស្រ្ដី​ជា​ជន​ក្រី​ក្រ​គឺ​ជា​រឿង​ល្អ ប៉ុន្តែ​ក្រុមមេធាវី​ទាំង​នោះ​មិន​គួរ​ជាប់​ពាក់​ព័ន្ធ​ជា​មួយ​ថ្នាក់​ដឹក​នាំ​នយោ​បាយ​ឡើយ ព្រោះ​ដើម្បី​កុំ​ឱ្យ​មាន​ការ​ប្រើ​ឥទ្ធិ​ពល​នយោ​បាយ​ណា​មួយ រំលោភ​លើ​ការ​ងារ​ជា​នីតិ​វិធី​មួយចំនួន នៅ​ពេល​រឿង​នោះ​អាច​ប៉ះពាល់​ដល់​នយោបាយ។

លោក​បញ្ជាក់ថា​៖ «ដូច្នោះ​យើង​​ចង់​បាន​ដំណើរ​ការ​នីតិវិធី​មួយ​ដែល​មាន​ការ​គាំទ្រ​ពី​ស្ថា​ប័ន​មេធាវី​មួយ ឱ្យ​ជួយ​ការពារ​​ជូន​ស្ត្រី​ក្រី​ក្រ​ទាំង​នោះ ​ប៉ុន្តែ​យើង​មិន​ចង់​ឱ្យ​ពាក់​ព័ន្ធ​អី​ជា​មួយ​បុគ្គល​អ្នក​ដឹក​នាំ​នយោ​បាយ​ដែល​មាន​ឥទ្ធិពល ​និង​អំណាច​អី​ទេ ពី​ព្រោះ​យើង​ដឹង​ថា​ប្រព័ន្ធ​តុលា​ការ​នៅ​ក្នុង​ប្រទេស​កម្ពុជា​យើង​ កំពុង​ទទួល​រង​ការ​រិះ​គន់​ពី​សាធារណជ​នថា​មាន​ការ​លម្អៀង​​ដោយ​សារ​​មាន​ការ​អន្តរា​គមន៍​ហើយ​ខ្លាច​អំណាច​ និង​បក្ស​និយម​អី​ជាដើម»។

ប៉ុន្តែ​លោក សែន​ករុណា​ មាន​យោ​បល់​ថា​ដើម្បី​ផ្ដល់​ភាព​យុត្តិ​ធម៌​ពិត​ប្រាកដ​ដល់​ពលរ​ដ្ឋ​ស្មើៗ​គ្នា គឺ​គេ​ត្រូវ​ធ្វើ​ឱ្យ​ប្រព័ន្ធ​តុលា​ការ ក្លាយ​ជា​ស្ថាប័ន​មាន​អំណាច​ឯក​រាជ្យ ​និ​ងអព្យា​ក្រឹតភាព​ស្រប​តាម​ប្រទេស​កាន់​លទ្ធិ​ប្រជាធិបតេយ្យ​ ហើយ​មិន​ត្រូវ​ពាក់​ព័ន្ធ​នឹង​អំពើ​ពុក​រលួយ​ និង​ខ្លាច​អំណាច​របស់​បុគ្គល​ឡើយ​ នោះ​គឺ​ជា​រឿង​ប្រសើរ​ជាង​ក្នុង​ការ​បង្កើត​​ក្រុម​មេធាវី​ទៅ​ទៀ​តពី​ព្រោះ​មេ​ធាវី​គ្រាន់​តែ​ជា​ការ​គម្រប់​ដំណើរ​ការនីតិ​វិធី​ច្បាប់​ប៉ុ​ណ្ណោះ ​ហើយ​ចៅ​ក្រម​ឯណោះ​​ទេ ​ដែល​មាន​ឆន្ទា​នុ​សិទ្ធិ​ផ្ដល់​ដោយ​ច្បាប់​ក្នុង​ការ​សម្រេច​ផ្ដល់​យុត្តិ​ធម៌​ជូន​ប្រជា​ពលរដ្ឋ៕

អត្ថបទគួរចាប់អារម្មណ៍