.jpg)
លោកនាយករដ្ឋមន្ត្រី ហ៊ុន សែន ថ្លែងក្នុងអង្គប្រជុំ។ រូបថត SPM
ភ្នំពេញៈ លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានដាក់បញ្ជាទៅលោកទេសរដ្ឋមន្ត្រី វ៉ា គឹមហុង ប្រធានអាជ្ញាធរជាតិទទួលបន្ទុកលើកិច្ចការព្រំដែនឱ្យចុះទៅជួបប្រជាពលរដ្ឋមួយចំនួនដែលបានអះអាងថា បាត់ដីនៅក្នុងខេត្តត្បូងឃ្មុំនៅតាមបណ្ដោយព្រំដែនកម្ពុជា-វៀតណាម ដោយលោកអះអាងឲ្យបើកចំហចំពោះព័ត៌មានជុំវិញបញ្ហាបោះបង្គោលព្រំដែន។
យោងតាមលោក ឈឹម ផលវរុណ ប្រធានលេខាធិការដ្ឋានឧត្តមក្រុមប្រឹក្សាពិគ្រោះ និងផ្តល់យោបល់បានថ្លែងនៅក្នុងសន្និសីទកាសែត ក្រោយកិច្ចប្រជុំបិទទ្វារបូកសរុបការងារឆមាសទី ៤ របស់ឧត្តមក្រុមប្រឹក្សានេះនៅវិមានសន្តិភាពកាលពីម្សិលមិញ។
កិច្ចប្រជុំរបស់ឧត្តមក្រុមប្រឹក្សានេះបានធ្វើឡើងជួនពេល ក្រោយពីមានការចាប់ខ្លួនចលនាបក្សប្រឆាំងដូចជា លោក រ៉ុង ឈុន អ្នកគាំទ្រអតីតគណបក្សសង្គ្រោះជាតិ និងលោក សួង សុភ័ណ្ឌ ប្រធានគណបក្សខ្មែរឈ្នះ រួមទាំងមនុស្សមួយចំនួនទៀតដែលចូលរួមតវ៉ាកាលពីពេលថ្មីៗកន្លងមកនេះ លើបញ្ហាការបោះបង្គោលព្រំដែនជាមួយវៀតណាមនៅខេត្តត្បូងឃ្មុំ។ លោក រ៉ុង ឈុន និងលោក សួង សុភ័ណ្ឌ កំពុងស្ថិតនៅក្នុងការឃុំខ្លួនបណ្ដោះអាសន្ន ដោយត្រូវបានតុលាការចោទប្រកាន់ពីបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម។
លោក ឈឹម ផលវរុណ ថ្លែងថា បញ្ហានេះលោកនាយករដ្ឋមន្ត្រីក៏បានណែនាំឲ្យរដ្ឋមន្ត្រីទីស្តីការគណៈរដ្ឋមន្ត្រីបើកសិក្ខាសាលាជាសាធារណៈឲ្យប្រជាពលរដ្ឋ សិស្ស និស្សិតចូលស្តាប់ និងសួរអំពីរឿងព្រំដែនផងដែរ ប៉ុន្តែការចូលរួមជាក់ស្តែង នៅពេលចុះទៅតាមព្រំដែន គឺអាស្រ័យទៅលើការសម្រេចរបស់គណៈកម្មាធិការព្រំដែន និងប្រជាពលរដ្ឋ។
លោកបានឲ្យដឹងទៀតថា ព័ត៌មានជុំវិញបញ្ហាព្រំដែននៅតែធ្វើការបើកចំហឲ្យសាធារណជនបានដឹងបានឮ ព្រោះមិនអាចលាក់បាំងបាននោះទេ លើកលែងតែព័ត៌មានសម្ងាត់មួយចំនួន ដែលចាំបាច់ត្រូវរក្សាការសម្ងាត់ ដើម្បីធានាដល់ផលប្រយោជន៍ជាតិ។
លោក ផលវរុណ ថ្លែងថា៖ «(កន្លែងដែលសម្តេចចង្អុលឲ្យចុះទៅ ) គឺទីណាក៏បានដែរឲ្យតែប្រជាពលរដ្ឋសំណូមពរ ហើយពេលវេលាគឺអាស្រ័យលើប្រជាពលរដ្ឋ អាស្រ័យទៅលើគណៈកម្មាធិការចុះទៅខ្លួនគាត់ ឬចុះទៅជួបប្រជាពលរដ្ឋតាមការស្នើសុំ គឺមើលតាមជាក់ស្តែង។ ប៉ុន្តែបទបញ្ជានេះចូលជាធរមាននៅពេលបញ្ជានេះហើយ»។
លោកថ្លែងថា៖ «ទៅជួបពលរដ្ឋតាមវិធីណា ខ្ញុំមិនដឹងទេ ប៉ុន្តែតាមធម្មតា ដឹងតែរង្វង់ទូលាយហើយ ព្រោះបើយើងធ្វើលាក់លៀម សម្តេចតេជោ លោក ក៏បានលើកនិយាយដែរ ថា យើងមិនអាចលាក់លៀមទេ។ យើងគ្មានអ្វីត្រូវលាក់លៀមទេ គ្រាន់តែកន្លែងខ្លះដែលយើងមិនគួរបង្ហាញឲ្យភាគីម្ខាងទៀតដឹង ព្រោះវានៅក្នុងចំណុចចរចា។ កន្លែងហ្នឹងហើយ ដែលចង់ឲ្យប្រជាពលរដ្ឋ មានការយល់»។
លោក វ៉ា គឹមហុង និងមន្ត្រីជំនាញរបស់លោក លោកស្រី កុយ ពិសី កាលពីម្សិលមិញមិនអាចសុំការអត្ថាធិប្បាយជុំវិញបញ្ហានេះបានតាមរយៈទូរស័ព្ទទេ ដោយទូរស័ព្ទគ្មានការទទួលឆ្លើយ។
លោក ពេជ្រ ស្រស់ សមាជិកឧត្តមក្រុមប្រឹក្សាពិគ្រោះ និងផ្តល់យោបល់មកពីគណបក្សយុវជនកម្ពុជាបានប្រាប់ភ្នំពេញប៉ុស្តិ៍កាលពីម្សិលមិញថា គណបក្សយុវជនកម្ពុជានឹងចុះទៅជួបពលរដ្ឋដែលអះអាងថា បាត់ដី ក្រោយពីបោះបង្គោលព្រំដែនកម្ពុជា និងវៀតណាមនៅខេត្តត្បូងឃ្មុំជាមួយលោក វ៉ា គឹមហុង ក្នុងពេលឆាប់ៗខាងមុខនេះ ដើម្បីស្វែងរកដឹងការពិត។
លោក ស្រស់ ថ្លែងថា៖ «អ្វីដែលខ្ញុំចុះទៅព្រំដែន ហើយបើទោះជាមិនអនុញ្ញាត ក៏ខ្ញុំត្រូវតែចុះទៅព្រំដែន ដើម្បីឲ្យបានដឹងច្បាស់ពីបញ្ហាចម្រូងចម្រាសពីបញ្ហាព្រំដែនដែលបណ្តាលឲ្យមានការចាប់ខ្លួនមនុស្សជិត ១០ នាក់។ អ្វីដែលខ្ញុំត្រូវធ្វើគឺត្រូវធ្វើឲ្យពិតប្រាកដ និងច្បាស់លាស់ ហើយខ្ញុំចង់ដឹងថា តើពលរដ្ឋដែលអះអាងថា បាត់ដីហ្នឹង បាត់របៀបម៉េច? ទី ២ ខ្ញុំក៏សង្កេតមើលថា តើគណៈកម្មការកិច្ចការព្រំដែននឹងដោះស្រាយរបៀបម៉េច បើសិនជាមានការបាត់ដីមែន? បើគ្រាន់តែសំអាងប្រយោលៗ ហើយអះអាងថា បាត់ដីនេះត្រូវឲ្យមានតម្លាភាព»៕
វីដេអូ៖
