.jpg)
លោកនាយករដ្ឋមន្ត្រី ហ៊ុន សែន ធ្វើសន្និសីទកាសែតបន្ទាប់ពីរូបលោកបានចាក់វ៉ាក់សាំងកូវីដ ១៩ កាលពីថ្ងៃទី ៤ ខែមីនា នៅមន្ទីរពេទ្យកាល់ម៉ែត។ រូបថត SPM
ភ្នំពេញ៖ លោកនាយករដ្ឋមន្រ្តី ហ៊ុន សែន បានបញ្ជាឱ្យកាត់បន្ថយចំនួនអ្នកធ្វើការយ៉ាងតិចឲ្យបាន៩០ភាគរយ នៅតាមស្ថាប័នរដ្ឋ និងស្ថាប័ននីតិប្បញ្ញត្តិ ក្នុងរយៈពេលយ៉ាងតិច ៧ ថ្ងៃ ហើយលោកក៏បានស្នើឱ្យវិស័យឯកជន ក៏គួរតែកាត់បន្ថយចំនួនអ្នកធ្វើការផងដែរដោយធ្វើការពីផ្ទះ ដើម្បីចូលរួមទប់ស្កាត់ការឆ្លងរាលដាលដៃជំងឺកូវីដដែលមានទំហំកាន់តែធំ។
បទបញ្ជារបស់លោក ហ៊ុន សែន នេះ ធ្វើឡើង បន្ទាប់ពីចំនួនអ្នកឆ្លងជំងឺកូវីដ ១៩ ត្រូវបានរកឃើញកាន់តែច្រើនរហូតដល់ ៤៩ នាក់ នៅត្រឹមល្ងាចថ្ងៃទី ៨ ខែមីនា ដែលចំនួនអ្នកឆ្លងនេះ មាននៅក្នុងទីក្រុងភ្នំពេញ ខេត្តព្រះសីហនុ ខេត្តព្រៃវែង និងផ្នែកខ្លះនៃខេត្តកណ្តាល។
លោក ហ៊ុន សែន នៅយប់ថ្ងៃចន្ទ ទី ០៨ ខែ មីនា ឆ្នាំ ២០២១ បានចេញសារជាសំឡេងបន្ទាន់មួយដោយអំពាវនាវឲ្យស្ថាប័នរដ្ឋ និងឯកជន ផ្អាករាល់ការជួបជុំ ដែលមិនមានការចាំបាច់ ខណៈករណីកូវីដ ១៩ កាន់តែរាលដាលខ្លាំង ដោយពេលនេះ មិនដឹងថា ជំងឺពិតប្រាកដចេញពីកន្លែងណា។
លោកបានថ្លែងថា ៖ «នេះគឺជាបញ្ហាប្រឈមដ៏ធំ។ ខ្ញុំគិតថា វិធានការនេះ គឺជាវិធានការចាំបាច់ ដើម្បីការពារនូវសុខភាពរបស់បុគ្គលម្នាក់ៗ គ្រួសារនីមួយៗ ក៏ដូចជាសង្គមជាតិរបស់យើងផងដែរ ហើយខ្ញុំសុំអំពាវនាវឱ្យមានការផ្អាកនូវការជួបជុំ ដែលមិនមានការចាំបាច់ ដើម្បីកាត់បន្ថយនូវហានិភ័យ»។
លោកនាយករដ្ឋមន្រ្តីបានបន្តថា លោកមិនទាន់អាចប្រើច្បាប់ ស្តីពីការដាក់ប្រទេសក្នុងគ្រាមានអាសន្នបានទេ តែត្រូវការច្បាប់គ្រប់គ្រង ទាក់ទងជាមួយនឹងជំងឺកូវីដ ១៩ និងជំងឺដ៏កាចសាហាវផ្សេងទៀត។
លោក ហ៊ុន សែន ក៏បានបញ្ជាឱ្យខេត្តព្រះសីហនុ ធ្វើការរឹតបន្តឹងបន្ថែមទៀត ទៅលើការចេញចូលរបស់មនុស្ស តែមិនត្រូវឱ្យមានការរាំងស្ទះ ដល់ការដឹកជញ្ជូនទំនិញចេញចូលទេ៕
វីដេអូ៖
