The Phnom Penh Post Search

Search form




Logo of Phnom Penh Post newspaper Phnom Penh Post - លោក​ ហ៊ុន ​សែន បញ្ជា​ឲ្យ​សង​ប្រាក់​ជំពាក់​ដល់​គ្រួសារ​សព​អតីត​យុទ្ធជន

លោក​ ហ៊ុន ​សែន បញ្ជា​ឲ្យ​សង​ប្រាក់​ជំពាក់​ដល់​គ្រួសារ​សព​អតីត​យុទ្ធជន

លោក​នាយក​រដ្ឋមន្ត្រី ហ៊ុន សែន នៅក្នុង​ពិធី​កាលពី​ម្សិលមិញ​។
លោក​នាយក​រដ្ឋមន្ត្រី ហ៊ុន សែន នៅក្នុង​ពិធី​កាលពី​ម្សិលមិញ​។ ហេង ជីវ័ន

លោក​ ហ៊ុន ​សែន បញ្ជា​ឲ្យ​សង​ប្រាក់​ជំពាក់​ដល់​គ្រួសារ​សព​អតីត​យុទ្ធជន

ភ្នំពេញៈ លោក​នាយករដ្ឋមន្ត្រី ហ៊ុន សែន បាន​បញ្ជា​ឲ្យ​ក្រសួង​សង្គមកិច្ច និង​ក្រសួង​សេដ្ឋកិច្ច​ទូទាត់​​សង​ប្រាក់​ជំពាក់​គ្រួសារ​សព​អតីត​យុទ្ធជន​ចំនួន ១៥២៣ នាក់​គិត​ជា​ទឹកប្រាក់​ចំនួន ៦ ពាន់​លាន​រៀល​ប្រហែល​ ១,៥ លាន​ដុល្លារ​ឲ្យ​បាន​មុន​ពិធី​បុណ្យ​ភ្ជុំបិណ្ឌ​ខាង​មុខ​នេះ​។

លោក ហ៊ុន ​សែន ក្នុង​តួនាទី​ជា​ប្រធាន​គណៈកម្មាធិការ​កណ្តាល​សមាគម​អតីត​យុទ្ធជន​កម្ពុជា​បាន​ប្រកាស​បែប​នេះ​ក្នុង​ពិធី​បិទ​មហាសន្និបាត​តំណាង​អតីត​យុទ្ធជន​កម្ពុជា​ទូទាំង​ប្រទេស​លើក​ទី ២ កាលពី​ម្សិលមិញ​បន្ទាប់ពី​របាយការណ៍ ៥ ឆ្នាំ​របស់​សមាគម​អតីត​យុទ្ធជន​កម្ពុជា​បាន​បង្ហាញ​ថា​គិត​ចាប់ពី​ឆ្នាំ ២០០៨ មក​អតីត​យុទ្ធជន​កម្ពុជា​ចំនួន​ ៥៥១៣ ​នាក់​បាន​ទទួល​ប្រាក់​ឧបត្ថម្ភ ៤ លាន​រៀល​ក្នុង​មួយ​គ្រួសារ​ពី​បេឡា​មរណ​សង្គ្រោះ​របស់​សមាគម​អតីត​យុទ្ធជន​កម្ពុជា​ខណៈ​នៅ​សល់​ប្រមាណ ១៥២៣ នាក់​មិន​ទាន់​ត្រូវ​បាន​ដោះស្រាយ​នៅ​ឡើយ។

លោក ហ៊ុន សែន ថ្លែង​ថា៖ «ខ្ញុំ​មាន​ការ​ភ្ញាក់ផ្អើល​ដែរ​ហើយ​ខ្ញុំ​ស្នើ​ឲ្យ​មាន​ការ​ដោះស្រាយ​បន្ទាន់​គឺ​ធ្វើឲ្យ​​បាន​មុន​ភ្ជុំបិណ្ឌ​នេះ​តែ​ម្តង​នោះ​គឺ​ត្រង់​ថា​មក​ដល់​ពេល​នេះ​បែរ​ជា​យើង​កំពុង​ជំពាក់​ថ្លៃ​សាកសព​ចំនួន​ ១៥២៣ សាកសព​ខ្ញុំ​មិន​អាច​យល់​ព្រម​បាន​ទេ​លើ​បញ្ហា​នេះ​ដែល​តម្រូវ​ឲ្យ​ក្រសួង​សង្គមកិច្ច​ធ្វើ​កិច្ចការ​ជា​បន្ទាន់​លើ​កិច្ចការ​នេះ​ដើម្បី​ផ្តល់​ឲ្យ​ក្រុម​គ្រួសារ​បងប្អូន​ដែល​ពលី​នោះ​ទទួល​បាន​នូវ​ថវិកា​នេះ»។

បើ​តាម​លោក​នាយករដ្ឋមន្ត្រី​ជា​មធ្យម​អតីត​យុទ្ធជន​បាន​ទទួល​មរណភាព​ចំនួន ១៥០ ​នាក់​ក្នុង ១ ខែ ដែល​ពួកគេ​ទាំងនោះ​មាន​អាយុ​ចាប់ពី​ប្រហាក់​ប្រហែល​នឹង ៦០ ឆ្នាំ ឬ​លើស​។

មន្ត្រី​យោធា​ចូលរួម​នៅក្នុង​ពិធី​បិទ​មហាសន្និបាត​តំណាង​សមាគម​អតីត​យុទ្ធជន​កម្ពុជា​ទូទាំង​ប្រទេស​លើក​ទី​ ២ ពី​ថ្ងៃ​ម្សិលមិញ​។
មន្ត្រី​យោធា​ចូលរួម​នៅក្នុង​ពិធី​បិទ​មហាសន្និបាត​តំណាង​សមាគម​អតីត​យុទ្ធជន​កម្ពុជា​ទូទាំង​ប្រទេស​លើក​ទី​ ២ ពី​ថ្ងៃ​ម្សិលមិញ​។ ហេង ជីវ័ន

តាម​លក្ខន្តិកៈ​សមាគម​អតីត​យុទ្ធជន​កម្ពុជា​ប្រការ ៣៥ ស.អ.ក មាន​ថវិកា​ដែល​បាន​មកពី​ប្រភព​ភាគទាន និង​វិភាគទាន​របស់​សមាជិក​អំណោយ​សប្បុរសធម៌​របស់​សប្បុរសជន​អង្គការ​ជាតិ អន្តរជាតិ អាជីវកម្ម​ស្រប​ច្បាប់​របស់ ស.អ.ក និង​អំណោយ​របស់​រាជរដ្ឋាភិបាល​។

ជាមួយ​គ្នា​នេះ​លោក​នាយក​រដ្ឋមន្ត្រី​បាន​ស្នើ​ឲ្យ​ក្រុម​គ្រួសារ​របស់​លោក​ដែល​ចូលរួម​ធ្វើ​សកម្មភាព​មនុស្សធម៌​ជួយ​សង់​ផ្ទះ​ទេវតា​ជូន​ចាស់ជរា ផ្លាស់ប្តូរ​ទិសដៅ​មក​ជួយ​ធ្វើ​ផ្ទះ​សម្រាប់​ជូន​យុទ្ធជន​កងទ័ព​វិញ​ជាពិសេស​ជនពិការ​ហើយ​លោក​ក៏​បាន​ជំរុញ​ឲ្យ​មន្ត្រី​រាជរដ្ឋាភិបាល​ចុះ​ទៅ​មូលដ្ឋាន​តាម​ខេត្ត​នានា​ជួយ​សង់​ផ្ទះ​ជូន​ដល់​យុទ្ធជន​កងទ័ព​ផង​ដែរ​។

អតីត​យុទ្ធជន​ដែល​ជា​ទាហាន​សម័យ ប៉ុលពត លោក ស៊ីម ឈិន បច្ចុប្បន្ន​អាយុ ៦០ ​ឆ្នាំ​ពិការ​ជើង​ម្ខាង និង​មាន​ជំងឺ​មហារីក​ពកក​រស់នៅ​ភូមិ​ឯកភាព ឃុំ​ជីរោទី២ ស្រុក​ត្បូងឃ្មុំ ខេត្ត​ត្បូងឃ្មុំ បាន​ប្រាប់​ភ្នំពេញ ប៉ុស្តិ៍ ពី​ម្សិលមិញ​ថា​កាលពី​ឆ្នាំ ១៩៧៨ ក្នុង​តួនាទី​ជា​ទាហាន​ម្នាក់​លោក​បាន​ជួប​គ្រោះ​ឧបទ្ទេវហេតុ​ជាន់​មីន​ក្នុង​សង្គ្រាម​រំដោះ​ជាតិ​ហើយ​​ជា​លទ្ធផល​លោក​បាន​ពិការ​ជើង​ម្ខាង និង​អសមត្ថភាព​ធ្វើ​ការងារ​។

លោក ឈិន បាន​អះអាង​ថា​ លោក​មិន​ដែល​បាន​ទទួល​ប្រាក់​សោធន​និវត្តន៍ ឬ​ប្រាក់​ឧបត្ថម្ភ​ណា​មួយ​ពី​អាជ្ញាធរ​មូលដ្ឋាន​នោះ​ទេ​ជាង ៣០ ​ឆ្នាំ​មក​នេះ​បើ​ទោះបី​ជា​លោក​បាន​សួរ​នាំ​ជាច្រើន​ដង​មក​ហើយ​ក៏​ដោយ​។

លោក​ថា៖ «ខ្ញុំ​ធ្លាប់​សួរ​មេឃុំ​គេ​ថា ​ខ្ញុំ​ជា​យុទ្ធជន​ជំនាន់​មុន​គឺ​ខុស​គ្នា​គេ​ថា​ទាល់​តែ​ឆ្នាំ​ ៧៩ មក​ទើប​គេ​រ៉ាប់រង។ ខ្ញុំ​ឆ្ងល់​ណាស់​ខ្ញុំ​ក៏​រំដោះ​ជាតិ​ដែរ​គ្រាន់តែ​ខ្ញុំ​មុន​គេ​ក្រោយ​ឆ្នាំ ៧៩ ​ប៉ុណ្ណោះ​ខ្ញុំ​ពិការ​​ដោយសារ​ជាតិ​ហើយ​រហូត​មក​ទល់​ពេល​នេះ​ក៏​គ្មាន​ប័ណ្ណ​ក្រីក្រ​​ទៀត​អត់​មាន​អ្នក​ខ្វល់​នឹង​ខ្ញុំ​ទេ​ទោះ​ខ្ញុំ​បាន​សួរ​នាំ​ក្តី​សព្វថ្ងៃ​ពឹង​លើ​កូនៗ​ដែល​ធ្វើ​ស្រែ​ចិញ្ចឹម​តែ​ប៉ុណ្ណោះ។ ខ្ញុំ​សូម​អំពាវនាវ​ឲ្យ​ជួយ​ខ្ញុំ​ផង»។

បើ​តាម​ក្រសួង​សង្គមកិច្ច​អតីត​យុទ្ធជន និង​យុវនីតិ​សម្បទា​រដ្ឋាភិបាល​បាន​ចំណាយ​ថវិកា​រដ្ឋ​សរុប​ជាង ៣០០ ពាន់​លាន​រៀល (ប្រហែល ៧៥ ​លាន​ដុល្លារ) ក្នុង​មួយ​ឆ្នាំ​សម្រាប់​អតីត​យុទ្ធជន ៨៧២៨៥ ​នាក់ និង​អ្នក​នៅក្នុង​បន្ទុក ១៤០៥២៨ ​នាក់​គិត​ត្រឹម​ខែ​មិថុនា​ឆ្នាំ​ ២០១៥ ហើយ​​ប្រាក់​របប​គោល​នយោបាយ​នេះ​ត្រូវ​បាន​កែសម្រួល​ជា​បន្តបន្ទាប់​ស្រប​តាម​ការ​ដំឡើង​ប្រាក់​បៀវត្សរ៍​មន្ត្រី​រាជការ និង​កងកម្លាំង​ប្រដាប់​អាវុធ៕

អត្ថបទគួរចាប់អារម្មណ៍