.jpg)
លោក ម៉ម ប៊ុនហេង រដ្ឋមន្ត្រីក្រសួងសុខាភិបាល។ ហុង រស្មី
ភ្នំពេញៈ លោកនាយករដ្ឋមន្ត្រី ហ៊ុន សែន បានបញ្ជាឲ្យអាជ្ញាធរចុះរឹបអូសយកតែម្តងនូវឧបករណ៍តេស្តរកវីរុសកូរ៉ូណាដែលកំពុងត្រូវបានគេចែកចាយដោយខុសច្បាប់ ខណៈដែលកម្ពុជានឹងចាប់ផ្ដើមអនុវត្តការរឹតបន្តឹងការធ្វើដំណើរចូលក្នុងប្រទេសរបស់ជនបរទេសចាប់ពីយប់ថ្ងៃចន្ទនេះតទៅ។
តាមសារជាសំឡេងដែលត្រូវបានគេចែកចាយតៗគ្នាកាលពីម្សិលមិញលោក ហ៊ុន សែន បានមានប្រសាសន៍ថា៖ «យើងអត់មានជម្រើសទេ ឥឡូវសុំឲ្យឯកឧត្តម ម៉ម ប៊ុនហេង ក្នុងឋានៈជាអ្នកដែលដឹងស្គាល់បញ្ហានេះធ្វើការជាមួយនឹងនគរបាលមូលដ្ឋាន ដើម្បីនឹងចុះចាប់យកហ្មង (ឧបករណ៍តេស្តរកវីរុសកូរ៉ូណា) កុំឲ្យយកទៅណាទៀត។ និយាយរួមចុះចាប់យកហ្មងរបស់ដែលយើងមិនទាន់មានការអនុញ្ញាតពីអង្គការសុខភាពពិភពលោក ចុះចាប់យកតែម្ដង»។ លោកបញ្ជាឲ្យអាជ្ញាធរពាក់ព័ន្ធដោយមានការសម្របសម្រួលពីព្រះរាជអាជ្ញា ចុះចាប់យកឧបករណ៍តេស្តរកវីរុសកូរ៉ូណាដោយមិនចាំបាច់យកវិធានការអប់រំជាមួយអ្នករកស៊ីទាំងនោះទៀតទេ។
លោកឲ្យអាជ្ញាធរអនុវត្តបន្ទាន់។ លោកក៏ឲ្យលោក ឃួង ស្រេង ធ្វើកិច្ចការនេះខណៈដែលរាជធានីភ្នំពេញមានការលក់ចែកចាយច្រើនជាងគេ។ នៅតាមខេត្តក៏ត្រូវធ្វើដូចគ្នាដែរ។ «អាហ្នឹងគឺបញ្ជាក់គ្នាយ៉ាងច្បាស់ៗដើម្បីផលប្រយោជន៍ប្រជាពលរដ្ឋរបស់យើងកុំឲ្យប្រជាពលរដ្ឋរបស់យើងរងគ្រោះ ដោយសារអាជំងឺរាតត្បាតនេះហើយរងគ្រោះដោយសារតែមនុស្សដែលវាប្រព្រឹត្ត។ អ៊ីចឹងខ្ញុំចេញបញ្ជាឲ្យកម្លាំងទាំងអស់ចេញប្រតិបត្តិការកន្លែងណាដែលមាន ហើយនិយាយរួមរាជធានី-ខេត្តត្រូវតែមើលខ្លួនឯងអំពីបញ្ហានេះ ព្រោះប្រតិបត្តិការឆាប់រហ័ស ដើម្បីបញ្ជូនកម្លាំងចុះទៅធ្វើតែម្ដង»។
ជាមួយគ្នានេះក្រសួងការបរទេស និងសហប្រតិបត្តិការអន្តរជាតិបានប្រកាសកាលពីថ្ងៃសុក្រថា ការសម្រេចធ្វើការរឹតបន្តឹងការធ្វើដំណើររបស់ជនបរទេសធ្វើឡើងតាមវិធានការនានាដែលប្រទេសក្នុងតំបន់អាស៊ានបានធ្វើ ហើយគឺជាវិធានការបន្ថែមលើអ្វីដែលកម្ពុជាបានដាក់ចេញកាលពីកន្លងទៅ។ ការរឹតបន្តឹងនេះរួមមានការផ្អាកគោលការណ៍លើកលែងទិដ្ឋាការទេសចរណ៍ ទិដ្ឋាការតាមប្រព័ន្ធអេឡិចត្រូនិក និងទិដ្ឋាការពេលមកដល់សម្រាប់ជនបរទេសទាំងអស់រយៈពេល ១ ខែ។ ជនបរទេសដែលមានបំណងធ្វើដំណើរមកកម្ពុជាត្រូវតែស្នើសុំទិដ្ឋាការជាមុន ហើយត្រូវប្រគល់នូវវិញ្ញាបនបត្របញ្ជាក់សុខភាពត្រឹមត្រូវមានសុពលភាពមិនលើស ៧២ ម៉ោងមុនពេលធ្វើដំណើរដែលបញ្ជាក់ថា បុគ្គលនោះមិនមានវីរុសកូរ៉ូណា។
លើសពីនេះទៀតត្រូវមានឯកសារធានារ៉ាប់រងសុខភាពក្នុងទឹកប្រាក់យ៉ាងតិច ៥ ម៉ឺនដុល្លារ។ ទោះយ៉ាងណាតម្រូវការវិញ្ញាបនបត្រ និងឯកសារធានារ៉ាប់រងសុខភាពមិនត្រូវអនុវត្តចំពោះជនបរទេសដែលកាន់ទិដ្ឋាការការទូត និងផ្លូវការនោះទេ។ រាល់ជនបរទេសនឹងត្រូវត្រួតពិនិត្យហានិភ័យសុខភាពដោយមន្ត្រីរដ្ឋាភិបាលដែលមានសមត្ថកិច្ច។
ក្រសួងការបរទេសថ្លែងថា៖ «ជនបរទេសនោះនឹងត្រូវដាក់ឲ្យនៅដាច់ដោយឡែកស្របតាមវិធានការចត្តាឡីស័ក ឬវិធានការនានាដែលបានកំណត់ដោយក្រសួងសុខាភិបាលកម្ពុជា ដើម្បីបង្ការ និងទប់ស្កាត់វីរុសនេះ»។
លោក កុយ គួង អ្នកនាំពាក្យក្រសួងការបរទេសថ្លែងយ៉ាងខ្លីកាលពីថ្ងៃអាទិត្យថា វិធានការនេះជាវិធានការបន្ថែមដែលកម្ពុជាបានដាក់ចេញនោះគឺការហាមឃាត់ជនបរទេសមកពីប្រទេសចំនួន ៦ មិនឲ្យចូលកម្ពុជារួមមានអ៊ីតាលី អេស្ប៉ាញ បារាំង អាល្លឺម៉ង់ សហរដ្ឋអាមេរិក និងអ៊ីរ៉ង់។
គិតត្រឹមថ្ងៃម្សិលមិញ កម្ពុជារកឃើញអ្នកឆ្លងជំងឺកូវីដ ១៩ ចំនួន ១០៣ នាក់ ដោយអ្នកឆ្លងចុងក្រោយមានចំនួនម្នាក់គឺជាស្ត្រីអាយុ ៣៦ ឆ្នាំនៅក្រុងប៉ោយប៉ែត ខេត្តបន្ទាយមានជ័យ។ ស្ត្រីរូបនេះកំពុងទទួលការព្យាបាលនៅមន្ទីរពេទ្យខេត្តបន្ទាយមានជ័យ។ នេះបើតាមក្រសួងសុខាភិបាល។
កាលពីថ្ងៃសៅរ៍ ក្រសួងសុខាភិបាលបញ្ជាក់ថា មានករណីវិជ្ជមានកូវីដ ១៩ ចំនួន ៤ ករណីលើពលដ្ឋខ្មែរនៅទីក្រុងភ្នំពេញ។ អ្នកទាំង ៤ គឺជាគ្រួសារមួយដែលមានឪពុកអាយុ ៦២ ឆ្នាំម្ដាយអាយុ ៦១ ឆ្នាំកូនប្រុសអាយុ ៣៩ ឆ្នាំ និងកូនស្រីអាយុ ៣៧ ឆ្នាំ។ អ្នកទាំង ៤ បានត្រឡប់មកពីប្រទេសបារាំងដោយកូនប្រុសត្រឡប់មកមុនគឺកាលពីថ្ងៃទី ១៥ មីនា ហើយមានរោគសញ្ញាបន្តិចបន្តួច ចំណែក ៣ នាក់ទៀតត្រឡប់មកនៅថ្ងៃទី ២៤ ខែមីនា ដោយមានរោគសញ្ញាបន្តិចបន្តួចដូចគ្នា។ បច្ចុប្បន្នអ្នកទាំង ៤ កំពុងសម្រាកព្យាបាលនៅមណ្ឌលសុខភាពចាក់អង្រែក្រោម។
ក្រសួងក៏បានបញ្ជាក់ដែរថា មានជនជាតិចិនចំនួន ១៧៤ នាក់បានធ្វើដំណើរពីប្រទេសហ្វីលីពីនចូលមកកម្ពុជាដើម្បីបន្តដំណើរទៅប្រទេសចិន ដោយបានស្នាក់នៅសណ្ឋាគារមួយនៅខេត្តស្វាយរៀង។ ប៉ុន្តែក្នុងចំនួននេះមាន ២ នាក់មានអាការក្ដៅខ្លួន ហើយត្រូវបានមន្ទីរពេទ្យបង្អែកខេត្តស្វាយរៀង យកសំណាករបស់ពួកគេទៅធ្វើតេស្តនៅវិទ្យាស្ថានប៉ាស្ទ័រដោយមានលទ្ធផលអវិជ្ជមាន។ អ្នកទាំង ២ ក៏ត្រូវបានអនុញ្ញាតឲ្យចេញពីមន្ទីរពេទ្យវិញ។
នៅថ្ងៃអាទិត្យម្សិលមិញក្រសួងបានបញ្ជាក់ថា អ្នកមានផ្ទុកកូវីដ១៩សរុប ២១ នាក់បានជាសះស្បើយ។ អ្នកទាំងនោះរួមមានជនជាតិចិនម្នាក់ដែលរកឃើញមុនគេ ជនជាតិអង់គ្លេស ៣ នាក់ជនជាតិបារាំងម្នាក់ និងជនជាតិខ្មែរ ១៦ នាក់។
ក្រសួងបញ្ជាក់ថា៖ «អ្នកដែលសម្រាកព្យាបាលសរុប ៨២ នាក់ (ស្រី ២៦ នាក់ និងបុរស ៥៦ នាក់) នៅតាមមន្ទីរពេទ្យរដ្ឋនៅថ្នាក់ជាតិ និងថ្នាក់ខេត្ត។ អ្នកមានវីរុសកូរ៉ូណាដែលបានរកឃើញនៅទូទាំងប្រទេសសរុបចំនួន ១០៣ នាក់ (ស្រី ២៨ នាក់ បុរស ៧៥ នាក់)»។ ជាមួយគ្នានេះក្រសួងសុខាភិបាល បានព្រមានថា បុគ្គល និងក្រុមហ៊ុនដែលលក់ឧបករណ៍តេស្តរកវីរុសកូរ៉ូណានេះនឹងត្រូវប្រឈមមុខច្បាប់ជាធរមាន ព្រោះឧបករណ៍ទាំងនេះមិនទាន់មានការបញ្ជាក់ពីអង្គការសុខភាពពិភពលោកនៅឡើយទេ ហើយលទ្ធផលមិនអាចទុកចិត្តបាន។ ក្រសួងក៏បានប្រាប់ពលរដ្ឋកុំឲ្យជឿលើឧបករណ៍ទាំងនេះ ក្រៅពីលទ្ធផលដែលចេញដោយវិទ្យាស្ថានប៉ាស្ទ័រ។
ក្រសួងបានសរសេរថា៖ «ក្រសួងសុខាភិបាលសូមអំពាវនាវសូមបងប្អូនប្រជាពលរដ្ឋកុំប្រើឧបករណ៍ធ្វើតេស្តរហ័សរកវីរុសកូវីដ១៩ ដោយខ្លួនឯងតាមការឃោសនាពីបុគ្គល ឬការផ្សព្វផ្សាយខុសច្បាប់មួយចំនួនបែបអនាធិបតេយ្យ»។
ទន្ទឹមនឹងនេះដែរភ្ញៀវទេសចរប្រមាណជិត ២០០ នាក់ដែលភាគច្រើនជាពលរដ្ឋនៃចក្រភពអង់គ្លេសបានជាប់នៅក្នុងប្រទេសកម្ពុជា ដោយសារតែក្រុមហ៊ុនហោះហើរបានលុបចោលជើងហោះហើរ។ នេះបើតាមក្រុមអ្នកដែលបានជាប់នៅកម្ពុជាដែលបានបង្កើតក្រុមហ្វេសប៊ុកមួយឈ្មោះថា «Stranded in Cambodia UK»។ លើសពីនេះក៏មានការធ្វើញត្តិតាមអនឡាញ ដើម្បីស្នើឲ្យលោកនាយករដ្ឋមន្ត្រីអង់គ្លេស Boris Johnson និងមន្ត្រីពាក់ព័ន្ធធ្វើអន្តរាគមន៍។ ត្រឹមថ្ងៃអាទិត្យមានមនុស្សជាង ១ ម៉ឺននាក់បានចូលរួមចុះឈ្មោះលើញត្តិនោះ។
ញត្តិនោះសរសេរថា៖ «យើងពិតជាត្រូវការជំនួយរបស់លោកដើម្បីទៅផ្ទះវិញ។ មានជនជាតិពីចក្រភពអង់គ្លេសដែលជាប់នៅកម្ពុជា ដោយគ្មានមធ្យោបាយទៅផ្ទះវិញ»។ ញត្តិនោះបន្តថា៖ «វាហាក់ដូចជាគ្មានជម្រើសអ្វីផ្សេងដើម្បីទៅផ្ទះទេ ក្រៅពីជំនួយពីរដ្ឋាភិបាលចក្រភពអង់គ្លេសក្នុងការរៀបចំយន្តហោះឯកជន»៕
