.jpg)
លោកនាយករដ្ឋមន្ត្រី ហ៊ុន សែន ថ្លែងនៅក្នុងវេទិកាតាមប្រព័ន្ធអនឡាញនៅថ្ងៃទី ២០ ឧសភា។ រូបថត SPM
ភ្នំពេញៈ លោកនាយករដ្ឋមន្រី្ត ហ៊ុន សែន បានស្នើសុំវ៉ាក់សាំងកូវីដ ១៩ ចំនួន ៤ លានដូស ពីសហរដ្ឋអាមេរិក ខណៈលោកបារម្ភពីគម្លាតនៃការទទួលបានវ៉ាក់សាំង នឹងធ្វើឲ្យមានវិសមភាព សម្រាប់ការងើបឡើងវិញនៃសេដ្ឋកិច្ចពិភពលោក។
លោក ហ៊ុន សែន បានថ្លែងបែបនេះ នៅក្នុងសន្និសីទអន្តរជាតិលើកទី២៦ ស្តីពីអនាគតរបស់អាស៊ី ក្រោមប្រធានបទ ការរៀបចំសម័យកាលថ្មី ក្រោយវិបត្តិកូវីដ តួនាទីរបស់អាស៊ី ក្នុងការស្តារពិភពលោកឡើងវិញ ដែលធ្វើឡើងតាមអនឡាញ នៅថ្ងៃទី ២០ ឧសភា។
លោកបានលើកឡើងថា ការទទួលបានវ៉ាក់សាំងដែលអាចធានាបាននូវភាពស៊ាំសហគមន៍ (Herd Immunity) នឹងត្រូវចំណាយពេលយូរទៀត ស្របពេលដែលគម្លាតនៃការទទួលបានវ៉ាក់សាំង រវាងប្រទេសកំពុងអភិវឌ្ឍន៍ និងប្រទេសអភិវឌ្ឍន៍ នឹងធ្វើឱ្យមានវិសមភាពសម្រាប់ការងើបឡើងវិញ នៃសេដ្ឋកិច្ច។
ការបញ្ជាក់យ៉ាងដូច្នេះ ដោយលោក សំអាងថា មានតែប្រទេសមួយចំនួនប៉ុណ្ណោះ អាចស្ដារសេដ្ឋកិច្ចខ្លួនឡើងវិញបានប្រសើរ ខណៈដែលប្រទេសជាច្រើនផ្សេងទៀត នឹងបន្តប្រឈមនឹងផលប៉ះពាល់ ទាំងក្នុងផ្នែកសុខាភិបាល និងផ្នែកសេដ្ឋកិច្ច។
លោកបញ្ជាក់ថា៖ «ពិភពលោកទាំងមូល ក៏កំពុងបន្តប្រឈមនឹងវិបត្តិ និងហានិភ័យជាច្រើនទៀតផងដែរ ជាពិសេស ការកើនឡើងនូវភាពតានតឹងនៃស្ថានភាពភូមិសាស្ត្រនយោបាយតំបន់ និងសង្គ្រាម ពាណិជ្ជកម្ម និងបច្ចេកវិទ្យារវាងប្រទេសមហាអំណាចនានា ក៏នឹងជះឥទ្ធិពលដល់ការអភិវឌ្ឍ សកលសម្រាប់ ទាំងរយៈពេលខ្លី និងវែងខាងមុខ»។
ជាមួយគ្នានេះ លោក ហ៊ុន សែន បានបញ្ជាក់បន្ថែមថា កម្ពុជាបានស្នើសុំទៅសហរដ្ឋអាមេរិក នូវវ៉ាក់សាំងចំនូន ៤ លានដូស ហើយកម្ពុជា ចាំស្វាគមន៍រាល់វ៉ាក់សាំងពីបណ្ដាប្រទេសនានា ដែលចង់ផ្តល់ជូនដល់កម្ពុជា ដើម្បីចូលរួមពន្លឿនភាពស៊ាំសហគមន៍នៅកម្ពុជា។
លោកបញ្ជាក់ថា៖ «យើងត្រូវខិតខំស្វែងរកវ៉ាក់សាំង ដើម្បីចាក់ជូនប្រជាពលរដ្ឋ របស់យើង។ យើងខ្ញុំក៏បានស្នើសុំទៅអាមេរិកនូវវ៉ាក់សាំងផងដែរ គឺសុំ ៤លានដូស។ ប៉ុន្តែមកដល់ម៉ោងនេះ យើងខ្ញុំអត់ទាន់ទទួលបានចម្លើយណាមួយពីសហរដ្ឋអាមេរិកទេ»។
កាលពីថ្មីៗនេះ អាមេរិក បានប្រកាសផ្តល់ថវិកាជាង ៤ ពាន់លានដុល្លារ ដល់បណ្ដាប្រទេសផ្សេងៗ តាមយន្តការ COVAX របស់អង្គការសុខភាពពិភពលោកក្នុងការផ្តល់វ៉ាក់សាំងប្រឆាំងកូវីដដល់បណ្តាប្រទេសក្រីក្រ។
ជាមួយនឹងការប្រកាសផ្តល់ថវិកានេះ កម្ពុជានឹងទទួលបានវ៉ាក់សាំង ១ លាន ១ សែនដូស នៅត្រឹមដំណាច់ខែឧសភា រួមនឹងទទួលបានជាបន្តបន្ទាប់ទៀតក្នុងពេលខាងមុខ។ នេះបើតាមលោក W. Patrick Murphy ឯកអគ្គរដ្ឋទូតអាមេរិកប្រចាំកម្ពុជា បានបញ្ជាក់កាលពីថ្ងៃទី ១៨ ឧសភា។
បន្ថែមពីនេះ លោក W. Patrick Murphy បានឱ្យដឹងថា អាមេរិក ក៏នឹងផ្តល់ថវិកាជាង ១១ លានដុល្លារ សម្រាប់កម្ពុជា នៅអំឡុងពេលរាតត្បាតកូវីដ ១៩ ជាសកលនេះផងដែរ៕
វីដេអូ៖
