.jpg)
អ្នកដំណើរកំពុងបើកបរឆ្លងកាត់ទីស្នាក់ការកណ្តាល CPP ពីម្សិលមិញ។ ហ៊ាន រង្សី
ភ្នំពេញៈ លោកនាយករដ្ឋមន្ត្រី ហ៊ុន សែន កាលពីម្សិលមិញបានបង្ហាញការប្តេជ្ញាចិត្ត តាមរយៈសារអបអរសាទរខួបអនុស្សាវរីយ៍លើកទី៤២ នៃថ្ងៃជ័យជម្នះ ៧មករា ដោយរក្សាភាពជាម្ចាស់ក្នុងការការពារប្រជាជនឱ្យមានសុខសន្តិភាព ខណៈការប្រារព្ធពិធីនេះត្រូវបានផ្អាកការជួបជុំ ដើម្បីទប់ស្កាត់កូវីដ ១៩ ស្របពេលស្ថានទូតមហាអំណាចក៏បង្ហាញការចងចាំនៃថ្ងៃដួលរលំរបបខ្មែរក្រហម។
តំណាងឱ្យគណបក្សប្រជាជនកម្ពុជាផងនោះលោក ហ៊ុន សែន បានថ្លែងក្នុងសារលិខិតរបស់លោកថា ចាប់ផ្តើមពីថ្ងៃជ័យជម្នះ ៧មករា ប្រជាជនកម្ពុជាបានជ្រោងទង់មហាសាមគ្គីជាតិពុះពារជម្នះគ្រប់ឧបសគ្គ ដើម្បីការពារការរស់រានមានជីវិតរបស់ខ្លួន ស្តារ និងកសាងប្រទេសឡើងវិញពីចំណុចសូន្យធ្វើឱ្យមានការផ្លាស់ប្តូរ រីកចម្រើនជាជំហានៗរហូតមកដល់បច្ចុប្បន្ន។
លោកបន្តថា បើទោះជាឆ្នាំនេះតម្រូវឱ្យផ្អាកការជួបជុំធ្វើមីទ្ទិងដោយសារតែបញ្ហាជំងឺកូវីដ ១៩ ក៏អត្ថន័យ និងស្មារតីជ័យជម្នះ ៧មករា នៅតែរស់រវើកជានិច្ចក្នុងមនសិការរបស់ប្រជាជនកម្ពុជា ព្រោះថ្ងៃនេះ ប្រជាជនកម្ពុជាបានប្រសិទ្ធនាមជាថ្ងៃកំណើតទី២ របស់ខ្លួន ដែលជាមូលដ្ឋានគ្រឹះនៃការកកើតឡើងវិញ និងការរីកចម្រើននូវអ្វីៗគ្រប់យ៉ាង ដែលជាគុណតម្លៃសម្រាប់សង្គមជាតិ។
លោក ហ៊ុន សែន បញ្ជាក់ថា៖ «ខ្ញុំព្រះករុណាខ្ញុំ សូមបញ្ជាក់ជាថ្មីនូវការប្តេជ្ញាចិត្តរបស់រាជរដ្ឋាភិបាលក្នុងការរក្សាភាពជាម្ចាស់លើការងារជាអាទិភាពចម្បងទាំង ២ គឺទី១ ការរក្សាសន្តិភាព ស្ថិរភាពនយោបាយ ដែលជាមូលដ្ឋានគ្រឹះសម្រាប់ការគ្រប់គ្រងស្ថានការណ៍ និងទី២ គឺការរក្សាស្ថិរភាព ម៉ាក្រូសេដ្ឋកិច្ចឱ្យល្អប្រសើរ និងបន្តជំរុញអនុវត្តយ៉ាងម៉ឺងម៉ាត់រាល់ភារកិច្ចដែលខ្ញុំ ព្រះករុណាខ្ញុំបានដាក់ចេញ ដើម្បីសន្តិភាព សុវត្ថិភាព សុខុមាលភាពប្រជាជន និងការអភិវឌ្ឍ»។
ក្រៅពីការប្តេជ្ញានេះលោក ហ៊ុន សែន ក៏បានលើកឡើងពីសន្តិភាពដែលមានតម្លៃពុំអាចកាត់ថ្លៃបាន ព្រោះសន្តិភាព និងស្ថិរភាពនយោបាយជាមូលដ្ឋានគ្រឹះសម្រាប់ការអភិវឌ្ឍ ហើយការរក្សាវាបានទើបធ្វើឱ្យកម្ពុជាអាចងើបឈរឡើងដោយខ្លួនឯង និងបានបោះជំហានទៅមុខលើវិថីអភិវឌ្ឍន៍។
លោកបានរំឭកថ្ងៃ ៧មករា ឆ្នាំ ១៩៧៩ គឺជាថ្ងៃដែលប្រទេសកម្ពុជាត្រូវបានសង្គ្រោះ និងរំដោះចេញផុតពីរបបកម្ពុជាប្រជាធិបតេយ្យ ឬហៅថារបបប្រល័យ ពូជសាសន៍ខ្មែរក្រហម ដឹកនាំដោយ ប៉ុល ពត ដែលបានប្រែក្លាយកម្ពុជាទៅជាវាលពិឃាតដ៏ខ្មៅងងឹតអស់រយៈពេល ៣ ឆ្នាំ ៨ ខែ និង ២០ ថ្ងៃ។ របបដ៏ឃោរឃៅព្រៃផ្សៃយង់ឃ្នងនេះ បានធ្វើឱ្យបាត់បង់ជីវិតមនុស្សស្លូតត្រង់អស់រាប់លាននាក់ ហើយប្រទេសជាតិទាំងមូលបានវិនាសអន្តរាយយ៉ាងធ្ងន់ធ្ងរបំផុត។
រីឯស្ថានទូតអាមេរិកប្រចាំកម្ពុជាបានសរសេរលើទំព័រហ្វេសប៊ុករបស់ខ្លួនថា ថ្ងៃ ៧មករា នេះយើងចងចាំនូវប្រជាជនកម្ពុជារាប់លាននាក់ដែលបានបាត់បង់ជីវិត ឬបានរងទុក្ខក្នុងអំពើប្រល័យពូជសាសន៍ខ្មែរក្រហម។
ស្ថានទូតនេះបានបញ្ជាក់ថា៖ «សហរដ្ឋអាមេរិកនៅតែប្តេជ្ញាចិត្តយ៉ាងមុតមាំក្នុងការជួយគាំទ្រដល់ប្រជាជនកម្ពុជា និងបំណងប្រាថ្នារបស់ពួកគេឱ្យមានយុត្តិធម៌ ប្រជាធិបតេយ្យ ឯករាជភាព និងការអភិវឌ្ឍប្រកបដោយនិរន្តរភាព ព្រមទាំងធានាបានថា សោកនាដកម្មបែបនេះនឹងមិនកើតឡើងទៀតឡើយ»។
ចំណែកឯកអគ្គរដ្ឋទូតរុស្ស៊ីប្រចាំកម្ពុជា Anatoly Borovik ក៏បានសរសេរលើបណ្តាញ twitter របស់លោកថា ថ្ងៃនេះ [៧មករា] គឺជាជំហានដំបូងឆ្ពោះទៅរកសន្តិភាព និងស្ថិរភាពនៅកម្ពុជា។ លោកបញ្ជាក់ថា៖ «ខ្ញុំរីករាយ និងមានមោទនភាពដែលប្រទេសរុស្ស៊ីស្ថិតក្នុងចំណោមមិត្តដំបូងបង្អស់របស់ប្រជាជាតិនេះ ដែលក្នុងគ្រានោះបានជួយកសាងសេដ្ឋកិច្ចកម្ពុជាឡើងវិញ»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានសរសេរលើហ្វេសប៊ុកពីថ្ងៃទី ៦ មករាថា ក្នុងបរិបទដែលកម្ពុជាកំពុងធ្វើដំណើរលើគន្លងវិថីប្រជាធិបតេយ្យសេរីពហុបក្សនោះ ពហុមតិទៅលើបញ្ហានានាក៏មានទៅតាមនោះដែរ។
លោកបន្តថា អត្ថន័យនៃថ្ងៃ ៧មករា ហាក់ត្រូវបានកំណត់ដោយផ្អែកលើទស្សនៈ និងគោលជំហរនយោបាយ ជាជាងតម្លៃនៃសច្ចភាពប្រវត្តិសាស្ត្រ។ ប៉ុន្តែសម្រាប់លោក “ថ្ងៃ៧មករា” គឺជាថ្ងៃរស់រានមានជីវិតជាថ្មីថ្ងៃកំណើតនៃការអភិវឌ្ឍ និងជាប្រភពកំណើតនៃសន្តិភាពនៅកម្ពុជា ក្រោយពេលដែលភ្លើងសង្គ្រាមស៊ីវិលបានឆាបឆេះឡើង។
លោកថា៖ «យើងមើលឃើញអំពីការរីកចម្រើននៃសេដ្ឋកិច្ចយើង។ យើងរក្សាបាននូវស្ថិរភាពនៃម៉ាក្រូសេដ្ឋកិច្ច រក្សាបាននូវកំណើនសេដ្ឋកិច្ចក្នុងរង្វង់ជាង ៧ ភាគរយពិត ២ ទសវត្សរ៍មកហើយ,ប្រាក់ចំណូលរបស់ពលរដ្ឋម្នាក់ៗដែលពីមុន យើងធ្លាប់បានត្រឹមតែ ១០០ ដុល្លារប៉ុណ្ណោះក្នុង ១ ឆ្នាំ តែឥឡូវនេះកើនដល់ទៅជិត ២ ០០០ ដុល្លារ»។
ជាចក្ខុវិស័យរបស់រាជរដ្ឋាភិបាលលោកយល់ថា កម្ពុជានឹងប្រែក្លាយជាប្រទេសមួយដែលកំពុងធ្វើសមាហរណកម្មខ្លួនយ៉ាងសកម្មទៅក្នុងរចនាសម្ព័ន្ធ និងនិម្មាបនកម្មតំបន់ និងពិភពលោក និងជាប្រទេសដែលកំពុងតែដើរតួនាទីយ៉ាងសកម្មដោយស្មើសិទ្ធិ និងស្មើភាពក្នុងគ្រប់កិច្ចការតំបន់ និងនៅលើឆាកអន្តរជាតិ។
ក៏ប៉ុន្តែលោក ឡៅ ម៉ុងហៃ អ្នកវិភាគបញ្ហានយោបាយបានថ្លែងពីម្សិលមិញថា ការប្រកាសប្តេជ្ញារក្សាភាពជាម្ចាស់ ដើម្បីការពារប្រជាជនឱ្យមានសុខសន្តិភាពរបស់លោកនាយករដ្ឋមន្ត្រី ហ៊ុន សែន គឺមិនមានអ្វីប្លែកនោះទេ ព្រោះមេដឹកនាំគ្រប់ប្រទេសគឺតែងតែប្រកាសបែបនេះ។
សម្រាប់រូបលោកថ្ងៃទី ៧ ខែ មករា ឆ្នាំ ១៩៧៩ គឺជាថ្ងៃបង្កើតសាធារណរដ្ឋប្រជាមានិតកម្ពុជាដោយកងទ័ពវៀតណាមដែលបានចូលមករំលំកម្ពុជាប្រជាធិបតេយ្យ។ ព្រឹត្តិការណ៍នេះក៏ត្រូវបានក្រុមប្រឹក្សាសន្តិសុខនៃអង្គការសហប្រជាជាតិកោះប្រជុំ ដើម្បីសុំឱ្យកងទ័ពបរទេសដកថយចេញពីកម្ពុជាផងដែរ។
លោកបញ្ជាក់ថា៖ «ថ្ងៃ ៧ មករា នេះ មានតម្លៃជាប្រវត្តិសាស្ត្រសម្រាប់មនុស្សជាតិកម្ពុជាឬទេ?
(ខ្ញុំ) គិតថា ២៥ ធ្នូ ១៩៧៨ ថ្ងៃណូអែល ថ្ងៃវៀតណាមបញ្ជូនទ័ពឆ្លងកាត់ព្រំដែនចូលមករំលំរបបខ្មែរក្រហម និងកាន់កាប់ប្រទេសកម្ពុជា។ អន្តរជាតិគេខ្វល់តែពីរឿងវៀតណាមឈ្លានពានទេ អត់និយាយដល់ ៧ មករា និងរដ្ឋាភិបាល ៧ មករានោះទេ» ៕
