.jpg)
លោក ហ៊ុន សែន ក្នុងពិធីចែកសញ្ញាបត្រពីម្សិលមិញ។ រូបថត ហ្វេសប៊ុក
ភ្នំពេញៈ លោកនាយករដ្ឋមន្ត្រី ហ៊ុន សែន បានប្រកាសកាត់បន្ថយសមាជិករដ្ឋាភិបាលចេញមួយចំនួនធំសម្រាប់រដ្ឋាភិបាលថ្មីក្រោយការបោះឆ្នោតអាណត្តិទី ៦ ចុងខែក្រោយ ខណៈរដ្ឋាភិបាលបច្ចុប្បន្នត្រូវបានរិះគន់ថាមានសមាជិករាប់រយនាក់នោះ។
ថ្លែងក្នុងឱកាសចូលរួមចែកសញ្ញាបត្រដល់សិស្សមន្ត្រីនៃសាលាភូមិន្ទរដ្ឋបាល ពីម្សិលមិញលោក ហ៊ុន សែន ដែលដឹកនាំរដ្ឋាភិបាលចំនួន ៥ អាណត្តិកន្លងមកហើយនោះបានប្រកាសកាត់បន្ថយសមាជិកសម្រាប់តំណែងរដ្ឋលេខាធិការដោយរក្សាទុកតែតំណែងរដ្ឋមន្ត្រី ទេសរដ្ឋមន្ត្រី និងឧបនាយករដ្ឋមន្ត្រីតែប៉ុណ្ណោះដែលជាសមាជិករដ្ឋាភិបាលដឹកនាំដោយរូបលោកជានាយករដ្ឋមន្ត្រី។ លោក ហ៊ុន សែន បានបញ្ជាក់ថារដ្ឋាភិបាលបានមើលឃើញភាពចាំបាច់ដើម្បីធ្វើវិសោធនកម្មរដ្ឋធម្មនុញ្ញទាក់ទងនឹងក្បាលម៉ាស៊ីនរាជរដ្ឋាភិបាល ហើយថាគណៈរដ្ឋមន្ត្រីទើបតែបានឆ្លងច្បាប់មួយស្តីពីការរៀបចំ និងការប្រព្រឹត្តទៅនៃគណៈរដ្ឋមន្ត្រី។
លោកថ្លែងថា៖ «រដ្ឋធម្មនុញ្ញ ១៩៩៣ តម្រូវឲ្យថ្នាក់រដ្ឋលេខាធិការក៏ជាសមាជិករដ្ឋាភិបាល។ ការពិតរដ្ឋលេខាធិការមិនមែនទទួលខុសត្រូវចំពោះមុខសភា និងនាយករដ្ឋមន្ត្រីទេ ដាក់ឲ្យទទួលខុសត្រូវចំពោះនាយករដ្ឋមន្ត្រី និងសភាគឺមានតែរដ្ឋមន្ត្រីដែលជាប្រធានស្ថាប័ន»។
លោកបញ្ជាក់ថា៖ «ដូច្នេះបានជាពេលរៀបចំរាជរដ្ឋាភិបាលម្តងៗគេឃើញសំពីងសំពោងរាប់រយនាក់ឯណោះ។ អ៊ីចឹងទេបានជាយើងត្រូវតែធ្វើការកែសម្រួលដោយដកចេញ [រដ្ឋលេខាធិការ] ដោយទុកតែថ្នាក់នាយករដ្ឋមន្ត្រី ឧបនាយករដ្ឋមន្ត្រី ទេសរដ្ឋមន្ត្រី និងរដ្ឋមន្ត្រីតែប៉ុណ្ណោះដែលជាសមាជិករបស់រាជរដ្ឋាភិបាល»។
លោកថាមុខតំណែងទាំងអស់ខាងលើត្រូវអនុម័តដោយរដ្ឋសភា លើកលែងតែមុខតំណែងរដ្ឋលេខាធិការគឺត្រូវតែងតាំងដោយព្រះរាជក្រឹត្យតាមសំណើរបស់នាយករដ្ឋមន្ត្រី។
ដោយឡែកអតីតប្រធាននៃអតីតគណបក្សសង្គ្រោះជាតិលោក សម រង្ស៊ី ដែលបច្ចុប្បន្នជាប្រធានចលនាសង្គ្រោះជាតិកំពុងនិរទេសខ្លួននៅក្រៅប្រទេស ក៏បានប្រកាសថ្មីៗនេះដែរថានៅពេលរដ្ឋាភិបាលថ្មីដឹកនាំដោយគណបក្សសង្គ្រោះជាតិរដ្ឋាភិបាលថ្មីនឹងត្រូវកាត់បន្ថយសមាជិកឲ្យនៅសល់តិចជាងរដ្ឋាភិបាលបច្ចុប្បន្នប្រមាណ ១០ ដងឯណោះ។
លោកក៏បានរិះគន់រដ្ឋាភិបាលលោក ហ៊ុន សែន ដែលមានសមាជិករាប់រយនាក់នោះគឺគ្រាន់តែការចែកអំណាច ចែកបុណ្យស័ក្តិដើម្បីផ្តល់ឱកាសប្រព្រឹត្តអំពើពុករលួយ។
លោក រង្ស៊ី ថ្លែងថា៖ «អ៊ីចឹងយើងត្រូវរៀបចំរដ្ឋាភិបាលឲ្យមានទំហំឲ្យក្បាលម៉ាស៊ីនហ្នឹងសមស្របឲ្យមានប្រសិទ្ធភាព»។
អ្នកវិភាគនយោបាយលោក ឆាំ ប៊ុនថេត និយាយថាបើលោក ហ៊ុន សែន មានឆន្ទៈពិតប្រាកដលោកនឹងអាចធ្វើបានដោយរៀបចំឲ្យមានមនុស្សតិច ប៉ុន្តែប្រើឲ្យមានប្រសិទ្ធភាព ហើយចំណេញដល់ជាតិដល់រដ្ឋាភិបាល និងក៏ចំណេញដល់គណបក្សប្រជាជនកម្ពុជាផងដែរ។
លោកបានថ្លែងថា៖ «មានរឿងច្រើនមួយរយៈពេលចុងក្រោយនេះ [លោក ហ៊ុន សែន] ធ្វើបាន។ ដូច្នេះខ្ញុំគិតថាមិនមែនជារឿងពិបាកសម្រាប់គាត់ក្នុងការធ្វើទេ»៕
