The Phnom Penh Post Search

Search form




Logo of Phnom Penh Post newspaper Phnom Penh Post - លោក ហ៊ុន សែន ប្រកាស​ចាប់​ផ្ដើម​យុទ្ធនាការ​ចុះ​​សួរ​សុខទុក្ខ​ពលរដ្ឋ មន្ត្រី​រាជការ និង​កងកម្លាំង​ប្រដាប់​អាវុធ

លោក ហ៊ុន សែន ប្រកាស​ចាប់​ផ្ដើម​យុទ្ធនាការ​ចុះ​​សួរ​សុខទុក្ខ​ពលរដ្ឋ មន្ត្រី​រាជការ និង​កងកម្លាំង​ប្រដាប់​អាវុធ

លោក​នាយក​រដ្ឋមន្ត្រី​ ហ៊ុន សែន ស្វាគមន៍​អ្នក​ចូលរួម​ក្នុង​ពិធី​នៅ​ខេត្ត​បាត់ដំបង​កាលពី​ម្សិលមិញ​។
លោក​នាយក​រដ្ឋមន្ត្រី​ ហ៊ុន សែន ស្វាគមន៍​អ្នក​ចូលរួម​ក្នុង​ពិធី​នៅ​ខេត្ត​បាត់ដំបង​កាលពី​ម្សិលមិញ​។ រូបថត ហ្វេសប៊ុក

លោក ហ៊ុន សែន ប្រកាស​ចាប់​ផ្ដើម​យុទ្ធនាការ​ចុះ​​សួរ​សុខទុក្ខ​ពលរដ្ឋ មន្ត្រី​រាជការ និង​កងកម្លាំង​ប្រដាប់​អាវុធ

ភ្នំពេញ: នាយក​រដ្ឋមន្ត្រី​ក្នុង​តំណែង​ និង​ប្រធាន​គណបក្ស​ប្រជាជន​កម្ពុជា​កាលពី​ថ្ងៃ​ព្រហស្បតិ៍​បាន​ប្រកាស​ចាប់​ផ្ដើម​យុទ្ធនាការ​ដោយ​ផ្ទាល់​ខ្លួន​ទូទាំង​ ២៥ ​រាជធានី-ខេត្ត​ដើម្បី​ចុះ​សួរ​សុខទុក្ខ​ប្រជាពលរដ្ឋ​ និង​ត្រួតពិនិត្យ​បញ្ហា​ប្រឈម​នានា​នៅ​ក្នុង​ជួរ​មន្ត្រី​រាជការ និង​កងកម្លាំង​ប្រដាប់​អាវុធ​ក្នុង​ពាក់​កណ្ដាល​អាណត្តិ​នៃ​ការ​បោះឆ្នោត​ក្រុម​ប្រឹក្សា​ឃុំ​សង្កាត់​នា​ឆ្នាំ​ ២០១៧ ខណៈ​​ពេល​ដែល​មេដឹកនាំ​របស់​គណបក្ស​សង្គ្រោះជាតិ​កំពុង​និរទេស​ខ្លួន​ឯង​ទៅ​ក្រៅ​ប្រទេស​ និង​ឃុំ​ខ្លួន​ឯង​ដោយ​បារម្ភ​ពី​ការ​ចាប់​ខ្លួន​ពី​តុលាការ​។

លោក​មាន​ប្រសាសន៍​ថា៖ «ខ្ញុំ​ត្រូវ​ពិនិត្យ​ទាំង​បញ្ហា​ជឿន​លឿន​​ និង​បញ្ហា​ដែល​នៅ​សេសសល់​ដែល​ត្រូវ​បន្ត​ដោះស្រាយ​ព្រោះ​វា​​ជាង​ពាក់​កណ្ដាល​អាណត្តិ​ហើយ​អ៊ីចឹង​ត្រូវ​ដើរ​ពិនិត្យ​តាម​ខេត្ត​នានា​បន្ត​ទៀត»​។

លោក​នាយក​រដ្ឋមន្ត្រី​បាន​ថ្លែង​ជា​សារធារណៈ​​នៅ​ខេត្ត​បាត់ដំបង​ក្នុង​ពិធី​សម្ពោធ​ដាក់​ឲ្យ​ប្រើប្រាស់​សមិទ្ធផល​គម្រោង​ពង្រីក​ប្រព័ន្ធ​ផ្គត់ផ្គង់​ទឹក​ស្អាត​ក្នុង​ខេត្ត​បាត់ដំបង។ «ខ្ញុំ​បាន​ជួប​​សំណេះ​សំណាល​ជាមួយ​មន្ត្រី​រាជការ​ និង​កងកម្លាំង​ប្រដាប់​អាវុធ​នៅ​ខេត្ត​បាត់ដំបង​របស់​យើង​ខ្ញុំ​នឹង​ដើរ​ទៅ​កន្លែង​ផ្សេង​ទៀត​ក្នុង​គោលដៅ​ពិនិត្យ​អំពី​វឌ្ឍន​ភាព​ទាំង​ឡាយ​ និង​បញ្ហា​ប្រឈម​ដែល​ត្រូវ​ដោះស្រាយ​»​។

ដំណើរ​ត្រួតពិនិត្យ​នេះ​ធ្វើ​ឡើង​ប៉ុន្មាន​ថ្ងៃ​ក្រោយ​ពី​សមាជិក​ដែល​មាន​ឥទ្ធិពល​របស់​គណបក្ស​ប្រជាជន​បាន​សម្រេច​ទិសដៅ​របស់​ខ្លួន​សម្រាប់​ឆមាស​ទី​ ២​ ដែល​បក្ស​កាន់​​អំណាច​មួយ​នេះ​ទាមទារ​ឲ្យ​យក​ចិត្ត​ទុកដាក់​ឲ្យ​បាន​ខ្លាំង​ឡើង​ថែម​ទៀត​ក្នុង​ការ​ពុះពារ​ដោះស្រាយ​ចំណុច​ខ្សោយ​ និង​ការ​ខ្វះខាត​ផ្សេងៗ​ដែល​ជា​​បាតុភាព​អសកម្ម​របស់​មន្ត្រី​មួយ​ចំនួន​ដូចជា​អំពើ​ពុករលួយ​ ការ​បំពាន​លើ​ផលប្រយោជន៍​របស់​ប្រជាជន​ ការ​ប្រកាន់​បក្ខពួក​គ្រួសារ​និយម នា​ម៉ឺន​និយម ហើយ​គណបក្ស​នេះ​បាន​ទទួល​ស្គាល់​សកម្មភាព​ចុះ​មូលដ្ឋាន​នៅ​តែ​មិន​បាន​ស្មើ​ដៃ​គ្នា​ព្រមៗ​គ្នា​ដោយសារ​អាកប្បកិរិយា​ស្កប់ស្កល់​នឹង​ជ័យជម្នះ ឆន្ទៈ​​ប្រយុទ្ធ​ស្ពឹក​ស្រពន់​មើល​ស្រាល​គូ​ប្រជែង​ដូច្នេះ​ត្រូវ​ប្ដូរ​ផ្ដាច់​បន្ត​លុប​បំបាត់​នូវ​រាល់​ចំណុច​ខ្វះខាត​ទាំង​អស់​នេះ។

តាម​របាយការណ៍​របស់​បក្ស​កាន់​អំណាច​បាន​ចោទប្រកាន់​ទៅ​លើ​គណបក្ស​ប្រឆាំង​បាន​ឃោសនា​បំពុល​បរិយាកាស​ពី​ស្ថានភាព​នយោបាយ​នៅ​កម្ពុជា​ និង​ជំរុញ​ធ្វើ​សកម្មភាព​នៅ​មូលដ្ឋាន​បន្ត​ប្រើប្រាស់​បញ្ហា​ដីធ្លី​ ព្រៃឈើ​ ព្រំដែន​ ពុករលួយ​ អយុត្តិធម៌​សង្គម​ និង​នយោបាយ​ប្រជាភិថុតិ​ព្រម​ទាំង​ប្រើប្រាស់​ចំណុច​ខ្វះខាត​របស់​មន្ត្រី​បក្ស​មួយ​ចំនួន​ដើម្បី​ឃោសនា​អូសទាញ​ទឹក​ចិត្ត​ប្រជាជន។

លោក​ អេង ឆៃអ៊ាង អ្នក​នាំ​ពាក្យ​របស់​គណបក្ស​សង្គ្រោះ​ជាតិ​ថា​សកម្មភាព​ចុះ​តាម​មូលដ្ឋាន​របស់​គណបក្ស​កាន់​អំណាច​គឺជា​រឿង​ធម្មតា​របស់​អ្នក​នយោបាយ​ដើម្បី​បង្ហាញ​ស្នាដៃ និង​ដោះស្រាយ​បញ្ហា​ជូន​ដល់​ប្រជាពលរដ្ឋ​គឺជា​ការ​ល្អ​តែ​មិន​ត្រូវ​​រាំង​ខ្ទប់​ភាគី​ជា​ដៃគូ​ប្រកួត​ប្រជែង​នោះ​ទេ។

លោក​ថ្លែង​ថា៖«ខ្ញុំ​គិត​ថា​ការ​ប្រជែង​យក​ស្នាដៃ​មុន​យុទ្ធនាការ​ឃោសនា​បោះឆ្នោត​ដោយ​ចុះ​តាម​មូលដ្ឋាន​គឺជា​រឿង​ល្អ​សម្រាប់​អ្នក​នយោបាយ​ និង​ប្រជាពលរដ្ឋ​ក្នុង​​ការ​ស្វែងរក​ដំណោះស្រាយ​តែ​ត្រូវ​អនុញ្ញាត​ឲ្យ​ភាគី​ដែល​ប្រកួត​ប្រជែង​មាន​សិទិ្ធ​សេរីភាព​ដូច​គ្នា​ដើម្បី​ឲ្យ​យើង​បាន​បំពេញ​ការងារ​មូលដ្ឋាន​ពេញលេញ​ជូន​ប្រជាពលរដ្ឋ»។

លោក​ ឆៃអ៊ាង ​បាន​បញ្ជាក់​ថា​សកម្មភាព​នយោបាយ​ចុះ​មូលដ្ឋាន​របស់​គណបក្ស​ប្រឆាំង​ស្ទើរតែ​អសកម្ម​ទាំង​ស្រុង​ដោយសារ​​ប្រធាន​គណបក្ស​លោក​ សម រង្ស៊ី ស្ថិត​នៅ​និរទេស​ខ្លួន​ឯ​ក្រៅ​ប្រទេស​ និង​អនុប្រធាន​កំពុង​ស្ថិត​នៅ​ក្នុង​ទីស្នាក់ការ​របស់​​គណបក្ស​ដែល​ឡោមព័ទ្ធ​ដោយ​​តុលាការ និង​តំណាងរាស្រ្ត​ត្រូវ​បាន​ឃុំ​ខ្លួន ​និង​ត្រូវ​បាន​គេ​ព្រួត​វាយ​ធ្វើ​បាប។

លោក​ថ្លែង​ថា​៖ ​«យើង​មាន​តែ​ទុក​ឲ្យ​ប្រជាពលរដ្ឋ​ជា​អ្នក​វិនិច្ឆ័យ​​នៅពេល​បោះឆ្នោត​ខាង​មុខ​ចុះ»។

អ្នក​វិភាគ​សង្គម​លោក មាស នី មើល​ឃើញ​ថា​ការ​ប្រកាស​ចុះ​មូលដ្ឋាន​របស់​ប្រធាន​គណបក្ស​កាន់​អំណាច​គឺ​បំណង​ដើម្បី​ស្តារ​​ប្រជាប្រិយភាព​ឡើង​វិញ​បន្ទាប់​គណបក្ស​នេះ​ត្រូវ​បាន​គេ​មើល​ឃើញ​ថា​បាត់បង់​សន្លឹក​ឆ្នោត​យ៉ាង​ច្រើន​កាលពី​ឆ្នាំ ២០១៣។

លោក​បន្ត​ថា៖ ​«អ្វី​ដែល​ជា​កត្តា​សំខាន់​គឺ​ចង់​ស្តារ​ប្រជាប្រិយភាព​ឡើង​វិញ​គឺ​ការ​ពង្រឹង​ចាប់​ចេញ​ពី​មន្ត្រី​រាជការ​សិន​ព្រោះ​មន្ត្រី​រាជការ​មាន​រាប់​សែន​នាក់​ហើយ​មន្ត្រី​រាជការ​មាន​​តួនាទី​សំខាន់​ក្នុង​ការ​ផ្តល់​ការ​គាំទ្រ​ក្នុង​ការ​បោះឆ្នោត​អ៊ីចឹង​បើ​កាលណា​មន្ត្រីរាជការ​បាត់បង់​​ទំនុក​ចិត្ត​អ៊ីចឹង​​គេ​នឹង​មិន​បោះឆ្នោត​ឱ្យ​ដែរ»៕

អត្ថបទគួរចាប់អារម្មណ៍