ភ្នំពេញៈ លោកនាយករដ្ឋមន្ត្រី ហ៊ុន សែន បានប្រកាសបញ្ចប់ការចែកចាយទឹកជាលក្ខណៈទ្រង់ទ្រាយធំនៅទូទាំងប្រទេសស្របពេលដែលមេឃបានធ្លាក់ភ្លៀងជាបន្តបន្ទាប់នៅតាមបណ្តាខេត្តជាច្រើនក្នុងរយៈពេលជាច្រើនថ្ងៃកន្លងមកនេះ។
ក្នុងពិធីប្រគល់សញ្ញាបត្រដល់និស្សិតសាកលវិទ្យាល័យអាស៊ីអឺរ៉ុបដែលធ្វើឡើងនៅវិទ្យាស្ថានជាតិអប់រំកាលពីម្សិលមិញលោកនាយករដ្ឋមន្ត្រីបានថ្លែងថាយុទ្ធនាការចែកចាយទឹកទ្រង់ទ្រាយធំនឹងត្រូវបញ្ចប់ត្រឹមពេលនេះ។ លោកបញ្ជាក់ថា៖ «ក្នុងនាមជារដ្ឋាភិបាលកម្ពុជាខ្ញុំសុំប្រកាសបញ្ចប់នូវយុទ្ធនាការទ្រង់ទ្រាយធំក្នុងការដោះស្រាយទឹកជូនប្រជាជនប៉ុន្តែសុំបញ្ជាក់នូវអត្ថន័យរបស់វាបន្តិចបញ្ចប់នូវយុទ្ធនាការទ្រង់ទ្រាយធំប៉ុន្តែមិនមែនបញ្ចប់ការផ្តល់ទឹកនៅតំបន់ខ្វះខាតនោះទេគឺត្រូវបន្តនៅតាមតំបន់ដែលខ្វះខាតខ្លះ»។ លោកសង្កត់ធ្ងន់ថាឆ្នាំនេះជាមេរៀនមួយដើម្បីឱ្យរដ្ឋាភិបាលត្រៀមលក្ខណៈបង្ការភាពខ្វះខាតទឹកនៅឆ្នាំក្រោយៗទៀត។ លោកថា៖ «ការខ្វះខាតទឹកវាមិនដែលមានយើងធ្លាប់តែធ្វើយុទ្ធនាការចែកចាយស្បៀង ឬព្យាបាលជំងឺ ឬសង្គ្រោះប្រជាជនពីទឹកជំនន់យើងមិនធ្លាប់ធ្វើយុទ្ធនាការចែកចាយទឹករបៀបនេះទេឆ្នាំនេះមេរៀនផ្តល់ឱ្យយើងច្រើនណាស់ដែលយើងត្រៀមទប់ទល់សម្រាប់រយៈពេលវែង»។ លោកនាយករដ្ឋមន្ត្រីឱ្យដឹងដែរថាចំពោះការជីកអណ្តូងទឹកថ្មី ជីកស្រះ និងជីកប្រឡាយត្រូវបន្តសកម្មភាពដើម្បីទុកបម្រុងសម្រាប់ឆ្នាំក្រោយៗទៀត។
បើតាមលោកនាយករដ្ឋមន្ត្រីយុទ្ធនាការចែកទឹកទ្រង់ទ្រាយធំនាពេលកន្លងមកនេះរដ្ឋាភិបាលបានបញ្ចេញទាំងថវិកា ទាំងកងកម្លាំងប្រដាប់អាវុធរាប់ទាំងរថយន្តរបស់កងទ័ព រាប់ទាំងរដា្ឋករទឹកនៅគ្រប់ទីកន្លែងរួមទាំងប្រើកម្លាំងធំផ្សេងទៀតជាពិសេសកម្លាំងយុវជនមកពីកាកបាទក្រហមផងដែរ។
ប្រទេសកម្ពុជាពុំធ្លាប់មានប្រវត្តិខ្វះទឹកប្រើប្រាស់ដូចឆ្នាំនេះទេខណៈប្រទេសនេះសម្បូរទៅដោយទន្លេស្ទឹងបឹងបួនៅស្ទើរពាសពេញផ្ទៃប្រទេស។ ការខ្វះទឹកប្រើប្រាស់ក្នុងឆ្នាំនេះត្រូវបានមជ្ឈដ្ឋានជាច្រើនធ្វើការរិះគន់ថាមួយផ្នែកដោយសារតែស្ទឹង បឹងបួ ព្រែក ប្រឡាយ ដែលជាទ្រព្យសម្បត្តិសាធារណៈរបស់រដ្ឋជាច្រើនត្រូវបានគេចាក់ដីលុបបំពេញយកធ្វើជាកម្មសិទ្ធិហើយរដ្ឋាភិបាលពុំបានដាក់ចេញនូវផែនការយុទ្ធសាស្ត្រថ្នាក់ជាតិច្បាស់លាស់ក្នុងការអភិរក្សការពារស្ទឹង បឹងបួ ព្រែកប្រឡាយ ទាំងនោះ ឬក៏ធ្វើការស្តារឡើងវិញជាលក្ខណៈទ្រង់ទ្រាយធំឲ្យបានទូទាំងប្រទេសនោះឡើយ។
ភ្នំពេញប៉ុស្តិ៍មិនអាចសុំការអត្ថាធិប្បាយបន្ថែមពីលោក ញឹម វណ្ណដា អនុប្រធានទី ១ នៃគណៈកម្មាធិការជាតិគ្រប់គ្រងគ្រោះមហន្តរាយបានទេកាលពីម្សិលមិញ។ តែកន្លងទៅលោកថ្លែងថារដ្ឋាភិបាលកំពុងតែផ្តល់ជំនួយទៅ ៨០ ភាគរយទៅដល់ប្រជាជនប្រមាណ ២,៥ លាននាក់ (ប្រហែល ៦ សែនគ្រួសារ) ដែលរងផលប៉ះពាល់ពីវិបត្តិកង្វះទឹកប្រើប្រាស់។ ក្នុងយុទ្ធនាការនោះរដ្ឋាភិបាលបានចំណាយថវិកាប្រមាណ ៥០០ លានរៀល (ប្រហែល ១២៥ ០០០ ដុល្លារ) ទៅលើការចែកចាយទឹកទៅកាន់ស្រុកជាង ១០០ ក្នុងចំណោមខេត្តចំនួន ១៨ នៅទូទាំងប្រទេសដែលរងគ្រោះរាំងស្ងួត។
ក្នុងពិធីនោះដែរលោក ហ៊ុន សែន ថ្លែងថាពិធីបុណ្យអុំទូកឆ្នាំនេះនឹងត្រូវប្រារព្ធឡើងវិញបន្ទាប់ពីផ្អាកកាលពីឆ្នាំ ២០១៥។ លោកថា៖ «ហើយធ្វើម៉េចជម្រៅទឹកឲ្យបានល្អបំផុតដែលត្រូវអុំទូកព្រោះបើមិនអុំទៀតគឺឡើង ២ ឆ្នាំជាប់គ្នាឆ្នាំនេះត្រូវតែអុំអ៊ីចឹងត្រៀមទូក ង ឲ្យហើយទៅអុំបានប៉ុន្តែឆ្នាំទៅបើអុំ ប្រហែលជាមានបញ្ហាព្រោះទឹកដែលមិនត្រូវខ្នាតនេះគឺនឹងធ្វើឲ្យលំបាកសម្រាប់ចំណុះទូកអុំ»។
រដ្ឋាភិបាលបានផ្អាកការអុំទូកចំនួន ៤ លើកមកហើយក្នុងនោះបីឆ្នាំជាប់គ្នាគឺក្នុងឆ្នាំ ២០១១,២០១២, ២០១៣ និងឆ្នាំ ២០១៥ បន្ទាប់ពីមានការជាន់គ្នាស្លាប់ជាង ៣៥០ នាក់នៅលើស្ពានកោះពេជ្រកាលពីឆ្នាំ ២០១០។ ប៉ុន្តែរដ្ឋាភិបាលបានផ្អាកការអុំទូកជាថ្មីម្តងទៀតនៅឆ្នាំ ២០១៥ ក្រោមហេតុផលថាទឹករាក់ពេកមិនអាចអុំបាន៕
