ភ្នំពេញៈ លោកនាយករដ្ឋមន្ត្រី ហ៊ុន សែន បានថ្លែងថា រាជរដ្ឋាភិបាលនឹងបន្តអនុវត្តកម្មវិធីឧបត្ថម្ភសាច់ប្រាក់ដល់គ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធប្រឆាំងនឹងជំងឺកូវីដ ១៩ សម្រាប់ខែវិច្ឆិកា និងខែធ្នូ ខណៈកម្មវិធីនេះបានបើកផ្តល់ប្រាក់បានដល់ជាង ៦៧ ម៉ឺនគ្រួសារ ហើយក្នុងជុំទី៣ លើកទី១ ពីថ្ងៃទី ២៥ តុលា ដល់ ២៤ វិច្ឆិកា។
ក្នុងពិធីជួបសំណេះសំណាលជាមួយសមាជិកក្រុមមេធាវីរាជរដ្ឋាភិបាល និងក្រុមមេធាវីស្ម័គ្រចិត្តសម្តេចតេជោនាវិមានសន្តិភាព លោកនាយករដ្ឋមន្ត្រីបានបញ្ជាក់ថា ជាសំណាងល្អដែលរាជរដ្ឋាភិបាលមានសាច់ប្រាក់សន្សំប្រមាណជាង ៣ ០០០ លានដុល្លារអាមេរិក ដែលក្នុងនោះរាជរដ្ឋាភិបាលបានបញ្ចេញ ១៥០ លានដុល្លារ សម្រាប់ធ្វើផ្លូវ ៣៨ ខ្សែនៅខេត្តសៀមរាប។
លោក ហ៊ុន សែន ថ្លែងថា៖ «កម្ពុជាមិនមែនជាប្រទេសអ្នកមានទេ ប៉ុន្តែ [យើង] មានរបៀបចាត់ចែង គ្រប់គ្រង ដឹកនាំប្រទេសមួយដូចជាស្ត្រីមេផ្ទះដែលមានរបៀបក្នុងការចាត់ចែងការចំណាយ និងការសន្សំថវិកាក្នុងគ្រួសារ។ យើងនឹងបន្តធ្វើសម្រាប់ខែ ១១ និងខែ ១២ ទៀត បើសិនជាការរីករាលដាលនៃជំងឺកូវីដនេះមិនទាន់ចប់នៅក្នុងខែ ១២ ខាងមុខនេះ យើងនឹងបន្តធ្វើទៀតដែលមុននេះខ្ញុំបាននិយាយហើយថាយើងត្រៀមទុកសម្រាប់រយៈពេល ១០ ខែដែលមុននេះយើងចំណាយតែត្រឹមប្រមាណជា ២០ លានដុល្លារ ក្នុង ១ ខែទេ ប៉ុន្តែឥឡូវយើងចំណាយជាង ៣០ លានដុល្លារ ក្នុង ១ ខែសម្រាប់ផ្តល់ជូនប្រជាពលរដ្ឋក្រីក្រ»។
«យើងមានបន្ទុកជួយប្រជាពលរដ្ឋក្រីក្រដែលមកដល់ពេលនេះចំនួនមានការកើនឡើងដល់ជាង ៦៧ ម៉ឺនគ្រួសារ ដែលគិតជាចំនួនមនុស្សមានប្រមាណជា ៣ លាននាក់។ ឥឡូវនេះយើងបានបញ្ចេញថវិកាជិត ២០០ លានដុល្លារសហរដ្ឋអាមេរិក សម្រាប់ការបើកផ្តល់ជូនជនក្រីក្រ និងងាយរងគ្រោះរួមនឹងស្ត្រីជាកម្មករឆ្លងទន្លេផងដែរ»។
យោងតាមរបាយការណ៍របស់ក្រសួងសង្គមកិច្ច និងអតីតយុទ្ធជនដែល ភ្នំពេញ ប៉ុស្តិ៍ ទទួលបាននៅថ្ងៃម្សិលមិញនេះបានឱ្យដឹងថា ការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ ១៩ ជុំទី៣ លើកទី១ នេះមានប្រជាពលរដ្ឋសរុបចំនួន ៦៧ ៤១៤៦ គ្រួសារ ដែលក្នុងនោះមានគ្រួសារក្រីក្រកម្រិត ១ និងគ្រួសារក្រីក្រកម្រិត ២។
សម្រាប់គ្រួសារក្រីក្រ និងងាយរងគ្រោះដោយសារកូវីដ១៩នេះត្រូវបានបែងចែកទៅតាមគោលដៅផ្សេងៗគ្នាគឺ ទីប្រជុំជនក្នុងរាជធានីភ្នំពេញ ទីប្រជុំជនក្រៅរាជធានី និងនៅទីជនបទ។ ទឹកប្រាក់ដែលត្រូវបានចំណាយក្នុងជុំទី៣ លើកទី១ នេះមានចំនួនប្រមាណជា ៣០ លានដុល្លារអាមេរិក។
លោក ឈួ សុបញ្ញា ប្រធាននាយកដ្ឋានសុខុមាលភាពសង្គមនៃក្រសួងសង្គមកិច្ច អតីតយុទ្ធជន និងយុវនីតិសម្បទាបានប្រាប់ ភ្នំពេញ ប៉ុស្តិ៍ ម្សិលមិញថា សម្រាប់ការបើកផ្តល់សាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ ១៩ ជុំទី៣ លើកទី២ ដែលចាប់ផ្តើមពីថ្ងៃទី ២៥ ខែវិច្ឆិកា ដល់ថ្ងៃទី ២៤ ខែធ្នូ ឆ្នាំ ២០២០ នឹងគ្របដណ្តប់លើអ្នកទទួលផលដែលមានគ្រួសារក្រីក្រសរុបចំនួន ៧០៣ ៥៩២ គ្រួសារ ដែលមានសមាជិកចំនួន ២ ៨១៧ ៧៨៨ នាក់ដែលចំណាយថវិកាសរុបចំនួនប្រមាណ ៣១,៩៣ លានដុល្លារអាមេរិក។
លោកថា៖ «យើងបានធ្វើបច្ចុប្បន្នភាពបានឡើងវិញ ដែលអ្នកណាដែលមានជីវភាពប្រសើរ យើងដកបណ្ណក្រីក្រនោះមកវិញ»។ គួរបញ្ជាក់ថា រាជរដ្ឋាភិបាលបានចំណាយលើការអនុវត្តកម្មវិធីចាប់ពីថ្ងៃទី ២៥ ខែ មិថុនា ឆ្នាំ ២០២០ រហូតមកដល់ថ្ងៃទី ២៤ ខែ វិច្ឆិកា ឆ្នាំ ២០២០ ប្រមាណជាង ១៣៥ លានដុល្លារអាមេរិក៕