.jpg)
លោក ហ៊ុន សែន នៅក្នុងពិធីបិទសន្និបាតបូកសរុបការងារក្រសួងសុខាភិបាលពីម្សិលមិញ។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន បានប្រកាសឱ្យពលរដ្ឋម្នាក់ៗ រហូតដល់គ្រប់ក្រសួងស្ថាប័នជាតិទាំងអស់ត្រូវចាត់ទុកការចូលរួមការប្រយុទ្ធប្រឆាំងនឹងវីរុសឆ្លងកូវីដ ១៩ គឺជាការងារអាទិភាពទី ១ និងចាំបាច់បំផុត ថ្វីដ្បិតមកដល់ពេលនេះកម្ពុជាពុំទាន់មានពលរដ្ឋណាម្នាក់ឆ្លងក្ដី។
លោក ហ៊ុន សែន បញ្ជាក់ថាកម្ពុជាក៏ត្រូវចាប់ផ្ដើមសិក្សាអំពីវិធានការនានា ដែលត្រូវប្រកាន់យក ប្រសិនបើមានករណីឆ្លងរាលដាលទ្រង់ទ្រាយធំកើតឡើងនៅក្នុងប្រទេស។ លោក ហ៊ុន សែន បានថ្លែងបែបនេះនៅក្នុងពិធីបិទសន្និបាតបូកសរុបលទ្ធផលការងារឆ្នាំ ២០១៩ និងលើកទិសដៅការងារឆ្នាំ ២០២០ របស់ក្រសួងសុខាភិបាលនៅសណ្ឋាគារសុខាភ្នំពេញកាលពីម្សិលមិញ។
លោកបញ្ជាក់ថា៖ «ចាប់តាំងពីផ្ទុះកូវីដ ១៩ រហូតមកដល់ពេលនេះ និងរហូតទៅដល់ការបញ្ចប់នៃជំងឺកូវីដ ១៩ នេះការងារខ្ពស់បំផុតរបស់កម្ពុជាគឺប្រយុទ្ធប្រឆាំងនឹងការរាលដាលនៃកូវីដ ១៩ ដែលនេះគឺជាការងារដែលយើងត្រូវធ្វើទាំងអស់គ្នា»។
លោកបន្តថា កម្ពុជាត្រូវតែរៀបចំផែនការ និងវិធានការនានាដែលត្រូវប្រកាន់យកនាពេលខាងមុខក្នុងករណីកូវីដ ១៩ បានឆ្លងមកដល់កម្ពុជា និងបានឆ្លងរាលដាលពីពលរដ្ឋម្នាក់ទៅពលរដ្ឋម្នាក់ ដែលមានល្បឿនលឿន និងទ្រង់ទ្រាយធំ។ លោកបន្តថា ឃុំ ស្រុក ឬខេត្តណាមួយដែលអាចមានការឆ្លងវីរុសនេះ នោះរដ្ឋាភិបាលអាចនឹងចាត់វិធានការមួយចំនួនដូចជាបិទសាលា វត្តអារាម ឬព្រះវិហារសាសនាគ្រិស្ត និងអ៊ិស្លាមជាដើម រួមទាំងការបិទចរាចរណ៍ចេញចូលក្នុងឃុំ ឬខេត្តដែលរងការឆ្លងវីរុសនេះ។
លោកបន្ថែមថា រដ្ឋត្រូវត្រៀមថវិកាសម្រាប់ជួយពលរដ្ឋក្នុងករណីចាំបាច់នៃការឆ្លងរាលដាលកូវីដ ១៩ តាមរយៈការសម្រេចកាត់បន្ថយការចំណាយរបស់ក្រសួងស្ថាប័នទាំងអស់ចំនួន ៥០ ភាគរយលើកលែងតែក្រសួងការពារជាតិ ក្រសួងពាណិជ្ជកម្ម និងទីស្តីការគណៈរដ្ឋមន្ត្រីដែលត្រូវកាត់បន្ថយ ២៥ ភាគរយ ដើម្បីសន្សំប្រាក់ទាំងនោះ។
លោកបញ្ជាក់ថា ការចំណាយរបស់អាជ្ញាធរថ្នាក់ក្រោមជាតិក៏ត្រូវកាត់បន្ថយដែរ ដើម្បីសន្សំប្រាក់ទាំងនោះទុកសម្រាប់បង្វែរការចំណាយចាំបាច់ទៅលើវិស័យសុខាភិបាលនាពេលខាងមុខ។ លោកថ្លែងទៀតថា៖ «សូមកុំឱ្យមានការបន្ថែមលើការចំណាយមានតែការកាត់បន្ថយការចំណាយតែម្ដងហើយមានតែប្រាក់បៀវត្សរ៍ប៉ុណ្ណោះ ដែលមិនត្រូវកាត់បន្ថយការចំណាយទេ។ ទាក់ទងនឹងការចំណាយចរន្តដែលក្នុងមួយខែយើងត្រូវចំណាយជាង ៤០០ លានដុល្លារ អាហ្នឹងមិនអាចប៉ះពាល់បានទេ»។
លោកបញ្ជាក់ថា ចាប់ពីពេលនេះតទៅមន្ត្រីតាមក្រសួងស្ថាប័នត្រូវកាត់បន្ថយការធ្វើដំណើរទៅក្រៅប្រទេស ឬកិច្ចប្រជុំខ្លះនៅក្រៅប្រទេស និងគប្បីចាត់តាំងត្រឹមឯកអគ្គរាជទូតឱ្យចូលរួមជំនួសជាដើម។
លោកថា៖ «សព្វថ្ងៃវាកំពុងស្ថិតក្នុងលទ្ធភាពទី ១ គឺការអំពាវនាវ និងអប់រំឱ្យប្រជាពលរដ្ឋឱ្យចេះការពារខ្លួនតាមរយៈការធ្វើអនាម័យ។ ការអប់រំប្រជាពលរដ្ឋមិនឱ្យមានការភ័យខ្លាច និងការរើសអើងជាវិធានការដែលយើងកំពុងប្រកាន់យកហើយ។ យើងគប្បីដាក់ចេញជំហានទី ២ ដែលហៅថា លទ្ធភាពទី ២ គឺលទ្ធភាពដែលពលរដ្ឋកម្ពុជាចាប់ផ្ដើមឆ្លងកូវីដ ១៩ ហើយបើចូលទៅក្នុងក្របខ័ណ្ឌខេត្តណាមួយ តើយើងគួរតែបិទខេត្តទាំងមូលទេ ឬក៏បិទក្នុងតំបន់ដែលមានវីរុសនេះដូចជាឃុំមួយ ឬស្រុកមួយ»។
លោកនាយករដ្ឋមន្ត្រីបញ្ជាក់ថាលោកបានគិតដល់អំពីការដាក់ចេញវិធានការទាំងនេះយូរមកហើយ ប៉ុន្តែដោយសារពលរដ្ឋមានការលង់លក់ខ្លាំងពេកក្នុងការភ័យខ្លាចអំពីវីរុស កូវីដ ១៩ ទើបលោកមិនបានប្រកាសឱ្យក្រសួងស្ថាប័នកាត់បន្ថយការចំណាយនេះ។ លោកគូសបញ្ជាក់ថា ការសន្សំថវិកាទាំងនេះគឺមិនមែនសម្រាប់ដោះស្រាយតែក្នុងករណីកើតឡើងការរាលដាលនៃវីរុស កូវីដ ១៩ ទេ ប៉ុន្តែក៏ដើម្បីត្រៀមទប់ទល់គ្រោះរាំងស្ងួតនាពេលខាងមុខផងដែរ។
ទោះយ៉ាងណាលោកបញ្ជាក់ថា ជាភ័ព្ទសំណាងដែលកម្ពុជាទើបរកឃើញករណីឆ្លង កូវីដ ១៩ តែលើជនជាតិចិនម្នាក់នៅក្នុងខេត្តព្រះសីហនុ និងអ្នកនៅលើនាវា Westerdam ដែលមកដល់ពេលនេះមិនទាន់មានអ្នកណាម្នាក់ឆ្លងវីរុសកូវីដ ១៩។ ប៉ុន្តែលោកថាអ្វីដែលកម្ពុជាទប់ទល់កន្លងមក គឺមិនមែនវីរុសកូវីត ១៩ តែគឺទប់ទល់អំពីការបំពុលព័ត៌មានដែលលោកហៅថា គឺជាក្រុមភេរវករ។
គិតត្រឹមថ្ងៃទី ២ ខែមីនា វីរុស កូវីដ ១៩ បានឆ្លងរាលដាលមនុស្សចំនួនជាង ៩ ម៉ឺននាក់នៅក្នុងប្រទេសប្រហែល ៧០ ខណៈអង្គការសុខភាពពិភពលោក បានប្រកាសឱ្យប្រទេសទាំងអស់ត្រូវត្រៀមលក្ខណៈឱ្យបានគ្រប់គ្រាន់ជាស្រេចក្នុងការប្រយុទ្ធប្រឆាំងការរាលដាលនៅតាមសហគមន៍។
លោក ហ៊ុន សែន ក៏បានប្រកាសណែនាំឱ្យបញ្ឈប់ការចាប់ដៃគ្នា និងងាកមកអនុវត្តតាមប្រពៃណីខ្មែរឡើងវិញ គឺសំពះគ្នា ដើម្បីបង្ការកុំឱ្យឆ្លងវីរុសនេះ ខណៈលោកក៏ថ្លែងថា លោកនឹងបញ្ឈប់ការចាប់ដៃជាមួយជនបរទេស៕
