.jpg)
ឈើដែលត្រូវបានគេកាប់នៅ លំផាត់ កាលពីឆ្នាំ ២០១៥។ ADHOC
ភ្នំពេញៈ លោក ហ៊ុន សែន នាយករដ្ឋមន្ត្រីកាលពីម្សិលមិញបានប្រតិកម្មចំពោះក្រុមអ្នករិះគន់ដែលបានចោទប្រកាន់ទៅលើរាជរដ្ឋាភិបាលថា ជាអ្នកនៅពីក្រោយខ្នងនៃការធ្វើឲ្យបាត់បង់ព្រៃឈើនៅកម្ពុជា ខណៈពួកគេបានកំពុងប្រើប្រាស់ឈើប្រណីតដើម្បីសាងសង់ និងតុបតែងលំនៅឋាន។
នៅក្នុងពិធីបើកការដ្ឋានសាងសង់ផ្លូវក្រវាត់ក្រុងទី ៣ ឆ្លងកាត់រាជធានីភ្នំពេញ និងខេត្តកណ្តាល កាលពីម្សិលមិញលោក ហ៊ុន សែន បានថ្លែងថា៖ «ផ្ទះរបស់វាធ្វើសុទ្ធតែពីឈើមកជេរឯងថាអស់ព្រៃឈើ នេះក្តៅៗអាហ្នឹងតើ។ ខឹងអាពួកកាប់ឈើវាម្យ៉ាងទេ ប៉ុន្តែអាវាប្រើប្រាស់ឈើ ហើយសុទ្ធតែអាប្រណីតទៀត តាំងពីបេង តាំងពីនាងនួន តាំងពីធ្នុង ស្អីគ្រប់សព្វទាំងអស់។ វាប្រើឲ្យពេញតែផ្ទះវា រួចវាមកជេរឯងថា គ្រប់គ្រងប្រទេសថា ឲ្យបាត់ឈើ។ ថ្ងៃណាប្រមូលហែ្អងត្រឹម ១០០ ផ្ទះ អញទៅរុះហ្មង រុះហើយយកឈើចេញៗ ស៊ីម៉ងត៍កុំយក យកតែឈើ រួចហើយយកចង្អុលបង្ហាញ ហែ្អងជេរអញបាត់ឈើ ឥឡូវឈើហ្នឹងហែ្អងយកពីណាមក»។
លោក ហ៊ុន សែន បានអះអាងថា ក្រុមទាំងនោះបានជេររាជរដ្ឋាភិបាលថាជាអ្នកធ្វើឲ្យបាត់ឈើ នៅពេលដែល ពួកទាំងនោះបានធ្វើចម្ការ ធ្វើផ្ទះដោយប្រើជញ្ជាំងឈើ ដែលបញ្ហាទាំងនេះគួរត្រូវបានលើកយកមកធ្វើជាបញ្ហា។
លោក ហ៊ុន សែន ថ្លែងថា៖ «អ៊ីចឹងទេ ថ្ងៃណាមួយ ខ្ញុំនឹងឲ្យតាមឈ្មោះមុខសញ្ញាពួកប្រឆាំង ខ្ញុំដើរទៅរុះផ្ទះទាំងអស់ដើររុះផ្ទះយកឈើ។ ហេតុអី? មកពីហ្អែងថាឲ្យអញថា បាត់ឈើ ចុះឈើហ្អែងធ្វើផ្ទះហ្នឹង ហ្អែងបានពីណា?»។
អត្ថាធិប្បាយរបស់លោក ហ៊ុន សែន ធ្វើឡើងក្រោយពីក្រុមបណ្ដាញសហគមន៍ព្រៃឡង់ចេញសេចក្ដីថ្លែងការណ៍អំពីរបាយការណ៍ឃ្លាំមើលអំពីបច្ចុប្បន្នភាពព្រៃឡង់លើកទី ៧ ដែលចេញផ្សាយកាលពីថ្ងៃទី ៧ ខែមករា ឆ្នាំ ២០១៩ បានឲ្យដឹងថា សកម្មភាពកាប់ឈើខុសច្បាប់នៅតែបន្តកើតមាន និងមានការកើនឡើងនៅប៉ុន្មានឆ្នាំចុងក្រោយនេះ។ ទោះជាយ៉ាងណាក៏ដោយក្រសួងបរិស្ថានចាត់ទុករបាយការណ៍នេះជាការបំពុលព័ត៌មាន។
លោក ស្រី ថី សមាជិកម្នាក់ក្នុងគណៈកម្មការសម្របសម្រួលបណ្តាញសហគមន៍ព្រៃឡង់ខេត្តព្រះវិហារ បានថ្លែងឲ្យដឹងកាលពីម្សិលមិញដែរថា ការអះអាងរបស់លោកនាយករដ្ឋមន្ត្រី ហាក់មិនសមហេតុផលនោះទេ ព្រោះថាព្រៃឈើនៅកម្ពុជាបានបាត់បង់អស់ជាច្រើន គឺមិនមែនដោយសារការកាប់ឈើសាងសង់ផ្ទះរបស់អ្នករិះគន់នោះទេ ហើយពួកគេក៏មិនមានឈើប្រណីតៗ សម្រាប់សាងសង់ផ្ទះដែរ។
លោកបញ្ជាក់ថា៖ «ក្រុមសហគមន៍យើងខ្ញុំ មិនមានដែក មានស៊ីម៉ងត៍ធ្វើផ្ទះទេ គឺមានតែប្រើឈើដែរ តែមិនមានអស់ឈើច្រើនដូចការបាត់បង់នេះដែរ យ៉ាងច្រើន ១ ឆ្នាំ ធ្វើផ្ទះអស់ ១០ ខ្នង ប្រសើរណាស់ហើយ ជួនកាលមិនបានផង។ តែបងប្អូនធ្វើផ្ទះ អត់មានឈើប្រណីតៗទេ មានតែឈើសរសៃធម្មតាទេ»។
ទោះយ៉ាងណាក៏ដោយ មន្ត្រីជាន់ខ្ពស់ផ្នែកស៊ើបអង្កេតនៃសមាគមអាដហុកលោក ស៊ឹង សែនករុណា បានថ្លែងកាលពីម្សិលមិញថា ជាទូទៅព្រៃនៅស្រុកខ្មែរ បើទោះជាពលរដ្ឋប្រើប្រាស់ទូទាំងប្រទេសទៀត ក៏ប្រើមិនអស់ដែរ បើគ្មានការកាប់បំផ្លាញនាំចេញដោយខុសច្បាប់នោះ។
លោក សែនករុណា ថ្លែងថា៖ «ប្រមុខរាជរដ្ឋាភិបាលបានទទួលស្គាល់ហើយពីការកាប់បំផ្លាញព្រៃឈើរហូតដល់មានការធ្វើការប្តេជ្ញាចិត្តទៅទៀត តែ ការរិះគន់ចុងក្រោយទាំងអស់នេះ យើងជឿជាក់ថា មិនគួរណាមានការជះត្រឡប់មកអ្នករិះគន់ទេ។ ផ្ទុយទៅវិញយើងត្រូវយកមតិរិះគន់មកទាំងអស់ហ្នឹង ដើម្បីរកយុទ្ធសាស្ត្រដើម្បីធ្វើយ៉ាងណាទប់ស្កាត់ឲ្យបានក្នុងការបំផ្លិចបំផ្លាញព្រៃឈើ»៕
