The Phnom Penh Post Search

Search form




Logo of Phnom Penh Post newspaper Phnom Penh Post - លោក ហ៊ុន សែន ប្រតិកម្ម​នឹង​អ្នក​ថា ការ​ផ្អាក​អុំ​ទូក​មក​ពី​ខ្លាច​បាតុកម្ម




លោក ហ៊ុន សែន ប្រតិកម្ម​នឹង​អ្នក​ថា ការ​ផ្អាក​អុំ​ទូក​មក​ពី​ខ្លាច​បាតុកម្ម

Content image - Phnom Penh Post
លោក​ ហ៊ុន សែន ថ្លែង​ក្នុង​ពិធី​សម្ពោធ​គម្រោង​ការពារ​ទឹក​ជំនន់​និង​កែ​លម្អ​ប្រព័ន្ធ​លូ​នៅ​រាជធានី​ភ្នំពេញ កាលពីម្សិលមិញ។ ហេង ជីវ័ន

លោក ហ៊ុន សែន ប្រតិកម្ម​នឹង​អ្នក​ថា ការ​ផ្អាក​អុំ​ទូក​មក​ពី​ខ្លាច​បាតុកម្ម

ភ្នំពេញៈ លោក​នាយក​រដ្ឋមន្ត្រី កាល​ពី​ម្សិល​មិញ​បាន​ប្រតិកម្ម​ខ្លាំង​ៗ​និង​បាន​ចាត់​ទុក​ការ​រិះ​គន់​របស់​ក្រុម​អ្នក​វិភាគ និង​តំណាង​រាស្ត្រ​បក្ស​សង្គ្រោះ​ជាតិ​​ដែល​ថា ការ​ផ្អាក​ព្រះ​រាជ​ពិធី​បុណ្យ​អុំ​ទូក​ឆ្នាំ​នេះ ដោយសារ​ខ្លាច​ក្រុម​អ្នក​គាំទ្រ​បក្ស​ប្រឆាំង​​ធ្វើ​បាតុកម្ម​នោះថា ជា​ការ​មាក់​ងាយ​រាជ​រដ្ឋាភិបាល​និង​មាន​ចរិតព្រ​ហើន។

ថ្លែង​ក្នុង​ពិធី​សម្ពោធ​គម្រោង​ការពារ​ទឹក​ជំនន់​និង​កែ​លម្អ​ប្រព័ន្ធ​លូ​នៅ​រាជធានី​ភ្នំពេញ លោក​ហ៊ុន សែន​ បាន​ថ្លែង​ថា ការ​ផ្អាក​​ដោយ​សារ​កម្ពស់​ទឹក​ទាប​អាច​ធ្លាក់​​ដល់​ ៤,២០ ម៉ែត្រ​ដែល​ធ្វើ​ឲ្យ​ការ​ដឹក​ជញ្ជូន​ទូក​និង​បច្ចេកទេស​អុំ​មាន​ការ​លំបាក មិន​​មែន​ខ្លាច​​ក្រុម​អ្នក​គាំទ្រ​បក្ស​ប្រឆាំង​ធ្វើ​បាតុកម្ម​ដូច​ការ​លើក​ឡើង​របស់​ក្រុម​​អ្នក​វិភាគ​ឯករាជ្យ​និង​​អ្នក​តំណាង​រាស្រ្ត​បក្ស​ប្រឆាំង​​នោះ​ទេ។

លោកបាន​ចាត់​ទុក​ការ​រិះ​​គន់​នោះថា​​ជា​​ការ​អធិ​ប្បាយ​បែប​ប្រមាថនិង​ព្រហើន​ដែល​មិន​អាច​ទទួល​យក​​បាន។

លោកថា៖ «ឲ្យ​ស្គាល់​ពី​បញ្ហា កុំ​លេង​​ស្អី​ក៏​​នយោ​បាយ​នៅ​ពី​ក្រោយនោះ»។

លោកពន្យល់​ថា៖«ឆ្នាំ​ទៅ​អុំ​ទូកក៏ទឹក​ទាប​ដែរ​ យើង​អុំ​​តែ ៦ ម៉ែត្រ​ជាង ចំណុះ​ទូក​ចង់​ដាច់​ខ្យល់​ទៅ​ហើយ អា​ហ្នឹង​​ទឹក​តែ​​ត្រឹម​ ៦ ម៉ែត្រ ល្អ​បំផុត​ទឹក​ ៧ ​ម៉ែត្រ​ឬ​លើស​ ៧ ​ម៉ែត្រ​បន្តិច ​ប៉ុន្តែ​បើ​ឡើង​ដល់​ទៅ​ ៨ ​ម៉ែត្រ​កន្លះ​ទៅ​ ៩ ​ម៉ែត្រ ​អាហ្នឹង​រឹត​តែ​អុំ​មិន​កើត​ទៀត ខ្លាច​គ្រោះ​​ថ្នាក់»។

លោក​​បាន​បន្ថែម​ថា ​បើ​ទោះ​ជា​មិន​មាន​ពិធី​បុណ្យ​​អុំទូក ​ប៉ុន្តែ​ការ​កម្សាន្ត​​ផ្សេង​​ទៀត ​ដូចជា ការ​បាញ់​កាំជ្រួច ​ការ​​តាំង​ពិព័រណ៍ ការ​​ប្រគំ​តន្ត្រី​ជា​ដើម ​នៅតែ​មាន​ដដែល​ដើម្បី​ឲ្យ​ពលរដ្ឋ​​បាន​មក​​សប្បាយ​រីក​រាយ ក្នុង​នោះ​ លោក​​នឹង​រ៉ាប់រង​ចំណាយ​លើ​តារា​ចម្រៀង​និង​តារា​សម្តែង​ទាំង​អស់។

Content image - Phnom Penh Post
ពិធីបុណ្យ​ធ្វើ​នៅ​ខេត្ត ស្វាយរៀង កាល​ពី​សប្តាហ៍​មុន។ ម៉ៃ វីរៈ

កាល​ពី​ថ្ងៃទី​ ៣១​ តុលា​ រាជរដ្ឋាភិ​បាលបាន​ចេញ​សារាចរ​ផ្អាក​ប្រារព្ធ​ព្រះរាជ​ពិធី​បុណ្យ​អុំ​ទូក បណ្តែត​ប្រទីបនិង​សំពះ​​ព្រះ​ខែ ដែល​នឹង​ប្រព្រឹត្ត​ចាប់ពី​ថ្ងៃ​ទី​ ២៤ ​ដល់​ ២៦ វិច្ឆិកា ខាង​មុខ​នេះ ដោយ​​លើក​ហេតុ​ផល​ថា ​ឆ្នាំ​នេះ​​ទឹក​ទន្លេ​មាន​កម្រិត​ទាប​និង​កំពុង​ជួប​គ្រោះ​រាំង​ស្ងួត។

លោក​នាយក​រដ្ឋ​មន្ត្រី​ក៏​បាន​សុំការ​​យោគ​យល់​ចំពោះ​ការ​ផ្អាក​នេះ និង​​បាន​បញ្ជា​ទៅ​មន្ត្រី​ឲ្យ​យក​ថវិកា​ដែលប​ម្រុង​សម្រាប់​រៀប​ចំ​ពិធី​នេះទៅ​ទិញ​ប្រេង​បូម​ទឹក​​ចូល​ស្រែ​ឲ្យ​កសិករ​ដែល​កំពុង​ជួប​គ្រោះ​រាំង​ស្ងួត។

ទោះ​យ៉ាង​ណា ការ​ផ្អាក​នេះធ្វើ​ឡើង​ក្រោយ​ពីមាន​បាតុ​កម្ម​ទម្លាក់ លោក កឹម សុខា ចេញ​ពី​អនុ​ប្រធាន​ទី​ ១ រដ្ឋសភា កាល​ពី​ថ្ងៃ​ទី ២៦ ខែ​តុលា។

អ្នកវិភាគ​និង​ស្រាវជ្រាវ​ពីការ​អភិវឌ្ឍ​សង្គម​ លោក មាស នី ដែល​បាន​វិភាគ​ពី​ការ​ផ្អាក​បុណ្យ​​អុំទូក​បាន​ថ្លែង​ថា ការ​បដិ​សេធ​របស់​លោក​នាយក​រដ្ឋមន្ត្រី គឺជា​សិទ្ធិ​របស់​លោក ​ប៉ុន្តែ​ប្រជា​ពលរដ្ឋ​លោក​បាន​ដឹង​​ពី​ទំនាក់​ទំនង​ជិត​​ស្និទ្ធ​នៃ​ការ​​ផ្អាក​​ពិធី​បុណ្យ​អុំ​ទូកនិង​វិបត្តិ​​នយោបាយ​ដែល​បាន​កើត​ កាល​ពី​ថ្ងៃ​ទី​ ២៦ តុលា។

លោកថា៖«ខ្ញុំ​​គិត​ថា ប្រ​សិន​បើ​លោក​នាយក​រដ្ឋ​មន្ត្រី ផ្តល់​ហេតុ​ផល​ថា ដោយសារ​ទឹក​ទន្លេ​មាន​កម្រិត​ទាប​នោះ យើង​គួរ​តែ​ដឹង​រឿង​នេះ​​កាលពី​ប៉ុន្មាន​ខែ​មុន ​ហើយ​ការ​ប្រកាស​ផ្អាក ​គួរ​តែ​ធ្វើ​កាល​ពី​ខែ​មុនឬ​ធ្វើ​មុន​ពេល​មាន​វិបត្តិ​នយោ​បាយ។ ហេតុ​នេះ​ហើយ​ទើប​អ្នក​វិភាគ​ខ្លះ​ជឿ​ថា វា​មាន​ទំនាក់​ទំនង​រវាង​ព្រឹត្តិ​ការណ៍​ថ្ងៃ ២៦ តុលា និង​ការ​ផ្អាក​ពិធី​បុណ្យ​អុំទូក»។

អ្នក​តំណាង​រាស្ត្រ​បក្ស​សង្គ្រោះជាតិ ​លោក ​អេង ឆៃ​អ៊ាង មិន​ឆ្លើយ​តប​នឹង​ការ​លើក​ឡើង​របស់​លោក​នាយក​រដ្ឋ​មន្ត្រី​ទេ ប៉ុន្តែ​​បាន​សម្តែង​ការ​សោក​ស្តាយ​ចំពោះ​ការផ្អាក​ព្រះ​រាជ​ពិធី​បុណ្យ ជា​ប្រពៃណី​ជាតិ​ដ៏យូរ​លង់​នេះ។

ព្រះ​រាជ​ពិធី​បុណ្យ​អុំ​ទូកដែល​ទាក់​ទាញ​មនុស្ស​ច្រើន​រហូត​ដល់​ប្រមាណ​មួយ​លាន​នាក់​មក​កាន់​រាជធានី​ភ្នំពេញ ​បាន​ផ្អាកបី​ឆ្នាំ​ជាប់​គ្នា បន្ទាប់​ពី​មាន​ព្រឹត្តិការណ៍​​ជាន់​គ្នា​ស្លាប់​ជាង​ ៣៥០ ​នាក់​ នៅ​លើ​ស្ពាន​​កោះ​ពេជ្រនា​ថ្ងៃ​ចុង​ក្រោយ​នៃ​ពិធី​បុណ្យ​នេះ​កាល​ពី​ឆ្នាំ​ ២០១០។

នៅ​ឆ្នាំ​ ២០១១​ រាជរដ្ឋាភិបាល ​បាន​​លុប​​ចោល​​ពិធីបុណ្យ​នេះ​ ដោយសារ​ទឹក​ជំនន់។ ឆ្នាំ ​២០១២ ​មូល​ហេតុ​នៃ​ការ​ផ្អាក​ គឺ​សម្តេច​ឪ នរោត្តម​ សីហនុ ​សោយ​ទិវង្គតនៅ​ខែ​តុលា គឺ​ប៉ុន្មាន​សប្តាហ៍​មុន​​ពេល​​រៀបចំ​ពិធី ​ហើយ​ឆ្នាំ ២០១៣ ក៏​​បាន​ផ្អាក​មួយ​ឆ្នាំ​ទៀត ដោយ​សារ​​ទឹក​ជំនន់​ ប៉ុន្តែ​​នៅ​ឆ្នាំ ២០១៤ មាន​ការ​​​ប្រារព្ធ​ពិធី​នេះ​ឡើង​វិញ​ជាធម្ម​តា​ដោយ​​អ្នក​ចូល​រួម​ទស្សនា​បាន​ថយ​ចុះ៕

អត្ថបទគួរចាប់អារម្មណ៍