.jpg)
ឆ្នេរសមុទ្រនៅខេត្តកំពតនាពេលកន្លងមក។ រូបថត ភ្នំពេញប៉ុស្ដិ៍
កំពតៈ លោកនាយករដ្ឋមន្ត្រី ហ៊ុន សែន បានប្រាប់ឱ្យអាជ្ញាធរ និងមន្ត្រីក្រោមឱវាទឱ្យខិតខំរក្សាឱ្យបាននូវតំបន់ទេសចរណ៍មិនឱ្យក្លាយជាតំបន់ប្រើប្រាស់គ្រឿងញៀន និងតំបន់គ្មានបងតូចបងធំ ការគំរាមកំហែង និងការវាយប្រហារភេរវកម្ម។
ក្នុងពិធីបុណ្យសមុទ្រលើកទី ៨ ក្នុងជុំទី ២ នៅខេត្តកំពតកាលពីយប់ថ្ងៃសៅរ៍ លោក ហ៊ុន សែន ថ្លែងថា៖ «ខិតខំធ្វើយ៉ាងណារក្សានូវសន្តិសុខ សណ្តាប់ធ្នាប់សង្គម កុំឱ្យមានភេរវកម្មកើតឡើងនៅតំបន់ទេសចរណ៍មាត់សមុទ្រ កុំឱ្យមានគ្រឿងញៀន កុំឱ្យមានបងតូចបងធំ និងក្រុមដែលធ្វើសកម្មភាពបំផ្លិចបំផ្លាញនូវស្ថិរភាពនៅតំបន់ទេសចរណ៍។ តំបន់ទេសចរណ៍របស់យើងត្រូវតែក្លាយជាតំបន់ទេសចរណ៍ ហើយគ្មានការគំរាមកំហែងពីពួកម៉ាហ្វីយ៉ា និងគ្មានការគំរាមកំហែងពីការវាយប្រហារភេរវកម្ម»។
លោក ហ៊ុន សែន ក៏បានអះអាងថា បើសេដ្ឋកិច្ចប្រទេសកម្ពុជាពឹងពាក់ទៅលើល្បែងអនឡាញ (Online) កម្ពុជានឹងក្លាយទៅប្រទេសរងគ្រោះសម្រាប់បញ្ហាសន្តិសុខរបស់ខ្លួន និងស្ថិតក្នុងការគំរាមកំហែងនៃក្រុមម៉ាហ្វីយ៉ាដែលជ្រៀតចូលមកក្នុងប្រទេសដើម្បីធ្វើសកម្មភាព។
លោក ហ៊ុន សែន បានថ្លែងថា៖ «យើងក៏ស្ថិតនៅក្នុងស្ថានភាពដែលក្លាយទៅជាប្រទេសនៃគោលដៅនៃការលាងលុយកខ្វក់តាមរយៈអនឡាញ។ យើងនឹងបាត់បង់នូវសុវត្ថិភាព យើងនឹងបាត់បង់សុវត្ថិភាពអ្នកជំនួញធំៗ អ្នករកស៊ីធំៗដែលជាអ្នកមានប្រាក់កាសមិនហ៊ានចូលមកកម្ពុជាដោយសារខ្លាចពួកក្រុមម៉ាហ្វីយ៉ា»។
លោក មាស វិរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀនបានឲ្យដឹងថា ការណែនាំរបស់លោកនាយករដ្ឋមន្ត្រីគឺជាការចង្អុលបង្ហាញ ហើយអាជ្ញាធរត្រូវតែខិតខំយកចិត្តទុកដាក់អនុវត្តតាមការលើកឡើងនូវបញ្ហាព្រួយបារម្ភ។
លោក មាស វិរិទ្ធ ថ្លែងថា៖ «សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី លោកមានតួនាទីតម្រង់ទិសណែនាំ។ យើងត្រូវតែអនុវត្តក្នុងក្របខ័ណ្ឌនៃការធ្វើសកម្មភាពប្រយុទ្ធប្រឆាំង (គ្រឿងញៀន)»។ នេះគឺជាការក្រើនរំឭករបស់ថ្នាក់ដឹកនាំដើម្បីឱ្យសមត្ថកិច្ចពាក់ព័ន្ធខិតខំយកចិត្តទុកដាក់ក្នុងការត្រួតពិនិត្យគ្រឿងញៀននៅតំបន់ទេសចរណ៍»។
លោក មាស វិរិទ្ធ បញ្ជាក់ថា បទល្មើសគឺត្រូវបានប្រព្រឹត្តឡើងដោយមនុស្ស។ សមត្ថកិច្ចអនុវត្តច្បាប់ពាក់ព័ន្ធត្រូវខិតខំធ្វើការតាមដាន ត្រួតពិនិត្យ និងស៊ើបអង្កេតពីបញ្ហាគ្រឿងញៀន។ ប្រសិនបើការប្រើប្រាស់គ្រឿងញៀនកើតមាននៅតំបន់ណា សមត្ថកិច្ចត្រូវបំផ្លាញគ្រឿងញៀននៅកន្លែងនោះ និងស្រាវជ្រាវត្រឡប់រកប្រភពនៃការបញ្ជូនគ្រឿងញៀនទៅដល់ដៃអ្នកប្រើប្រាស់ហើយ អាជ្ញាធរកំពុងបន្តនីតិវិធីនេះ។
លោក មាស វិរិទ្ធ បញ្ជាក់ទៀតថាកន្លងមកនេះអាជ្ញាធរបានអនុវត្តផែនការស្តីពីយុទ្ធនាការប្រយុទ្ធប្រឆាំងគ្រឿងញៀនខុសច្បាប់របស់រាជរដ្ឋាភិបាល ហើយបានសម្រេចនូវលទ្ធផលគួរជាទីមោទន និងផ្តល់ភាពកក់ក្តៅជូនប្រជាពលរដ្ឋដែលជាការចូលរួមថែរក្សាសន្តិសុខសង្គម។
លោកថ្លែងថា៖ «តាមការណែនាំហ្នឹងគឺ សមត្ថកិច្ចបានត្រួតពិនិត្យទៅលើកន្លែងកម្សាន្តសប្បាយជាច្រើនជាមួយនឹងការត្រួតពិនិត្យយន្តការរដ្ឋបាល។ អ៊ីចឹងឃើញថា តាមក្លិបកម្សាន្តស្ទើរតែទាំងអស់គឺថាមិនមានសកម្មភាពប្រព្រឹត្តសកម្មភាពល្មើសច្បាប់ពាក់ព័ន្ធនឹងបញ្ហាគ្រឿងញៀន ហើយយើងនៅតែបន្តយកចិត្តទុកដាក់លើកិច្ចការនេះបន្ថែមទៀត»។
កាលពីថ្ងៃទី ១៦ ដល់ ២០ លោក កែ គឹមយ៉ាន ឧបនាយករដ្ឋមន្ត្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀនបានដឹកនាំប្រតិភូអាជ្ញាធរជាតិប្រយុទ្ធប្រឆាំងគ្រឿងញៀនទៅបំពេញទស្សនកិច្ចនៅប្រទេសចិន។ លោក កែ គឹមយ៉ាន បានប្រាប់តំណាងក្រសួងសន្តិសុខសាធារណ:ចិនថា រដ្ឋាភិបាលកម្ពុជាបាន និងកំពុងយកចិត្តទុកដាក់យ៉ាងខ្លាំងលើការងារត្រួតពិនិត្យគ្រឿងញៀន ដោយផ្តោតលើយន្តការពហុវិស័យទាំងផ្នែកអនុវត្តច្បាប់ ការអប់រំផ្សព្វផ្សាយ ព្យាបាល និងស្តារនីតិសម្បទាអ្នកញៀនគ្រឿងញៀន កិច្ចសហប្រតិបត្តិការអន្តរជាតិ និងការចូលរួមគាំទ្រពីគ្រប់វិស័យ។ នេះបើយោងតាមហ្វេសប៊ុកអាជ្ញាធរជាតិប្រយុទ្ធប្រឆាំងគ្រឿងញៀនកាលពីពេលថ្មីៗកន្លងមកនេះ។
លោកបានស្នើសុំការគាំទ្រពីភាគីចិនទៅលើផ្នែកសម្ភារ បច្ចេកទេស ការអប់រំផ្សព្វផ្សាយ ការបណ្តុះបណ្តាលមន្រី្ត អនុវត្តច្បាប់ និងការងារព្យាបាល និងស្តារនីតិសម្បទាអ្នកញៀនគ្រឿងញៀន។ ភាគីចិនក៏បានស្នើឲ្យមានកិច្ចសហប្រតិបត្តិការរួមគ្នាក្នុងការត្រួតពិនិត្យគ្រឿងញៀន និងសន្តិសុខសម្រាប់ប្រទេសទាំង ២៕
