.jpg)
លោក ហ៊ុន សែន ក្នុងជំនួបជាមួយឯកអគ្គរដ្ឋទូតសហរដ្ឋអាមេរិកកាលពីថ្ងៃទី ២១ ខែវិច្ឆិកា។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន កាលពីថ្ងៃអង្គារ បានសរសេរលិខិតមួយច្បាប់ ផ្ញើជូនលោក ដូណាល់ ត្រាំ ប្រធានាធិបតីសហរដ្ឋអាមេរិក ដោយបញ្ជាក់ថា លោកទទួលការអញ្ជើញរបស់ លោក ត្រាំ ទៅចូលរួមជំនួបកំពូលពិសេសអាស៊ាន-អាមេរិក និងបង្ហាញការស្ងើចសរសើរ ចំពោះការបន្តគាំទ្ររបស់អាមេរិកចំពោះកម្ពុជា។
លិខិតរបស់ លោក ហ៊ុន សែន ចុះថ្ងៃទី ២៦ ខែ វិច្ឆិកា គឺជាការឆ្លើយតបទៅនឹងលិខិតចំនួន ២ ដែលលោក ត្រាំ បានផ្ញើជូនលោកកាលពីដើមខែនេះដោយលោក ត្រាំ បានប្ដេជ្ញាគាំទ្រកម្ពុជា និងបានអញ្ជើញ លោក ហ៊ុន សែន ទៅចូលរួមជំនួបកំពូល ដែលនឹងធ្វើឡើងនៅត្រីមាសទី ១ នៃឆ្នាំ ២០២០។
កាលពីដើម ខែនេះលោក ត្រាំ បញ្ជាក់ថា សហរដ្ឋអាមេរិកប្ដេជ្ញាក្នុងការផ្ដល់ការគាំទ្រដល់កម្ពុជា ជាពិសេសអាមេរិកគោរពដល់អធិបតេយ្យភាពរបស់កម្ពុជា ហើយមិនគាំទ្រការផ្លាស់ប្ដូររបបទេ។ ទោះយ៉ាងណាលោក ត្រាំ ក៏បានជំរុញឲ្យរដ្ឋាភិបាលកម្ពុជាព្យាយាមបន្ថែមទៀត លើការខំប្រឹងប្រែងពង្រឹងលទ្ធិប្រជាធិបតេយ្យ។
លោក ត្រាំ បានសរសេរថា៖ «វាមានសារៈសំខាន់ណាស់សម្រាប់ទំនាក់ទំនងទ្វេភាគីដែលអ្នកត្រូវធ្វើឲ្យកម្ពុជាត្រឡប់ទៅដើរលើផ្លូវរដ្ឋាភិបាលតាមបែបប្រជាធិបតេយ្យ។ ជំហានដំបូង ខ្ញុំសង្ឃឹមថាលោកនឹងវាយតម្លៃឡើងវិញចំពោះការសម្រេចចិត្តជាក់លាក់មួយចំនួនដែលរដ្ឋាភិបាលលោកបានសម្រេច ប៉ុន្តែជាអ្វីដែលសហរដ្ឋអាមេរិកជឿជាក់ថា វាបានបង្កឲ្យមានហានិភ័យធ្ងន់ធ្ងរដល់អធិបតេយ្យភាព ស្ថិរភាព និងការអភិវឌ្ឍសេដ្ឋកិច្ចរបស់ព្រះរាជាណាចក្រកម្ពុជា»។
ជាការឆ្លើយតបលោក ហ៊ុន សែន បានសរសេរថា៖ «សំខាន់បំផុត ខ្ញុំទទួលបាននូវការធានាតាមរយៈការអះអាងដ៏ជាក់លាក់របស់ឯកឧត្តមក្នុងការស្វែងរកការចូលរួមដ៏ពិតប្រាកដមួយក្នុងការអនុវត្តលទ្ធិប្រជាធិបតេយ្យ សេរីភាពបុគ្គល និងនីតិរដ្ឋ ជាជាងការផ្លាស់ប្ដូររបប»។
លោក ហ៊ុន សែន បញ្ជាក់ថា៖ «ជាប្រទេសមួយដែលមានលទ្ធិប្រជាធិបតេយ្យដ៏ក្មេងខ្ចី ឯកឧត្តមប្រហែលជាអាចទទួលស្គាល់ការតស៊ូរបស់យើងខ្ញុំក្នុងការស្វែងរកសន្តិភាពពេញលេញមួយដែលជាលក្ខខណ្ឌមិនអាចខ្វះបាន មុនពេលដែលយើងខ្ញុំអាចកសាងប្រទេសឡើងវិញ ដោយប្រកាន់ខ្ជាប់នូវប្រព័ន្ធប្រជាធិបតេយ្យពហុបក្ស»។
លោក ហ៊ុន សែន ក៏បានបន្ទរតាមការលើកឡើងរបស់លោក ត្រាំ ដោយលោកទទួលស្គាល់នូវទំនាក់ទំនងមិនសូវល្អរវាងប្រទេសទាំង ២ ហើយលោកនាយករដ្ឋមន្ត្រីសង្ឃឹមថា ក្រុមការងារកិច្ចការបរទេសនៃប្រទេសទាំង ២ នឹងធ្វើការជាមួយគ្នា ដើម្បីស្ដារទំនុកចិត្ត និងភាពជឿជាក់ឡើងវិញព្រមទាំងកសាងឡើងវិញនូវចំណងមិត្តភាពរវាងប្រទេស និងប្រជាជនទាំង ២។
លោក ហ៊ុន សែន បន្តថា៖ «ខ្ញុំយល់ថា យើងមិនត្រូវឲ្យខ្លួនយើងក្លាយជាចំណាប់ខ្មាំងនៃទំព័រខ្មៅងងឹតខ្លះនៃប្រវត្តិសាស្ត្ររបស់យើងនោះទេ។ មានដំណាក់កាលដ៏ស្រស់បំព្រងជាច្រើនផ្សេងទៀតដែលមានសារៈប្រយោជន៍ក្នុងការបំពាក់បំប៉នពូនជ្រុំសម្រាប់ធ្វើឲ្យទំនាក់ទំនងរវាងប្រទេស និងប្រជាជនយើងទាំង ២ កាន់តែមានការរីកលូតលាស់ថែមទៀត»។
លោក ហ៊ុន សែន លើកឡើងថានាពេលបច្ចុប្បន្ននេះមួយផ្នែកនៃវិបុលភាពរបស់ប្រជាជនកម្ពុជាគឺបានមកពីលទ្ធផលនៃការចូលរួមវិភាគទានរបស់ប្រជាជន និងរដ្ឋាភិបាលសហរដ្ឋអាមេរិកដោយចាប់ផ្ដើមពីការធ្វើប្រជាធិបតេយ្យនីយកម្មដោយសន្តិវិធីរហូតដល់ការកសាងប្រទេសជាតិ អភិបាលកិច្ចសង្គម និងការទទួលបានការចូលទីផ្សារដ៏ទូលំទូលាយរបស់សហរដ្ឋអាមេរិក។
លោក ផៃ ស៊ីផាន អ្នកនាំពាក្យរាជរដ្ឋាភិបាលបានថ្លែងកាលពីម្សិលមិញថា លិខិតលោក ហ៊ុន សែន បង្ហាញពីការវាយតម្លៃខ្ពស់លើកិច្ចសហប្រតិបត្តិការរវាងប្រទេសទាំង ២ ហើយវាក៏បញ្ជាក់ពីទំនាក់ទំនងដ៏ស្មោះត្រង់រវាងកម្ពុជានឹងអាមេរិក។ លោកថ្លែងថា៖ «វាក៏បង្ហាញថាកម្ពុជាមិនត្រូវការអ្វីក្រៅតែពីសន្តិភាព និងស្ថិរភាព»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានថ្លែងថា ទាំងលោក ហ៊ុន សែន និងលោក ដូណាល់ ត្រាំ បានបង្ហាញនូវសារបែបស្ថាបនាដោយស្មោះត្រង់ដើម្បីពង្រឹងទំនាក់ទំនងរវាងប្រទេសទាំងពីរ។ ទោះជាយ៉ាងណាលោក ផៃ ស៊ីផាន បានថ្លែងថា ដើម្បីឲ្យទំនាក់ទំនងប្រទេសទាំង ២ រីកស្គុសស្គាយ «សហរដ្ឋអាមេរិកមិនត្រូវធ្វើសកម្មភាពអ្វីដែលគេអាចមើលឃើញថា ជាការប៉ុនប៉ងបង្កឲ្យមានការប្ដូររបប ឬក៏សកម្មភាពដែលប៉ុនប៉ងក្នុងការប្ដូររបប ឬជ្រៀតជ្រែកក្នុងកិច្ចការផ្ទៃក្នុងកម្ពុជា»។
ស្រដៀងគ្នានេះអ្នកវិទ្យាសាស្ត្រនយោបាយលោក សូ ចន្ថា បានសរសេរនៅលើធ្វីធើររបស់លោកថា ការផ្ញើលិខិតទៅវិញទៅមករវាងថ្នាក់ដឹកនាំប្រទេសទាំង ២ គឺជាសញ្ញាវិជ្ជមាននៃទំនាក់ទំនងកម្ពុជា-អាមេរិក នៅក្នុងសតវត្សរ៍ទី ២១ នេះ។
លោក សូ ចន្ថា បាននិយាយថា៖ «ទំនាក់ទំនងប្រកបដោយតុល្យភាពជាមួយប្រទេសមហាអំណាច គឺជាជម្រើសល្អបំផុតសម្រាប់កម្ពុជា ដើម្បីជំរុញការអភិវឌ្ឍសង្គម និងសេដ្ឋកិច្ច»៕
