ភ្នំពេញៈ លោកនាយករដ្ឋមន្ត្រី ហ៊ុន សែន បានថ្លែងពន្យល់ពីកំណើនជនជាតិចិនដោយលោកបានហៅអ្នករិះគន់ដែលថា ចិនមកឈ្លានពានកម្ពុជាថា «ឆ្កួត» ខណៈដែលមានការរិះគន់ផង និងការព្រួយបារម្ភផង ចំពោះការកើនឡើងយ៉ាងគំហុកនៃជនជាតិចិននៅកម្ពុជាជាពិសេសនៅខេត្តព្រះសីហនុក្នុងរយៈពេលប៉ុន្មានខែចុងក្រោយនេះ។
លោកនាយករដ្ឋមន្ត្រីបានថ្លែងកាលពីយប់រំលងអធ្រាត្រឈានចូលថ្ងៃទី ២៤ ខែតុលា ឆ្នាំ ២០១៨ ក្នុងពិធីសំណេះសំណាលជាមួយសហគមន៍ខ្មែររស់នៅទ្វីបអឺរ៉ុបនាទីក្រុងហ្សឺណែវ ប្រទេសស្វ៊ីសថាមានប្រជាពលរដ្ឋខ្លះមានទុក្ខកង្វល់ពាក់ព័ន្ធកំណើនជនជាតិចិននៅក្នុងខេត្តព្រះសីហនុដោយលោកពន្យល់ថាការកើនឡើងនៃជនជាតិចិននេះមួយផ្នែកគឺដោយសារតែប្រទេសកម្ពុជា ខ្វះកម្លាំងពលកម្មជំនាញ ដើម្បីបម្រើដល់ការសាងសង់ ហើយជនជាតិចិនដែលមកបម្រើក្នុងវិស័យសំណង់ទាំងនោះនឹងត្រឡប់ទៅប្រទេសខ្លួនវិញ បន្ទាប់ពីការសាងសង់បានបញ្ចប់។
លោកបញ្ជាក់ថា៖ «បងប្អូនខ្លះកង្វល់ពីចិននៅកំពង់សោម។ បងប្អូន សំណង់ច្រើនណាស់ យើងផ្តល់កម្មករ និងជំនាញឲ្យគេមិនគ្រប់ ដូច្នេះយើងត្រូវធ្វើម៉េចបើកឱកាស ដើម្បីឲ្យគេយកកម្មករមកសាងសង់សំណង់ ដូចជាស្ពាន និងអ្វីផ្សេងទៀតមួយចំនួន...។ នៅពេលដែលគេកសាងហើយ គេមិននៅស្រុកខ្មែរទេ គេទៅស្រុកគេវិញហើយកុំឆ្ងល់ពេក ហើយយើងក៏គ្មានច្បាប់អនុញ្ញាតឲ្យគេនៅដែរ»។
លោកបន្ថែមថា៖ «បើនិយាយពីទេសចរចិនឆ្នាំទៅ ១ លាន ២ សែននាក់ឆ្នាំនេះអាចឡើងដល់ ១ លានកន្លះ អ៊ីចឹងទៅទីណាក៏ឃើញទេសចរចិន ហើយថា ចិនមកឈ្លានពានខ្មែរទៀតអានេះមិនដឹងជារឿងអី? នៅស្រុកបារាំងមាន China Town ទេ? មាន! អាមេរិកមាន China Town ទេ? មាន! ស្រុកខ្មែរអត់ទាន់មាន China Town ទេ»។
នៅក្នុងរយៈពេលចុងក្រោយនេះមន្ត្រីអតីតគណបក្សប្រឆាំងមួយចំនួនបានធ្វើការរិះគន់ចំពោះកំណើនជនជាតិចិនកាន់តែច្រើនឡើងៗ ជាពិសេសនៅខេត្តព្រះសីហនុថាអាចនឹងបង្កទៅជាវិបត្តិធ្ងន់ធ្ងរសម្រាប់ប្រទេសកម្ពុជាទៅថ្ងៃមុខ នៅពេលដែលជនជាតិចិនមួយចំនួនតែងតែបង្កបទល្មើសផ្សេងៗ។
ប៉ុន្តែលោក ហ៊ុន សែន ចោទសួរថា៖ «គេអត់មកវិនិយោគ វាថាគេអត់មកវិនិយោគដល់គេមកវិនិយោគ វាថាគេមកឈ្លានពានអានេះឆ្កួតឡប់អីវា? យើងជារដ្ឋអធិបតេយ្យសូមបញ្ជាក់ខ្ញុំនិយាយដោយត្រង់ចិនមិនដែលនាំកងទ័ពចេញផុតពីទល់ដែនរបស់ខ្លួនទេ។ ប្រទេសដទៃនាំកងទ័ពចូលឈ្លានពានកម្ពុជាប៉ុន្មានដងហើយ»។
កាលពីពេលថ្មីៗនេះអគ្គនាយកដ្ឋានអន្តោប្រវេសន៍ក្រសួងមហាផ្ទៃបានឲ្យដឹងថាបច្ចុប្បន្នមានជនជាតិចិនកំពុងស្នាក់នៅកម្ពុជាប្រមាណ ២១ ម៉ឺននាក់ក្នុងនោះជាង ៧ ម៉ឺននាក់នៅខេត្តព្រះសីហនុ។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាបានថ្លែងកាលពីម្សិលមិញថា ការកើនឡើងយ៉ាងឆាប់រហ័សនៃជនជាតិចិនបានបង្កឲ្យមានបទល្មើសគ្រឿងញៀន និងបទល្មើសប្លន់ ចាប់ជំរិត ដែលធ្វើឲ្យប្រជាពលរដ្ឋមានការព្រួយបារម្ភពីបញ្ហាសន្តិសុខសុវត្ថិភាពដែលហេតុដូច្នេះហើយរដ្ឋាភិបាលត្រូវតែពង្រឹងច្បាប់អន្តោប្រវេសន៍។
«ជនជាតិចិនដែលខិលខូចយកទឹកដីកម្ពុជាធ្វើជាកន្លែងប្រព្រឹត្តអំពើឧក្រិដ្ឋកម្មដូចជាការចាប់ជំរិត ការបាញ់បោះ ការកាប់សម្លាប់គ្នាប្លន់ដែលនេះហើយជារូបភាពនៃការព្រួយបារម្ភ។ ប្រសិនអាជ្ញាធរទប់ស្កាត់ និងគ្រប់គ្រងបានមិនឲ្យជនជាតិចិនប្រព្រឹត្តអំពើអស់ហ្នឹងគឺគ្មានប្រជាពលរដ្ឋណាបារម្ភទេ»។
ជាមួយគ្នានេះលោក ជ័យ ក៏បានលើកឡើងផងដែរថា ការទទួលយកកម្មករចិនដ៏ច្រើនសន្ធឹកសន្ធាប់គឺជារឿងមួយដែលធ្វើឲ្យខាតប្រយោជន៍ដល់កម្លាំងពលកម្មកម្ពុជាដោយសារតែវាមិនបានផ្តល់ឱកាសការងារដល់ពលរដ្ឋខ្មែរ ហើយពលរដ្ឋខ្មែរ នៅតែបន្តធ្វើចំណាកស្រុកដោយប្រឈមគ្រោះថ្នាក់ទៅក្រៅប្រទេស៕