បន្ទាយមានជ័យៈ លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានព្រមានជាសាធារណៈដល់ក្រុមប្រឆាំងដែលគ្រោងធ្វើបាតុកម្មនៅមុខស្ថានទូតចិនក្នុងរាជធានីភ្នំពេញ ប្រឆាំងទៅនឹងការចោទប្រកាន់ដោយគ្មានភ័ស្តុតាងពីប្រភពខាងក្រៅថា កម្ពុជាបានផ្ដល់មូលដ្ឋានកងទ័ព និងវត្តមានយោធាចិននៅកម្ពុជាក្នុងពេលតែមួយ លោកក៏បានអះអាងផងដែរថា ក្រុមនេះបន់ឱ្យតែមានពលរដ្ឋស្លាប់បន្ទោសរដ្ឋាភិបាលថា គ្មានសមត្ថភាពគ្រប់គ្រងប្រទេសជាតិ។
ក្នុងពិធីជួបសួរសុខទុក្ខ និងផ្គត់ផ្គង់ស្បៀងអាហារជូនដល់ប្រជាពលរដ្ឋដែលរងគ្រោះដោយសារទឹកជំនន់ និងពិនិត្យស្ថានភាពទឹកជំនន់នៅក្នុងខេត្តបន្ទាយមានជ័យកាលពីម្សិលមិញ លោក ហ៊ុន សែន បានថ្លែងទៅកាន់ពលរដ្ឋថា រាជរដ្ឋាភិបាលចាប់អារម្មណ៍តែរឿងជួយសង្គ្រោះប្រជាពលរដ្ឋតែប៉ុណ្ណោះ ដោយមិនខ្វល់ជាមួយនឹងក្រុមប្រឆាំងទាំងនោះទេ បើទោះជាក្រុមនេះនិយាយស្ដីអ្វី និងគ្រោងធ្វើអ្វីក៏ដោយ។
បើទោះបីជាលោកមិនចង់ថ្លែងសារនយោបាយយ៉ាងណាក្ដី ក៏លោក ហ៊ុន សែន នៅតែថ្លែងទៅកាន់ប្រជាពលរដ្ឋថា៖ «ខ្ញុំមិនខ្វល់ថា ពួកប្រឆាំងគេនិយាយយ៉ាងម៉េច អីយ៉ាងម៉េច ព្រោះអានោះវាបន់ឱ្យតែប្រជាជនងាប់ឱ្យបានច្រើន ដើម្បីវាឆ្លៀតយកចំណេញថា យើងអត់សមត្ថភាពគ្រប់គ្រង តែប៉ុណ្ណឹងទេ អ្វីដែលពួកគេចង់បានគឺប៉ុណ្ណឹង។ សម្រាប់យើង វាមិនចំណុះលើពួកហ្នឹងថាទេ អ្វីដែលយើងត្រូវធ្វើត្រូវខិតខំបន្តទៀត»។ «យើងនឹងជម្នះបាននូវការលំបាកដែលមកពីជំនន់ទឹកភ្លៀង យើងនៅតែមានសមត្ថភាពស្ដារឡើងវិញក្រោយទឹកជំនន់»។
លោក ហ៊ុន សែន ក៏បានបង្ហាញឱ្យដឹងទៀតថា ក្រុមប្រឆាំងក៏បានរិះគន់រាជរដ្ឋាភិបាលផងដែរដែលបានទិញរថយន្ត ២៩០ គ្រឿងពីចិនសម្រាប់បម្រើឱ្យវិស័យកងទ័ព ប៉ុន្តែបែរជាគេទិតៀនថារថយន្តនោះសម្រាប់ដឹកកងទ័ពទៅបង្ក្រាបប្រជាពលរដ្ឋ ខណៈដែលរថយន្តទាំងនោះកំពុងប្រើប្រាស់ជាមធ្យោបាយជួយសង្គ្រោះប្រជាពលរដ្ឋដែលរងគ្រោះដោយទឹកជំនន់។
លោក ហ៊ុន សែន ថ្លែងថា៖ «គេគួរអបអរ តែបែរទិតៀន ធុនណឹងមិនបាច់នៅស្រុកខ្មែរទេគេដេញវ៉ៃ»។
លើសពីនេះទៀត លោកក៏បានព្រមានទុកមុន សម្រាប់ដល់អ្នកដែលចង់ធ្វើបាតុកម្មនៅមុខស្ថានទូតចិននៅកម្ពុជា ខណៈពេលដែលកម្ពុជាកំពុងដោះស្រាយបញ្ហាគ្រោះទឹកជំនន់។
លោកថា៖ «អ្នកដែលចង់ធ្វើបាតុកម្ម ត្រូវប្រយ័ត្នប្រយែង និងកុំមករញ៉េរញៃវើយ។ ខ្ញុំសូមជម្រាបថា មុខសញ្ញាដែលប្រុងឡើងមកភ្នំពេញនោះ ឥឡូវគេមិនសូវយកអ្នកភ្នំពេញទេ គេរើសអ្នកខេត្តដើម្បីមកឈរធ្វើបាតុកម្ម។ មុខសញ្ញាណាគេគ្រប់គ្រងបានហើយ។ ផ្ដាំផ្ញើទៅកុំមកដាក់ញត្តិអី ២៣ តុលា នោះ។ អាអ្នកចុះហត្ថលេខា ២៣ តុលា នេះនៅឈរនៅហ្នឹងម្នាក់ (ចង្អុលទៅខ្លួនឯង) ទៀ បាញ់ ម្នាក់ នៅតែ ២ នាក់ទេ។ សុទ្ធតែអ្នកចុះហត្ថលេខាលើកិច្ចព្រមព្រៀងទីក្រុងប៉ារីស។ ឯងកិច្ចព្រមព្រៀងក្រុងប៉ារីសអីនឹងគេដែរ មកធ្វើបាតុកម្មនោះ? ហើយស្គាល់កិច្ចព្រមព្រៀងប៉ារីសនោះច្បាស់ទេ? បើគេអ្នកចរចាកិច្ចព្រមព្រៀងនេះ»។
«សុំផ្ដាំផ្ញើកំពុងទឹកជំនន់ផង កូវីដផង កុំរញ៉េរញ៉ៃ ហើយកុំទៅលើកម្រាមដៃ ៣ អី ចូលរួមជាមួយថៃ។ ឃើញថៃដាក់ត្រឡប់ទៅវិញថា កុំជ្រៀតជ្រែកផ្ទៃក្នុងរបស់អញ។ ឃើញខាងថៃដាក់ត្រឡប់ទៅវិញ។ អីចង់សាមគ្គីភាពជាមួយការតស៊ូរបស់ប្រជាជនថៃ។ រឿងថៃជារឿងរបស់ថៃ រឿងខ្មែរ ជារឿងរបស់ខ្មែរ»។
បើទោះបីជាប្រសាសន៍របស់លោកមិនសំដៅផ្ទាល់ទៅលើបុគ្គលណាម្នាក់ក៏ដោយ ប៉ុន្តែការលើកឡើងរបស់លោក ហ៊ុន សែន ទំនងសំដៅទៅលើលោក សម រង្ស៊ី ពីព្រោះលោក សម រង្ស៊ី បានសរសេរនៅលើហ្វេសប៊ុករបស់លោកកាលពីថ្ងៃទី ១៩ តុលា ថា នៅថ្ងៃទី ២៣ តុលា ដែលជាខួបទី ២៩ នៃកិច្ចព្រមព្រៀងទីក្រុងប៉ារីស «ជនជាតិខ្មែរទូទាំងពិភពលោកនឹងរៀបចំធ្វើបាតុកម្មប្រឆាំងវត្តមានយោធាចិនលើទឹកដីប្រទេសកម្ពុជា»។
បើតាមហ្វេសប៊ុកលោក សម រង្ស៊ី ថា ការធ្វើបាតុកម្មនេះធ្វើឡើងនៅមុខស្ថានទូត និងស្ថានកុងស៊ុលចិននៅក្រៅប្រទេស រួមមាននៅទីក្រុងធំៗនៅសហរដ្ឋអាមេរិក កាណាដា បារាំង បែលហ្ស៊ិក ស្វ៊ីស អូស្ត្រាលី នូវែលសេឡង់ កូរ៉េខាងត្បូង និងជប៉ុន ដើម្បីប្រឆាំងនឹងអ្វីដែលលោកអះអាងថា «វត្តមានយោធាចិននៅកម្ពុជា»។ លើសពីនេះលោក សម រង្ស៊ី ក៏បានបង្ហោះរូបលោកលើកម្រាមដៃ ៣ ដែលជាសញ្ញាគាំទ្រដល់ការធ្វើបាតុកម្មទាមទារលទ្ធិប្រជាធិបតេយ្យនៅប្រទេសថៃ។
លោក អ៊ូ ច័ន្ទរ័ត្ន អតីតតំណាងរាស្ត្រគណបក្សសង្គ្រោះជាតិបានថ្លែងដោយយល់ឃើញថា ការលើកឡើងរបស់លោក ហ៊ុន សែន ថាបក្សប្រឆាំងចង់ឃើញមនុស្សស្លាប់ដើម្បីជាលេសចោទរដ្ឋាភិបាលនោះ មិនត្រឹមត្រូវទេ។
លោកថ្លែងដូច្នេះថា៖ «ខ្ញុំអត់យល់អ៊ីចឹងទេ បក្សប្រឆាំងមិនបានបន់ស្រន់ឱ្យមនុស្សស្លាប់អី មិនមានទេ។ ក្រែងលោអ្នកណាផ្សេងខ្ញុំមិនដឹង សម្រាប់ខ្ញុំជាសមាជិកអតីតបក្សប្រឆាំងមួយដែរ ខ្ញុំចង់ឃើញតែភាពសុខសាន្តរបស់សង្គមរបស់រាស្ត្រទាំងអស់គ្នា។ ថ្មីៗនេះខ្ញុំឃើញមេដឹកនាំធំៗសស្រាក់សស្រាំចុះទៅជួយ នេះជារឿងប្រសើរ ខ្ញុំមានការត្រេកអរណាស់។ ខ្ញុំមិនដឹងថា ក្រុមណាចង់ឃើញមនុស្សស្លាប់ដើម្បីបន្ទោសរដ្ឋាភិបាល ខ្ញុំមិនមានជំនឿបែបនេះទេ»។
លោក អ៊ូ ច័ន្ទរ័ត្ន ថ្លែងថា លោកមិនបានដឹងពីគម្រោងការធ្វើបាតុកម្មមុខស្ថានទូតចិនដើម្បីប្រឆាំងវត្តមានយោធាចិននៅកម្ពុជាទេ ព្រោះពេលនេះពលរដ្ឋកំពុងរងគ្រោះដោយសារទឹកជំនន់ និងកូវីដ ដូច្នេះមិនជឿថាមានអ្នកទៅគិតគូររឿងធ្វើបាតុកម្មដែលប្រឈមនឹងគ្រោះថ្នាក់នោះទេ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិបានថ្លែងថា និន្នាការអ្នកប្រឆាំងនៅកម្ពុជាជាទូទៅចង់ឃើញចំណុចអវិជ្ជមានកើតចេញពីរដ្ឋាភិបាល បើទោះបីជាចំណុចនោះកើតឡើងពីគ្រោះធម្មជាតិក៏ដោយក៏ពួកគេដាក់បន្ទុកលើរដ្ឋាភិបាលដែរ។ លោកយល់ថា ការធ្វើបាតុកម្មប្រឆាំងនឹងចិននៅកម្ពុជាគឺជារឿងមិនត្រឹមត្រូវពីព្រោះការធ្វើបែបនេះប្រៀបដូចជាការអូសកម្ពុជាឱ្យចូលក្នុងល្បែងនៃការប្រកួតប្រជែងភូមិសាស្ត្រនយោបាយរវាងចិន និងអាមេរិក។
លោក គិន ភា ថ្លែងថា៖ «វាអត់មានហេតុផលអ្វីដែលយើងត្រូវធ្វើបាតុកម្មប្រឆាំងវត្តមានចិននៅកម្ពុជាទេ ព្រោះគេកំពុងជំរុញការលើកកម្ពស់ទំនាក់ទំនងគ្រប់តែប្រទេស។ មូលហេតុនៃការធ្វើបាតុកម្មវាអត់សមហេតុផល។ តែបើគាត់ធ្វើបាតុកម្មនៅក្រៅប្រទេស វាជាសិទ្ធិរបស់គាត់ ហើយអាស្រ័យលើយុត្តាធិការប្រទេសនោះ។ បើធ្វើនៅកម្ពុជា ខ្ញុំយល់ថា រដ្ឋាភិបាលនឹងមានវិធានការ»៕