ភ្នំពេញៈ លោកនាយករដ្ឋមន្ត្រី ហ៊ុន សែន បានថ្លែងថា បើមានកងកម្លាំងប្រដាប់អាវុធងើបឡើងដូចអ្វីដែលលោក សម រង្ស៊ី បានប្រកាសផ្ដល់ថវិកាមែននោះ កងទ័ពនឹងចេញមុខហើយវាយកម្ទេចដោយមិនចាំបាច់រង់ចាំដីកាពីតុលាការឡើយ ខណៈមនុស្ស ៧ នាក់ទៀត ត្រូវបានចោទប្រកាន់ពីបទ «រួមគំនិតក្បត់» កាលពីម្សិលមិញ។
លោក ហ៊ុន សែន បានថ្លែងដូច្នេះក្នុងពិធីជួបជុំ និងផ្ដល់រង្វាន់លើកទឹកចិត្តដល់សិស្សជាប់និទ្ទេស A ចំនួន ៤៤៣ នាក់ នៅវិមានសន្តិភាពកាលពីម្សិលមិញ។ ដោយថ្លែងដៀមដាមទៅដល់គម្រោងវិលត្រឡប់មកកម្ពុជាវិញរបស់លោក សម រង្ស៊ី លោកនាយករដ្ឋមន្ត្រី ហ៊ុន សែន ថ្លែងថាលោកបានធ្វើជានាយករដ្ឋមន្ត្រី ៣០ ឆ្នាំហើយ បើបូកទាំងនាយករដ្ឋមន្ត្រីស្ដីទីគឺមានរយៈពេល ៣៥ ឆ្នាំ។
ប៉ុន្តែលោកមិនដឹងគិតយ៉ាងណាទេនៅថ្ងៃទី ៩ ខែ វិច្ឆិកា ព្រោះវាជាថ្ងៃដែលលោក សម រង្ស៊ី ប្រកាសចូលមកចាប់លោក ហើយលោក សម រង្ស៊ី ថែមទាំងប្រកាសផ្ដល់ថវិកាដល់កងទ័ពទៀតផង។ លោកថា ការប្រកាសប្រមូលថវិកានេះហើយ ជាចំណុចដែលលោកអាចយកជាសំអាងក្នុងការវាយកម្ទេចចលនារបស់លោក សម រង្ស៊ី។
លោកថ្លែងយ៉ាងដូច្នេះថា៖ «តែមានប្រដាប់អាវុធហើយ អញវ៉ៃហើយ ហើយអាហ្នឹងឃើញត្រង់ណាវ៉ៃត្រង់ហ្នឹងហ្មង គឺអត់មានត្រូវចាំដីកាចាប់ខ្លួន ឬមិនចាប់ខ្លួន អានេះឃើញត្រង់ណាវ៉ៃត្រង់ហ្នឹងតែម្ដង។ ផ្ដល់ឱកាសឲ្យកងកម្លាំងប្រដាប់អាវុធក្នុងនោះមានទាំងកងទ័ពចេញធ្វើសកម្មភាពហើយ»។
លោកបន្តថា៖ «នៅពេលសភាពការណ៍ធម្មតា ទ័ពអត់ចេញទេ ចេញតែប៉ូលិស និងអាវុធហត្ថទេ គេហៅនគរបាលយុត្តិធម៌។ ប៉ុន្តែប្រកាសទ័ពបែបនេះហើយបានសេចក្ដីថា ទ័ពចាប់ផ្ដើមពង្រាយហើយ ហើយប្រើអាវុធគ្រប់ធុន ព្រោះអានេះមិនមែនជាបាតុកម្មទាមទារឯណា អានេះចូលដល់ប្រដាប់អាវុធ»។
លោកថាលោក សម រង្ស៊ី បានយកការស្ទង់មតិមួយដែលថាជាង ៦៥ ភាគរយ នៃកងកម្លាំងប្រដាប់អាវុធគាំទ្រលោក រង្ស៊ី។ ប៉ុន្តែលោកថា បើសិនជាមានច្រើនដូច្នេះមែនលោក សម រង្ស៊ី គួរតែមកកាន់តែលឿនកាន់តែល្អ។
ចំពោះអ្នកគាំទ្រវិញលោកថា ពួកគេមិនបាច់ឆ្ងល់ច្រើនទេគឺឃើញចាប់ៗ ដោយមិនបាច់និយាយច្រើន ហើយអ្នកដែលប្រឈមនឹងនីតិវិធីតុលាការ ប្រឈមមុខជាប់ពន្ធនាគារ «អត់មានទាបទេ»។ រដ្ឋាភិបាលមិនបំពានសិទ្ធិរបស់ពួកគេទេ ប៉ុន្តែដោយសារពួកគេបានឆ្លងកាត់បន្ទាត់ក្រហមហើយ។
លោក ហ៊ុន សែន ក៏លើកជាចម្ងល់ថា តើលោក សម រង្ស៊ី នឹងវិលត្រឡប់មកវិញតាមផ្លូវណា ព្រមជាមួយនឹងអ្នកគាំទ្ររាប់លាននាក់ដោយចេញដំណើរពីកូរ៉េផង ពីថៃផង។ លោកថា បើមកពីកូរ៉េវាមែននោះ លុះត្រាតែមានយន្តហោះ ៥០០ គ្រឿង ហើយការហោះហើរនឹងធ្វើឲ្យងងឹតមេឃទាំងអស់រកកន្លែងចុះមិនបាន។
លោកថ្លែងថា៖ «ប៉ុន្តែមេឧទ្ទាមអត់ចាំបាច់និយាយគ្នាទេ អាហ្នឹងភារកិច្ចរបស់ទៀ បាញ់ ហើយ ព្រោះឆ្លងផុតបន្ទាត់ក្រហមហើយ។ ការប្រមាថព្រះមហាក្សត្រមិនមែនជារឿងធម្មតាពេកទេ។ ប្រើពាក្យប្រមាថព្រះមហាក្សត្រសុទ្ធតែ «វា» ប្រើពាក្យវា ឲ្យព្រះមហាក្សត្រទៅធ្វើស្ដេចល្ខោនឲ្យព្រះមហាក្សត្រដាក់រាជ្យទៅ។ វាព្រហើនហួស អ៊ីចឹងគោលដៅរបស់វាមិនត្រឹមតែដកហ៊ុនសែនពីតំណែងទេ (គឺ) ដកមហាក្សត្រចេញ»។
លោក ហ៊ុន សែន បន្តថាលោកយកថ្ងៃ ៩ វិច្ឆិកា ជាថ្ងៃទទួលទាន «អំបុកការពារជាតិសាសនា ព្រះមហាក្សត្រ»។ ជាការក្រើនរំឭកដល់អ្នកគាំទ្រលោក សម រង្ស៊ី លោកនាយករដ្ឋមន្ត្រីបានបញ្ជាក់ថា នីតិវិធីចំពោះពួកគេបានចាប់ផ្ដើមហើយ និងបន្តរហូត។
លោកបញ្ជាក់ថា៖ «ផែនការឈានដល់ការផ្ទុះអាវុធផ្ដួលរំលំរដ្ឋ មិនអាចអនុញ្ញាតបានទេ។ បង្ហោះតែហ្វេសប៊ុកចូលក្នុងយុទ្ធនាការហ្នឹងក៏ត្រូវតែចាប់ខ្លួនដែរ នេះមិនមែនជាសិទ្ធិបញ្ចេញមតិទេ គឺជាការចូលរួមអំពើក្បត់ ដើម្បីផ្ដួលរំលំតាមរយៈកម្លាំងប្រដាប់អាវុធ។ យើងមិនយល់ព្រមឲ្យអ្នកឯងធ្វើរបៀបនេះទេ។ គេប្រឹងធ្វើការងារចង់ងាប់»។
ចំពោះអ្នកគាំទ្រលោក សម រង្ស៊ី និងផែនការ «រដ្ឋប្រហារ» ដែលកំពុងរស់នៅប្រទេសថៃ ពួកគេក៏អាចត្រូវបានចាប់បញ្ជូនខ្លួនមកកម្ពុជាវិញ ពីព្រោះកម្ពុជានិងថៃមានកិច្ចសហប្រតិបត្តិការជាមួយគ្នា។ នេះបើយោងតាមការបញ្ជាក់របស់លោកនាយករដ្ឋមន្ត្រី។
លោក ឡៅ ម៉ុងហៃ អ្នកវិភាគនយោបាយថ្លែងថា៖ «ការជ្រើសរើសយកការគំរាមកំហែងរឿងហិង្សារបស់លោកនាយករដ្ឋមន្ត្រីគឺជាការបញ្ជាក់អំពីភាពគ្មានប្រសិទ្ធភាពនៃវិធានការផ្លូវច្បាប់ក្នុងការរារាំងដល់អ្នកដែលទៅទទួលលោក សម រង្ស៊ី បើសិនជាលោកមកមែននោះ»។
លោក សុខ ទូច ប្រធានរាជបណ្ឌិត្យសភាកម្ពុជាបានថ្លែងថា កងទ័ពត្រូវតែប្រើប្រាស់អាវុធការពាររដ្ឋធម្មនុញ្ញ ព្រោះរដ្ឋាភិបាលកើតចេញពីការបោះឆ្នោតដែលពលរដ្ឋទៅបោះឆ្នោតរហូតដល់ជាង ៨៣ ភាគរយ។
លោកថ្លែងថា៖ «រដ្ឋាភិបាលនិយាយថាចេញ ១ ចាប់ ១ ចេញ ២ ចាប់ ២ នេះវាប្រសើរជាងទឹកបាក់ទំនប់។ កាលណាទឹកបាក់ទំនប់ យើងយកដីមកបិទវាគ្រោះថ្នាក់ច្រើន។ អ៊ីចឹងយើងធ្វើសកម្មភាពនៅពេលក្រុមនោះធ្វើកិច្ចការណាមួយដែលផ្ទុយនឹងច្បាប់ និងរដ្ឋធម្មនុញ្ញហើយគឺត្រូវតែកម្ទេច។ កម្ទេច ១ ឬ ២ ប្រសើរជាងការបាក់ទំនប់ដែលមានការបង្ហូរឈាមកម្រិតធំ»។
ស្រដៀងគ្នានេះដែរលោក គិន ភា ប្រធានវិទ្យាស្ថានទំនាក់ទំនងអន្តរជាតិបានថ្លែងថា បើសិនជាសកម្មភាពក្បត់ជាសកម្មភាពជាក់ស្ដែង ការបង្ក្រាបអាចធ្វើឡើងដោយមិនចាំបាច់មានដីកាពីតុលាការ។
លោកថ្លែងថា៖ «ទោះបីជាគាត់មកដោយគ្មានអាវុធក៏ដោយ ប៉ុន្តែផលវិបាកកើតចេញពីការអំពាវនាវរបស់គាត់នោះ វាជាបទល្មើសរួចទៅហើយ។ ដូច្នេះបើទោះបីគាត់មកដោយដៃទទេក៏ដោយ ក៏គាត់នៅតែត្រូវបានចាប់ខ្លួន និងផ្តន្ទាទោសបន្ថែមលើទោសអ្វីដែលគាត់មាន។ អ្វីដែលគាត់បានធ្វើ ទោះបីបានសម្រេច ឬមិនបានសម្រេច វាជាអំពើក្បត់រួចទៅហើយ»។
លោក ជិន ម៉ាលីន អ្នកនាំពាក្យក្រសួងយុត្តិធម៌បានថ្លែងកាលពីម្សិលមិញថា ការបះបោរដោយប្រដាប់អាវុធដែលជាសកម្មភាពប៉ះពាល់ដល់សន្តិសុខជាតិ ឬវិទ្ធង្សនាក្នុងការផ្ដួលរំលំរដ្ឋាភិបាលគឺជាបទល្មើសជាក់ស្ដែងធ្ងន់ធ្ងរ ហើយកម្លាំងសមត្ថកិច្ចអាចធ្វើសកម្មភាពអាចប្រើប្រាស់នូវគ្រប់យន្តការ និងគ្រប់កម្លាំងទាំងអស់ដើម្បីទប់ស្កាត់ និងបង្ក្រាប។
ស្របពេលជាមួយគ្នានេះដែរយ៉ាងហោចណាស់មានមនុស្ស ៧ នាក់ទៀត ត្រូវបានចោទប្រកាន់កាលពីថ្ងៃចន្ទម្សិលមិញពីបទ «រួមគំនិតក្បត់» ដែលក្នុងនោះមាន ៥ នាក់ជាពលរដ្ឋរស់នៅរាជធានីភ្នំពេញ ហើយ ២ នាក់ទៀតរស់នៅខេត្តឧត្តរមានជ័យ។ នេះបើតាមការប្រកាសរបស់សាលាដំបូងរាជធានីភ្នំពេញ និងសាលាដំបូងខេត្តឧត្ដរមានជ័យ។
នៅភ្នំពេញ អ្នកដែលត្រូវបានចោទប្រកាន់រួមមានឈ្មោះ គ្រុយ សុខេមរិទ្ធ, សេង ខន, ទិត្យ សុផាត, វឿង សំណាង, ឃិន សុខហៀង, ព្រមទាំងគូកន។
តុលាការបានបញ្ជាក់ថាឈ្មោះទាំង ៥ និងគូកនបានកៀរគរ និងបំផុសឲ្យមហាជនចូលរួមក្នុងផែនការផ្ដួលរំលំរាជរដ្ឋាភិបាលនៃព្រះរាជាណាចក្រកម្ពុជា ក្រោមឧបាយកលនៃការវិលត្រឡប់របស់លោក សម រង្ស៊ី គឺបានអំពាវនាវឲ្យពលរដ្ឋធ្វើដំណើរមករាជធានីភ្នំពេញនៅថ្ងៃទី ៩ វិច្ឆិកា។
ចំណែកតុលាការខេត្តឧត្ដរមានជ័យបានចោទប្រកាន់ឈ្មោះ អូន ស្រ៊ាន និងឈ្មោះ ម៉ក់ វណ្ណវុទ្ធី ហៅ រុណ ពីបទរួមគំនិតក្បត់ដូចគ្នាដែរ ដោយមនុស្សទាំង ២ នាក់នេះបានអំពាវនាវឲ្យពលករចំណាកស្រុកទៅប្រទេសថៃឲ្យចូលរួមផែនការផ្ដួលរំលំរដ្ឋាភិបាលក្រោមរូបភាពការវិលត្រឡប់របស់លោក សម រង្ស៊ី និងធ្វើដំណើរមកភ្នំពេញ។
លោក ជិន ម៉ាលីន ថ្លែងថារហូតមកដល់ពេលនេះក្រសួងយុត្តិធម៌មិនទាន់បានធ្វើការបូកសរុបថា តើមានមនុស្សប៉ុន្មាននាក់ត្រូវបានចោទប្រកាន់ និងចាប់ខ្លួនពាក់ព័ន្ធនឹងបទ «រួមគំនិតក្បត់» នៅឡើយទេ៕