The Phnom Penh Post Search

Search form

Logo of Phnom Penh Post newspaper Phnom Penh Post - លោក​ ហ៊ុន សែន ​រង់ចាំ​ការឆ្លើយតប​ពី​ចិន​ ដើម្បី​ទៅសួរសុខទុក្ខ​និស្សិត​ខ្មែរ​នៅ​ទីក្រុង​វូហាន




លោក​ ហ៊ុន សែន ​រង់ចាំ​ការឆ្លើយតប​ពី​ចិន​ ដើម្បី​ទៅសួរសុខទុក្ខ​និស្សិត​ខ្មែរ​នៅ​ទីក្រុង​វូហាន

លោក​ ហ៊ុន សែន ​រង់ចាំ​ការឆ្លើយតប​ពី​ចិន​ ដើម្បី​ទៅសួរសុខទុក្ខ​និស្សិត​ខ្មែរ​នៅ​ទីក្រុង​វូហាន

ភ្នំពេញៈ លោកនាយក​រដ្ឋមន្ត្រី ហ៊ុន សែន បាន​បញ្ជាក់ថា លោក​បាន​ស្នើសុំ​ទៅ​រដ្ឋាភិបាល​ចិន​រួចហើយ ដើម្បី​ធ្វើ​ដំណើរ​ទៅសួរសុខទុក្ខ​ក្រុមនិស្សិត​ខ្មែរ​ចំនួន ២៣ ​នាក់ ​ដែល​កំពុង​ជាប់​នៅក្នុង​ទីក្រុង​វូហាន​នៅ​ថ្ងៃ​ពុធ​នេះ ដើម្បី​ផ្ដល់​ភាពកក់ក្ដៅ​ដល់​ពួកគេ​។ ការប្រកាស​ជាថ្មី​នេះ​គឺ​បន្ទាប់ពី​លោក​បាន​ឆ្លើយតប​ទៅកាន់​អ្នក​រិះគន់​ថា ក្នុងនាម​លោក​ជា​មនុស្ស​ម្នាក់​ធ្លាប់​យក​ជីវិត​ទៅ​ប្រថុយ ដើម្បី​រំដោះ​ប្រទេសជាតិ​ចេញ​ពី​សង្គ្រាម​គឺ​លោក​គ្មាន​ការភ័យខ្លាច​ក្នុង​ការធ្វើដំណើរ​ទៅកាន់​ទីក្រុង​វូហាន​ដែល​កំពុង​ផ្ទុះ​ជំងឺឆ្លង​នេះ​ទេ​។

តាម​ទំព័រ​ហ្វេសប៊ុក​លោក​នាយក​រដ្ឋមន្ត្រី​បាន​ផ្សាយ​ថា នៅក្នុង​កិច្ចសន្ទនា​មួយ​ជាមួយ​លោកស្រី ហាក់ ចាហានមូន ស្ថាបនិក​អង្គការ​សហព័ន្ធ​សន្ដិភាព​សកល​កាលពី​ថ្ងៃ​ម្សិលមិញ​នៅក្នុង​ប្រទេស​កូរ៉េខាងត្បូង​លោក ហ៊ុន សែន បាន​លើក​ឡើង​ថា​លោក​មិនបាន​ចាត់ទុក​ការ​ផ្ទុះឡើង​នៃ​វីរុស​កូរ៉ូណា​ថ្មី​នៅក្នុង​ប្រទេស​ចិន​ជា​ឧបសគ្គ​មួយ​សម្រាប់​លោក​នោះទេ​។

ទំព័រ​ហ្វេសប៊ុក​បាន​សរសេរ​ថា​៖ «​សម្ដេចតេជោ​មាន​ប្រសាសន៍​បន្តថា នៅ​ថ្ងៃស្អែក​ទី​ ៥ កុម្ភៈ​ (​ថ្ងៃនេះ​) សម្ដេច​បាន​រាយការណ៍​ជូន​ថ្នាក់ដឹកនាំ​ចិន​រួចហើយ​ថា សម្ដេច​គ្រោង​នឹង​អញ្ជើញ​ទៅ​សួរសុខទុក្ខ​និស្សិត​កម្ពុជា​ដែល​កំពុង​សិក្សា​នៅ​ទីក្រុង​វូហាន ដើម្បី​បង្ហាញ​ពី​ភាពកក់ក្ដៅ​ និង​ដើម្បី​កុំឱ្យ​និស្សិត​ខ្មែរ​នៅ​ទីក្រុង​វូហាន​មាន​ការភ័យខ្លាច​ចំពោះ​ការឆ្លង​រីករាលដាល​នៃ​ជំងឺ​ប្រភេទ​ថ្មី​កូរ៉ូណាវីរុស​»​។

នៅក្នុង​ទំព័រ​ហ្វេសប៊ុក​ដដែល​បន្តថា​៖ «​នៅពេល​នេះ​សម្ដេច​តេជោ​កំពុង​រង់ចាំ​ការបញ្ជាក់ និង​សម្រេច​ពី​ភាគី​មិត្ត​ចិន​ថា តើ​អនុញ្ញាត​ឱ្យ​ទៅ​សួរសុខទុក្ខ ឬ​មិន​អនុញ្ញាត​ឱ្យ​ទៅ​ក្នុងពេល​ដែល​ទីក្រុង​នេះ​ត្រូវ​បាន​ដាក់​ឱ្យនៅ​ដាច់​ដោយ​ឡែក​ក្នុង​សភាព​ប្រកាសអាសន្ន​មិន​ឱ្យមាន​ចរាចរណ៍​ចេញចូល​ទាំង​នៅក្នុង​ប្រទេស​ចិន និង​ក្រៅ​ប្រទេស​ចូលមក​»​។

ពី​ថ្ងៃ​ម្សិលមិញ​លោក ផៃ ស៊ីផាន អ្នកនាំពាក្យ​រដ្ឋាភិបាល​ថ្លែង​ថា​លោក​មិនទាន់​បានដឹងថា ប្រទេស​ចិន​បាន​សម្រេច​ឱ្យ​លោក ហ៊ុន សែន ​អាច​ធ្វើ​ដំណើរ​ទៅកាន់​ទីក្រុង​វូហាន​នៅឡើយ​ទេ​។

កាលពី​ថ្ងៃ​ចន្ទ​នៅពេល​ជួប​សំណេះសំណាល​ជាមួយ​ពលរដ្ឋ​ខ្មែរ​ក្នុង​ប្រទេស​កូរ៉េខាងត្បូង លោក ហ៊ុន សែន បាន​ប្រតិកម្ម​ឆ្លើយតប​ចំពោះ​អ្នក​រិះគន់​មួយចំនួន​ដែល​ឌឺដង ចង់​ឱ្យ​លោក​ធ្វើដំណើរ​ទៅកាន់​ទីក្រុង​វូហាន​ដែល​ជា​ទីក្រុង​កំពុង​រីករាលដាល​វីរុស​កូរ៉ូណា​ថ្មី​ខ្លាំង​បំផុត​នៅក្នុង​ប្រទេស​ចិន​។ មតិ​ឌឺដង​ទាំង​នោះ​គឺ​ធ្វើ​ឡើង​បន្ទាប់ពី​លោក ហ៊ុន សែន បាន​ប្រកាស​នៅ​ថ្ងៃទី​ ៣០ មករា​ថា លោក​មិន​បញ្ជូន​និស្សិត​ខ្មែរ ឬ​មន្ត្រី​ទូត​ខ្មែរ​ចេញ​ពី​ប្រទេស​ចិន ជាពិសេស​ចេញ​ទីក្រុង​វូហាន​ដូច​ប្រទេស​ជាច្រើន​បាន​ធ្វើ​ឡើយ​។

កាលពី​ថ្ងៃ​ម្សិលមិញ ក្រសួង​ការបរទេស​ក៏​បានចេញ​សេចក្ដី​ប្រកាស​ព័ត៌មាន​មួយ​ដែរ​ថា ក្រសួង​បាន​ទាក់ទង​យ៉ាង​ជិតស្និទ្ធ​ជាមួយ​អាជ្ញាធរ​ប្រទេស​ចិន​ដើម្បី​តាមដាន​សុខភាព​របស់​ក្រុមនិស្សិត​ខ្មែរ​ដែល​មាន​គ្នា​ចំនួន​ ២៣ ​នាក់​ជាប់​នៅក្នុង​ទីក្រុង​​វូហាន​។

សេចក្ដី​ប្រកាស​ព័ត៌មាន​នោះបាន​សរសេរ​ថា​៖ «​កន្លងមក រាជរដ្ឋាភិបាល​កម្ពុជា​បាន​តាមដាន​ដោយ​យកចិត្ត​ទុកដាក់​ខ្ពស់បំផុត​ចំពោះ​ការវិវឌ្ឍ​នៃ​ការរាលដាល​ជំងឺឆ្លង​ផ្លូវដង្ហើម​កូរ៉ូណា​នេះ​។ ក្រសួង​ការបរទេស និង​បណ្ដាញ​ស្ថាន​តំណាង​របស់​កម្ពុជា​នៅ​សាធារណរដ្ឋ​ប្រជាមានិត​ចិន​បាន​ធ្វើការ​ទាក់ទង​យ៉ាង​ជិតស្និទ្ធ​ជាមួយ​អាជ្ញាធរ និង​ក្រសួង​ការបរទេស​ចិន​ដើម្បី​តាមដាន​បច្ចុប្បន្នភាព​នៃ​សុខុមាលភាព​របស់​ពលរដ្ឋ​ខ្មែរ​ជាពិសេស​និស្សិត​ខ្មែរ​ដែល​កំពុង​សិក្សា​នៅ​សាធារណរដ្ឋ​ប្រជាមានិត​ចិន​»​។

ក្រសួង​ការបរទេស​ក៏​ណែនាំ​ឱ្យ​មន្ត្រី​ទូត​ប្រចាំ​ប្រទេស​ចិន​ទាក់ទង​ជាប្រចាំ​ជាមួយ​អាជ្ញាធរ​ចិន ដើម្បី​ផ្ញើ​បរិក្ខារ​អនាម័យ​ចាំបាច់​នានា​ទៅ​ឱ្យ​និស្សិត​ខ្មែរ ខណៈ​ខាង​សាកលវិទ្យាល័យ​ចិន​ក៏​បាន​ឧបត្ថម្ភ​ស្បៀង និង​សម្ភារ​ចាំបាច់​នានា​ដល់​និស្សិត​ខ្មែរ​ទាំងនោះ​ដែរ ហើយ​ថែមទាំង​ណែនាំ​ពី​វិធី​បង្ការ និង​ទប់ស្កាត់​របស់​អាជ្ញាធរ​ចិន ដើម្បី​ធានា​សុវត្ថិភាព និង​សុខភាព​ផ្ទាល់ខ្លួន​។

សេចក្ដី​ប្រកាស​ព័ត៌មាន​ដដែល​បន្តថា មក​ដល់​ពេលបច្ចុប្បន្ន​នេះ​ពុំ​មាន​ករណី​ឆ្លង​មេរោគ​វីរុស​កូរ៉ូណា​លើ​ពលរដ្ឋ​ខ្មែរ​ទេ ហើយ​ក្រសួង​ការបរទេស​ក៏បាន​បង្កើត​បណ្ដាញ WeChat ជាមួយ​និស្សិត​ខ្មែរ​នៅ​តាម​តំបន់​នានា​នៅ​ប្រទេស​ចិន ដើម្បី​សម្រួល​ការទាក់ទង និង​ផ្ដល់​ព័ត៌មាន​ឱ្យ​បាន​ទាន់​ពេលវេលា​។

លោក កុយ គួង អ្នកនាំពាក្យ​ក្រសួង​ការបរទេស​ប្រាប់​ភ្នំពេញ-ប៉ុស្ដិ៍​ពី​ព្រឹក​ម្សិលមិញ​ថា កម្ពុជា​មិនមាន​ពលរដ្ឋ​ជា​អ្នកទេសចរ ឬ​អ្នករកស៊ី​ដែល​កំពុង​ជាប់​នៅក្នុង​ទីក្រុង​វូហាន​ឡើយ ក្រៅពី​និស្សិត​ចំនួន​ ២៣ ​រូប​នោះ​។

លោក​ថា​៖ «​និស្សិត​ទាំងនោះ​មិន​មាន​អ្វី​ជា​បញ្ហា​ទេ គឺ​សុខភាព​ពួកគាត់​ល្អ​ហើយ​កន្លងមក គាត់​តែង​និយាយ​ឆ្លើយឆ្លង​ជាមួយ​ស្ថាន​កុងស៊ុល និង​ស្ថានទូត​យើង​ប្រចាំ​ប្រទេស​ចិន​គឺ​និយាយ​ដោយ​សើច​ឮ​ក្អាកក្អាយ​នៅឡើយ​ទេ ហើយ​មាន​អាហារ​ហូបចុក​គ្រប់គ្រាន់​ត្រឹមត្រូវ​»​។

ក្រសួង​អប់រំ​ឲ្យ​ដឹងថា កម្ពុជា​មាន​និស្សិត​ចំនួន ៨៩ ​នាក់​ដែល​រៀន​នៅតាម​សាកលវិទ្យាល័យ​មួយចំនួន​នៅ​ក្រុង​វូហាន​ ប៉ុន្តែ​មាន​ចំនួន​ ៦៦ ​នាក់​បានធ្វើ​មកលេង​ស្រុក​កំណើត​នៅ​អំឡុង​វិស្សមកាល គឺ​មុនពេល​មានការ​ផ្ទុះឡើង​វីរុស​កូរ៉ូណា​ថ្មី​ទៅទៀត ហើយ​បច្ចុប្បន្ន​និស្សិត​ដែល​កំពុង​ស្ថិត​នៅក្នុង​ទីក្រុង​វូហាន​គឺ​នៅសល់​តែ​ចំនួន​ ២៣ ​នាក់​ប៉ុណ្ណោះ​។

លោក រស់ សុវាចា មន្ត្រី​នាំពាក្យ​ក្រសួង​អប់រំ​បាន​លើក​ឡើង​ដែរ​ថា ក្រសួង​អប់រំ​ក៏​បាន​ទាក់ទង​ទៅ​ក្រុមនិស្សិត​ទាំងនោះ​ជាប្រចាំ​ថ្ងៃ​ដែរ ដើម្បី​សួរនាំ​ពី​ស្ថានភាព​ពួកគេ​នៅ​ទីនោះ​។ លោក​ថា​៖ «​មកដល់​ពេល​នេះ​គឺ​សុខទុក្ខ​របស់​ប្អូនៗ​គឺ​មាន​ជាធម្មតា​ទេ​។ បងប្អូន​មួយ​ចំនួន​គឺ​បាន​ទទួល​ម្ហូប​ពី​សាកលវិទ្យាល័យ​ផ្ទាល់​ដែល​ ១ ​ថ្ងៃ​ ៣ ​ពេល​ដោយ​មាន​គេ​យក​ឱ្យ​ពួកគាត់​ដល់​នៅ​មាត់ទ្វារ ហើយ​និស្សិត​យើង​មួយ​ចំនួន​ទៀត​បាន​ធ្វើ​ដំណើរ​ទៅ​ទិញ​ម្ហូប​ពី​ខាងក្រៅ​នៅ​តាម​ហាង​ជិតៗ​ដែល​បើកទ្វារ​ហើយ​យក​ស្ដុក​ទុក​នៅ​ទូទឹកកក​ម្ដង​បាន​ពី​ ៤ ​ទៅ​ ៥ ​ថ្ងៃ​»​។

លោក មួន សេងឡុង និស្សិត​ពេទ្យ​ឆ្នាំ​ទី​ ៥ នៅ​សាកលវិទ្យាល័យ​មួយ​នៅ​ក្រុង​វូហាន​ប្រាប់​ភ្នំពេញ-ប៉ុស្ដិ៍​ថា ខាង​សាកលវិទ្យាល័យ​បាន​អនុញ្ញាត​ឱ្យ​និស្សិត​ទាំងអស់​ឈប់​សម្រាក​រយៈពេល​ ១ ​ខែ​ក្នុង​អំឡុងពេល​បុណ្យ​ចូលឆ្នាំថ្មី​របស់​ប្រទេស​​ ចិន​។

និស្សិត​រូបនេះ​បន្តថា ការ​ឈប់​សម្រាក​បែបនេះ គឺ​ទម្លាប់​ធ្វើ​ឡើង​ជា​រៀងរាល់​ឆ្នាំ​ហើយ​និស្សិត​ខ្មែរ​មួយចំនួន គឺ​តែង​ធ្វើដំណើរ​មកលេង​ស្រុកកំណើត​ដោយសារ​មាន​ការអនុញ្ញាត​ត្រឹមត្រូវ​ពី​ខាង​សាកលវិទ្យាល័យ​។ លោក​បាន​បញ្ជាក់​ថា ក្រុមនិស្សិត​ចំនួន​ ៦៦ ​នាក់​​ ដែល​បាន​មកលេង​នៅ​ខ្មែរ គឺ​មុន​ពេល​ដឹងថា​នៅ​ក្រុង​វូហាន​មាន​ផ្ទុះ​វីរុស​កូរ៉ូណា​ហើយ​មកដល់​ពេល​នេះ​សាកលវិទ្យាល័យ​ក៏​បាន​ផ្ញើ​សារ​តាម​អ៊ីមែល​ប្រាប់​ដល់​និស្សិត​ទាំងនោះ​ដើម្បី​ពន្យារពេល​ចូលរៀន​វិញ​ដោយ​មិន​កំណត់ពេល បន្ទាប់ពី​ផ្ទុះឡើង​នៃ​វីរុស​កូរ៉ូណា​។

ចំណែក​លោក ប៉ែន បារាំង និស្សិត​ខ្មែរ​ដែល​កំពុង​ជាប់​នៅក្នុង​ទីក្រុង​វូហាន​ថ្លែងថា លោក​មិន​ចង់ឱ្យ​លោក​ ហ៊ុន សែន ​ធ្វើ​ដំណើរ​មកកាន់​ក្រុង​វូហាន​ឡើយ​។ លោក​ថា​៖ «​ខ្ញុំ​បានឮ​ប្រសាសន៍​របស់​ប្រមុខ​រដ្ឋាភិបាល​បាន​ប្រកាស​ពី​សាធារណរដ្ឋ​កូរ៉េ​ថា លោក​ចង់​មក​សួរសុខទុក្ខ​និស្សិត​ផ្ទាល់​នៅ​ទីក្រុង​វូហាន​នេះ​។ ប៉ុន្តែ​សម្រាប់​ខ្ញុំ​ផ្ទាល់​គឺ​គាត់​មិនគួរ​មក​ទេ​នៅពេលនេះ​។ ប្រសិន​បើ​គាត់​អញ្ជើញ​មក​អាច​មាន​ភាពស្មុគស្មាញ​សម្រាប់​ក្រុម​ការងារ​រដ្ឋបាល​ក្រុង​វូហាន​ក្នុង​ការរៀបចំ​ទទួល​គណៈប្រតិភូ ការរក្សា​សុខសុវត្ថិភាព និង​សុខភាព​ជូន​គាត់​ជាដើម​។ ម្យ៉ាងទៀត​ពួក​ខ្ញុំ​ទាំង​ ២៣ ​រូប​គឺ​នៅ​ទីតាំង​ ៦ ​ទីតាំង​ផ្សេងៗ​គ្នា ហើយ​វា​ពិបាក បើ​ថា​ជួប​ក៏​មិនដឹង​ជួប​យ៉ាងម៉េច ហើយ​សាលា​គេ​បាន​ជូនដំណឹង​ហើយ​ឱ្យ​នៅក្នុង​បន្ទប់​ ឬ​ក្នុង​អគារ​»​។

លោក ប៉ែន បារាំង យល់​ថា​ក្នុង​នាម​ជា​ប្រមុខ​រដ្ឋាភិបាល​នៃ​ប្រទេសមួយ​គឺ​លោក ហ៊ុន សែន ត្រូវមាន​ភារកិច្ច​ច្រើន​ដែល​ត្រូវបំពេញ​ទាំង​ការងារ​ក្នុង និង​ក្រៅប្រទេស​។ «​បច្ចុប្បន្ន​ពួកខ្ញុំ​ទាំង​ ២៣ ​រូប​ហ្នឹង​មាន​សុខភាព​ល្អប្រសើរ​ធម្មតា ហើយ​កំពុង​មាន​ការយកចិត្ត​ទុកដាក់​ពី​សំណាក់​ស្ថានទូត​ខ្មែរ​នៅ​ចិន​ពី​សំណាក់​សមាគមនិស្សិត​នៅ​ចិន ក្រសួង​អប់រំ ក្រសួង​ការបរទេស អ៊ីចឹង​! ភាពកក់ក្ដៅ​មាន​ហើយ ហើយ​បើ​សួរថា ចង់​ឱ្យ​គាត់​ (​ហ៊ុន សែន​) ​អញ្ជើញ​មក​អត់​? ខ្ញុំ​ថា​ចាំ​ពួក​ខ្ញុំ​រៀន​ចប់ ចាំ​ពួក​ខ្ញុំ​សុំ​ទៅ​សួរសុខទុក្ខ​គាត់​វិញ​ក៏​បាន​ដែរ​ហើយ​ពេល​ហ្នឹង​គាត់​មិន​គួរ​មក​ទេ​»៕

អត្ថបទគួរចាប់អារម្មណ៍