ភ្នំពេញៈ នៅថ្ងៃប្រារព្ធខួបលើកទី ៧១ នៃទិវាសិទ្ធិមនុស្សអន្តរជាតិ «១០ ធ្នូ ១៩៤៨-១០ ធ្នូ ២០១៩» ដែលបានប្រព្រឹត្តទៅពីម្សិលមិញ លោកនាយករដ្ឋមន្ត្រី ហ៊ុន សែន បានរំឭកពលរដ្ឋខ្មែរនៅទូទាំងប្រទេសតាមរយៈបណ្ដាញសង្គមថា សិទ្ធិសេរីភាពរបស់កម្ពុជាដែលមានបច្ចុប្បន្ននេះគឺត្រូវបានរំដោះយកមកវិញ ក្រោយពេលរបបប្រល័យពូជសាសន៍ ប៉ុលពត ត្រូវបានផ្តួលរំលំទាំងស្រុងនៅថ្ងៃទី ៧ ខែ មករា ឆ្នាំ ១៩៧៩។
លោកបានលើកឡើងថា នៅក្នុងរបបប្រល័យពូជសាសន៍ប៉ុលពត (១៩៧៥-១៩៧៩) ប្រជាពលរដ្ឋមិនមានសិទ្ធិសេរីភាពអ្វីទាំងអស់ សូម្បីសិទ្ធិរស់រានមានជីវិត សិទ្ធិទទួលទានអាហារ សិទ្ធិពិនិត្យព្យាបាលជំងឺ សិទ្ធិជំនឿសាសនា សិទ្ធិសិក្សាអប់រំ សិទ្ធិជ្រើសរើសតំណាង និងសិទ្ធិបញ្ចេញមតិ សិទ្ធិរៀបអាពាហ៍ពិពាហ៍ និងសិទ្ធិប្រកបការងារជាដើម...។ល។
លោកបានគូសបញ្ជាក់ថា៖ «របបប្រល័យពូជសាសន៍ ប៉ុល ពត បានដកហូតសិទ្ធិសេរីភាពទាំងអស់ ហើយបានបង្ខំឲ្យពលរដ្ឋទាំងក្មេងចាស់ប្រុសស្រីធ្វើការហួសកម្លាំង ឈឺស្លាប់ដោយគ្មានពេទ្យ និងថ្នាំព្យាបាល ព្រមទាំងបានបណ្ដាលឲ្យប្រជាពលរដ្ឋជាង ៣ លាននាក់បានស្លាប់ក្នុងរយៈពេលតែ ៣ ឆ្នាំ ៨ ខែ និង ២០ ថ្ងៃ»។
លោកបានបន្ថែមថា បច្ចុប្បន្ន សិទ្ធិសេរីភាពបានធ្វើឲ្យប្រជាពលរដ្ឋរស់នៅ និងប្រកបការងារតូចធំ ជ្រើសរើសជំនឿសាសនា និងសិទ្ធិបោះឆ្នោតជ្រើសតាំងមេដឹកនាំដែលខ្លួនពេញចិត្តដោយសេរី ហើយសិទ្ធិសេរីភាពក៏បានធ្វើឲ្យកម្ពុជាកាន់តែរីកចម្រើនជឿនលឿនទៅមុខដែរ។
ទិវាសិទ្ធិមនុស្សអន្តរជាតិ ១០ ធ្នូ នៅក្នុងឆ្នាំនេះបានផ្ដោតសំខាន់លើប្រធានបទ «យុវជនក្រោកឡើងដើម្បីសិទ្ធិមនុស្ស» និងរំលេចពីតួនាទីដឹកនាំ និងសក្តានុពលរបស់យុវជនក្នុងការចូលរួមក្នុងកិច្ចការងារសង្គម ដើម្បីឲ្យមានការផ្លាស់ប្ដូរប្រកបដោយគុណភាព និងសុវត្ថិភាព។
នៅថ្ងៃប្រារព្ធទិវាសិទ្ធិមនុស្ស ១០ ធ្នូនេះដែរ ក្រុមអង្គការសម្ព័ន្ធភាពការពារសិទ្ធិមនុស្សកម្ពុជា សហជីព និងអង្គការសង្គមស៊ីវិលចំនួន ២១ ផ្សេងទៀត បានជួបជុំគ្នានៅទីលានប្រជាធិបតេយ្យ ឫស្សីកែវ ដើម្បីបញ្ចេញមតិជុំវិញបញ្ហាប្រឈមនានាដែលពួកគេបានជួបប្រទះនាពេលកន្លងមក។
ក្នុងឱកាសនោះលោក មាស សារ៉ាត់ ប្រធានក្រុមប្រឹក្សាភិបាលនៃអង្គការសម្ព័ន្ធភាពការពារសិទ្ធិមនុស្សកម្ពុជាថ្លែងថា៖ «ពលរដ្ឋកម្ពុជានៅពុំទាន់អាចអនុវត្តសិទ្ធិរបស់ពួកគេដោយពេញលេញលើការបញ្ចេញមតិពាក់ព័ន្ធកិច្ចការសាធារណៈ នយោបាយ និងការជួបជុំជាសាធារណៈ»។
លោកបន្តថា សេរីភាពសារព័ត៌មាន សិទ្ធិពលរដ្ឋ និងសិទ្ធិចូលរួមក្នុងការគ្រប់គ្រង និងការអភិវឌ្ឍធនធានធម្មជាតិក៏នៅតែជាឧបសគ្គនៅឡើយ។
លោកស្រី ចក់ សុភាព នាយិការមជ្ឈមណ្ឌលសិទ្ធិមនុស្សកម្ពុជាកត់សម្គាល់ថា ចាប់តាំងពីឆ្នាំ ២០១៧ មកទល់ពេលនេះ សិទ្ធិមនុស្ស និងសេរីភាពជាមូលដ្ឋានត្រូវបានគេមើលរំលង ឬពុំមានការយកចិត្តទុកដាក់ពីមន្ត្រីរដ្ឋាភិបាលនោះឡើយ។ ការរំលោភលើសេរីភាពបញ្ចេញមតិ និងសមាគមបានកើនឡើងដោយសារការបង្ក្រាបលើសមាជិក និងសកម្មជននៃអតីតគណបក្សសង្គ្រោះជាតិ។
លោកស្រីបញ្ជាក់ថា៖ «បញ្ហាទាក់ទងនឹងសិទ្ធិដីធ្លីបានបន្តកើតឡើង និងរីករាលដាលនៅទូទាំងប្រទេស និងនៅតែជាក្ដីព្រួយកង្វល់ ព្រោះយន្តការស្វែងរកភាពយុត្តិធម៌ជូនជនរងគ្រោះនៅមានកម្រិត»។
អង្គការសម្ព័ន្ធភាពការពារសិទ្ធិមនុស្សកម្ពុជា និងសហជីពរួមទាំងអង្គការសង្គមស៊ីវិល ២១ ផ្សេងទៀតដែលមកពីបណ្ដារាជធានី ខេត្តនៅទូទាំងប្រទេសបានរៀបចំអនុសាសន៍មួយចំនួនដាក់ស្នើទៅរដ្ឋាភិបាលដើម្បីពិនិត្យ និងកែសម្រួល ដើម្បីធ្វើឲ្យប្រសើរឡើងនូវការគោរពសិទ្ធិមនុស្ស និងលទ្ធិប្រជាធិបតេយ្យនៅកម្ពុជា៕