ភ្នំពេញៈ លោកនាយករដ្ឋមន្ត្រី ហ៊ុន សែន បានលុបចោល និងលើកពេលចូលរួមកម្មវិធីដែលបានគ្រោងទុកមួយចំនួន ដើម្បីបន្តធ្វើចត្តាឡីស័ក បើទោះបីជារូបលោក និងអ្នកប៉ះពាល់ប្រមាណ ៦២៨ នាក់ដែលជាមន្ត្រីជាន់ខ្ពស់ និងមន្ត្រីពាក់ព័ន្ធនឹងការមកបំពេញទស្សនកិច្ចរបស់រដ្ឋមន្ត្រីការបរទេស ហុងគ្រី ត្រូវបានធ្វើតេស្តអវិជ្ជមានទាំងអស់ពីជំងឺកូវីដ១៩ក៏ដោយ។
លោក ហ៊ុន សែន បានបញ្ជាក់នៅលើទំព័រហ្វេសប៊ុកកាលពីថ្ងៃពុធថា ទោះបីលោកមិនមានឆ្លងកូវីដ១៩ក្តី តែដើម្បីសុវត្ថិភាពទាំងអស់គ្នាដែលគ្រូពេទ្យតម្រូវឱ្យលោករស់នៅដាច់ដោយឡែករយៈពេល ១៤ ថ្ងៃ សូម្បីតែភរិយា កូន និងចៅរបស់លោកក៏មិនអាចជួបបានដែរ។
ដូច្នេះលោកសូមព្រះរាជទានទោសពីអង្គព្រះមហាក្សត្រ និងហ្លួងម៉ែដែលមិនអាចដង្ហែព្រះអង្គទាំងទ្វេ យាងមកពីសាធារណរដ្ឋប្រជាមានិតចិន និងដង្ហែព្រះអង្គប្រារព្ធពិធីបុណ្យឯករាជ្យជាតិ ៩ វិច្ឆិកា បាន។ បន្ថែមពីនេះលោកបានលុបចោលដំណើរចុះជួបប្រជាពលរដ្ឋ និងបានលើកពេលកម្មវិធីមួយចំនួនទៀតផងដែរ។
លោកបញ្ជាក់ថា៖ «សូមអភ័យទោសពីបងប្អូនជនរួមជាតិនៅខេត្តពោធិ៍សាត់ បាត់ដំបង និងបន្ទាយមានជ័យដែលខ្ញុំមិនអាចចូលរួមចែកស្រូវពូជ និងជំនួយសង្គ្រោះបានដែលខ្ញុំនឹងចាត់តំណាងទៅចែកជំនួស។ សូមលើកពេលថ្ងៃបើកការដ្ឋានសាងសង់ផ្លូវ ៣៨ ខ្សែនៅខេត្តសៀមរាបដែលគ្រោងធ្វើនៅថ្ងៃ ១៦ វិច្ឆិកា ២០២០ ទៅពេលក្រោយវិញ»។
លោកថ្លែងថា៖ «សូមអធ្យាស្រ័យពីសំណាក់ប្រមុខរដ្ឋប្រមុខរដ្ឋាភិបាលអាស៊ាន និងដៃគូពាក់ព័ន្ធទាំងអស់ដែលខ្ញុំមិនអាចចូលរួមប្រជុំបានដែលខ្ញុំនឹងចាត់តំណាងចូលរួមពីថ្ងៃ ១២ ដល់ថ្ងៃ ១៥ វិច្ឆិកា ២០២០ ខាងមុខនេះ។ ទោះត្រូវអាក់ខានចេញពីផ្ទះដែលជាការតម្រូវរបស់គ្រូពេទ្យក្នុងការធ្វើចត្តាឡីស័ក ១៤ ថ្ងៃ តែខ្ញុំនៅតែបំពេញការងារដោយពិនិត្យសម្រេច និងចុះហត្ថលេខាលើឯកសារនានារបស់រាជរដ្ឋាភិបាលបានដដែល»។
បើតាមលោកនាយករដ្ឋមន្ត្រីលោកនឹងយកពេលវេលាក្នុងអំឡុងពេលធ្វើចត្តាឡីស័កដើម្បីធ្វើលំហាត់ប្រាណក្នុងបរិវេណផ្ទះដោយមិនឱ្យមនុស្សដទៃមកជិតឡើយ តែលោកអនុញ្ញាតដល់សមាជិករាជរដ្ឋាភិបាល អភិបាលខេត្ត និងមេបញ្ជាការកងកម្លាំងប្រដាប់អាវុធ នៅតែអាចរាយការណ៍ ឬសុំយោបល់ពីលោកបានដដែល។
លោកមានប្រសាសន៍ថា៖ «នេះជាវិធីដែលល្អបំផុត ដើម្បីសុវត្ថិភាព និងសុខភាពទាំងអស់គ្នា។ ខ្ញុំសូមអរគុណចំពោះបងប្អូនជនរួមជាតិទាំងក្នុង និងក្រៅប្រទេសដែលបារម្ភពីសុខភាពខ្ញុំ និងជូនពរដល់ខ្ញុំ»។
ក្រសួងសុខាភិបាលបានប្រកាសកាលពីម្សិលមិញថា ក្រោយពីទទួលបានព័ត៌មានស្តីពីករណីជំងឺកូវីដ ១៩ លើរដ្ឋមន្ត្រីការបរទេសហុងគ្រីដែលកំពុងបំពេញបេសកកម្មនៅប្រទេសថៃគឺក្រសួងសុខាភិបាលកម្ពុជាបានធ្វើការស្រាវជ្រាវភ្លាមៗ រកអ្នកប៉ះពាល់ជាមួយគាត់ អំឡុងពេលបំពេញទស្សនកិច្ចនៅកម្ពុជា។
ក្រសួងបញ្ជាក់ថា៖ «គិតត្រឹមម៉ោង ១១ យប់ ថ្ងៃទី ៤ ខែវិច្ឆិកា មានអ្នកប៉ះពាល់សរុប ៦២៨ នាក់ ត្រូវបានធ្វើតេស្តវត្ថុសំណាកដោយវិទ្យាសាស្ត្រប៉ាស្ទ័រកម្ពុជា ដែលទទួលបានលទ្ធផលអវិជ្ជមានជំងឺកូវីដ ១៩ ទាំងអស់គ្នា។ ក្រសួងកំពុងបន្តការស្រាវជ្រាវ និងជម្រាបជូនសាធារណជន នៅពេលទទួលបានលទ្ធផលវិភាគវត្ថុសំណាកជាបន្តបន្ទាប់ទៀត»។
ជាមួយគ្នានេះដែរក្រសួងអប់រំ យុវជន និងកីឡាកាលពីថ្ងៃទី ៤ ខែវិច្ឆិកា បានប្រកាសឱ្យគ្រឹះស្ថានសិក្សាដែលមានបុគ្គល ឬសិស្សានុសិស្សមានការពាក់ព័ន្ធនឹងដំណើរទស្សនកិច្ចផ្លូវការរបស់គណៈប្រតិភូនៃប្រទេសហុងគ្រីត្រូវផ្អាកដំណើរការសិក្សារយៈពេល ១៤ ថ្ងៃសិន។ ក្រសួងអប់រំបានអះអាងថា ក្រៅពីផ្អាករយៈពេល ១៤ ថ្ងៃ ចំពោះបុគ្គលិក និងអ្នកពាក់ព័ន្ធទាំងអស់ អ្នកទាំងនោះត្រូវធ្វើចត្តាឡីស័កដោយខ្លួនឯង ១៤ ថ្ងៃផងដែរ ខណៈកម្មវិធីរៀនតាមអនឡានចំពោះគ្រឹះស្ថានដែលបានផ្អាកគឺនៅដំណើរការជាធម្មតា។
ក្រសួងបញ្ជាក់ទៀតថា៖ «គណៈគ្រប់គ្រងគ្រឹះស្ថានសិក្សា បុគ្គលិក សិស្សានុសិស្ស និស្សិត មាតាបិតា និងអ្នកអាណាព្យាបាលនៅតាមគ្រឹះស្ថានសិក្សាខាងលើត្រូវលើកកម្ពស់ការប្រុងប្រយ័ត្នកម្រិតខ្ពស់បំផុត និងបន្តតាមដានសុខភាពផ្ទាល់ខ្លួន។ ក្នុងករណីដែលសង្ស័យត្រូវទាក់ទងទៅក្រសួងសុខាភិបាល»។
លោកស្រី ជា សិរី អគ្គនាយិកាបច្ចេកទេសធនាគារជាតិនៃកម្ពុជាបានលើកឡើងថា លោកស្រី និងអ្នកដទៃទៀតទទួលបានលទ្ធផលអវិជ្ជមានពីការធ្វើតេស្តកូវីដ១៩ ប៉ុន្តែលទ្ធផលនេះមិនបានន័យថា យើងអាចចេញដើរដូចធម្មតាបានឡើយ។
លោកស្រីនិយាយបន្ថែមថា៖ «អ្នកផ្ទះខ្ញុំទាំងអស់នឹងរង់ចាំថ្ងៃទី ១៣ ដើម្បីធ្វើតេស្តម្ដងទៀតដែលជាលទ្ធផលសម្រេច។ ក្នុងនាមជាអាណាព្យាបាលសិស្ស ខ្ញុំយល់ពីការព្រួយបារម្ភរបស់ពួកគាត់ (កូនៗ) នឹងសូមអរគុណសាលារបស់ពួកគាត់ដែលបានចាត់វិធានការត្រឹមត្រូវ និងទាន់ពេលវេលា»។
តាមតួលេខចុងក្រោយរបស់ក្រសួងសុខាភិបាលបានឱ្យដឹងថា គិតត្រឹមថ្ងៃទី ៥ វិច្ឆិកា កម្ពុជា មិនមានរកឃើញករណីវិជ្ជមានកូវីដ១៩ ថ្មីនោះទេដោយមានអ្នកឆ្លងសរុបទូទាំងប្រទេសចំនួន ២៩២ នាក់ ខណៈមានអ្នកជាសះស្បើយចំនួន ៣ នាក់បន្ថែមទៀតដែលនាំឱ្យអ្នកជាសះស្បើយសរុបទូទាំងប្រទេសមានចំនួន ២៨៦ នាក់៕