ភ្នំពេញៈ ប្រមុខរដ្ឋាភិបាលលោក ហ៊ុន សែន បានបញ្ជាក់ថានៅថ្ងៃនេះលោកត្រូវជួបមេដឹកនាំទូតចំនួន ៣ រូបដូចជា អគ្គរាជទូតជប៉ុន អគ្គរដ្ឋទូតអាល្លឺម៉ង់ និងអគ្គរដ្ឋទូតនៃសហរដ្ឋអាមេរិកដែលទើបថ្វាយសារតាំងព្រះមហាក្សត្រថ្មីៗនេះដោយលោកថ្លែងថា កម្ពុជានៅតែមានទំនាក់ទំនងការទូតល្អជាមួយសហគមន៍អន្តរជាតិ ហើយចាត់ទុកអ្នករិះគន់ដែលថាទំនាក់ទំនងធ្លាក់ចុះនោះថា ជាការរិះគន់បែបល្ងីល្ងើ។
ថ្លែងនៅក្នុងពិធីប្រគល់សញ្ញាបត្រដល់និស្សិតសាកលវិទ្យាល័យបៀលប្រាយ ចំនួន ៤ ០៣៨ នាក់ ដែលប្រារព្ធឡើងនៅមជ្ឈមណ្ឌលកោះពេជ្រ រាជធានីភ្នំពេញកាលពីម្សិលមិញលោកនាយករដ្ឋមន្ត្រី ហ៊ុន សែន មានប្រសាសន៍ថា ប្រទេសអឺរ៉ុប និងសហគមន៍អន្តរជាតិនៅតែបន្តរកស៊ីជាមួយប្រទេស កម្ពុជា។
លោកបញ្ជាក់ថា៖ «មានអ្នកខ្លះ វិភាគថាឯងយកខាងកើតទៅទប់ខាងលិច ហើយទប់វាមិនឈ្នះទេ ពីព្រោះខាងលិចវាខ្លាំងជាង។ ប្រទេសនៅខាងលិចជាច្រើននិយាយរួមឲ្យចំតែម្តង មានអាល្លឺម៉ង់ និងបារាំងប្រាប់យើងថា គេបន្តការរកស៊ីជាមួយយើង។ ស្ថាប័នអឺរ៉ុបទាំងអស់ទាំងធនាគារអឺរ៉ុប ទាំងស្អីហ្នឹងគេធ្វើការជាមួយយើង»។
លោកក៏បានឲ្យដឹងដែរថា នៅថ្ងៃពុធនេះលោកនឹងជួបលោក MIKAMI Masahiro ឯកអគ្គរាជទូតថ្មីនៃប្រទេសជប៉ុនប្រចាំនៅកម្ពុជាលោក Christian Berge ឯកអគ្គរដ្ឋទូតថ្មីនៃសាធារណរដ្ឋសហព័ន្ធអាល្លឺម៉ង់ប្រចាំកម្ពុជា និងលោក Patrick Murphy ឯកអគ្គរដ្ឋទូតអាមេរិកថ្មីដែលទើបថ្វាយសារតាំងព្រះមហាក្សត្រនាពេលថ្មីៗនេះ។ លោកចាត់ទុកការលើកឡើងដែលថា ប្រទេស កម្ពុជា មានទំនាក់ទំនងមិនល្អជាមួយប្រទេសអឺរ៉ុបមួយចំនួន និងសហរដ្ឋអាមេរិកនោះថា ជាការលើកឡើងបែបល្ងីល្ងើពកថ្ងាស។
លោកបញ្ជាក់ថា៖ «ខ្ញុំត្រូវទទួលទូតរហូតដល់ទៅ ៣ ពីព្រោះទូតទាំង ៣ នេះបានជូនសារតាំងហើយ។ រង់ចាំការជួបជាមួយនាយករដ្ឋមន្ត្រីស្អែកហ្នឹង។ ដំបូងគេគឺទូតជប៉ុនថ្មីពេលព្រឹកម៉ោង ៩ ហើយ ម៉ោង ១០ ព្រឹកទទួលទូតអាល្លឺម៉ង់ ហើយល្ងាចទទួលអាមេរិកទើបតែថ្វាយសារតាំងថ្មីៗនេះ។ គេធ្វើការជាមួយរដ្ឋាភិបាល ហ៊ុន សែន ឲ្យវាយល់ បើភ្លើណាស់ទៅរៀនឲ្យវាចេះទៅ កុំចេះតែស្រែក។ នេះគឺជាស្ថាប័នរដ្ឋ ហើយនេះតំណាងឲ្យជាតិខ្មែរ»។
លោកបន្តថា៖ «អាទិត្យក្រោយចូលទៅដល់អាស៊ានទៀតហើយ ហើយអាស៊ានវាត្រូវមានបូក បូក ៣ បូក ១... ហ៊ុន សែន ទៅថ្លែងពេញសិទ្ធិ ពេញមុខមាត់ នៅកន្លែងហ្នឹង ហ្អែងនិយាយឲ្យច្បាស់មើល៍។ កុំភ្លេចឲ្យសោះណា អាស៊ានធ្វើការតាមកុងសង់ស៊ីស។ ឲ្យចេះយល់ កុំចេះតែពភ្លីពភ្លើ ហើយតាំងខ្លួនជាបញ្ញវន្ត ហើយខ្ញុំឃើញវាខ្សោយពេក ហើយគិតតែមកបន្ទោស បង្អាប់ប្រព័ន្ធអប់រំរបស់យើងទៅវិញ តែខ្លួនឯងវិញល្ងង់ពកថ្ងាស ពាក្យខ្មែរអាល្ងង់ពកថ្ងាសគឺយ៉ាប់ណាស់»។
លោកនាយករដ្ឋមន្ត្រី ហ៊ុន សែន បន្តថាកម្ពុជានឹងធ្វើជាម្ចាស់ផ្ទះប្រជុំអាស៊ីអឺរ៉ុបនៅឆ្នាំក្រោយផងដែរ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាលើកឡើងថា ជំនួបរវាងលោកនាយករដ្ឋមន្ត្រី ហ៊ុន សែន និងលោក Patrick Murphy អគ្គរដ្ឋទូតថ្មីរបស់អាមេរិកនឹងផ្តោតទៅលើការប្តេជ្ញាចិត្តរបស់លោកក្នុងការពង្រឹងទំនាក់ទំនង ការលើកកម្ពស់ពាណិជ្ជកម្ម ការអភិរក្សលើវិស័យវប្បធម៌ និងបរិស្ថានរវាងប្រទេសទាំង ២ ហើយលោកអាចនឹងចៀសវាងលើកនូវបញ្ហារសើបដែលអាចធ្វើឲ្យប៉ះពាល់ដល់ទំនាក់ទំនងរវាងប្រទេសទាំង ២។
លោកថ្លែងថា៖ «ទូតថ្មីរបស់សហរដ្ឋអាមេរិក គាត់នឹងមិនលើកប្រធានបទ ដែលមានលក្ខណៈរសើបដែលធ្វើឲ្យខូចទំនាក់ទំនងទេ ពីព្រោះតាមរយៈសារ Twitter របស់គាត់ ហើយនិងសារដែលបានបញ្ចេញនៅលើហ្វេសប៊ុកស្ថានទូតអាមេរិកគឺជាសារដែលបង្ហាញពីការថ្នាក់ថ្នមនូវទំនាក់ទំនង។ ដូច្នេះក្នុងជំនួបដំបូងនេះ ខ្ញុំយល់ថាអគ្គរដ្ឋទូតថ្មីដែលមានបទពិសោធខាងការទូត គាត់មិនលើកឡើងរឿងក្តៅក្រហាយណាមួយដែលនាំឲ្យមើលមុខគ្នាមិនត្រង់នោះទេ»។
កាលពីថ្ងៃសៅរ៍ទី ១៩ ខែតុលា លោក Patrick Murphy បានចូលបង្គំគាល់ថ្វាយសារតាំងព្រះមហាក្សត្រកម្ពុជា ព្រះបាទសម្ដេចព្រះបរមនាថ នរោត្តម សីហមុនី មួយខែបន្ទាប់ពីលោកបានមកដល់កម្ពុជានៅថ្ងៃទី ១៩ ខែកញ្ញា។ លោកថាលោករង់ចាំជួបសមាជិកនានារបស់រដ្ឋាភិបាលដើម្បីពិភាក្សាពីកិច្ចប្រឹងប្រែងក្នុងការពង្រឹងចំណងមិត្តភាពរវាងប្រទេសទាំង ២។
លោកស្រី Emily Zeeberg អ្នកនាំពាក្យស្ថានទូតអាមេរិកបានថ្លែងតាមរយៈអ៊ីមែលថា លោកឯកអគ្គរដ្ឋទូតថ្មីអាមេរិករង់ចាំជួបជាមួយលោកនាយករដ្ឋមន្ត្រី ហ៊ុន សែន និងមន្ត្រីរបស់រដ្ឋាភិបាលកម្ពុជាផ្សេងទៀត បន្ទាប់ពីលោកបានថ្វាយសារតាំងព្រះមហាក្សត្រកម្ពុជាកាលពីថ្ងៃសៅរ៍។
ទំនាក់ទំនងកម្ពុជា-អាមេរិក បានល្អក់កករតិចតួច ជាពិសេសនៅពេលសមាជិករដ្ឋសភា និងព្រឹទ្ធសភាអាមេរិកព្រមានដាក់ទណ្ឌកម្មលើរដ្ឋាភិបាលកម្ពុជាដោយសារមិនពេញចិត្តពីបញ្ហាសិទ្ធិមនុស្ស និងលទ្ធិប្រជាធិបតេយ្យ។
សមាជិករដ្ឋសភា និងព្រឹទ្ធសភាអាមេរិកមួយក្រុមបានធ្វើច្បាប់ជំរុញឲ្យរដ្ឋបាលលោកប្រធានាធិបតី ដូណាល់ ត្រាំ ព្យួរប្រព័ន្ធអនុគ្រោះពន្ធទូទៅ GSP មកលើកម្ពុជា។ ប៉ុន្តែមកទល់ពេលនេះច្បាប់នោះមិនទាន់ចូលជាធរមានទេ ហើយក៏បានបង្កើតច្បាប់ដាក់ទណ្ឌកម្មទៅលើថ្នាក់ដឹកនាំកម្ពុជាតាមរយៈទណ្ឌកម្មបង្កកទ្រព្យសម្បត្តិ និងការបដិសេធទិដ្ឋាកាមិនឱ្យជាន់ទឹកដីអាមេរិកផងដែរ។
អ្នកវិភាគនយោបាយលោក ឡៅ ម៉ុងហៃ មិនបានឆ្លើយតបនូវការសុំអត្ថាធិប្បាយពីភ្នំពេញប៉ុស្តិ៍ទេពីម្សិលមិញ៕