ភ្នំពេញៈ ជាមួយនឹងការអះអាងពីគូប្រជែងរបស់ខ្លួនដើរជាន់អន្ទាក់ខ្លួនឯងក្នុងល្បែងភ្នាល់លើសំណុំរឿងលោក កឹម សុខា អតីតប្រធានគណបក្សសង្គ្រោះជាតិលោកនាយករដ្ឋមន្ត្រី ហ៊ុន សែន ក៏បានការពារភាពស្របច្បាប់ក្នុងការលេងល្បែងភ្នាល់នេះដោយលោកថាល្បែងនេះមិនបានបំពានសមត្ថកិច្ចរបស់តុលាការនោះទេ ខណៈលោក សម រង្ស៊ី ប្រធានចលនាសង្គ្រោះជាតិក៏បានអះអាងថានាយករដ្ឋមន្ត្រីក៏បានដើរចូលអន្ទាក់របស់ខ្លួនដែរនោះ។
កាលពីចុងសប្ដាហ៍មុនទាំងលោក សម រង្ស៊ី និងលោក ហ៊ុន សែន បានប្រកាសលេងល្បែងភ្នាល់ដាក់ជីវិតនយោបាយលោក កឹម សុខា ដែលកំពុងជាប់ឃុំនៅក្នុងផ្ទះលើសំណុំរឿង «ក្បត់ជាតិ» ដ៏សម្រូងចម្រាស។ លោក សម រង្ស៊ី បានសន្យាប្រគល់ខ្លួនឲ្យអាជ្ញាធរចាប់ដាក់ពន្ធនាគារ រីឯលោក ហ៊ុន សែន សន្យាចុះចេញពីតំណែងជានាយករដ្ឋមន្ត្រី បើគូប្រជែងនយោបាយណាមួយចាញ់ការភ្នាល់គ្នាដែលថាលោក កឹម សុខា នឹងត្រូវដោះលែងចន្លោះពីថ្ងៃទី ២៩ ខែធ្នូ ឆ្នាំ ២០១៨ ដល់ថ្ងៃទី ៣ ខែមីនា ឆ្នាំ ២០១៩។
ក្នុងបទសម្ភាសជាមួយវិទ្យុអាស៊ីសេរីកាលពីសប្ដាហ៍មុនលោក សម រង្ស៊ី អះអាងថាលោក ហ៊ុន សែន បានដើរ «ចូលអន្ទាក់» របស់លោកក្នុងការទទួលយកល្បែងភ្នាល់ដែលបង្ហាញថា លោកនាយករដ្ឋមន្ត្រីគឺជាជន «ផ្ដាច់ការដែលប្រើប្រាស់តុលាការជាឧបករណ៍នយោបាយ»។
ទោះយ៉ាងណាបន្ទាប់ពីបានឆ្លងឆ្លើយសារនយោបាយតាមប្រព័ន្ធផ្សព្វផ្សាយវាយបកគ្នាទៅវិញទៅមកជាមួយលោក សម រង្ស៊ី រួចមកលោក ហ៊ុន សែន កាលពីយប់ថ្ងៃអាទិត្យបានសរសេរសារនៅលើទំព័រហ្វេសប៊ុករបស់លោកអមដោយវីដេអូឃោសនាដែលមានរូបលោក សម រង្ស៊ី ផងនោះអះអាងថាលោកមិនបានបំពានលើអំណាចតុលាការឡើយក្នុងការភ្នាល់នយោបាយជាមួយលោក សម រង្ស៊ី។
លោកសរសេរថា៖ «ការបកស្រាយក្នុងវីដេអូឃ្លីបនេះគឺបានបង្ហាញនូវហេតុផលត្រឹមត្រូវខាងផ្លូវច្បាប់ដែលខ្ញុំបាននិយាយទាក់ទងជាមួយដែនសមត្ថកិច្ចរបស់នាយករដ្ឋមន្ត្រីដែលគ្មានចំណុចណាមួយបំពានដល់សមត្ថកិច្ចរបស់តុលាការទាល់តែសោះ»។
លោកពន្យល់ថានាយករដ្ឋមន្ត្រីពុំមានសិទ្ធិស្នើសុំលើកលែងទោសឲ្យអ្នកដែលមិនទាន់បានកាត់ទោស ឬសាលក្រមមិនទាន់ចូលស្ថាពរនោះទេ (ទោះសេះដុះស្នែងក៏មិនកើតឡើងទេ)។
លោកបន្ថែមថា៖ «តែមនុស្សដែលចូលចិត្តវាយប្រហារខ្ញុំគេអត់ចេះស្តាប់ និងសិក្សាពីសម្តីដែលបង្កប់ដោយន័យនយោបាយ និងផ្លូវច្បាប់ដែលខ្ញុំបាននិយាយនោះទេដូចនេះទើបគេរៀបអន្ទាក់ដាក់ខ្ញុំ ពេលនេះគេដើរជាន់អន្ទាក់ខ្លួនឯងហើយ។ ដោយសារការភ្នាល់លើកនេះជាការភ្នាល់ដាក់ជីវិតនយោបាយដែលអ្នកបបួលខ្ញុំភ្នាល់គឺជាជនពាលខាងនយោបាយដូចនេះតម្រូវឲ្យខ្ញុំត្រូវមានភ័ស្តុតាង និងសូមស្នើឲ្យមេធាវីខ្ញុំរក្សាទុកភ័ស្តុតាងនេះតាមផ្លូវច្បាប់»។
ការលេងល្បែងភ្នាល់របស់អ្នកនយោបាយចាស់វស្សាទាំង ២ មិនទទួលបានការស្វាគមន៍ឡើយ ផ្ទុយទៅវិញការរិះគន់ និងការថ្កោលទោសបានធ្លាក់ចុះមកជាបន្តបន្ទាប់ពីអ្នកឃ្លាំមើលសង្គមស៊ីវិល និងថ្នាក់ដឹកនាំនៃអតីតបក្សសង្គ្រោះជាតិ។
លោក សួន សូរីដា អតីតតំណាងរាស្ត្រនៃអតីតគណបក្សសង្គ្រោះជាតិបានសរសេរលើទំព័រហ្វេសប៊ុករបស់លោកកាលពីថ្ងៃអាទិត្យថ្កោលទោសនូវទង្វើភ្នាល់ជាល្បែងរវាងលោក ហ៊ុន សែន និងលោក សម រង្ស៊ី ដោយរំលោភលើសិទ្ធិសេរីភាពបុគ្គលលោក កឹម សុខា ប្រធានគណបក្សសង្គ្រោះជាតិ។
លោក គល់ បញ្ញា នាយកប្រតិបត្តិនៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជាហៅកាត់ថា (COMFREL) បានសរសេរលើបណ្ដាញទំនាក់ទំនងសង្គមធ្វីធើរ និងហ្វេសប៊ុករបស់លោកកាលពីថ្ងៃអាទិត្យថា ការលេងល្បែងភ្នាល់បែបនេះគឺជាការរំលោភលើអំណាចតុលាការ។
លោកសរសេរថា៖ «នាយករដ្ឋមន្ត្រីបន្តរំលោភអំណាចលើប្រព័ន្ធតុលាការដែលធ្វើឲ្យយុត្តិធម៌នយោបាយ និងនីតិរដ្ឋកាន់តែចុះខ្សោយ និងខ្សោយទៅទៀត។ គ្មានសិទ្ធិ និងអំណាចក្នុងការសម្រេចដាក់ទោស ឃុំមេដឹកនាំនយោបាយរហូត និងគ្មានពេលកំណត់ទេ»។
ឯលោក ឯម សុវណ្ណារ៉ា អ្នកវិភាគនយោបាយថ្លែងថា៖ «មិនមែនយកបញ្ហាមនុស្សម្នាក់យកមកលេងសើចទេ យើងត្រូវគិតលើយន្តការមួយដែលអ្នកនយោបាយឲ្យតម្លៃគ្នា គោរពគ្នា នៅក្នុងក្របខ័ណ្ឌអ្នកនយោបាយ ទោះបីជាគាត់ជាប់ការចោទប្រកាន់ក៏ដោយ ក៏តម្លៃមនុស្សនៅមានដដែលទេ»៕