ភ្នំពេញ៖ លោកនាយករដ្ឋមន្រ្តី ហ៊ុន សែន បានលើកឡើងទាក់ទងនឹងការបើកឡើងវិញ នូវវិធានការបិទខ្ទប់ភូមិសាស្រ្តក្នុងរាជធានីភ្នំពេញ និងក្រុងតាខ្មៅនៃខេត្តកណ្តាល ដែលនឹងផុតកំណត់នៅថ្ងៃទី ០៥ ខែឧសភានេះ ខណៈពេលដែលគណៈកម្មការបិទខ្ទប់ (ក.ប.ខ) នឹងបើកកិច្ចប្រជុំ ដើម្បីពិភាក្សាលើករណីនេះ មុនពេលកាលបរិច្ឆេទនៃការបញ្ចប់នេះមកដល់។
លោក ហ៊ុន សែន នៅក្នុងការឆ្លើយតបនឹងការសួរពីពលរដ្ឋម្នាក់ក្នុងបណ្តាញហ្វេសប៊ុកថា តើថ្ងៃទី ០៥ ខែឧសភា ខានស្អែកនេះ អាចនឹងបើកផ្លូវឡើងវិញមែនទែន ឬយ៉ាងណា? លោកនាយករដ្ឋមន្រ្តីបានឆ្លើយថា លោកពុំមានហេតុផលបន្តបិទទៀតនោះទេ។
លោកបានសរសេរដូចនេះថា៖ «ពុំមាន ហេតុផលបន្តបិទទេ យើងនឹងបើកតែខេត្ត ឬរាជធានី។ អាចបិទតំបន់តូចៗដែលនៅមានហានិភ័យលើការឆ្លងខ្ពស់»។
លោកនាយករដ្ឋមន្រ្តីបានបន្តថា៖ «ការបិទកន្លងមកនេះ គឺជាការបង្ខំចិត្ត ដើម្បីកាត់បន្ថយការឆ្លង និងការស្លាប់របស់ប្រជាជនយើង។ សូមយោគយល់ដល់ការលំបាករួមរបស់យើង»។
គួរបញ្ជាក់ថា រាជរដ្ឋាភិបាលកម្ពុជាកាលពីថ្ងៃទី ២៦ ខែមេសា បានចេញសេចក្តីសម្រេចបន្តធ្វើការបិទខ្ទប់ភូមិសាស្រ្តរាជធានីភ្នំពេញ និងទីក្រុងតាខ្មៅនៃខេត្តកណ្តាល ដើម្បីទប់ស្កាត់ការឆ្លងរាលដាលនៃជំងឺកូវីដ ១៩ រហូតដល់ថ្ងៃទី ០៥ ខែ ឧសភា ឆ្នាំ ២០២១។
ទាក់ទងនឹងការបង្ហើបពីលោកនាយករដ្ឋមន្រ្តី ក្នុងការបើកឡើងវិញនូវការបិទខ្ទប់នេះ លោក ហុក គឹមចេង អគ្គនាយកបច្ចេកទេសសុខាភិបាលនៃក្រសួងសុខាភិបាលបានប្រាប់ ភ្នំពេញ ប៉ុស្តិ៍ នៅថ្ងៃចន្ទ ទី ០៣ ខែឧសភា នេះថា គណៈកម្មការបិទខ្ទប់ (ក.ប.ខ) នឹងបើកកិច្ចប្រជុំក្នុងគណៈកម្មការពាក់ព័ន្ធសំខាន់ៗទាំងអស់ ដើម្បីធ្វើការពិចារណាក្នុងការបើកឡើងវិញនូវការបិទខ្ទប់នេះ។
លោកមានប្រសាសន៍ថា៖ «គណៈកម្មការបិទខ្ទប់រួមនឹងគណៈកម្មការសំខាន់ៗផ្សេងទៀតនឹងមានការពិចារណាគ្រប់ជ្រុងជ្រោយ ដើម្បីដាក់ជូនប្រមុខរាជរដ្ឋាភិបាល។ ដូចនេះ ខ្ញុំគិតថា នឹងមានការគិតគូរច្បាស់លាស់មួយនៅក្នុងការសម្រេចចិត្ត ហើយខ្ញុំក៏មិនដឹងថា តើនឹងមានការសម្រេចចិត្តយ៉ាងណាទៀតទេ គឺអាស្រ័យលើគណៈកម្មការទាំងនេះ ដើម្បីទទួលខុសត្រូវក្នុងការបិទខ្ទប់នេះ ដើម្បីធ្វើការសម្រេចចិត្ត»។
លោក ហុក គឹមចេង យល់ឃើញថា ទោះបីជាមានការបិទខ្ទប់ ឬយ៉ាងណាក៏ដោយ ប្រជាពលរដ្ឋទាំងអស់ត្រូវតែប្រកាន់យកនូវវិធានការអនុវត្តជាប្រចាំនូវ «៣ ការពារ ៣ កុំ» ហើយគោរពទៅតាមវិធានការណែនាំរបស់ប្រមុខរាជរដ្ឋាភិបាល និងក្រសួងសុខាភិបាល។
លោកបន្ថែមថា៖ «ទោះបីជាក្នុងកាលៈទេសៈណាក៏ដោយ យើងត្រូវតែរៀនរស់ និងរស់នៅក្នុងរបៀបមួយដោយប្រុងប្រយ័ត្នការពារកុំឱ្យមានការឆ្លង។ នេះ គឺជាចំណុចសំខាន់»។
ទន្ទឹមនឹងនេះដែរ លោក ឃួង ស្រេង អភិបាលរាជធានីភ្នំពេញ ក៏បានលើកឡើងនៅក្នុងកិច្ចប្រជុំ ស្ដីពីការត្រួតពិនិត្យការងារការអនុវត្តសេចក្ដីសម្រេចការបិទខ្ទប់ក្នុងភូមិសាស្រ្តរាជធានីភ្នំពេញនាព្រឹកថ្ងៃចន្ទ ទី ០៣ ខែឧសភា នេះថា ទោះបីជាការបិទខ្ទប់នឹងបញ្ចប់នៅថ្ងៃទី ០៥ ខាងមុខនេះក៏ដោយ ប៉ុន្តែសម្រាប់រាជធានីភ្នំពេញ គឺនៅតែរក្សាតំបន់ ៣ សំខាន់ដដែល គឺតំបន់ក្រហម លឿងទុំ និងតំបន់លឿង ដើម្បីបង្ការទប់ស្កាត់នូវជំងឺកូវីដ ១៩ ដោយគ្រាន់តែធ្វើការបង្រួមតំបន់លឿងទុំ និងតំបន់ក្រហម មកនៅតូចជាងមុនប៉ុណ្ណោះ។
យោងតាមការស្រង់សំដីរបស់លោក ឃួង ស្រេង តាមរយៈបណ្តាញព័ត៌មានហ្វេសញូវបានឱ្យដឹងថា៖ «រាជរដ្ឋាភិបាលនឹងបើកឱ្យធ្វើចរាចរណ៍ឡើងវិញនៅទូទាំងប្រទេសពីតំបន់មួយទៅតំបន់មួយពីខេត្តមួយទៅខេត្តមួយនៅថ្ងៃទី ៦ ខែឧសភា។ ប៉ុន្តែសម្រាប់ភ្នំពេញនៅរក្សាតំបន់ ៣ ដដែល និងត្រូវពង្រឹងឲ្យបានហ្មត់ចត់ទៅលើទីតាំងដែលបានកំណត់ ចៀសវាងការបន្តរីករាលដាលជំងឺកូវីដ ១៩ ទៅតំបន់ផ្សេងទៀត»។
លោក ឃួង ស្រេង បានធ្វើការពន្យល់ថា ចំពោះតំបន់លឿង និងលឿងទុំ នៅរក្សាការអនុវត្តវិធានការដដែល ប៉ុន្តែសម្រាប់តំបន់ក្រហម គឺជាតំបន់ដែលត្រូវបិទខ្ទប់ឲ្យបានម៉ឺងម៉ាត់បំផុត ហើយអ្វីដែលត្រូវអនុវត្ត គឺការបង្រួមការបិទខ្ទប់ តំបន់ប្រឈមឲ្យមកនៅទ្រង់ទ្រាយតូចជាងមុន។
ពលរដ្ឋមួយរូប អ្នកស្រី សាយ ផល្លា ដែលស្ថិតក្នុងតំបន់ក្រហម ក្នុងខណ្ឌមានជ័យបានប្រាប់ថា ទោះបីជារាជរដ្ឋាភិបាលបើកការបិទខ្ទប់នេះឡើងវិញ ក៏អ្នកស្រីមិនហ៊ានចេញពីផ្ទះដែរ ដោយសារតែចំនួននៃអ្នកឆ្លងនៅមានច្រើនជារៀងរាល់ថ្ងៃ ហើយអ្នកស្រីខ្លាចឆ្លងវីរុសនេះពេលចេញទៅខាងក្រៅ។
អ្នកស្រីថា៖ «ខ្ញុំគិតថា នៅក្នុងផ្ទះសុវត្ថិភាពជាងចេញក្រៅ ប៉ុន្តែខ្ញុំគាំទ្រចំពោះការគ្រោងនឹងបើកឱ្យធ្វើចរាចរណ៍ជាធម្មតាឡើងវិញនៅថ្ងៃខាងមុខនេះ ដើម្បីឱ្យបងប្អូនអាជីវករ និងអ្នកលក់ដូរមួយចំនួន គាត់រកចំណូលបានវិញ។ ប៉ុន្តែសម្រាប់ខ្ញុំក៏នៅមានអារម្មណ៍ខ្លាចការឆ្លងដដែល ព្រោះថាបើយើងក្រឡេកទៅមើលចំនួនតួលេខអ្នកឆ្លង គឺមិនទាន់មានការថយចុះនៅឡើយ អ្វីដែលបារម្ភ គឺខ្លាចតែបើកឡើងវិញហើយមានការជួបជុំ ហើយធ្វើឱ្យចំនួនឆ្លងទប់លែងជាប់»៕