បន្ទាយមានជ័យៈ លោកនាយករដ្ឋមន្ត្រី ហ៊ុន សែន បានវាយបកលើអ្នករិះគន់ម្នាក់ដែលរិះគន់ការចូលរួមវិភាគទានរបស់សប្បុរសជននានាក្នុងហេតុការណ៍គ្រោះមហន្តរាយនានានៅកម្ពុជា។ លោកបញ្ជាក់ថា ការចូលរួមរបស់សប្បុរសជន គឺជាទឹកចិត្តរបស់គេ។ លោកនាយករដ្ឋមន្ត្រីបានថ្លែងបែបនេះ នៅក្នុងពេលលោកចុះចែកអំណោយដល់ជនរងគ្រោះដោយទឹកជំនន់នៅខេត្តបន្ទាយមានជ័យកាលពីថ្ងៃព្រហស្បតិ៍ម្សិលមិញ។
លោកថ្លែងដូច្នេះថា៖ «មកតាមផ្លូវមិញ ឃើញអាមួយណានោះបង្ហោះហ្វេសប៊ុកគេថា បក្សដ៏អស្ចារ្យនេះជំនន់ក៏រៃលុយ បាក់អគារក៏រៃលុយ។ សុំផ្ដាំទៅពួកឯងវិញទៅ បើឯងចង់ធ្វើសត្រូវជាមួយលុយ ឯងធ្វើខ្លួនឯងទៅ។ អញមិនធ្វើសត្រូវជាមួយលុយទេ ហើយពេលសប្បុរសជនចូលរួមជាទឹកចិត្តរបស់គេ យើងទទួលនេះជាទឹកចិត្តរបស់គេ គេចង់ចូលរួម។ គេថាទិញឡានក៏រៃលុយ ពេលកូវីដក៏រៃលុយ ពេលទឹកជំនន់ក៏រៃលុយ ធ្វើអីក៏រៃលុយដែរ។ អត់ទេ សុំផ្ដាំទៅអាអ្ហែងវិញ»។
លោកបន្តថា៖ «សប្បុរសជនគេចង់ចូល ចូលប៉ុន្មាន ទទួលប៉ុណ្ណឹង។ ចូល ១ រៀលក៏យក ១ រយ ក៏យក ១ ពាន់ក៏យក ១០ លានក៏យក។ បើគេឱ្យហើយ យកមកជួយប្រជាជននេះជាទឹកចិត្តសប្បុរសរបស់គេ តែពួកឯងទេ ដែលរៃលុយអាស្រោមសំបុត្ររួចយកញាត់ហោប៉ៅខ្លួនឯងនោះ។ វាឆ្ងាញ់អាគេថតបានយកញាត់ហោប៉ៅខ្លួនឯង។ ឱ្យតែចាប់ផ្ដើមកម្មវិធីអី អាក្រុមហ្នឹងកម្មវិធីមួយៗ សុទ្ធតែទិញសំបុត្រចូលរួចហើយមានស្រោមសំបុត្រជូនមេ»។
គិតចាប់ពីពេលមានទឹកជំនន់ ថវិកាសប្បុរសជនសម្រាប់ជួយដល់ជនរងគ្រោះដោយទឹកជំនន់មានចំនួនជិត ៨ លានដុល្លារ គិតត្រឹមថ្ងៃព្រហស្បតិ៍ម្សិលមិញ។ នេះបើតាមការបញ្ជាក់របស់លោក ហ៊ុន សែន។
ពាក់ព័ន្ធនឹងការបរិច្ចាគរបស់សប្បុរសជនជាមួយនឹងរដ្ឋាភិបាលដើម្បីចូលរួមទប់ស្កាត់ជំងឺកូវីដ ១៩ លោក ហ៊ុន សែន បញ្ជាក់ថាលោកមិនបានអំពាវនាវឱ្យពលរដ្ឋចូលរួមទេគឺព្រះករុណាព្រះមហាក្សត្រព្រះអង្គ និងសម្តេច ព្រះមហាក្សត្រីនរោត្តមមុនិនាថសីហនុ ព្រះអង្គបានចូលរួមថវិកា ដែលជាការលើកទឹកចិត្តឱ្យពលរដ្ឋ និងឧកញ៉ាចូលរួមតាមក្រោយជាហូរហែ។ ថវិកាសប្បុរសជនសម្រាប់ប្រឆាំងកូវីដ ១៩ មានប្រមាណ ជិត ២០ លានដុល្លារ។
ក្រៅពីចូលរួមឧបត្ថម្ភក្នុងឧប្បត្តិហេតុផ្សេងៗឧកញ៉ាជាច្រើនក៏បានចូលរួមក្នុងការកសាងខឿនការពារជាតិផងដែរ។ លោក ហ៊ុន សែន បានឱ្យដឹងថា រថក្រោះដែលរដ្ឋាភិបាលបានទិញកាលពីកន្លងទៅទទួលបានការឧបត្ថម្ភពីឧកញ៉ាមួយចំនួនដោយឧកញ៉ាខ្លះទិញរហូតដល់ទៅ ១០ គ្រឿង ហើយឧកញ៉ាមួយចំនួនទិញ ៥ គ្រឿង។
លោកថ្លែងថា៖ «អ៊ីចឹងបានយករថក្រោះមកប្រើអត់មានចំណាយលុយជាតិទេ ឧកញ៉ាជួយទិញ អញនៅតែយក អញប្រាប់ឱ្យហើយ។ ត្រូវការរថក្រោះ កាំភ្លើងធំ លុយជាតិមួយចំណែក ប៉ុន្តែអ្នកទាំងអស់នោះគេមានសមានចិត្តជួយ។ បន្ទាយទាហានធ្វើតាមទល់ដែន ភាគច្រើនគឺសប្បុរសជនធ្វើខ្លះជួយ ២០ ខ្នង ខ្លះជួយ ៣០ ខ្នង។ មួយខ្នងប៉ុន្មាន ប៉ុន្មាន អាហ្នឹងកិច្ចការទាំងអស់គ្នា។ អាហ្នឹងហើយដែលគេហៅថា ខឿនការពារជាតិរបស់ប្រជាជនមិនមែនសម្រាប់តែកងទ័ពទេ»។
អ្នកវិភាគនយោបាយលោក ឡៅ ម៉ុងហៃ ថ្លែងថាវប្បធម៌នៃការផ្ដល់ជំនួយ សម្រាប់សេចក្ដីត្រូវការចាំបាច់មិនមែនជាបញ្ហាអ្វីទេ។ បញ្ហាគឺនៅត្រង់ថា អ្នកនយោបាយជាច្រើនបានធ្វើនយោបាយទៅលើអំពើសប្បុរសធម៌នោះដោយប្រើប្រាស់វាដើម្បីទាក់ទាញការបោះឆ្នោតគាំទ្រ។
លោកបានថ្លែងថា វិធីកាន់តែប្រសើរគឺកាត់ផ្ដាច់រឿងនយោបាយចេញពីអំពើសប្បុរសធម៌ និងពីកាកបាទក្រហមកម្ពុជាហើយអនុញ្ញាតឱ្យកាកបាទក្រហមប្រមូលការបរិច្ចាគ និងរៀបចំជំនួយមនុស្សធម៌នោះ។ អនុញ្ញាតឱ្យកាកបាទក្រហមយាងព្រះមហាក្សត្រ សម្ដេចម៉ែ នាយករដ្ឋមន្ត្រី ឬមន្ត្រីសាធារណៈល្បីៗធ្វើជាអធិបតីសម្រាប់ពិធីចែកអំណោយ។
លោកបញ្ជាក់ថា៖ «វាជារឿងមិនប្រកបដោយក្រមសីលធម៌ទេ ដែលយើងត្រូវឈ្លោះគ្នានៅពេលជាតិរបស់យើងបានក្លាយជាជនរងគ្រោះដោយសារគ្រោះធម្មជាតិ ហើយកំពុងត្រូវការជំនួយចាំបាច់ជាបន្ទាន់នោះ»៕