ភ្នំពេញៈ លោកនាយករដ្ឋមន្ត្រី ហ៊ុន សែន បានសម្រេចឱ្យមានការបូជាសព បើក្នុងករណីមានការស្លាប់ដោយសារជំងឺកូវីដ១៩ ដើម្បីងាយស្រួលក្នុងការគ្រប់គ្រង ហើយលោកបានស្នើឱ្យមានការរៀបចំទីប៉ាឆានៅតាមរាជធានី-ខេត្ត ខណៈចំនួនអ្នកឆ្លងកូវីដដែលកំពុងសម្រាកព្យាបាលនៅមន្ទីរពេទ្យមានរហូតដល់ ៥២១ នាក់។
យោងតាមសារជាសំឡេងរបស់លោក ហ៊ុន សែន នៅថ្ងៃទី ៩ ខែមីនា បានឱ្យដឹងថា ដោយកន្លងមកមិនទាន់មានសភាពការណ៍កម្រិតធ្ងន់ មិនទាន់មានវិធានការមួយដែលជាវិធានការចាំបាច់ចុងក្រោយនោះ គឺករណីមរណភាពចំពោះអ្នកជំងឺកូវីដដែលជាបញ្ហាចោទឡើងថា តើត្រូវបូជា ឬកប់?
លោកបានពិភាក្សាជាមួយនឹងរដ្ឋមន្ត្រីក្រសួងសុខាភិបាលលោក ម៉ម ប៊ុនហេង ដោយសម្រេចថាត្រូវតែបូជា។ លោកថ្លែងថា៖ «សម្រាប់យើង យើងប្រើប្រាស់វិធានការដុត ឬបូជា ដែលជាវិធានការងាយស្រួលក្នុងការគ្រប់គ្រង ហើយខ្ញុំក៏សុំស្នើឱ្យមានការចាត់ចែងរៀបចំនូវបច្ឆាសម្រាប់បូជាសពនៅតាមរាជធានី-ខេត្ត ក្នុងករណីមានការស្លាប់ ដោយសារជំងឺកូវីដ ១៩ និងត្រូវធ្វើនៅទីតាំងឆ្ងាយពីកន្លែងដែលប្រជាពលរដ្ឋរស់នៅ»។
លោក ហ៊ុន សែនក៏បានស្នើឱ្យលោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងលោក កើត រិទ្ធ រដ្ឋមន្ត្រីក្រសួងយុត្តិធម៌រួមនឹងសហការីដែលទទួលបន្ទុកតាក់តែងអនុក្រឹត្យពាក់ព័ន្ធជាមួយនឹងការចាត់វិធានការតាមផ្លូវអនុក្រឹត្យដែលច្បាប់ប្រគល់ឱ្យទៅលើភាពលម្អិតនៃវិធានការសុខាភិបាល រៀបចំនូវអនុក្រឹត្យមួយស្តីពីការបូជាសព អ្នកដែលស្លាប់ដោយសារជំងឺកូវីដ ១៩ ដោយបញ្ជាក់ពីការកំណត់ចំនួនមនុស្សក្នុងការចូលរួមពិធីបូជាសពនេះ។
លោកថា៖ «យើងក៏ត្រូវកំណត់នូវវិធានការ ថាតើប៉ុន្មានម៉ោងក្រោយពីការស្លាប់នឹងត្រូវយកទៅបូជា ដោយសារនេះជាកិច្ចការវិធានការសុខាភិបាល ដើម្បីចៀសវាងការឆ្លងរាលដាលដទៃទៀត»។
ចំណែករដ្ឋបាលខេត្តកណ្តាលបានសម្រេចធ្វើការបិទជាបណ្តោះអាសន្ននូវកាស៊ីណូចំនួន ៦ និងបិទការធ្វើដំណើរចេញចូលនៅតំបន់ទីប្រជុំជនជ្រៃធំក្នុងឃុំសំពៅពូន ស្រុកកោះធំ បន្ទាប់ពីជនបរទេសចំនួន ៦ នាក់ ត្រូវរកឃើញវិជ្ជមានកូវីដ ១៩។
លោក គង់ សោភ័ណ្ឌ អភិបាលខេត្តកណ្តាលបានប្រាប់ ភ្នំពេញ ប៉ុស្តិ៍ ពីម្សិលមិញថា កាស៊ីណូ និងសណ្ឋាគារទាំង ៦ នេះត្រូវបានដាក់ជាកន្លែងចត្តាឡីស័ក និងធ្វើតេស្តអ្នកដែលធ្វើការនៅទីនោះទាំងអស់ដែលមានប្រមាណ ៦៥៩៧ នាក់ ដែលពួកគាត់មួយចំនួនបានធ្វើតេស្ត ២ ដងហើយ ហើយបានរកឃើញមនុស្សចំនួន ៦ នាក់ (ចិន ៤ នាក់ និងវៀតណាម ២ នាក់) វិជ្ជមានកូវីដ ១៩។
លោកប្រាប់ថា៖ «អ្នកទាំងនេះមានជនជាតិចម្រុះដូចជា ខ្មែរ ចិន វៀតណាម និងឥណ្ឌូនេស៊ី។ ដោយសារតែទីតាំងនេះមានលក្ខណសម្បត្តិគ្រប់គ្រាន់ ធានាសន្តិសុខទាំងខាងក្នុង និងបរិវេណខាងក្រៅ ទើបយើងសម្រេចយកទីតាំងនោះជាកន្លែងធ្វើចត្តាឡីស័កតែម្តង»។
លោកអភិបាលបន្តថា គិតត្រឹមថ្ងៃម្សិលមិញសំណាកប្រមាណជា ១ ៦០០ នាក់ត្រូវបានយក ហើយក្រុមការងារបន្តយកសំណាកទៅធ្វើការពិនិត្យបន្តទៀត ដែលអាចនឹងបញ្ចប់នៅថ្ងៃ ទី ១០ ឬទី ១១ ខែមីនា។
លោក គង់ សោភ័ណ្ឌ បន្ថែមថា អាជ្ញាធរបិទជាបណ្តោះអាសន្នមិនឱ្យជនបរទេស និងអ្នកពាក់ព័ន្ធក្នុងកាស៊ីណូធ្វើដំណើរចេញ-ចូលទីប្រជុំជនជ្រៃធំនេះ ប៉ុន្តែប្រជាពលរដ្ឋផ្សេងទៀតអាចធ្វើដំណើរឆ្លងកាត់បានដដែលរួមនឹងការចរាចរណ៍ទំនិញដែរ។
រីឯអភិបាលខេត្តសៀមរាបលោក ទៀ សីហា បានប្រាប់ឱ្យកងកម្លាំងប្រដាប់អាវុធទាំងអស់រួមជាមួយនឹងក្រុមការងារមន្ទីរសុខាភិបាលដាក់បារ៉ាស់ត្រួតពិនិត្យនៅតាមច្រកចូលមកក្នុងខេត្តសៀមរាបទាំងអស់ ដើម្បីធ្វើការស្រង់ទិន្នន័យពីគោលដៅរបស់អ្នកធ្វើដំណើរ។ ខេត្តនឹងមានការដាក់បារ៉ាស់នៅតាមផ្លូវមួយចំនួនដែលឆ្លងកាត់តាមស្រុកស្ទោង ស្រុកជីក្រែង ស្រុកក្រឡាញ់ ស្រុកព្រះនេត្រព្រះរួមនឹងតាមផ្លូវទឹកផងដែរ។
លោក ទៀ សីហា បានបន្ថែមថា នេះជាវិធានការក្នុងការបង្ការនូវហានិភ័យនៃការចម្លងកូវីដចូលមកក្នុងខេត្តនេះ។ ប្រសិនបើរកឃើញមានអ្នកដំណើរមកពីតំបន់ហានិភ័យ ដូចជាទីក្រុងភ្នំពេញ ខេត្តព្រះសីហនុ និងខេត្តព្រៃវែងនោះពួកគាត់នឹងត្រូវនាំខ្លួនយកទៅធ្វើចត្តាឡីស័ក និងយកសំណាកដើម្បីធ្វើតេស្តរកកូវីដ ១៩។ សម្រាប់អ្នកដែលមកពីខេត្តផ្សេងៗគឺអាចនឹងមានការវាស់កម្ដៅ និងស្កេន QR Code ដើម្បីធ្វើការតាមដាន។
ដោយឡែកសាលារាជធានីភ្នំពេញបានអនុញ្ញាតឱ្យទីតាំងចំនួន ២៣ កន្លែង ដែលធ្លាប់ជាប់ពាក់ព័ន្ធជាមួយនឹងអ្នកឆ្លងកូវីដ ១៩ បើកដំណើរការឡើងវិញ នៅថ្ងៃម្សិលមិញបន្ទាប់ពីត្រូវបានផ្អាកដំណើរការមួយរយៈ។
យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញ ទីតាំងអាជីវកម្មចំនួន ២៣ កន្លែង ត្រូវបានសម្រេចអនុញ្ញាតឱ្យបើកដំណើរការឡើងវិញ ប៉ុន្តែត្រូវគោរពតាមលក្ខខណ្ឌ និងវិធានសុខាភិបាល។
លិខិតនេះបានលើកឡើងថា៖ «រដ្ឋបាលខណ្ឌត្រូវធ្វើកំណត់ហេតុជាមួយម្ចាស់ទីតាំងដោយត្រូវណែនាំឱ្យគោរពតាមលក្ខខណ្ឌមួយចំនួនដូចជា គោរពវិធាន ៣ កុំ ៣ ការពារ អនុវត្តវិធានរបស់ក្រសួងសុខាភិបាល និងត្រូវសហការជាមួយអាជ្ញាធរមានសមត្ថកិច្ចគ្រប់ពេលវេលា ដោយឥតលក្ខខណ្ឌ ដើម្បីការពារ និងទប់ស្កាត់ការរីករាលដាលមេរោគកូវីដ ១៩»។
នៅថ្ងៃម្សិលមិញ ក្រសួងសុខាភិបាលបានប្រកាសរកឃើញអ្នកឆ្លងកូវីដ ១៩ ចំនួន ៤៩ នាក់បន្ថែមទៀត ក្នុងនោះអ្នកដែលបានឆ្លងថ្មីក្នុងព្រឹត្តិការណ៍សហគមន៍ ២០ កុម្ភៈ មានចំនួន ៤៨ នាក់ ដែលធ្វើឱ្យចំនួនអ្នកឆ្លងក្នុងព្រឹត្តិការណ៍សហគមន៍នេះមានរហូតទៅដល់ ៥៤៩ នាក់។
អ្នកជំងឺដែលបានឆ្លងក្នុងព្រឹត្តិការណ៍សហគមន៍ទាំងនោះមានជនជាតិខ្មែរចំនួន ១៩ នាក់ ជនជាតិចិនចំនួន ២៨ នាក់ និងជនជាតិឥណ្ឌូនេស៊ីចំនួន ១ នាក់។
គិតត្រឹមថ្ងៃម្សិលមិញ កម្ពុជាមានអ្នកឆ្លងវីរុសកូវីដ ១៩ សរុបចំនួន ១ ០៦០ នាក់ ក្នុងនោះអ្នកដែលបានព្យាបាលជាសះស្បើយមានចំនួន ៥៣៨ នាក់ និងអ្នកដែលកំពុងសម្រាកព្យាបាលមានចំនួន ៥២១ នាក់។
ជាមួយគ្នានេះដែរក្រសួងសុខាភិបាលកំពុងធ្វើការផ្ទៀងផ្ទាត់អ្នកជំងឺកូវីដចំនួន ៦០ នាក់ផ្សេងទៀត ដោយក្នុងនោះអ្នកជំងឺចំនួន ១៩ នាក់ ត្រូវបានបញ្ជូនទៅបន្តស្នាក់នៅតាមដានសុខភាពនៅសណ្ឋាគារសុខាភ្នំពេញ និង ១១ នាក់ទៀតនៅវិទ្យាល័យបុរី ១០០ ខ្នងរាជធានីភ្នំពេញ។ រីឯអ្នកជំងឺកូវីដមួយចំនួនផ្សេងទៀតកំពុងតែធ្វើការផ្ទៀងផ្ទាត់ជាមួយនឹងមន្ទីរពេទ្យផ្សេងៗទៀត ដើម្បីពិនិត្យមើលនូវភាពត្រួតស៊ីគ្នានៃអ្នកជំងឺដែលអាចមានឈ្មោះដូចគ្នា ឬប្រហាក់ប្រហែលគ្នា ឬមួយខុសភេទគ្នា ឬឈ្មោះដូចគ្នា តែខុសអាសយដ្ឋានគ្នាដែលអាចកើតមាននៅក្នុងការកត់ត្រា៕
វីដេអូ៖