The Phnom Penh Post Search

Search form

Logo of Phnom Penh Post newspaper Phnom Penh Post - លោក ហ៊ុន សែន សរសើរ​សំនៀង​សម្ដេច​ក្រុម​ព្រះ




លោក ហ៊ុន សែន សរសើរ​សំនៀង​សម្ដេច​ក្រុម​ព្រះ

Content image - Phnom Penh Post
ឌីសចម្រៀងព្រះរាជនិពន្ធដោយសម្ដេចឪ ដែលសម្ដេចក្រុមព្រះច្រៀងឡើងវិញ។ រូបថត Album

លោក ហ៊ុន សែន សរសើរ​សំនៀង​សម្ដេច​ក្រុម​ព្រះ

ភ្នំពេញៈ ប្រមុខ​រាជរដ្ឋាភិបាល​កម្ពុជា ​បាន​លើក​សរសើរ​ចំពោះ​សំនៀង​របស់​សម្តេច​ក្រុម​ព្រះ​នរោត្តម ​រណឫទ្ធិ​ ថា​ ពីរោះ ក្រោយ​បាន​ស្តាប់​ទ្រង់​បន្លឺ​សូរ​សៀង​ចម្រៀង​ចំនួន​ ១០ បទ ដែល​ជា​ព្រះរាជ​និពន្ធ​របស់​អង្គ​សម្តេច​ឪ ព្រះ​បរម​រតនកោដ្ឋ​ នរោត្តម សីហនុ។

ក្នុង​សារ​លិខិត​ថ្វាយ​សម្តេច​ក្រុម​ព្រះ​ នរោត្តម រណឫទ្ធិ ព្រះ​ប្រធាន​គណបក្ស​ហ៊្វុនស៊ិនប៉ិច ចុះ​ថ្ងៃទី​ ៣១ តុលា លោក​នាយក​រដ្ឋមន្ត្រី ហ៊ុន សែន​ បាន​សរសេរ​ថា ដោយ​សរសើរ​ទ្រង់​រណឫទ្ធិ​ថា ​បាន​បន្លឺ​សូរ​សៀង​គ្រប់​បទ​ដែល​ទ្រង់​ថត​ដាក់​ក្នុង​ ស៊ីឌី គឺ​ប្រកប​ដោយ​សូរសៀង «ពីរោះ ​ក្រអួន​ក្រអៅ​ស័ក្តិសម​នឹង​បន្ត​ថែ​ព្រះ​រាជ​កេរ​មរតក​ដ៏​វិសេស​វិសាល​ និង​មាន​តម្លៃ​ជា​ប្រវត្តិសាស្ត្រ​របស់​អង្គ​សម្តេច​ឪ ព្រះ​បិតា​វប្បធម៌​ជាតិ»។

មិន​តែ​ប៉ុណ្ណោះ​ អាល់​ប៊ុម​មាន​ចម្រៀង​ទាំង​ ១០ ​បទ ដែល​បន្លឺ​សូរសៀង​ផ្ទាល់​ដោយ​សម្តេច​ក្រុម​ព្រះ នរោត្តម រណឫទ្ធិ ក៏​បាន​ផ្ញើ​ជូន​ដល់​លោក​ឧប​នាយក​រដ្ឋ​មន្ត្រី ហោ ណាំហុង រដ្ឋមន្ត្រី​ក្រសួង​ការ​បរទេស​ផងដែរ។ នេះ​បើ​យោង​តាម​លិខិត​ដែល​មន្ត្រី​គណបក្ស​ហ៊្វុនស៊ិន​ប៉ិច ផ្ញើ​មក​ជូន​ ភ្នំពេញ ​ប៉ុស្តិ៍ កាល​ពី​ម្សិល​មិញ។

លោក ហោ ណាំហុង បាន​ទូលថ្វាយ​តប​វិញ​ថា៖ «បទ​ចម្រៀង​ទាំង​អស់​នេះ​ពី​រោះ​ណាស់ និង​ធ្វើ​ឲ្យ​ទូល​បង្គំ​នឹក​ឃើញ​ព្រះរាជ​សូរ​សៀង​ដ៏ពីរោះ​រណ្តំ​របស់​ព្រះ​បរមរតន​កោដ្ឋ​ដែល​ទូល​បង្គំ​ធ្លាប់​បាន​ស្តាប់​ផ្ទាល់​ផង»។

បទ​ទាំង​នេះ​រួម​មាន ​បទ​សេ្នហា​ បទ​ជំនោរវិច្ឆិកា បទ​កម្ម​បង​ពុំ​បាន​ដូច​ចិន្តា​ បទ​កែវស្នេហា បទ​រាត្រី​ដែល​បាន​ជួប​ភក្ត្រ បទ​ផ្កាយ​ស្នេហា បទ​សក្រវាទិ៍ បទ​ព្រៃ​ប្រសិទ្ធិ៍ បទ​អប្សរា​និង​បទ​លា​ហើយ​កម្ពុជា​។

លោក ធៀង វណ្ណ​ដារ៉ុង មន្ត្រី​ជាន់​ខ្ពស់​របស់​គណបក្ស​ ហ៊្វុនស៊ីនប៉ិច ឲ្យ​ដឹង​ថា បទ​ដែល​បាន​បន្លឺ​សូរ​សៀង​ឡើង​វិញ​ដោយ​សម្តេច​ក្រុម​ព្រះ សុទ្ធតែ​ជា​បទ​ដ៏​ពីរោះ​មាន​អត្ថន័យ​ជ្រាល​ជ្រៅ​ដែល​ជា​ព្រះរាជ​និពន្ធ​របស់​ព្រះ​បរម​រតនកោដ្ឋ ហើយ​បទ​ចុង​ក្រោយ​ដែល​ «ដក់​​ក្នុង​ដួង​ចិត្ត​និង​ក្រអៅ​បេះដូង​របស់​ពល​​រដ្ឋ​គ្រប់​រូប» គឺ​បទ​លា​ហើយ​កម្ពុជា របស់​អង្គ​សម្តេ​ចឪ​៕

អត្ថបទគួរចាប់អារម្មណ៍